Mati 15–21

Mataupu Faavae ma Feagaiga 27-28

“E Ao Ina Faia Mea Uma i le Faatulagaga Tatau”

Na faapea mai Elder D. Todd Christofferson, a o e suesue i tusitusiga paia ma faamaumau ou lagona uunai, “o le a e tuuina se avanoa i lou loto mo le upu a le Atua, ma o le a Ia fetalai atu ia te oe” (““Pe a Liua Mai Oe,”,” Ensign po o le Liahona, Me 2004, 11).

Tusifaamaumau Ou Lagona Uunai

O faaaliga i le taimi lea ua o se mataupu fou lava mo le Au Paia a o faaauau pea ona faagasolo le Toefuataiga.” O tagata muamua o le Ekalesia sa latou iloa e mafai e le Perofeta o Iosefa Samita ona talia faaaliga mo le Ekalesia, a e e mafai e isi? O fesili faapea na faaopoopoina lo latou taua ina ua talitonu Ailama Page, o se tasi o Molimau e Toavalu o papatusi auro, ina ua ia talitonu ua ia maua se faaaliga mo le Ekalesia. E toatele au paia faamaoni na talitonu o ia faaaliga e mai le Atua. Na tali mai le Alii e ala i le aoao mai e faapea, i totonu o Lana Ekalesia, “e ao ina faia mea uma i le faatulagaga tatau” (Mataupu Faavae ma Feagaiga 28:13), o lona uiga na’o le tasi lava e “tofia na te mauaina poloaiga ma faaaliga” mo le Ekalesia atoa (Mataupu Faavae ma Feagaiga 28:2). E ui a i lea, e mafai e isi ona maua faaaliga patino mo lo latou vaega i le galuega a le Alii. O le mea moni, o upu a le Alii ia Oliva Kaotui o se faamanatu ia i tatou uma: “O le a tuu atu ia te oe mea e te faia” (Mataupu Faavae ma Feagaiga 28:15).

Tagai foi i “E Ao Ina Faia Mea Uma i Le Faatulagaga Tatau,” Faaaliga i lona tulaga tonu, 50-53.

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 27:1–4

E tatau ona ou ai i le faamanatuga ma le manatu tasi i le mamalu o le Atua.

O Sally Knight ma Ema Samita na papatisoina i le amataga o le taumafanafana ia Iuni 1830, a e o le faamauga na faalavelaveina e tagata faatupu faalavelave. Lua masina mulimuli ane, na o mai ai Sally ma lona toalua o Newel, e asiasi ia Ema ma Iosefa, ma o lea na tonu ai o le a faamauina o laua [papatisoga], ma o i latou sa faapotopoto atu o le a aai ma feinu faatasi i le faamanatuga. A o alu i le ala e sue mai se uaina mo le faamanatuga sa faafetaui ai e se avefeau mai le lagi Iosefa. O le a se mea na aoao ai o ia e le agelu faatatau i le faamanatuga? (Tagai Mataupu Faavae ma Feagaiga 27:1-4).

O a ni mea ua aoao atu e nei fuaiupu ia te oe e uiga i le ala o loo manao le Faaola e te mafaufau ai i le faamanatuga? O le a se mea ua e lagona ua uunaia oe e fai ona o le mea ua aoaoina mai?

O le faamanatuga e faamanatu mai ia i tatou le taulaga a le Faaola.

Mataupu Faavae ma Feagaiga 27:15–18

O le ofutau a le Atua o le a fesoasoani ia te a’u e tulai atu e tetee i le tiapolo.

Na faapea mai Peresitene M. Russell Ballard: “E leai o se mea maoae ma silisili e mafai ona tatou faia e faaauupegaina ai i tatou lava faaleagaga. O le mana moni faaleagaga e taoto i galuega laiti e tele e lalagaina faatasi i se ie o le puipuiga faaleagaga lea e puipui ma talitali ai mai mea leaga uma” (Ia Faamalosi i le Alii,”,” Ensign, Iulai 2004, 8).

A o e faitauina le Mataupu Faavae ma Feagaiga 27:15-18, e mafai ona e faia se siata e pei ona faaali atu i lalo. O le a se mea o e faia e ofu ai vaega taitasi o le ofutau o le Atua?

Vaega o le ofutau	Vaega o le tino o loo puipuia	O le a le mea e ono faatusa i ai le vaega o le tino
Ufifatafata o le Amiotonu	Fatu	O o tatou manaoga ma alofaaga
Pulou o le Faaolataga	Ulu po o le mafaufau

Tagai foi Efeso 6:11--18; 2 Nifae 1:23.

Mataupu Faavae ma Feagaiga 28

O le perofeta soifua o le fofoga taumomoli lea o le Atua mo Lana Ekalesia.

