24 nō Tēnuare

Nāhea vau ’ia fa’aineine iā’u iho nō te ’āmui atu i roto i te « ’ohipa ’ūmerehia » a te Atua ?

Te Parau Ha’api’ira’a ʼe te mau Parau Fafau 3–5

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te ’ohipa i ni’a i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau mea e ’āparau) :

• Tā tātou pupu ’aore rā piha. E aha tā tātou e nehenehe e rave nō te fa’atupu i te tāhō’ē i roto i te mau melo o te pupu ’aore rā, o te piha ? E aha te mau ’ōpuara’a tā tātou e hina’aro e rave ’āmui ?

• Tā tātou mau ’ohipa ’aore rā mau hōpoi’a. E aha tā tātou e rave ra nō te fa’a’ite i te ’evanelia ? E aha te mau ’itera’a rau tā tātou i fāri’i nō te ravera’a i te ’ohipa hiero ’e te ’ā’amu ’utuāfare ?

• Tō tātou orara’a. Nāhea tātou i te ’itera’a i te rima o te Fatu i roto i tō tātou orara’a ? E aha te mea tei fa’auru ia tātou i roto i tā tātou tuatāpapara’a pāpa’ira’a mo’a i teie hepetoma ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū nō ni’a i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te Ha’api’ira’a tumu

’Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou i te pae vārua

I te fa’aro’ora’a te feiā mo’a i tahito ra nō te taime mātāmua i te parau poro’i o te ’evanelia i fa’aho’i-fa’ahou-hia mai, e rave rahi tei hina’aro ’ia ’ite ē, e aha tā rātou e rave nō te tauturu i te ’ohipa. ’O te metua tāne o te peropheta Iosepha Semita, ’oia ho’i, ’o Joseph Smith metua, te hō’ē o te mau ta’ata tei ani ’ia ’ite i te hina’aro o te Fatu nōna. Mai tāua taime ra, ’ua riro te pāhonora’a a te Fatu o tē ’itehia i roto i Te Parau Ha’api’ira’a ’e te mau Parau Fafau 4, ’ei fa’aurura’a nō te mau u’i ta’ata ’ia tāvini ma tō rātou « ’ā’au ato’a, te pūai, te mana’o ’e te itoito » (’īrava 2). Te tāvinira’a i roto ānei i te hō’ē misiōni, ’aore rā, te tāvinira’a i roto i te hō’ē pi’ira’a, ’aore rā, i te hō’ē hōpoi’a i roto i te ’Ēkālesia, hō’ē ā huru te mau ti’ara’a nō te tāvini : te hina’aro ’ia tāvini i te Atua, ’āpitihia i te fa’aro’o, te tīa’ira’a, te aroha, ’e te here (hi’o i Te Parau Ha’api’ira’a ’e te mau Parau Fafau 4:2–6). Nāhea e nehenehe ai ia ’outou ’ia tauturu te mau melo o te pupu ’aore rā, o te piha ’ia ha’apūai i tō rātou hina’aro ’ia tāvini i te Fatu ’e ’ia fa’aineine nō te mau taime tāvinira’a amuri a’e ?

Nō te fa’aineine ia ’outou iho nō te arata’i i te mau melo o te pupu ’aore rā, o te piha, i roto i teie tuatāpapara’a, e nehenehe ’outou e tai’o ’e e feruri hōhonu i te hō’ē ’aore rā, hau atu, o te mau parau poro’i ’o tē ’itehia i roto i « Te tahi atu mau rāve’a tauturu ».

Te ’atu’atura’a i te feiā nava’i ’ore, e tuha’a te reira nō te ’ohipa o te fa’aorara’a.

Ha’api’i-’āmui-ra’a mai

’Ua fa’auruhia paha te mau melo o te pupu ’aore rā, o te piha, ’ia tāvini itoito atu ā i te Fatu nā roto i te tai’ora’a i Te Parau Ha’api’ira’a ’e te mau Parau Fafau 3–5 i teie hepetoma. Nō te fa’aitoito ia rātou ’ia fa’a’ite mai i tō rātou mau mana’o, e nehenehe ’outou e ani ia rātou ’ia feruri ē, tē ’imi ra rātou i te hō’ē ’ohipa. E aha te mau tītaura’a tā rātou e tu’u i roto i te hō’ē parau fa’ata’ara’a ’aore rā, e parau i roto i te hō’ē uiuira’a ’ohipa ? E nehenehe rātou e hi’o fa’ahou i Te Parau Ha’api’ira’a ’e te mau Parau Fafau 4 ’e ’ia ’ite mai i te mau tītaura’a tā te Fatu e tītau nei i te feiā e hina’aro e ’āmui atu i roto i tāna ’ohipa. ’A mā’iti hō’ē ’aore rā, hau atu ’ohipara’a, i raro nei, nō te tauturu i te feiā tā ’outou e ha’api’i nei ’ia feruri, e aha tā rātou e nehenehe e rave nō te ’āmui hau atu i roto i « te ’ohipa ’ūmerehia » a te Atua (Te Parau Ha’api’ira’a ’e te mau Parau Fafau 4:1).

