Mati 29–Aperila 4

Eseta

“O Aʼu O Lē O Ola, O Aʼu O Lē Na Fasia”

A o e sauni e faamanatu le Toetu o le Faaola i le Aso Sa o le Eseta, mafaufau loloto pe faapefea e faaaliga o onapo nei ona faalolotoina lou faatuatua o Iesu Keriso o le Alo e Toatasi na Fanaua o le Atua ma le Togiola o le lalolagi.

Tusifaamaumau Ou Lagona Uunai

Aperila 3, 1836, o le Aso Sa o le Eseta. I le mavae ona fesoasoani ai le tuuina atu o le faamanatuga i le Au Paia ua potopoto i le faapaiaga o le malumalu o Katelani fou, na maua e Iosefa Samita ma Oliva Kaotui se nofoaga filemu i tua o le veli i le malumalu ma punonou ai i le tatalo filemu. Ona o lenei aso paia o loo faamanatuina ai e tagata Kerisiano i soo se mea le Toetu o Iesu Keriso, na faaali mai ai le Faaola toetu lava ia i Lona malumalu, ma folafola mai, “o aʼu o lē o ola, o aʼu o lē na fasia” (Mataupu Faavae ma Feagaiga 110:4).

O le a le uiga o le faapea mai o Iesu Keriso o “ia o lē o ola”? O lona uiga ua le na’o le toetu o Ia mai le tuugamau i le lona tolu o aso ma faaali atu i Ona soo Kalilaia. O lona uiga o loo soifua o Ia i le taimi nei. O loo Ia fetalai e ala mai perofeta i aso nei. O loo Ia taitaia Lana Ekalesia i aso nei. O loo ia faamaloloina agaga faamanualia ma loto ua nutimomoia i aso nei. E mafai la ona tatou faaleoina upu o le molimau malosi a Iosefa Samita: “O lenei, ina ua uma ona faia molimau e tele e uiga ia te ia, o le molimau lenei mā te faia ia te ia: O loo soifua o ia!“ (Mataupu Faavae ma Feagaiga 76:22). E mafai ona tatou faalogo i Lona siufofoga i nei faaaliga. E mafai ona tatou molimauina Lona aao i o tatou olaga. Ma e mafai ona tatou lagona ‘le olioli e aumaia e lenei fuaiupu: ‘Ua ou iloa o loo soifua lo’u Faaola!’“ (Viiga, nu. 73).

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 29:5; 38:7; 62:1; 76:11–14, 20–24; 110:1–10

O loo soifua Iesu Keriso.

Na silia ma le tasi le taimi na vaai ai le Perofeta o Iosefa Samita i le Faaola toetu, ma o le lua o na aafiaga o loo faamaumauina i le Mataupu Faavae ma Feagaiga. A o e faitauina vaega 76: 11--14, 20--24; 110:1–10, o le a se mea ua faagaeetia ai oe i le molimau a Iosefa Samita? Aisea e taua tele ai lana molimau ia te oe?

I le faasologa o le Mataupu Faavae ma Feagaiga, o loo tuuina atu ai le molimau a le Faaola e uiga i Lana lava misiona ma lona paia. O le a se mea e te aoao mai e uiga i le Faaola soifua mai Ana upu i totonu o le Mataupu Faavae ma Feagaiga 29:5; 38:7; 62:1? Atonu e te manatu e faamaumauina folafolaga faapea e te maua a o e suesueina i le Mataupu Faavae ma Feagaiga?

Tagai foi Iosefa Samita—Talafaasolopito 1:17.

Mataupu Faavae ma Feagaiga 29:26--27; 42:45--46; 63:49; 88:14-17, 27-31; 93:33-34

Ona o Iesu Keriso, o le a ou toetu ai.

Na silafia e Iosefa Samita lagona o le faanoanoa i le maliu ai o se pele. O le toalua o ona uso, o Alevine ma Don Carlos, na maliliu o ni alii talavou. Na tanu e Iosefa ma Ema le toa ono o le fanau, o i latou uma e itiiti ifo ma le lua tausaga le matutua. A e mai faaaliga na ia maua, na oo mai ai se vaaiga e faavavau i le oti ma le fuafuaga e faavavau a le Atua. Manatunatu i upumoni ua faaalia mai i Mataupu Faavae ma Feagaiga 29:26--27; 42:45--46; 63:49; 88:14-17, 27-31; 93:33-34. E faapefea e nei faaaliga ona aafia ai le ala e te vaai atu ai i oti? E mafai faapefea ona latou aafia ai le ala o loo e ola ai?

Tagai foi 1 Korinito 15; M. Russell Ballard, “O le Faaaliga o le Togiolaina o Ē ua Maliliu,” Ensign po o le Liahona, Nov. 2018, 71--74; Aoaoga a Peresitene o le Ekalesia: Iosefa Samita (2007), 174--76.

Mataupu Faavae ma Feagaiga 18:10–13; 19:16–19; 45:3–5; 76:69–70

O Iesu Keriso na faataunuuina le “togiola atoatoa.”