Mafaufau pe faape’i pe a faapea soo se tasi e mafai ona maua poloaiga ma faaaliga mo le Ekalesia atoa. Ina ua faapea mai Ailama Page o lea ua ia maua faaaliga ia, sa i ai le lē mautonu i tagata o le Ekalesia. I le Mataupu Faavae ma Feagaiga 28, na faaalia ai e le Alii le faatulagaga mo faaaliga i totonu o Lana Ekalesia. O le a le mea ua e aoaoina mai i lenei vaega e uiga i le tiute patino o le Peresitene o le Ekalesia? O le a le mea ua e aoaoina mai mai upu a le Alii ia Oliva Kaotui i le fuaiupu 3? O le a le mea ua e aoao mai i lenei vaega e uiga i le ala e mafai e le Atua ona faatonu ai oe?

Tagai foi Dallin H. Oaks, “O Laina e Lua o Fesootaiga,,” Ensign po o le Liahona, Nov. 2010, 83–86.

Mataupu Faavae ma Feagaiga 28:8--9

Aisea na taua ai le misiona a Oliva Kaotui i le au Sa Lamana?

O se tasi o faamoemoega o le Tusi a Mamona o le “ina ia mafai ona o mai ai o sa Lamanā i le malamalama o o latou tamā, ma ina ia latou iloa ai folafolaga a le Alii” (Mataupu Faavae ma Feagaiga 3:20). O loo ogatusa lenei faatasi ma folafolaga na faia e le Alii i le tele o perofeta o le Tusi a Mamona (tagai, mo faataitaiga, 1 Nifae 13:34--41; Enosa 1:11--18; Helamana 15:12--13). Na tele ina manatu tagata muamua o le Ekalesia e faapea o Initia Amerika e tupuga mai tagata o le Tusi a Mamona. (O le tulaga taliaina o le Ekalesia i le asō e faapea o sa Lamanā “o latou o ni isi o tua’a o Initia Amerika” [O le Faatomuaga o le Tusi a Mamona].)

Mo le faitau atili e uiga i le misiona a Oliva i ituaiga o Initia Amerika lata ane, tagai “O Le Misiona i Sa Lamanā” (Faaaliga i le Tulaga Tonu, 45--49). O le a se mea e aoao mai e lenei misiona ia te oe e uiga i le Alii ma Lana galuega?

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 27:1–2.E mafai faapefea ona sili na tatou manatua le ositaulaga a le Faaola mo i tatou a o tatou aai ma feinu i le faamanatuga?

Mataupu Faavae ma Feagaiga 27:5–14.O le a se mea ua tatou iloa e uiga i perofeta i nei fuaiupu? E mafai ona e saili mo faamatalaga e uiga ia i latou i totonu O Le Taiala i Tusitusiga Paia (scriptures.ChurchofJesusChrist.org). O a faamanuiaga ia ua tatala mai mo i tatou e ala mai ki sa latou umia? Mo nisi faamatalaga e uiga i ni isi o nei ki, tagai Mataio 16:16--19; Mataupu Faavae ma Feagaiga 110:11--16.

Mataupu Faavae ma Feagaiga 27:15–18.Atonu o le a fiafia lou aiga e faafoliga se taua e i ai ni ofu faaopoopo e faaalia ai le ofutau o le Atua, e pei o pulou, ufifatafata, ufiufi, po o seevae. E mafai faapefea e le ofutau ona puipuia tatou i le taua? Talatalanoa faatatau i ni isi o aafiaga leaga e feagai ma lou aiga ma mea e mafai ona outou faia e ofuina ai le ofutau faaleagaga. Manatunatu e faaali le vitio “Ia ofu le ofutau atoa o le Atua” (ChurchofJesusChrist.org).

Mataupu Faavae ma Feagaiga 28:2–7. O a mea ua tatou aoaoina mai i nei fuaiupu e uiga i le valaauga o se perofeta? Atonu e mafai e tagata o le aiga ona iloilo savali ua tuanai mai lo tatou perofeta soifua ma faasoa mai pe faapefea e lana fautuaga ona fesoasoani ia i tatou e mulimuli ia Iesu Keriso.

Mataupu Faavae ma Feagaiga 28:11Pe a tatou mananao e ofo atu se faasaoga o se tasi, aisea e taua ai le taulimaina i le “va o ia ma oe, na’o oulua lava?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Mai Faalogo i le Perofeta,” Viiga, nu. 13.

Faaleleia o Suesuega Faaletagata Lava ia

Saili i upu a perofeta ma aposetolo o aso e gata ai. Faitau po o a mea na aoao mai e perofeta ma aposetolo o aso e gata ai e uiga i mataupu faavae e te maua i tusitusiga paia. Manatu e iloilo autu o le konafesi i le faasino autu i luga o conference.ChurchofJesusChrist.org po o i luga o le Gospel Library app.