Tufa’a 41
E heheura’a tei hōro’ahia mai nā roto ia Iosepha Semita te peropheta, i tō te ’Ēkālesia, i Kirtland, i Ohio, i te 4 nō Fepuare 1831. Tē fa’aue nei teie heheura’a i te peropheta ’e i te mau peresibutero o te ’Ēkālesia ’ia pure nō te fāri’i i te « ture » a te Atua (hi’o i te tufa’a 42). Nō tae noa mai Iosepha Semita i Kirtland mai New York mai, ’e tei reira ’o Leman Copley, e melo nō Thompson, i Ohio, e vāhi tāpiri noa mai, nō te « tītau i te taea’e ra Iosepha ’e ia Sidney [Rigdon]… ’ia noho e ana ra ’e nāna e hōro’a nā rāua te fare ’e te mā’a ». Tē ha’apāpū nei teie heheura’a i hea Iosepha ’e Sidney e ti’a ai ’ia noho, ’e tē pi’i ato’a nei ho’i ia Edward Partridge ’ei ’episekōpo mātāmua o te ’Ēkālesia.
1–3, ’Ia fa’atere te mau peresibutero i te ’Ēkālesia nā roto i te vārua nō te heheura’a ; 4–6, E fāri’i ’e e ha’apa’o te mau pipi mau i te ture a te Fatu ; 7–12, ’Ua mā’itihia ’o Edward Partridge ’ei ’episekōpo nō te ’Ēkālesia.
1 ’A ha’apa’o mai na ’e ’a fa’aro’o mai na ho’i, ’o ’outou e tō’u nei feiā, tē nā reira mai nei te Fatu tō ’outou Atua, ’o ’outou tā’u i ’oa’oa ’ia ha’amaita’i atu i te mau ha’amaita’ira’a hau a’e i te rahi i te mau ha’amaita’ira’a ato’a, ’o ’outou ho’i ’o tē fa’aro’o mai iā’u nei ; ’e ’o ’outou ’o tē ’ore e fa’aro’o mai iā’u nei ’e ’o tei rave ha’avare i tō’u i’oa, e ’anatema vau ia ’outou i te ’anatemara’a teiaha rahi roa atu.
2 ’A fa’aro’o mai na, ’o ’outou ’e te mau peresibutero nō tā’u nei ’ēkālesia, ’o tā’u i mā’iti, inaha, tē hōro’a atu nei au i te hō’ē fa’auera’a ia ’outou ’ia ha’aputuputu mai ’outou ia ’outou iho i te vāhi hō’ē ’e ’ia tāhō’ē ho’i i ni’a i tā’u nei parau ;
3 ’E nā roto i te pure o tō ’outou na fa’aro’o e noa’a ai ia ’outou tā’u nei ture, ’ia ’ite ho’i ’outou nāhea ’ia fa’atere i tā’u nei ’ēkālesia ’e ’ia tano te mau mea ato’a i mua iā’u nei.
4 ’E e riro vau ’ei fa’atere nō ’outou ’ia tae atu vau ; ’e inaha, e tae ’oi’oi atu vau, ’e ’a mata na ’ia ha’apa’ohia tā’u nei ture.
5 ’O ’oia ’o tē fāri’i i tā’u nei ture ma te ha’apa’o ho’i i te reira, ’o ’oia ïa tā’u nei pipi ; ’e ’o ’oia ’o tē parau noa mai ē tē fāri’i nei ’oia i te reira ma te ’ore ho’i e ha’apa’o i te reira, e ’ere ho’i ïa ’oia i tā’u nei pipi, ’e e ti’avaruhia ’oia mai rotopū atu ia ’outou na ;
6 Nō te mea e ’ere ïa i te mea ti’a ’ia hōro’ahia atu te mau mea a te mau tamari’i o te bāsileia i te feiā ti’amā ’ore ’e ’aore rā i te mau ’ūrī, ’eiaha ho’i te mau poe ’ia paruhia atu i te mau pua’a.
7 ’E teie fa’ahou ā, e mea ti’a roa ’ia hāmanihia te hō’ē fare nō tō’u tāvini ra ’o Iosepha Semita, tamaiti, ’ei reira ’oia e pārahi ai ’e e ’īriti ai ho’i i te parau.
8 ’E teie fa’ahou ā, e mea ti’a roa ’ia pārahi noa tō’u tāvini ra ’o Sidney Rigdon i te vāhi mai te au i tōna mana’o e maita’i ai ’oia ra, mai te mea e ha’apa’o ’oia i tā’u mau fa’auera’a.
9 ’E teie fa’ahou ā, ’ua mā’iti au i tō’u tāvini ra ia Edward Partridge ; ’e tē hōro’a atu nei au i te hō’ē fa’auera’a ’ia pāturuhia ’oia e te reo o te ’ēkālesia, ’e ’ia fa’atōro’ahia ho’i ’ei ’episekōpo nō te ’ēkālesia, ’ia vaiiho ’oia i tāna tao’a ho’o ’e ’ia fa’a’ohipa i tōna taime tā’āto’a i roto i te mau ’ohipa a te ’ēkālesia ;
10 ’Ia ha’apa’o ’oia i te mau mea ato’a ’o tē fa’ata’ahia atu iāna i roto i tā’u mau ture i te mahana vau e hōro’a atu ai i te reira.
11 Nō te mea ’ua mā tōna ’ā’au i mua iā’u nei ; ’e ’ua au ho’i ’oia ia Nathanael i tahito ra, ’aore ho’i e ha’avare i roto iāna ra.
12 ’Ua hōro’ahia atu teie nei mau parau ia ’outou na, ’e e mea mā roa ho’i te reira i mua iā’u nei ; nō reira, ’a ara nāhea ’outou ’ia ha’apa’o i te reira, nō te mea e tae mai te utu’a i ni’a iho i tō ’outou mau vārua i te mahana ha’avāra’a. ’Oia ïa. ’Āmene.