Tufa’a 7
E heheura’a tei hōro’ahia mai ia Iosepha Semita te peropheta ’e ia Oliver Cowdery, i Harmony, i Pennsylvania, i te ’āva’e ’Ēperēra 1829, i te taime rāua i ani atu ai nā roto i te Urima ’e te Tumima ē, ’ua fa’aea noa mai ānei Ioane pipi here i te tino nei ’e ’aore rā ’ua pohe ānei. ’O te heheura’a teie tei ’īritihia mai nō ni’a mai i te pāpa’a parau i pāpa’ihia e Ioane i ni’a i te ’iri ’ānimara ’e ’o tei hunahia e ana iho.
1–3, E ora noa ’o Ioane pipi here ē tae noa atu ’ua ho’i mai te Fatu ; 4–8, ’Ua fāri’i Petero, Iakobo, ’e Ioane i te mau tāviri nō te ’evanelia.
1 ’E ’ua parau mai ra te Fatu iā’u nei : E Ioane, e tā’u pipi here, e aha tā ’oe i hina’aro ? Nō te mea ’o tā ’oe e ani mai, e hōro’ahia ïa ia ’oe na.
2 ’E ’ua parau atu ra vau iāna : E te Fatu, ’a hōro’a mai na i te mana iā’u i ni’a a’e i te pohe, ’ia ora noa vau ’e ’ia fa’afāriu mai i te mau ta’ata ia ’oe na.
3 ’E ’ua parau mai ra te Fatu iā’u nei : ’Oia mau, ’oia mau, tē parau atu nei au ia ’oe na ē, nō te mea ’ua hina’aro ’oe i te reira, e ora noa ïa ’oe ē tae noa atu i te taime au e tae mai ai i roto i tō’u ra hanahana, ’e e tohu ho’i ’oe i te parau i mua i te mau nūna’a, te mau ’ōpū, te mau reo ’e te mau ta’ata ato’a.
4 Nō reira te Fatu i parau atu ai ia Petero ē : Mai te mea ’ua hina’aro vau ’ia ora noa ’oia ē tae noa atu i te taime au e tae mai ai, e aha ïa tā ’oe i reira ? ’Ua hina’aro mai ho’i ’oia iā’u nei ’ia fa’afāriu mai ’oia i te mau ta’ata iā’u nei, ’ua hina’aro rā ’oe ’ia tae ’oi’oi mai iā’u nei i tō’u ra bāsileia.
5 Tē parau atu nei au ia ’oe, e Petero, e hina’aro maita’i roa te reira ; terā rā ’ua hina’aro tā’u pipi here ’ia rahi atu ā te ’ohipa tāna e rave i rotopū i te ta’ata, i tei rave-’ē-hia na e ana.
6 ’Oia ïa, ’ua ha’amata ïa ’oia i te ’ohipa rahi a’e ; nō reira e fa’ariro vau iāna mai te auahi ura ’e te melahi utuutu ho’i ; e utuutu ’oia ia rātou ’o tē riro ’ei mau fatu ’āi’a nō te ora ’e ’o tē pārahi ra i ni’a i te fenua nei.
7 ’E e fa’ariro vau ia ’oe ’ei ta’ata utuutu nāna ’e nō tō taea’e ’o Iakobo ; ’e ’ia ’outou to’otoru e hōro’a atu vau i teie nei mana ’e te mau tāviri nō teie nei ’ohipa mo’a ē tae noa atu i te taime au e tae mai ai.
8 ’Oia mau tē parau atu nei au ia ’ōrua, e fāri’i ’ōrua to’opiti i te mea tā ’ōrua e hina’aro nei, nō te mea tē ’oa’oa nei ’ōrua to’opiti ato’a i te mea tā ’ōrua i hina’aro na.