Tufa’a 23
E ’āpapara’a o e pae heheura’a i hōro’ahia mai nā roto ia Iosepha Semita te peropheta, i Manchester, i New York, i te ’āva’e ’Ēperēra 1830, ia Oliver Cowdery ; Hyrum Smith ; Samuel H. Smith ; Joseph Smith, metua ; e Joseph Knight, metua. Nō te hina’aro mau o nā ta’ata to’opae i fa’a’itehia atu i ni’a nei ’ia ’ite i tā rātou iho mau ’ohipa, ’ua ani atu te peropheta i te Fatu ’e ’ua fāri’i mai ’oia i te hō’ē heheura’a nō nā ta’ata tata’itahi.
1–7, ’Ua pi’ihia teie mau pipi mātāmua roa nō te poro i te ’evanelia, nō te a’o, ’e nō te ha’apūai i te ’Ēkālesia.
1 Inaha, tē parau atu nei au ia ’oe e Oliver, i te tahi mau parau ri’i. Inaha, ’ua ha’amaita’ihia ’oe, ’e ’aita i fa’ahapahia. ’A ara rā i te te’ote’o ’o te ō atu ho’i ’oe i roto i te fa’ahemara’a.
2 ’A fa’a’ite i te huru o tō ’oe tōro’a i mua i tō te ’ēkālesia, ’e i mua ato’a i tō te ao nei, ’e e ha’amatarahia tō ’oe ’ā’au ’ia a’o atu i te parau mau mai teie nei ā ē a muri noa atu. ’Āmene.
3 Inaha, tē parau atu nei au ia ’oe e Hyrum, i te tahi mau parau ri’i ; nō te mea ’aita ato’a ho’i ’oe i fa’ahapahia, ’e ’ua mahora tō ’oe ’ā’au, ’e ’ua matara ho’i tō ’oe arero ; ’e tō ’oe tōro’a ’o te a’ora’a ïa, ’e ’o te ha’apūai-tāmau-noa-ra’a i tō te ’ēkālesia. Nō reira, i te ’ēkālesia tā ’oe ’ohipa ē a muri noa atu, nō tō ’oe ’utuāfare ho’i i nā-reira-hia ai. ’Āmene.
4 Inaha, tē parau atu nei au i te tahi mau parau ri’i ia ’oe, e Samuela ; nō te mea ’aita ato’a ho’i ’oe i fa’ahapahia, ’e tō ’oe tōro’a ’o te a’ora’a ïa, ’e te ha’apūaira’a i tō te ’ēkālesia ; ’e ’aita ā ’oe i pi’ihia ’ia a’o i mua i tō te ao nei. ’Āmene.
5 Inaha, tē parau atu nei au i te tahi mau parau ri’i ia ’oe, e Joseph ; nō te mea ’aita ato’a ho’i ’oe i fa’ahapahia, ’e tō ’oe ato’a tōro’a ’o te a’ora’a ïa, ’e te ha’apūaira’a i tō te ’ēkālesia ; ’e ’o teie ho’i tā ’oe ’ohipa mai teie nei atu ē a muri noa atu. ’Āmene.
6 Inaha, tē fa’a’ite atu nei au ia ’oe, e Joseph Knight, nā roto i teie nei mau parau, ’ia rave ’oe i tō ’oe sātauro e ti’a ai, ’e i roto i te reira ’ia pure ’oe ’e ’ia fa’aro’ohia i mua i tō te ao nei ’e i te vāhi mo’emo’e ho’i, ’e i roto i tō ’oe ’utuāfare, ’e i rotopū i tō ’oe mau hoa, ’e i te mau vāhi ato’a.
7 ’E, inaha, ’o tā ’outou ïa ’ohipa ’ia ’āmui atu i te ’ēkālesia mau, ’e ’ia hōro’a atu i tō ’outou reo i te a’o-tāmau-noa-ra’a, ’ia noa’a ia ’outou te utu’a maita’i a te ta’ata rave ’ohipa. ’Āmene.