Iosepha Semita e pure ra

’Ua ’ite au i te hō’ē māramarama, nā Jon McNaughton

10 nō Tēnuare

Nō te aha e mea faufa’a te ’ōrama mātāmua ?

’Ōmuara’a o Te Parau Ha’api’ira’a ’e te mau Parau Fafau ; Iosepha Semita—’Ā’amu 1:1–26

ītona tāu’aparau ʼāmui

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te ’ohipa i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau tumu parau e ’āparau) :

• Tā tātou pupu ’aore rā piha. ’O vai te hina’aro i tā tātou tauturu ’e mau pure ? E aha tā tātou e nehenehe e rave nō te tauturu ia rātou ? ’O vai tā tātou e ani manihini ’ia haere mai i te hō’ē ’ohipara’a i muri nei ?

• Tā tātou mau ’ohipa ’aore rā mau hōpoi’a. E aha te mau tītaura’a tā tātou i fa’aoti ? E aha te mau tītaura’a e ti’a ia tātou ’ia rave ? Nāhea tātou i te ani manihini ia vētahi ’ē ’ia haere mai i te Mesia ra, ’e nāhea tātou i te ani manihini ia vētahi ’ē i teienei ?

• Tō tātou orara’a. E aha te mau ’itera’a ’aita i maoro a’enei tei ha’apūai i tō tātou ’itera’a pāpū ? E aha te mea e tupu nei i roto i tō tātou orara’a ’e e nāhea tātou e nehenehe ai e pāturu te tahi ’e te tahi ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū nō te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau ’ōpuara’a ’e te mau ani-manihini-ra’a i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

Noa atu ē, ’ua hau i te 200 matahiti i teienei ’a tūturi ai o Iosepha Semita nō te taime mātāmua, nō te pure i roto i te uru rā’au mo’a, ’ua ha’aputapū hōhonu roa te pāhonora’a tāna i fāri’i, i tō tātou orara’a i teie mahana. ’A feruri i te mau ha’amaita’ira’a tei tae mai i roto i tō ’outou orara’a, maoti te fāra’a mai te Metua ’e te Tamaiti ia Iosepha. Nō te aha e mea faufa’a nō te feiā tā ’outou e ha’api’i nei ’ia noa’a tō rātou iho ’itera’a nō te ’Ōrama mātāmua nā ’ō mai i te Vārua Maita’i ra ? Nāhea ’outou i te tauturu ia rātou ʼia rave i te reira ? E mea maita’i roa nō ’outou ’ia hi’o fa’ahou i te mau parau poro’i nō te ’āmuira’a rahi nō ’Ēperēra, tei fa’ahanahana i te 200ra’a o te matahiti o teie ’ōrama hanahana.

feiā ’āpī tamahine i roto i te piha ha’api’ira’a

E nehenehe te ta’ata ’āpī tāta’itahi e fāri’i i te hō’ē ’itera’a pāpū nōna iho nō ni’a i te ’ōrama mātāmua.

Ha’api’i-’āmui-ra’a mai

Tei roto o Iosepha Semita i tōna ’āpīra’a i te taime o te ’ōrama mātāmua, nō reira, e nehenehe te feiā tā ’outou e ha’api’i nei, e turu’i i ni’a i tāna ’imira’a nō te parau mau. ’A hōro’a i te mau melo o te pupu ’aore rā, o te piha, i te tahi taime nō te fa’a’ite mai i tō rātou mau ferurira’a ’e te mau mana’o nō ni’a i te Iosepha Semita—’Ā’amu 1:1–26. E nehenehe te mau ’ohipara’a i raro nei e tauturu ia rātou ’ia ha’apūai i tō rātou ’itera’a pāpū ē, ’ua fā mai te Atua te Metua ’e o Iesu Mesia ia Iosepha Semita.

• E aha te mau parau mau o te ’evanelia tā tātou e ha’api’i mai nā roto mai i te ’ohipa tei tupu i ni’a ia Iosepha Semita i roto i te uru rā’au mo’a ? E nehenehe te mau melo o te pupu ’aore rā, o te piha, e tai’o i te ’ā’amu o Iosepha i roto i te Iosepha Semita—’Ā’amu 1:7–20 ’e ’ia fa’a’ite mai i te mau parau mau tei ’itehia e rātou. (’Ei hi’ora’a, e fa’aro’o ’e e pāhono te Atua i te mau pure ; tē vai mau ra Sātane ’e tōna mana, e mana rahi a’e rā tō te Atua ; ’aita te heheura’a i fa’aea.) Nāhea teie mau parau mau i te ha’amaita’i i tō tātou orara’a ?

• E nehenehe ato’a ’outou e ani i te mau melo o te pupu ’aore rā, o te piha, ’ia hi’o fa’ahou i te mau parau poro’i nō ni’a i te ’Ōrama Mātāmua i roto i te ’Amuira’a rahi nō ’Ēperēra 2020 (hi’o Liahona, Mē 2020). Ei hi’ora’a, e nehenehe tā rātou e hi’o fa’ahou i te parau poro’i a te peresideni Russell M. Nelson « A fa’aro’o iāna » (Liahona, Mē 2020, 88 – 92). ’A ani ia rātou ’ia fa’a’ite mai i te mea tei ’itehia ia rātou,’e i tō rātou mau ’āehuehu nō ni’a i te ’Ōrama Matamua.