• Nō te tauturu i te feiā tā ’outou e ha’api’i nei ’ia ha’api’i mai, nāhea e nehenehe ai ia rātou ’ia ’āmui atu i roto i te ha’ape’epe’era’a i te ’ohipa o te fa’aorara’a, e pāpa’i i ni’a i te tāpura ’ere’ere i te tātarara’a o te ’ohipa fa’aorara’a : Tē ani nei te Atua i te mau ta’ata ato’a ’ia haere mai i te Mesia ra ’e ’ia tauturu i roto i tāna ’ohipa nā roto i te orara’a i te ’evanelia a Iesu Mesia, te aupurura’a i te feiā nava’i ’ore, te ani-manihini-ra’a i te mau ta’ata ato’a ’ia fāri’i i te ’evanelia, ’e te tāhō’ēra’a i te mau ’utuāfare nō te tau a muri atu. E ani i te mau melo o te pupu ’aore rā, o te piha, ’ia ’āparau, e nāhea te mau ’ateriputi i tāpurahia i roto i Te Parau Ha’api’ira’a ’e te mau Parau Fafau 4 i te tauturu ia rātou ’ia rave i te tuha’a tāta’itahi o te ’ohipa nō te fa’aorara’a. E vāhi i te feiā ’āpī nā roto i te mau pupu, ’e e vaiiho i te pupu tāta’itahi ’ia ’āparau i te mau rāve’a e nehenehe ai ia rātou ’ia fa’ananea i teie mau ’ateriputi. E aha te ti’a ia tātou ’ia rave nō te fa’ariro i te ’ohipa nō te fa’aorara’a ’ei tuha’a hau atu i te faufa’a nō tō tātou orara’a ?

• E ani i te mau melo o te pupu ’aore rā, o te piha ha’api’ira’a ’ia hi’o fa’ahou i te hō’ē o te mau parau poro’i e ’itehia i roto i « Te tahi atu mau rāve’a tauturu », ma te ’imi mai i te hō’ē fa’ahitira’a parau tā rātou e nehenehe e fa’a’ite mai nō ni’a i te huru nō te tāvinira’a i te Fatu ma te ha’apa’o maita’i i roto i te mau pi’ira’a o te ’Ēkālesia, te mau fa’auera’a ’ohipa, ’aore rā, te tahi atu mau hōpoi’a. E ani ia rātou ’ia fa’a’ite mai i te fa’ahitira’a parau tā rātou i ’ite mai ’e nō te aha rātou i feruri ai ē, e mea faufa’a te reira. Nāhea rātou ’ia fa’a’ohipa i te mau mea tā rātou i ha’api’i mai i teienei ’e a muri a’e ?

• Tē fa’aineine nei paha te tahi mau melo o te pupu ’aore rā, o te piha, ’ia tāvini ’ei misiōnare. E nehenehe ’outou e ani ia rātou ’ia fa’a’ite mai e mea nāhea rātou i te fa’aineinera’a nō te tāvini. Nō te fa’aitoito ia rātou i roto i tā rātou mau tauto’ora’a, e nehenehe ’outou e fa’a’ite i te uira’a tā Elder David A. Bednar i parau ē, e mea pinepine ’oia i te fāri’i : « E aha tā’u e rave nō te fa’aineine maita’i atu ā nō te tāvini ’ei misiōnare rave tāmau ? » (« Te rirora’a ’ei misiōnare », Liahona, Novema 2005, 45). Nāhea te mau melo o te pupu ’aore rā, o te piha, ’ia pāhono i teie uira’a ? E aha te mana’o tā Elder Bednar i hōro’a ? E nehenehe ’outou e ani i te hō’ē misiōnare ’aore rā, hau atu, tei fa’aoti te misiōni, ’ia fa’a’ite mai e aha tā rātou i rave nō te fa’aineine nō te hō’ē misiōni ’e e aha tā rātou e hina’aro nei ia rave rātou i tāua taime fa’aineinera’a ra.

’A rave ma te fa’aro’o

E fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te fa’a’ohipa i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tu’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e hōro’a mai i tō rātou mau mana’o.

Mau rāve’a tauturu pāturu

• Mataio 28: 19–20 ; Te Parau Ha’api’ira’a ’e te mau Parau Fafau 18:9–16 ; 50: 13–14 ; 88: 81 (E hōpoi’a nā tātou ’ia fa’aite i te ’evanelia)

• Dieter F. Uchtdorf, « Tei rahi a’e i rotopū ia ’outou », Liahona, Mē 2017, 78–81

• Carl B. Cook, « Tāvini », Liahona, Novema 2016, 110–12

• « Fa’aineine nō te tāvini », ChurchofJesusChrist.org/topics/missionary-preparation

Ha’api’ira’a mai tā te Fa’aora

’Ua ani te Fa’aora i tāna mau pipi ’ia fa’a’ite pāpū, ’e ’a nā reira ai rātou, ’ua ha’aputapū te Vārua i tō rātou ’ā’au. ’A ha’api’i ai ’outou nō ni’a i te ha’apa’o, ’ei hi’ora’a, e ani i te mau melo o te pupu ’aore rā, o te piha, ’ia fa’a’ite mai i tō rātou ’itera’a pāpū nō te faufa’a rahi i te ha’apa’ora’a i te mau fa’auera’a. (Hi’o Ha’api’ira’a mai tā te Fa’aora [2016], 11, 32.)