Tufa’a 3
E heheura’a tei hōro’ahia mai ia Iosepha Semita te peropheta, i Harmony, i Pennsylvania, i te ’āva’e Tiurai 1828, nō ni’a i te mo’era’a te 116 mau ’api parau pāpa’i-rima-hia i ’īritihia nō roto mai i te tufa’a mātāmua o te Buka a Moromona, ’o tei parauhia te buka a Lehi. ’Ua huru taiā te peropheta i te hōro’ara’a i teie mau ’api mai roto atu i tōna rima ia Martin Harris, ’o tei rave poto noa i te ’ohipa pāpa’i parau nō te ’īritira’a i te Buka a Moromona. ’Ua hōro’ahia mai teie nei heheura’a nā roto i te Urima ’e te Tumima (Hi’o ato’a i te tufa’a 10).
1–4, E mea mure ’ore te haere’a o te Fatu ; 5–15, E mea ti’a roa ia Iosepha Semita ’ia tātarahapa ’e mai te mea ’aita, e rave-’ē-hia atu te hōro’a nō te ’ohipa ’īritira’a parau ; 16–20, E tae mai te Buka a Moromona nō te fa’aora i te hua’ai o Lehi.
1 E ’ore roa e ti’a i te mau ’ohipa, ’e te mau ’ōpuara’a, ’e te mau hina’aro tumu o te Atua ’ia fa’a’orehia, e ’ore ato’a ho’i te reira e mou.
2 Nō te mea e ’ore roa te Atua e haere nā ni’a i te mau ’ē’a fefe, e ’ore ato’a ho’i ’oia e fāriu atu i te pae ’atau ’e ’aore rā i te pae ’aui, e ’ore roa ato’a ho’i ’oia e fa’ahuru ’ē i te mea tāna i parau ra. Nō reira, e mea ’āfaro noa tōna ’ē’a, ’e e mea mure ’ore ho’i tōna haere’a.
3 ’A ha’amana’o, ’a ha’amana’o, e ’ere ïa i te ’ohipa a te Atua ’o tē fa’a’orehia, ’o te ’ohipa rā a te ta’ata nei ;
4 Noa atu ā ho’i ē, e rave rahi paha heheura’a tā te hō’ē ta’ata e fāri’i, ’e e noa’a iāna te mana nō te rave e rave rahi mau ’ohipa rarahi, mai te mea rā ē e fa’ate’ote’o mai ’oia i tōna iho pūai, ma te fa’afaufa’a ’ore i te mau parau a’o a te Atua, ’a pe’e atu ai i te hina’aro o tōna iho ’ā’au ’e te hina’aro o tōna iho tino, ’ua ti’a roa ïa iāna ’ia hi’a ’e ’ia fāri’i i te fa’ahapara’a a te Atua parauti’a i ni’a iāna.
5 Inaha, ’ua hōro’a-ti’aturi-hia teie nei mau mea ia ’oe, terā rā, e aha ra te ’eta’eta o tā ’oe mau fa’auera’a ; ’e ’a ha’amana’o ato’a i te mau parau fafau i parauhia ia ’oe na, ’āhiri ’aita ’oe i ’ōfati i taua mau fa’auera’a ra.
6 ’E inaha, ’ua ’ōfati pinepine noa ’oe i te mau fa’auera’a ’e te mau ture a te Atua, ’e ’ua pe’e noa ho’i i te mau mārōra’a a te ta’ata nei.
7 Inaha ho’i, e ’ere i te mea ti’a ia rahi a’e tō ’oe ri’ari’a i te ta’ata nei i tō ’oe mata’u i te Atua. Noa atu ē ’ua fa’ariro te mau ta’ata i te mau parau a’o a te Atua ’ei mea faufa’a ’ore, ’e ’ua vahavaha atu ho’i i tāna mau parau—
8 I ha’apa’o maita’i na ’oe ; ’e ’ua fa’atoro mai ïa ’oia i tōna rima ’ei tauturu nō ’oe i te mau ihe auahi ato’a a te enemi ra ; ’e ’ua ti’a noa mai ïa ’oia i pīha’i iho ia ’oe i te mau taime pe’ape’a ato’a ra.
