Fa’aʼohipara’a i te Mai, peʼe mai—nō te mau pupu Autahu’ara’a a Aarona ʼe te mau piha a te Feiā ʼĀpī Tamāhine

E aha te mau fā a tā tātou mau rurura’a nō te pupu ’e te piha ?

’Ua hōro’a mai te Fatu ia ’outou i te hō’ē ti’aturira’a mo’a : ’Ua pi’i ’oia ia ’outou nō te tāvini i roto i te hō’ē peresidenira’a nō te pupu autahu’ara’a a Aarona ’aore rā, te hō’ē peresidenira’a nō te piha a te Feiā ’Āpi Tamāhine. Hō’e tuha’a o tā ’outou hōpoi’a ’oia ho’i, te arata’ira’a ’e te fa’aterera’a i tā ’outou mau rurura’a o te pupu ’aore rā, o te piha i te sābati. Nō te rave i te reira, e tauturu te reira ’ia māramarama nō te aha teie mau rurura’a e fa’atupuhia ai.

E mea ta’a ’ē te mau rurura’a a te pupu Autahu’ara’a a Aarona ’e a te piha a te Feiā ’Āpī Tamāhine i te mau piha ha’api’ira’a a te ’Ēkālesia mai te Ha’api’ira’a Sābati ’aore rā te Ha’api’ira’a ’Evanelia a te feiā ’āpī. I roto i te mau rurura’a a te pupu ’aore rā a te piha, e tuatāpapa hau atu tātou i te hō’ē tumu parau o te ’evanelia. E ha’api’i mai tātou nō ni’a i te ’ohipa tā te Atua i hōro’a mai ia tātou ’e e fa’anaho tātou i te mau melo o tā tātou pupu ’aore rā piha nō te rave i taua ’ohipa ra, i roto i tō tātou fare, i roto i te ’Ēkālesia, ’e i roto i tō tātou ’oire. E fa’anaho tātou, ’ei hi’ora’a, nāhea tātou i te rave fa’aoti i tō tātou ti’ara’a ’ei tuha’a nō te nu’u fa’ehau feiā ’āpī a te Fatu nō te tauturu i te ha’aputuputura’a ia ’Iserā’ela. I roto i teie mau rurura’a, e’ita tātou e paraparau noa nō ni’a i te ’ohipa—E fa’anaho tātou i te mau ’ōpuara’a nō te rave i te reira.

Nō teie onoonora’a i ni’a i te ’ohipa, e ’ere te aura’a ē e ha’apae tātou i te mau ’āparaura’a ha’api’ira’a tumu nō te Ha’api’ira’a Sābati noa. Te mea pāpū, e mea faufa’a roa ’ia ha’api’i mai i te ha’api’ira’a tumu i roto i te mau rurura’a a te pupu ’e te Feiā ’Āpī Tamāhine—e tauturu te reira ia tātou ’ia hāro’aro’a i te mau tumu tātou e rave ai i te ’ohipa. ’A tuatapapa ’āmui ai tātou i te ’evanelia, e nehenehe te mau parau mau ’o tā tātou e ha’api’i mai e taui i tō tātou ’ā’au. E nehenehe tātou e fāri’i i te mau muhumuhura’a nō ni’a i te mau rāve’a nō te ha’amara’a « i te pa’ari ’e te rahi, ’e te herehia e te Atua ’e te ta’ata ato’a » (Luka 2:52). ’A tupu noa ai tō tātou fa’afāriura’a ia Iesu Mesia ’e i tāna ’evanelia, e tae mai te hia’ai ia tātou nō te tauturu ia vētahi ’ē i ni’a i te ’ē’a nō te fafaura’a, ’oia ato’a tō tātou mau ’utuāfare, tō tātou mau hoa, ’e tō tātou mau hoa melo nō te pupu ’e nō te piha.

Nā vai e arata’i i teie mau rurura’a ?

’Ua pi’i te Atua ia ’outou ’ei mau peresidenira’a pupu ’e piha ’e ’ua hōro’a mai i te mana fa’atere ia ’outou nō te arata’i. Nō reira, e arata’ihia te rurura’a tāta’itahi o tā ’outou pupu ’aore rā piha nā te hō’ē melo o te peresidenira’a o tā ’outou pupu ’aore rā piha. ’E ti’a i te feiā fa’atere pa’ari e hōro’a i te arata’ira’a ʼe te pāturura’a, e’ita rā e ti’a ia rātou e rave i tā ’outou fa’aterera’a. ’A hi’o te tuha’a pi’ihia « Ha’api’i ʼāmui mai » i te ʼōmuara’a o te fa’anahora’a tāta’itahi o teie rāve’a tauturu, i te mau mana’o nō te tauturu ia ’outou ’ia ’ite nāhea ’ia arata’i i te hō’ē rurura’a ’e ’ia fa’aoti i tā te reira mau ’ōpuara’a mau. E fa’a’ohipa i te mau ’āpo’ora’a a te peresidenira’a nō te fa’anaho e nāhea ’outou i te fa’atere i teie mau rurura’a i te sābati.

’O vai te tītauhia e ha’api’i i te ha’api’ira’a ?