• ’Ua fa’a’ite pāpū te mau peresideni tāta’itahi o te ’Ēkālesia i te misiōni hanahana a te peropheta Iosepha Semita. E nehenehe te mau melo o te pupu ’aore rā, o te piha, e fāna’o i te tai’ora’a i tō rātou ’itera’a pāpū i roto i te hō’ē o te mau buka ha’api’ira’a Te mau Ha’api’ira’a a te mau Peresideni o te ’Ēkālesia. (I roto i te rahira’a o teie mau buka tē vai ra te hō’ē pene nō ni’a i te peropheta Iosepha Semita. Nō te hō’ē tāpura nō teie mau pene, hi’o Te mau tumu parau o te ’evanelia, « Te ’ōrama mātāmua », topics.ChurchofJesusChrist.org.) Tau mahana hou te ha’api’ira’a, e nehenehe ’outou e ani i te mau melo o te pupu ’aore rā, o te piha, ’ia mā’iti i te hō’ē o teie mau peresideni ’e ’ia fa’a’ite mai i te hō’ē fa’ahitira’a parau tāna i parau o tā rātou e nehenehe e fa’a’ohipa nō te ha’api’i i te hō’ē ta’ata nō ni’a i te ’ōrama mātāmua.

• E nehenehe ’outou e ani i te mau melo o te pupu ’aore rā, o te piha, ’ia tuatāpapa i « Te fa’aho’i-fa’ahou-ra’a-hia mai o te ’evanelia a Iesu Mesia nā roto ia Iosepha Semita » i roto i te pene 3 o te ’Ia poro haere i tā’u nei ’evanelia ([2019], 36–38) ’e ’ia ha’a i te ha’api’ira’a te tahi i te tahi nō ni’a i te ’Ōrama Matamua. E nehenehe ’outou e tītau ia rātou ’ia fa’a’ite mai i te ’ohipa tei tupu i ni’a ia Iosepha Semita, ma te fa’a’ohipa i te tahi o tāna iho mau parau, ’o tē ’itehia i roto i te Iosepha Semita—’Ā’amu 1:16–17.

• ’Ua ’ite ānei te feiā tā ’outou e ha’api’i nei ē, e rave rahi ’ā’amu nō ni’a i te ’Ōrama Mātāmua ? Tē hōro’a nei teie mau ’ā’amu tāta’itahi i te mau ha’apāpūra’a ta’a ’ē ’o tē fa’atupu i te hō’ē hāro’aro’ara’a hau atu nō ni’a i te ’ohipa tei tupu i roto i te uru rā’au mo’a. E nehenehe ’outou e ha’apoto i te tuha’a « Hi’opo’ara’a poto » o te vauvaura’a o te mau tumu parau o te ’evanelia « Te mau ’ā’amu nō te ’Ōrama Mātāmua » (topics.ChurchofJesusChrist.org). I muri iho, e nehenehe ’outou e ani i te feiā tā ’outou e ha’api’i nei ’ia hi’o fa’ahou i te mau ha’apotora’a o nā ’ā’amu e maha o te ’itehia i raro a’e i « Te mau ’ā’amu o te ’Ōrama Mātāmua ». E nehenehe ato’a rātou e tai’o i te tahi o te mau ’ā’amu nō teie tau nā roto i te fa’a’ohipara’a i te mau hono i hōro’ahia mai. E aha tei ’itehia ia rātou tei ha’apūai i tō rātou ’itera’a pāpū nō te ’Ōrama Mātāmua ? E nehenehe ’outou e māta’ita’i i te video « ’A ani i te Atua : Te ’ōrama mātāmua o Iosepha Semita » (ChurchofJesusChrist.org), ’o tē fa’ata’a ra i te ’ōrama mātāmua ma te fa’a’ohipa i te mau parau nō roto mai i teie mau ’ā’amu. Nō te aha e mea maita’i ’ia roa’a e rave rahi ’ā’amu o te ’Ōrama Mātāmua ? Nāhea teie mau ’ā’amu i te tauturu ia tātou ’ia hāro’aro’a maita’i a’e i te Metua i te Ao ra ’e ia Iesu Mesia ?

’A rave ma te fa’aro’o

’A fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tū’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e fa’a’ite mai i tō rātou mau mana’o.

Mau rāve’a tauturu pāturu

• Mataio 3:13–17 ; Te Ohipa 7:54–60 ; 3 Nephi 11:3–10 (’Ua fa’a’ite te Atua te Metua ’e ’o Iesu Mesia ia rāua iho i te ta’ata i ni’a i te fenua nei)

• « ’E aha tā tātou e ha’api’i mai nō ni’a i te nātura o te Atua nā roto i teie ’Ōrama Mātāmua ? » video Mata ’e mata ’e te peresideni Eyring ’e ’o Elder Holland (Ha’apūrorora’a nā te feiā ’āpī ’ati ti’a te ao nei, 4 nō Māti 2017), FacetoFace.ChurchofJesusChrist.org

Ha’api’ira’a mai tā te Fa’aora

’Ua ani te Fa’aora i tāna mau pipi ’ia fa’a’ite pāpū i te parau mau o tāna mau ha’api’ira’a. ’A nā reira ai rātou, ’ua ha’aputapū te Vārua i tō rātou ’ā’au. Nāhea e nehenehe ai ia ’outou ’ia fa’aitoito i te feiā tā ’outou e ha’api’i nei ’ia fa’a’ite i tō rātou ’itera’a papu ? (Hi’o Ha’api’ira’a mai tā te Fa’aora [2016], 11)

Hi’o ato’a « Fa’aineine nō te ha’api’i » (video, ChurchofJesusChrist.org).