9 Inaha, ’o Iosepha ’oe, ’e ’ua mā’itihia ’oe nō te rave i te ’ohipa a te Fatu. Nā roto rā i te ’ōfatira’a i te ture, ’ia ’ore ’oe ’ia ara maita’i, e hi’a ïa ’oe.
10 ’A ha’amana’o rā, tē vai nei tō te Atua aroha ; nō reira, ’a tātarahapa i tā ’oe ’ohipa tano ’ore i te fa’auera’a tā’u i hōro’a atu ia ’oe na, ’e ’ua mā’iti-noa-hia ā ’oe, ’e ’ua pi’i-fa’ahou-hia ho’i ’oe nō te rave i te ’ohipa.
11 ’Ia ’ore rā ’oe ’ia nā reira, e fa’aru’e-’ē-hia atu ’oe ’e e riro ’oe mai te tahi atu mau ta’ata, ’e ’aita roa tā ’oe e hōro’a fa’ahou.
12 ’E ’a tu’u atu ai ’oe i te mea tā te Atua i hōro’a mai ia ’oe, ’oia te ’ite ’e te mana ’ia ’īriti, ’ua tu’u atu ïa ’oe i te mea mo’a i roto i te rima o te hō’ē ta’ata parauti’a ’ore,
13 ’O tei fa’ariro i te mau parau a’o a te Atua ’ei mea faufa’a ’ore, ’e ’ua ’ōfati i te mau fafaura’a mo’a roa ’o tei fafauhia i mua i te Atua ra, ’e ’ua ti’aturi ho’i ’oia i tōna iho pa’ari, ’e ’ua parau fa’ate’ote’o mai i tōna iho ’ite rahi.
14 ’E ’o teie ho’i te tumu i tāpe’ahia ai tō ’oe mau ha’amaita’ira’a nō te hō’ē ma’a tau iti—
15 Nō te mea ’ua fa’ati’a ’oe i te parau a’o a tō ’oe arata’i ’ia ta’ata’ahihia i raro mai te mātāmua mai ā.
16 Noa atu rā i te reira, e haere tā’u ’ohipa i mua, nō te mea ’ua noa’a i tō te ao nei te ’ite nō ni’a i te Fa’aora, nā roto i te ’itera’a pāpū o te mau ’āti Iuda, e nā reira ato’a teie ’ite nō ni’a i te Fa’aora e noa’a ai i tō’u ra mau ta’ata—
17 ’E i te mau ’āti Nephi, ’e i te mau ’āti Iakoba, ’e i te mau ’āti Iosepha, ’e i te mau ’āti Zorama ho’i, nā roto i te ’itera’a pāpū o tō rātou ra mau metua—
18 ’E e riro teie nei ’itera’a pāpū i te tae atu i mua i te mau ’āti Lamana, ’e i te mau ’āti Lemuela, ’e i te mau ’āti Isema’ela ho’i, ’o tei topa atu i roto i te ti’aturi ’ore nō te mau ’ohipa ’ī’ino a tō rātou ra mau metua, ’o tā te Fatu i fa’ati’a ’ia ha’amou atu i tō rātou ra mau taea’e o te mau ’āti Nephi, nō tā rātou mau ’ohipa ’ī’ino ’e tā rātou ho’i mau ’ohipa vi’ivi’i.
19 ’E nō teie ho’i tumu i fa’ahereherehia ai teie nei mau ’api, ’e tei roto i te reira teie nei mau pāpa’a parau—’ia fa’ati’ahia te mau fafaura’a a te Fatu, tāna i fa’a’ite mai i tōna ra mau ta’ata ;
20 ’E ’ia noa’a i te mau ’āti Lamana te ’ite nō ni’a i tō rātou ra mau metua, ’e ’ia ’ite ho’i rātou i te mau fafaura’a a te Fatu, ’e ’ia ti’aturi rātou i te ’evanelia ’e i te mau maita’i rahi ho’i o Iesu Mesia, ’e ’ia fa’ahanahanahia ho’i rātou nā roto i te fa’aro’o i tōna ra i’oa ; ’e nā roto ho’i i tā rātou ra tātarahapara’a e fa’aorahia ai rātou. ’Āmene.