Faatusa o itulau tusitusia o le uluai Tusi a Mamona.

Fepuari 1–7

Mataupu Faavae ma Feagaiga 10-11

“Ina Ia Mafai Ona E Sau Ai O Lē Ua Manumalo”

O le tusia faamaumau o lagona uunai a o e faitauina tusitusiga paia ua pei o le totoina o fatu; e oo lava i lagona uunai itiiti e mafai ona taitai atu ai i faaaliga patino anoa.

Tusifaamaumau Ou Lagona Uunai

A o faagasolo le faaliliuina o le Tusi a Mamona, na oo mai ai se fesili e tusa ma le gasologa faalenatura: O le a le mea e tatau ona fai e Iosefa Samita ma Oliva Kaotui faatatau i itulau ua faaliliu ia ua leiloloa? O le mea e foliga e tatau ona fai o le toe foi i tua ma toe faaliliu le vaega lea, ae na silafia e le Alii se mea e la te lei iloaina---o tagata leaga o loo latou taupulepule e sui upu o loo i luga o ia itulau ma aumaia ai le lē mautinoa i luga o le galuega musuia a Iosefa. Na i ai le fuafuaga a le Atua e taofia ai taumafaiga a Satani ma tauia ai mea ua leiloa. O lenei fuafuaga na faagaoioia i le afe ma afe o tausaga na muamua atu i le taimi na musuia ai le perofeta o Nifae e faia se faamaumauga lona lua mo le vaitaimi lava lea e tasi. Mulimuli ane ai, na musuia Mamona e faaaofia le faamaumauga i totonu o le Tusi a Mamona “mo se faamoemoega poto” o loo silafia e le Alii (tagai Upu a Mamona 1:3--7).

“O lo’u poto” na fetalai atu ai le Alii ia Iosefa, “e sili atu nai lo le faitogafiti-poto o le tiapolo” (Mataupu Faavae ma Feagaiga 10:43). O se savali faato’aloto i aso e pei ona tatou iai, i le taimi o taumafaiga faaauau a le fili e faavaivaia faatuatua ua faamalosia atili. Faapei o Iosefa, e mafai ona tatou “faamaoni ma faaauau pea” i le galuega ua valaau tatou e le Atua e fai [fuaiupu 3). Ona tatou iloa lea ua Ia saunia le ala “e le mafai e faitotoa o seoli ona manumalo” e faasaga mai ia te i tatou (fuaiupu 69).

Tagai Au Paia, 1:51-61.

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 10:1–33

Ua saili Satani e faaumatia le galuega a le Atua.

E sili ia satani lo tatou faagalo e le o i ai o ia---po o le tatou le iloa ana taumafaiga e faaaafia tatou (tagai 2 Nifae 28:22--23). A o afioga a le Alii o loo i le Mataupu Faavae ma Feagaiga 10 o loo faaali mai ai o Satani o loo faifai pea lona toaga e tetee i le galuega a le Atua. A o e faitauina fuaiupu 1--33, faailoa ala o loo saili ai Satani e faaumatia le galuega a le Atua i le taimi o Iosefa Samita (tagai foi fuaiupu 62--63). O a mea e talitutusa ai ua e vaaia i auala o loo galue ai Satani i aso nei? E mafai ona e ole atu i le Alii e fesoasoani atu ia te oe ia e iloaina ala o loo faaaoga e Satani e faaosoosoina oe. O a ni mea ua e aoao mai i vaega 10 lea e mafai ona fesoasoani ia te oe e tetee atu i taumafaiga a Satani?

Mataupu Faavae ma Feagaiga 10:34--52

O le Alii, “ua sili atu Lona poto nai lo le faitogafiti-poto o le tiapolo.”

I le silia ma le 2,400 tausaga muamua, na saunia ai e le Alii le toe faaleleia mo itulau leiloloa o le Tusi a Mamona (tagai 1 Nifae 9). O le a le mea ua aoao mai e uiga i le Alii mai le Mataupu Faavae ma Feagaiga10:34–52? O le a se faamaoniga o le poto ma le muaisilafia e le Alii ua e vaaia i lou olaga?

O le talafaamaumau na saunia e le Atua e sui ai e itulau na leiloloa o loo maua i le 1 Nifae e oo atu ia Ominae. Ua faapefea e tala ma aoaoga i lenei talafaamaumau ona “[tuuina] mai ai ni vaaiga tetele atu e uiga [i le] talalelei” mo oe? (Mataupu Faavae ma Feagaiga 10:45),

O Mamona o loo Otootoina ia Papatusi, saunia e Tom Lovell

Mataupu Faavae ma Feagaiga 11

Afai ou te ole atu i le Atua, o le a ou maua.

