“Faaaogaina o le Sau, Muliumuli Mai ia te A’u—Mo Tagata Taitoatasi ma Aiga,” Sau, Mulimuli Mai ia te A’u—Mo Tagata Taitoatasi ma Aiga: Mataupu Faavae ma Feagaiga 2021 (2020)
“Faaaogaina o le Sau, Mulimuli Mai ia te A’u—Mo Tagata Taitoatasi ma Aiga,” Sau, Mulimuli Mai ia te A’u—Mo Tagata Taitoatasi ma Aiga: 2021
Faaaogaina o le Sau, Mulimuli Mai ia te A’u—Mo Tagata Taitoatasi ma Aiga
E Mo Ai Lenei Punaoa?
O lenei punaoa e mo tagata taitoatasi uma ma aiga i le Ekalesia. Ua mamanuina e fesoasoani ia te oe e aoao le talalelei—pe na o oe pe o e i ai faatasi ma lou aiga. Afai e te lei suesueina le talalelei e le aunoa i le taimi ua fano, ua mafai ona fesoasoani lenei punaoa ia te oe e amata. Afai ua i ai sau masani lelei o le suesueina o le talalelei, e mafai ona fesoasoani lenei punaoa ia e maua nisi mau aafiaga anoa.
E Faapefea Ona Ou Faaaogaina Lenei Punaoa?
Faaaoga lenei punaoa i soo se auala e fesoasoani ai ia te oe. E ono fesoasoani ia te oe o se taiala po o se fesoasoani mo suesuega faaletagata lava ia ma faaleaiga o tusitusiga paia. E mafai foi ona e faaaogaina mo afiafi faaleaiga. O otootoga ua faamamafa mai ai mataupu faavae taua o loo maua i le Mataupu Faavae ma Feagaiga, fautua mai ai manatu mo suesuega ma gaoioiga mo tagata taitoatasi ma aiga, ma maua ai foi avanoa e tusifaamaumau ai ou lagona uunai.
Sau, Mulimuli Mai ia te A’u—Mo Tagata Taitoatasi ma Aiga e le faapea o le a suia ai pe faatautava foi ma mea lelei o loo e faia. Mulimuli i le taitaiga a le Agaga e iloa ai le auala e fai ai au lava suesuega o le afioga a le Atua.
O le a Le Faia o Lenei Punaoa i Mea e Tutupu i le Ekalesia?
O le aotelega o le punaoa lenei ua faatulaga e tusa ai ma le faasologa faalevaiaso o lau faitaugatusi. O le Sau, Mulimuli Mai ia te A’u—Mo le Peraimeri ma le Sau, Mulimuli Mai ia te A’u—Mo le Aoga Sa e mulimuli lava i le faasologa lena. Ina ia lagolago i au taumafaiga e aoao ma ola i le talalelei i le fale, o le a tuu atu e ou faiaoga i le lotu ia avanoa e faasoa atu ai ou aafiaga, mafaufauga, ma fesili e uiga i fuaitau o mau sa e suesue ai i le fale.
Talu ai e na’o le faalua ona aoaoina le Aoga Sa i le masina, e mafai e faiaoga o le Aoga Sa ona filifili e faapasi pe tuufaatasi aotelega ia ogatasi ai ma le faasologa o le vaiaso. Atonu e alagatatau foi lenei mea i vaiaso ia e le faia ai sauniga masani a le Ekalesia ona o konafesi faalesiteki po o isi mafuaaga. I nei la vaiaso e valaaulia oe e faaauau pea ona suesue le Mataupu Faavae ma Feagaiga i le fale.
Pe Tatau Ona Ou Mulimuli i le Faasologa?
O le faasologa o le a fesoasoani ia oo atu i le faaiuga o le tausaga ua uma ona e faitauina le Mataupu Faavae ma Feagaiga. Ma le isi, o le mulimuli ai i lea lava faasologa e pei foi o isi, e mafai ona taitai atu ai i ni aafiaga anoa i le fale, i le lotu, ma soo se mea lava. Ae aua le manatu ua taotaomia ai i le faasologa pe e tatau lava ona faitau fuaiupu uma; o le faasologa ua na’o se taiala faigofie e fesoasoani ia te oe i le faasoasoaina o lau alu. O le mea taua o le, o loo e aoaoina le talalelei e oe lava ma aoaoina foi o se aiga.