Manatu e Faaleleia ai a Outou Suesuega Faaleaiga o Tusitusiga Paia

O le suesue faaleaiga o tusitusiga paia e le aunoa o se ala mamana lea e fesoasoani ai i lou aiga e aoao le talalelei. O le a le tele po o le a foi le umi tou te faitau ai o se aiga e le tutusa le taua ma le faifai pea e le aunoa o a outou taumafaiga. A o e faia le suesue o tusitusiga paia o se vaega taua o lou olaga faaleaiga, o le a e fesoasoani i tagata o lou aiga e faalatalata atili atu i le tasi ma le isi ma Iesu Keriso ma fausia a latou molimau i le faavae o Lana afioga.

Mafaufau i fesili nei:

• E mafai faapefea ona e faamalosiauina tagata o le aiga e suesue e i latou lava ia tusitusiga paia?

• O le a se mea e mafai ona e faia e faamalosiauina ai tagata o le aiga e faasoa mai mea ua latou aoaoina?

• E mafai faapefea ona e faamamafaina mataupu faavae o loo e aoaoina i le Mataupu Faavae ma Feagaiga i taimi e aoao atu ai i aso uma?

Manatua o le fale o le nofoaga lelei tele lea mo le aoaoina o le talalelei. E mafai ona e aoao mai ma aoao atu le talalelei i le fale i auala e le mafai ona faia i se vasega i le Lotu. Ia fatufatu mea fou a o e mafaufau i auala e fesoasoani ai i lou aiga e aoao mai tusitusiga paia.

Manatu mo Gaoioiga

Mafaufau i nisi o manatu nei e faaleleia ai le suesueina o tusitusiga paia e lou aiga.

Faaaoga musika

Usu pese e faamalosia ai mataupu faavae na aoaoina i tusitusiga paia. Ua lisiina atu se viiga fautuaina po o se pese a tamaiti i otootoga i vaiaso taitasi. E mafai ona e faia fesili e uiga i upu po o fasi fuaiupu o le pese. E le gata i le pepese, ae e mafai foi e le tou aiga ona faatino ia taga e o faatasi ma pese pe faalogologo foi i pese e tata a o faia isi a latou gaoioiga.

Faasoa atu ni mau anoa

Tuu atu i tagata o le aiga e faasoa mai ni mau latou te mauaina e anoa i le taimi o a latou suesuega faaletagata lava ia.

Faaaoga au lava upu

Valaaulia tagata o le aiga e aotele i a latou lava upu mea latou te aoao mai mau tou te suesueina.

Faaaoga mau i lou olaga

A uma ona faitau se mau, fai i tagata o le aiga e fasoa mai ni auala e faaaoga ai le fuaitau i o latou olaga.

Fai se fesili

Valaaulia tagata o le aiga e fai se fesili faaletalalelei, ona faaalu lea o se taimi e sue ai fuaiupu e mafai ona fesoasoani e tali ai le fesili.

Faaali i luga se mau

Filifili se fuaiupu e te iloa e anoa, ma faaali i se mea o le a vaai soo i ai tagata o le aiga. Valaaulia isi tagata o le aiga e feauaua’i e filifili se mau e faaali i luga.

Fai se lisi o mau

I le avea ai o se aiga, filifili ni fuaiupu e te manao e talanoaina i le vaiaso a sau.

Tauloto ia mau

Filifili se mau e anoa i lou aiga, ma valaaulia tagata o le aiga e tauloto e ala i le faifai soo i aso taitasi pe fai foi se taaloga faatauloto.

Faasoa lesona faatino

Sue ni mea e fetaui ma mataupu ma fuaiupu o loo outou faitauina o se aiga. Valaaulia tagata o le aiga e talanoa e uiga i le auala e fesootai ai mea faitino taitasi i aoaoga i tusitusiga paia.

Filifili se autu

Tuu e feauaua’i tagata o le aiga e filifili se autu o le a suesue faatasi e le aiga. Faaaoga le Taiala mo Autu, le Bible Dictionary, po o le Taiala i Tusitusiga Paia (scriptures.lds.org) e sue ai mau e uiga i le autu.

Tusi se ata

Faitau ni nai fuaiupu o se aiga, ona tuu lea o se taimi i tagata o le aiga e tusi ai se mea e fesootai ma mea o loo outou faitauina. Faaalu se taimi e talanoaina ai ata a le tasi ma le isi .

