A Tootuli Tulivae Uma, saunia e J. Kirk Richards

Mati 22–28

Mataupu Faavae ma Feagaiga 29

O Le A Faapotopotoina e Iesu Keriso Ona Tagata

O se tasi o faamoemoega o le suesueina o tusitusiga paia o le aoao mai lea o mataupu faavae po o upumoni o le talalelei lea e moomia mo lo tatou faaolataga. . A o e suesue i le Mataupu Faavae ma Feagaiga 29 i lenei vaiaso, vaavaai mo malamalamaaga faalemataupu faavae ia e anoa ia te oe.

Tusifaamaumau Ou Lagona Uunai

E ui lava na faatulagaina le Ekalesia a Iesu Keriso i le 1830, e tele lava upumoni o le talalelei e le’i faaalia mai lava, ma e i ai ni tagata muamua o le Ekalesia na i ai fesili. Sa latou faitauina valoaga o loo i totonu o le Tusi a Mamona e uiga i le faapotopotoina o Isaraelu ma le faatuina o Siona (tagai 3 Nifae 21). E faapefea ona tupu lena mea? O faaaliga na faapea Ailama Page na ia taliina na faatatau i lena mataupu, lea na tupu atili ai le fia iloa o tagata o le Ekalesia (tagai Mataupu Faavae ma Feagaiga 28). O isi tagata ua mafaufau e uiga i le Pa’u o Atamu ma Eva ma le oti faaleagaga. Na talisapaia e le Alii nei fesili i le 1830: “Soo se mea tou te ole mai ai i le faatuatua,” na ia ta’u atu ai i le Au Paia, “ma le lotogatasi i le tatalo e tusa ai ma laʼu poloaiga, o le a outou maua” (Mataupu Faavae ma Feagaiga 29:6). Ma e Na te talisapaia a tatou fesili i le aso nei; O loo ia faatali mai mo tatou e ole atu ia te Ia i le tatalo. O le mea moni, e pei na i ai le anoa o lenei faaaliga i mataupu faavae i totonu o le Mataupu Faavae ma Feagaiga 29 o loo faaalia mai ai, o ni isi taimi Na te tali mai ai e ala i le tuuina mai o le upumoni ma le malamalamaaga e loloto atu nai lo fesili na tuuina atu i le taimi muamua.

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 29

Ua saunia e Tama Faalelagi se fuafuaga ua atoatoa mo lo tatou olataga.

Mataupu Faavae ma Feagaiga 29 o loo aoao mai ai le tele o upumoni e uiga i le fuafuaga a le Atua mo Lana fanau. A o e faitau, vaavaai mo upumoni ua e aoao mai e uiga i vaega taitasi nei o le fuafuaga:

• Muaiolaga (tagai fuaiupu 36--37)

• Foafoaga (tagai fuaiupu 31--33)

• O Le Pa’u o Atamu ma Eva (tagai fuaiupu 40-41)

• Olaga faitino (tagai fuaiupu 39, 42--45)

• O Le Togiola a Iesu Keriso (tagai fuaiupu 1, 42-43, 46--50)

• O Le Toetu (tagai fuaiupu 13, 26)

• O le Faamasinoga Mulimuli (tagai fuaiupu 12–13, 27–30)

O a ni malamalamaaga fou na e mauaina? O le a faape’i ona ese lou olaga pe ana faapea e te lei iloaina se mea e uiga i nei upumoni?

E mafai ona e suesue atili e uiga i le fuafuaga a Tama Faalelagi i le “Ata o le Faaolataga” (Talai Lau Talalelei: O se Taiala mo le Galuega Faafaifeautalai, rev. ed. [2018], ChurchofJesusChrist.org/manual/missionary).

Mataupu Faavae ma Feagaiga 29:1–8

O le a faapotopotoina e Iesu Keriso Ona Tagata a o lumanai Lona Afio Mai Faalua.

Ua fetalai Iesu Keriso i le faapotopotoina o Ona tagata “e pei ona ofaofatai e se matuamoa lana toloai i lalo o ona apaau” (Mataupu Faavae ma Feagaiga 29:2). O le a le aoaoga a lenei ata faatusatusa ia te oe e uiga i le naunau o le Faaola e faapotopoto ia te outou? A o e faitauina le Mataupu Faavae ma Feagaiga 29:1-8, vaavaai mo malamalamaaga e uiga i le mafuaaga e tatou te faapotopoto ai, o ai o le a faapotopotoina , ma pe faapefea ona tatou fesoasoani e faapotopoto le au “filifilia” (fuaiupu 7).

I o tatou aso nei, o le faapotopotoina o Siona, o lona uiga o le aufaatasi i siteki o Siona i le lalolagi. E faapefea e le faapotopotoina o se Au Paia ona fesoasoani ia i tatou e “saunia ai i mea uma” mo faigata ia o le a oo mai a o le’i o’o i le Afio Faalua mai o le Faaola? (fuaiupu 8; tagai foi fuaiupu 14--28).