E i ai tagata o le aiga o Iosefa Samita ma uo na fai atu ia te ia e fai ma sui mo i latou e saili le finagalo o le Alii. Na fiafia Iosefa e faia lea, a e sa naunau foi le Alii e tuu atu ia i latou faaaliga faaletagata lava ia. I le Mataupu Faavae ma Feagaiga 11, o se faaaliga na maua e Iosefa mo lona uso matua o Ailama, na faapea mai ai le Alii, “O le a Ou faaali atu ia te oe ‘ai lo’u Agaga, ma o le a e iloa ai mea uma o soo se mea e te manao mai ai ia te a’u” (Mataupu Faavae ma Feagaiga 11:13--14).

Na fetalai mai le Alii, o Ana upu e mo “i latou uma ua i ai manaoga lelei, ma ua sasau atu a latou selesaito e selesele mai” (fuaiupu 27). I le Mataupu Faavae ma Feagaiga 11, o le a le mea o loo taumafai le Alii e ta’u atu ia te oe e uiga i faaaliga faaletagata lava ia? e uiga i le auai i le galuega a le Atua? O a isi savali o i le Alii mo oe?

Mataupu Faavae ma Feagaiga 11:15–26

A o ou saili ia “maua le upu a le [Atua],” o le ‘a ou maua Lona Agaga ma le mana.

E oo lava a o le’i faaliliuina le Tusi a Mamona, sa naunau Ailama Samita e talai atu le talalelei. A o e faitau i le tali a le Alii i ona manaoga, manatunatu i le uiga ia te oe o le “maua le upu a le [Atua]” (fuaiupu 21). E faapefea e le mauaina o le upu a le Atua ona fesoasoani ia te oe e auauna i totonu o le Ekalesia? E faapefea e lea ala ona aumaia le mana o le Atua i lou olaga?

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 10:5O le a le mea ua tatou aoao mai i lenei fuaiupu e uiga i le mana o le tatalo? E faapefea ona tatou “tatalo e le aunoa”? (Mo ni manatu, tagai David A. Bednar, “Tatalo e le Aunoa,,” Ensign po o le Liahona, Nov. 2008, 41–44.)

Mataupu Faavae ma Feagaiga 10:38–46.Ina ia fesoasoani i lou aiga e talatalanoa i le ala na toe faaleleia ai mo itulau leiloloa faaliliu o le Tusi a Mamona, atonu e mafai e tagata o le aiga ona talanoa e uiga i se mea sa leiloa lata mai nei. O a ni o latou lagona ina ua latou iloaina ua leiloa? Sa faape’i o latou lagona ina ua maua? E ui o itulau leiloloa o le Tusi a Mamona na le toe maua lava, na faapefea ona toe faaleleia lo latou leiloloa, e tusa ma le Mataupu Faavae ma Feagaiga 10:38--46?

Mataupu Faavae ma Feagaiga 10:55–70.Valaaulia tagata o le aiga e saili pe faailoga fuaitau lea e amata i le “O a’u” po o le “O le ‘a Ou.” O a mea ua tatou aoao mai i fuaitau o “O A’u” faatatau i le po o ai Iesu Keriso ma pe faape’i o Ia? O le a le mea ua tatou aoaoina mai le fuaitau o le “O le ‘a Ou” faatatau i mea sa Ia faia? Uunaia tagata o le aiga e faasoa atu ala e faamalosia ai e nei upumoni lo latou faatuatua ia Iesu Keriso.

Mataupu Faavae ma Feagaiga 11:12--14.O le faitauina o nei fuaiupu e mafai ona fesoasoani i tagata o lou aiga ia iloa le taimi o loo fesootai ai le Agaga ma i latou. E mafai ona faamumu le moliuila i luga o le fola ma valaaulia se tagata o le aiga e alu ane i le mea o loo suluia e le moli. E faapefea ona talitutusa lea ma le mulimuli i le taitaiga a le Agaga Paia? O a ni aafiaga patino e mafai ona e faasoa atu?

Mataupu Faavae ma Feagaiga 11:15–30.Manatunatu i le faia o se lisi o mea na ta’u atu e le Alii ia Ailama Samita e fai ia mafai ai ona ia saunia e faasoa atu le talalelei. O le a le mea e tatau ona tatou galulue ai o se aiga?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Saili, Mafaufau loloto, ma Tatalo,” Tusi Pese a Tamaiti, 109; tagai i le “Manatu e Faaleleia ai le Suesuega Faaleaiga o Tusitusiga Paia.”

Faaleleia o Lo Tatou Aoao Atu

Faaaoga mau i lou olaga. A uma ona faitau se mau, fai i tagata o le aiga e faasoa mai ni auala e faaaoga ai le fuaitau i o latou olaga. Mo se faataitaiga, e mafai ona latou faasoa atu le ala na aafia ai i latou e le Agaga i ala o loo faamatalaina i le Mataupu Faavae ma Feagaiga 11:12-13.

Iosefa ma Ailama Samita, saunia e Ken Corbett