O se tasi ala e taulai ai i le Faaola i le taimi o le Eseta o le suesue lea i faaaliga o loo i le Mataupu Faavae ma Feagaiga o lo’o aoao mai e uiga i Lana taulaga togiola. O ni isi o nei faaaliga e mafai ona maua i le Mataupu Faavae ma Feagaiga 18:10–13; 19:16–19; 45:3–5; 76:69–70. Atonu e mafai ona e faia se lisi o upumoni e uiga i le Togiola a le Faaola e te maua i totonu o nei fuaiupu. Ina ia faalolotoina au suesuega, e mafai ona faaopoopo atu i lau lisi e ala i le suesue o mau faasino o loo lisiina atu i le “Togiola” (O Le Taiala i Tusitusiga Paia, scripture.ChurchofJesusChrist.org).

O ni isi nei o fesili lea e mafai ona taiala ai lau suesue:

• Aisea na filifili ai Iesu Keriso e puapuagatia?

• O le a le mea e tatau ona ou faia ia maua ai faamanuiaga o Lana Taulaga?

• E mafai faapefea ona ou iloa ua i ai se aoga o Lana Togiola o lo’u olaga?

Le Alii o le Tatalo, saunia e Yongsung Kim

Manatu mo Suesuega Faaleaiga o Tusitusiga Paia ma Afiafi Faaleaiga

Konafesi aoao.Ona e o faatasi le konafesi aoao ma le Aso Sa o le Eseta i le tausaga lenei, atonu e te manatunatu pe faapefea e savali o le konafesi (e aofia ai musika) ona mafai na faalolotoina le molimau a lou aiga ia Iesu Keriso. Mo se faataitaiga, e mafai e tamaiti laiti ona tusi se ata o le Faaola, pe faailoa ane i luga se ata o Ia, pe a latou faalogo i se savali po o se pese e uiga ia Iesu Keriso. E mafai e isi tagata o le aiga ona faia se lisi o upumoni e latou te faalogo i ai e uiga i le Faaola. Mulimuli ane, ona mafai lea e tagata o le aiga ona faasoa mai e uiga i a latou ata po o lisi ma a latou molimau ia Iesu Keriso.

Mataupu Faavae ma Feagaiga 88:14-17; 138:17, 50. Atonu e mafai e lou aiga ona fiafia e mafaufau i se faatusa po o se aoaoga mea faitino e faamalamalama ai le uiga o le oti, ma le toetu mai--lea e faailoa ai le tino ma le agaga ua tuueseeseina ma toe faatasia, e pei o le lima ma le totigilima. E faapefea e nei fuaiupu ona faalolotoina lo tatou agaga faafetai mo le mea na faia e le Faaola mo i tatou?

“O Le Keriso Soifua: O Le Molimau a Aposetolo,”Ina ia uunaia talatalanoaga e uiga i perofeta o aso e nei, o a latou molimau o le Faaola, e mafai ona tofia tagata o le aiga taitoatasi e faitau se vaega o le ““O Le Keriso Soifua: O Le Molimau a le Au Aposetolo” (Ensign po o le Liahona, Me 2017, totonu o le faavaa o luma) ma faasoa mai mea ua latou aoao mai e uiga ia Iesu Keriso. E mafai foi ona e faaali atu le vitio “Molimau Aposetolo Montage” (ChurchofJesuChrist.org). O a ni upumoni ua tatou maua ua musuia ai tatou?

“Ua Ou Iloa o Loo Soifua Lo’u Faaola!”Ina ia mafai ona fesoasoani i lou aiga ia manatunatu i le tele o ala ua faamanuiaina ai tatou e le Faaola toetu i aso nei, e mafai ona outou pepese faatasi le ““Ua Ou Iloa o Loo Soifua Lo’u Faaola” (Viiga, nu.136) ma faafesootai upumoni o loo aoao mai i lenei viiga ma upumoni o loo aoao mai i mau nei: Mataupu Faavae ma Feagaiga 6:34; 45:3--5; 84:77; 98:18; 138:23. Atonu e ono mafai foi e lou aiga ona fiafia e tusi ni fuaiupu faaopoopo mo le viiga lea e faailoa atu ai le ala e latou te iloa ai o loo soifua lo latou Faaola.

Mo se vitio o le Eseta ma isi punaoa, tagai Easter.ComeUntoChrist.org.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ua Toetu Iesu,“ Tusipese a Tamaiti,70.

Faaleleia o Lo Tatou Aoao Atu

Saili lesona i mea o aso taitasi. Manatunatu e faapefea e aafiaga o aso taitasi o tagata o lou aiga e ono tatai atu ai i se talanoaga anoa e uiga i se upumoni o le talalelei (tagai Aoao Atu i le Ala a le Faaola,4). Mo se faataitaiga, o se timu afa e mafai ona avea ma se avanoa e talanoa ai e uiga i le ala a le Atua e liligi faatimuga mai ai faamanuiaga i luga o Lana fanau.

O Iesu Ua Faaali atu i le Perofeta o Iosefa Samita ma Oliva Kaotui, saunia e Walter Rane