Tagai foi Mataupu Faavae o le Faatuatua 1:10; Russell M. Nelson ma Wendy W. Nelson, “Faamoemoe o Isaraelu” (faigalotu i le lalolagi atoa mo le autalavou, 3 Iuni, 2018, ChurchofJesusChrist.org).

E Faafia, saunia e Liz Lemon Swindle

Mataupu Faavae ma Feagaiga 29:31–35

“Ua faaleagaga mea uma ia te au.”

O le a le uiga o le faapea mai o poloaiga uma e faaleagaga? E faapefea e le iloa o poloaiga uma e faaleagaga ona aoao mai oe e uiga i faamoemoega o poloaiga? Atonu e mafai ona e lisiina ni nai poloaiga ma manatunatu i mataupu faavae faaleagaga lea e fesootai ma poloaiga taitasi.

O le a se mea e ono suia pe a fai e te vaai mo le uiga faaleagaga, po o le faamoemoega i outou faatinoga i aso taitasi, e tusa pe foliga mai e faaletino pe o se mea e faisoo.

Tagai foi Roma 8:6; 1 Nifae 15:30–32.

Mataupu Faavae ma Feagaiga 29:36–50

Na togiola tatou e Iesu Keriso mai le Pau.

O lenei faaaliga o loo amata i le faailoa e le Alii o Ia lava o lo tatou Togiola, o le na “togiola mo a [tatou] agasala” (fuaiupu 1). E faaauau e le faaaliga ona faamalamalamaina ni isi o mafuaaga e tatou te manaomia ai se Togiola. Manatunatu pe faapefea ona e faaaogaina fuaiupu 36--50 e faamalamalama ai pe aisea e tatou te manaomia ai le togisala e ala atu i le Faaola o Iesu Keriso. I tu ma aga o le tele o faatuatuaga, o le Pa’u o loo vaaia o se faalavelave ogaoga; o a mea ua e maua i nei fuaiupu lea o loo aoao atu ai taunuuga aoga o le Pa’u? (Tagai foi 1 Koronito 5:22; 2 Nifae 2:6–8, 15–29; Mosaea 3:1–19; Mose 5:9–12.)

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 29.E mafai ona e faaaogaina ata o loo i le faaiuga o lenei taiala faatasi ma le Mataupu Faavae ma Feagaiga 29 e aoao ai lou aiga e uiga i le ata o le faaolataga. Mo se faataitaiga, e mafai ona aoao mai tagata o le aiga e uiga i vaega eseese o le ata e ala i le faitau ma le talanoaina o fuaiupu fautuaina. E mafai ona latou maua upumoni faaopoopo o loo i totonu o Autu o le Talalelei (topics.ChurchofJesusChrist.org) po o le O le Taiala i Tusitusiga Paia (scriptures.ChurchofJesusChrist.org). Tusi i lalo mea ua e aoaoina. Aise e tatou te faafetaia ai le i ai o se malamalamaaga e uiga i le ata o le faaolataga? E faapefea e lea malamalamaaga ona aafia ai o tatou olaga i aso taitasi?

Mataupu Faavae ma Feagaiga 29:2, 7–8.O le a le uiga o le faapotopoto e le Faaola? E faapefea ona tatou fesoasoani ia te Ia e faapotopoto le au filifilia?

Mataupu Faavae ma Feagaiga 29:3–5.O a mea ua tatou aoao e uiga i le Faaola mai i nei fuaiupu lea e fesoasoani ia i tatou ia “sii i luga o [tatou] loto ma fiafia”? (fuaiupu 5). O le vitio “E Mafai Ona Tatou Maua Le Fiafia” (ChurchofJesuChrist.org) e mafai ona fesoasoani ia te oe e talanoaina pe faapefea e malamalamaaga e uiga i le ata o le faaolataga ona aumaia i lou aiga le fiafia.

Mataupu Faavae ma Feagaiga 29:34–35.O le faitauina o nei fuaiupu e mafai ona avatu ai i lou aiga le avanoa e talanoa ai e uiga i mafuaaga faaleagaga o loo tua atu o ni isi o poloaiga po o fautuaga faaperofeta o loo e taumafai e mulimuli i ai. Mo se faataitaiga, aisea e finagalo ai le Alii ia tatou faitau tusitusiga paia faaleaiga? O a faamanuiaga faaleagaga ua tatou vaaia mai le tausia o poloaiga?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Isaraelu, Ua Valaau Mai le Atua,” Viiga, nu. 6.

Faaleleia o Lo Tatou Aoao Atu

Vaavaai mo Iesu Keriso. Ua aoao mai tatou e tusitusiga paia o mea uma o le foafoaga a le Atua o loo molimau ia Iesu Keriso (tagai Mose 6:62–63), o lea, vaavaai mo Ia a o e faitauina tusitusiga paia. Fuafua e matau pe maka ia fuaiupu ia o loo aoao mai e uiga ia te Ia.