Faatino se tala

A uma ona faitau se tala, valaaulia tagata o le aiga e faatino mai. A uma, talanoa pe faapefea ona fesootai le tala ma mea sa outou oo i ai taitoatasi faapea foi o se aiga.

Aoaoina o Fanau

Afai e i ai sau fanau laiti i lou aiga, o nai gaoioiga nei e mafai ona fesoasoani latou te aoao ai:

Usu

Viiga ma pese mai le Tusipese a Tamaiti e aoao atu ai ma le mamana ia aoaoga faavae. Ua i ai i otootoga taitasi o le punaoa lenei se pese fautuaina. E mafai foi ona e faaaogaina le faasino autu o loo i tua o le Tusipese a Tamaiti e sue ai ni pese e fetaui ma mataupu faavae o le talalelei o loo e aoaoina atu. Fesoasoani i lau fanau e faafetaui le savali o pese i o latou olaga.

Faalogologo i le tala pe faatino foi se tala

E fiafia lava tamaiti laiti i tala—mai tusitusiga paia, mai lou olaga, mai le talafaasolopito o le Ekalesia, pe mai mekasini a le Ekalesia. Vaavaai mo auala e faaaofia ai i latou i le faamatalaina o tala. E mafai ona latou uuina ata po o meafaitino, tusi ata o mea latou te faalogo i ai, faatino le tala, pe fesoasoani foi i le faamatalaina o le tala. Fesoasoani i lau fanau ia iloa upumoni o le talalelei i tala o loo e faasoa atu.

Faitau se mau

Atonu e le mafai e tamaiti laiti ona faitau lelei, ae e mafai lava ona e faagalueina i latou e aoao mai tusitusiga paia. E te ono manaomia le taulai atu i se fuaiupu se tasi, fasi fuaitau autu, po o upu.

Tilotilo i se ata pe matamata se vitio

Fai atu ni fesili e uiga i se ata po o se vitio e faatatau i se mataupu faavae o le talalelei o loo tou talanoaina. Mo se faataitaiga, e mafai ona e fesili, “O le a le mea lea o loo tupu i le ata? O a ni ou lagona ua maua ai?” O le polokalama o le Gospel Library, o le Gospel Media Library i le ChurchofJesusChrist.org, ma le children.ChurchofJesusChrist.org o ni nofoaga lelei ia e vaai i ai mo ata ma vitio.

Fatuina

E mafai e tamaiti ona fau, tusi, pe valivali se mea e faatatau i le tala po o se mataupu faavae o loo latou aoaoina.

Auai i lesona faatino

E mafai ona fesoasoani se lesona faitino faigofie i lau fanau e malamalama ai i se mataupu faavae o le talalelei e faigata ona malamalama ai. A faaaoga lesona faitino, vaai ni auala e faaauai ai lau fanau i le faatinoina. O le a tele mea latou te aoaoina i se aafiaga latou te faatinoina nai lo le na o le matamata i se faataitaiga.

Faataitai ona faatino

A faatino e tamaiti i taga se tulaga latou te ono fetaiai i le olaga moni, o le a sili ona mafai ona latou malamalama i le ala e faatatau ai se mataupu faavae i o latou olaga.

Fai ma toe fai ia gaoioiga

E ono moomia e tamaiti laiti ona faalogo faafia i manatu faavae ina ia malamalama ai. Mo se faataitaiga, e mafai ona faatele ona e faasoa atu se tala o tusitusiga paia i ni auala eseese—faitau mai tusitusiga paia, aotele i au lava upu, tuu atu i lau fanau e fesoasoani ia te oe i le faamatalaina o le tala, valaaulia i latou e faatino le tala ma isi mea faapena.

Fai ni fesootaiga i a latou sini patino mo le tuputupu ae.

O le suesuega faaleaiga o tusitusiga paia e mafai ona maua mai ai musumusuga mo le autalavou ma tamaiti e seti ai sini mo lo latou tuputupu ae faaleagaga, faaletino, faaleatamai, ma faaleagafesootai (tagai Luka 2:52).