Te feiā fa’atere pa’ari, hō’ē melo o te peresidenira’a pupu ’aore rā piha, ’aore rā te tahi atu melo o te pupu ’aore rā o te piha te nehenehe e ha’api’i i te mau ha’api’ira’a. ’Ei peresidenira’a nō te pupu ’aore rā nō te piha, ’a farerei atu i tō ’outou feiā fa’atere pa’ari nō ni’a ’o vai te nehenehe e fa’ata’a nō te ha’api’i i te mau ha’api’ira’a. E ha’amanao ē, e rave rahi mau mea tā tō ’outou feiā fa’atere pa’ari e hōro’a mai. ’A mata nā i te ha’api’i mai nā roto mai i tō rātou mau ’itera’a rau ’e mau ’itera’a pāpū. Tē vai ato’a ra te mau maita’i i te anira’a i te feiā ’āpī ’ia ha’api’i—e nehenehe te ha’api’ira’a e tauturu ’ia fa’ahōhonu i tō rātou fa’afāriura’a ’e ’ia patu i te mau autaeaʼera’a pa’ari a’e ’e te tahi atu mau melo o te pupu ’aore rā o te piha. Nō reira, ’a hōro’a ia rātou te mau rāve’a tano nō te ha’api’i i te tā’āto’ara’a ’aore rā, te hō’ē tuha’a o te ha’api’ira’a, terā rā, e mata nā i te ha’amanaʼo i te mau hina’aro ’e te mau ’aravihi o te mau ta’ata i roto i tā ’outou pupu ’aore rā piha. ’Ei hi’ora’a, e nehenehe te feiā fa’atere pa’ari e ha’api’i pinepine i roto i te mau pupu ’aore rā te mau piha tei roto te feiā ’āpī aʼe ’aore rā, te feiā ’āpī ’aita i ’aravihi roa i roto i te ha’api’ira’a i te ’evanelia. ’Ia ani-manihini-ana’e-hia te feiā ’āpī ’ia ha’api’i, e mea ti’a roa i te hō’ē metua ’aore rā, i te hō’ē tauturu arataʼi e tauturu ia rātou ’ia fa’aineine mai tei hina’arohia.

E nehenehe te feiā tei anihia e ha’api’i e fa’a’ohipa i te tuha’a tei pi’ihia « Ha’api’i i te ha’api’ira’a tumu » i roto i te fa’anahora’a tāta’itahi i roto i teie rāve’a tauturu nō te tauturu ia rātou ’ia fa’aineine. Tei roto i teie tuha’a te mau mana’o tauturu nō te ha’api’i ʼe nō te ’āparau i te ha’api’ira’a tumu nō terā hepetoma, terā rā, ’eiaha te mau ’orometua e tāʼōti’a i teie noa mau mana’o nei. Ma te arata’ihia e te Vārua, e nehenehe te mau ’orometua e fa’atano i teie mau mana’o ’aore rā e fa’aʼohipa i tō rātou iho nō te ha’api’i ma te ara ē e pāhono māite te reira i te mau hina’aro o te mau melo o te pupu ’aore rā o te piha, ’e e tauturu ia rātou ’ia māramarama maita’i i te ha’api’ira’a tumu.

E aha te mau tumu parau o te ha’api’ira’a tumu tā tātou e ’āparau i roto i tā tātou mau rurura’a ?

Te tumu parau i fa’anahohia nō te hepetoma tātaʼitahi ’o te hō’ē ïa parau tumu o te ha’api’ira’a tumu tei mā’iti-fa’atano-hia i ni’a i te tai’ora’a o Te Parau Ha’api’ira’a e te mau Parau Fafau i tāpurahia nō taua hepetoma ra, i roto i te Mai, pe’e mai—nō te ta’ata hō’ē ’e te ’utuāfare. Nā roto i teie rāve’a, e pāturu te mau ’āparaura’a o te ha’api’ira’a tumu i roto i te mau rurura’a a te pupu ’e a te piha i te mea tā te feiā ’āpī i ha’api’i mai i te fare.

Noa atu ē e mea tītauhia ’ia ha’api’i i te mau tumu parau i te tahi mau sābati, ’e nehenehe ato’a ’outou e ’āparau i te tahi atu mau tumu parau o te ha’api’ira’a tumu ’ia au i te mau hina’aro o tā ’outou pupu ’aore rā piha.

Tē vai nei i roto i teie rāve’a tauturu te mau fa’anahora’a nō te hepetoma tātaʼitahi, i te taime e tupu ai te mau rurura’a a te pupu Autahu’ara’a a Aarona ’e te mau piha a te Feiā ʼĀpī Tamāhine. I te tahi taime, e tītauhia ia ’outou ’ia ha’apae i te hō’ē ha’api’ira’a nō te ’āmuira’a titi ’aore rā nō te tahi atu mau tumu.

E aha te ti’ara’a o tō tātou feiā fa’atere pa’ari ?

E ti’ara’a faufa’a roa tō tā ’outou feiā fa’atere pa’ari i roto i te mau pupu autahu’ara’a a Aarona ’e te mau piha a te Feiā ʼĀpī Tamāhine. E arata’i ʼe e aʼo rātou ia ’outou i roto i tō ’outou mau pi’ira’a nō te fa’atere. E pāturu ʼe e fa’aitoito rātou ia ’outou ’a rave ai ’outou i te ’ohipa i roto i tā ’outou pupu ’aore rā piha. E ha’api’i rātou ia ’outou i te ha’api’ira’a tumu, ʼe e ha’amaita’i rātou ia ’outou nā roto i tō rātou hi’ora’a maita’i, tō rātou ’itera’a rau ʼe te ’itera’a pāpū.