Tufa’a 122
Te parau a te Fatu ia Iosepha Semita te peropheta, ’a vai noa ai ’oia ’ei mau ’āuri i roto i te fare tāpe’ara’a i Liberty, i Missouri. E tuha’a noa teie tufa’a nō te hō’ē ’episetole i tō te ’Ēkālesia i te 20 nō Māti 1839 (hi’o i te upo’o parau o te tufa’a 121).
1–4, E ui mai tō te mau hope’a o te fenua nei i te parau nō te i’oa o Iosepha Semita ; 5–7, E riro tōna mau ’ati ’e tōna mau mamae rahi ’ei tauturura’a ’e ’ei maita’i nōna ; 8–9, ’Ua pou te Tamaiti a te Ta’ata i raro a’e i taua mau mea ato’a ra.
1 E ui mai tō te mau hope’a o te fenua nei i te parau nō tō ’oe i’oa, ’e e parau fa’a’ino ho’i te feiā ma’ama’a ia ’oe, ’e e fa’atupu hade i te riri rahi ia ’oe ;
2 ’A tītau tāmau noa ai te feiā ’ā’au mā, ’e te feiā ’aravihi, ’e te feiā parauti’a, ’e te feiā vi’ivi’i ’ore ho’i, i te a’ora’a, ’e te ha’amanara’a, ’e te mau ha’amaita’ira’a i raro a’e i tō ’oe nā rima.
3 ’E e ’ore roa tō ’oe iho mau ta’ata e fāriu ’ē atu ia ’oe nā roto i te parau fa’a’ite a te mau ta’ata ha’avare ra.
4 ’E noa atu ē nā tō rātou mana ’oe e hurihia atu ai i roto i te pe’ape’a, ’e i te mau fare tāpe’ara’a ra, e fa’aturahia ’oe ; ’e maori rā nō te hō’ē taime iti noa, e riro tō ’oe reo ’ei mea ri’ari’a a’e i tō te liona taehae roa ra i rotopū i tō ’oe mau ’enemi, nō tō ’oe parauti’a ; ’e e ti’a noa tō ’oe Atua i pīha’i iho ia ’oe ē a muri ē a muri noa atu.
5 Mai te mea e parauhia ’oe ’ia haere nā roto i te ’ati rahi ; mai te mea e tei roto ’oe i te mau vāhi tapitapi i rotopū i te mau taea’e ha’avare ; mai te mea ē tei roto ’oe i te mau vāhi tapitapi i rotopū i te feiā ’eiā haru ; mai te mea ē tei roto ’oe i te mau vāhi tapitapi i ni’a i te fenua ’e ’aore rā i ni’a i te miti ;
6 Mai te mea e parihia ’oe i te mau huru parira’a ha’avare ato’a ; mai te mea e tae mai tō ’oe mau ’enemi i ni’a ia ’oe ; mai te mea e haru atu rātou ia ’oe mai mua atu i tō ’oe metua tāne ’e tō ’oe metua vahine ’e tō ’oe mau taea’e ’e tō ’oe mau tuahine ; ’e mai te mea nā roto i te ’o’e i unuhihia ra e fa’ata’a ’ē atu tō ’oe mau ’enemi ia ’oe mai mua mai i te ’ōuma o tā ’oe vahine fa’aipoipo, ’e tā ’oe ho’i mau tamari’i, ’e tā ’oe tamaiti pa’ari a’e, noa atu ē e ono noa iho tōna matahiti, ’e e tāpe’a mai ’oia i ni’a i tō ’oe ’ahu, ’e e parau mai ē, E tō’u metua, e tō’u metua, e aha te tumu e’ita e nehenehe ia ’oe ’ia fa’aea mai i pīha’i iho ia mātou ? E tō’u metua, e aha tā te mau ta’ata e rave i ni’a ia ’oe na ? ’E mai te mea i reira ’oia e ravehia atu ai mai mua atu ia ’oe, nā roto i te ’o’e ra, ’e e ’umehia atu ai i te fare tāpe’ara’a ra, ’e e fa’a’ati haere noa tō ’oe mau ’enemi ia ’oe mai te au i te mau luko i te hina’arora’a i te toto o te pinia māmoe ra ;
7 ’E mai te mea e hurihia atu ’oe i roto i te ’āpo’o, ’e ’aore rā i roto i te rima o te feiā taparahi ta’ata, ’e e tu’uhia mai te utu’a pohe i ni’a ia ’oe na ; mai te mea e hurihia atu ’oe i roto i te moana ra ; mai te mea e tāpo’ipo’i mai te ’are tūpa’ipa’i ia ’oe na ; mai te mea e riro te mau mata’i pūai ’ei ’enemi nō ’oe na ; mai te mea e ha’aputuputu mai te mau ra’i i te pōiri, ’e e ’āmui mai te mau mea ri’i tumu nō te fa’aapiapi i te ’ē’a ; ’e tei hau roa atu ho’i, mai te mea e hāmama mai te ta’a nō hade iho i te vaha i te tītaura’a ia ’oe na, ’ia ’ite ’oe, e tā’u nei tamaiti ē, e noa’a ia ’oe te ’ite nā roto i teie mau mea ato’a, ’e e riro ho’i ïa ’ei maita’i nō ’oe na.
8 ’Ua haere roa atu te Tamaiti a te Ta’ata nei i raro a’e i taua mau mea ato’a ra. ’Ua rahi a’e ānei ’oe iāna ?
9 Nō reira, ’a tāmau noa na ’oe i tō ’oe haere’a, ’e e vai noa te autahu’ara’a ia ’oe na ; nō te mea ’ua fa’ata’a-mau-hia tō rātou mau ’ōti’a, e ’ore roa e nehenehe ia rātou ia mareva ’ē atu. ’Ua ’itea tō ’oe pu’e mahana, ’e e ’ore roa tō ’oe na mau matahiti e ha’apotohia ; nō reira, ’eiaha e mata’u i tā te ta’ata nei e rave, nō te mea e vai noa te Atua i pīha’i iho ia ’oe na ē a muri ē a muri noa atu.