Aoaoina o le Autalavou

Afai e i ai sau fanau talavou i lou aiga, o nisi nei o gaoioiga e mafai ona fesoasoani latou te aoao ai:

Valaaulia i latou e aoao mai

E masani ona tatou aoaoina ni mea se tele pe a tatou aoao atu se mea nai lo na o le tatou faalogo i ai. Tuu atu i lau talavou ni avanoa e taitaia ai ni talanoaga faaleaiga e uiga i mau.

Fai ni fesootaiga i le seminare

O loo aoaoina i le tausaga lenei e tamaiti seminare le Mataupu Faavae ma Feagaiga. Afai o loo auai lau talavou i le seminare, valaaulia i latou e faasoa atu mea o loo latou aoaoina iina.

Faatatauina tusitusiga paia

O nisi taimi e faigata ai e le autalavou ona iloa le fesootaiga o le aoaoga faavae ma mataupu faavae o loo i mau i o latou olaga. Fesoasoani ia latou iloa le faatatauga o tala ma aoaoga o loo i tusitusiga paia i tulaga o loo feagai ma i latou i le fale, i le aoga, po o le faatasi ai ma a latou uo.

Fai fesili e uunaia ai le mafaufau loloto

E toatele le autalavou e tali lelei atu i fesili e mafai ona faamatala ai o latou manatu ma lagona e uiga i mau nai lo na’o le toe ta’uina atu o mea o loo fai mai ai mau. Mo se faataitaiga, e mafai ona e fesili atu, “Mata o le a se mea o aoao mai e le Alii ia te oe i nei fuaiupu?” po o le “Aisea e te manatu o le a anoa ai lenei faaaliga i le Au Paia i le vaitaimi o le 1830?”

Fai ni fesootaiga i a latou sini patino mo le tuputupu ae

O le suesuega faaleaiga o tusitusiga paia e mafai ona maua ai musumusuga mo le autalavou ma tamaiti e seti ai a latou sini mo le tuputupu ae faaleagaga, faaletino, faaleatamai, ma faaleagafesootai (tagai Luka 2:52).

Ia naunau e faalogo ma tali i a latou fesili

O se fesili mai se talavou o se avanoa taua lea e faasoa atu ai upumoni ma saili le malamalama i se autu o loo ia fiailoaina moni. Aua le fefe i fesili pe faafoliga e pei e le taua, e tusa lava pe foliga mai e le faatatau i le autu o le talanoaga. E le afaina pe afai e te le iloa uma ia tali. O le aiga o le nofoaga sili e sue faatasi ai tali.

Uunaia i latou e faasoa mai o latou malamalamaaga loloto

O loo i ai i le autalavou ni manatu ma ni malamalamaaga loloto tulaga ese e saofaga ai i suesuega faaleaiga o tusitusiga paia. Faailoa atu ia i latou o loo e fia iloa mea o loo aoao ai i latou e le Agaga e uiga i mau. E mafai foi ona e fai atu ia i latou e faasoa atu ni malamalamaaga loloto mai a latou suesuega patino.

Ia fetuutuunai

Afai e i ai sau talavou e le o naunau e auai i le suesuega faaleaiga o tusitusiga paia, vaavaai mo nisi auala e faafesootai ai ma ia. Mo se faataitaiga, e mafai ona e ta’ua le talalelei i se ala e masani ai i tou talanoaga po o le faasoa o se mau anoa i se auala e le foliga ai o loo e talai atu pe faasausili? E le faapea e tatau lava ona tutusa le suesueina o tusitusiga paia i aiga uma. O isi tamaiti e lelei atu a latou tali mai i le suesueina o tusitusiga paia pe a faafesagai taitoatasi. Ia maua le agaga tatalo ma mulimuli i uunaiga a le Agaga.

Ua saunoa Peresitene Russell M. Nelson: “Ou te folafola atu pe a e galue filiga e toe faafou lou fale e avea ma se nofoaga autu e aoaoina ai le talalelei, i le gasologa o taimi o le a avea au aso Sapati ma aso fiafia moni. O le a fiafia lau fanau e aoao ma ola i aoaoga a le Faaola, ma o le a faaitiitia le faatosinaga a le fili i lou olaga ma i lou aiga. O suiga i lou aiga o le a iloga ma tumau” (“Avea ma Faataitaiga Lelei o le Au Paia o Aso e Gata Ai,” Ensign po o le Liahona, Nov. 2018, 113).