Tufa’a 65
E heheura’a tei hōro’ahia mai nā roto ia Iosepha Semita te peropheta, i Hiram, i Ohio, i te 30 nō ’Ātopa 1831.
1–2, ’Ua hōro’ahia mai te mau tāviri nō te bāsileia o te Atua i te ta’ata i ni’a i te fenua nei, ’e e upo’oti’a te ’ōpuara’a nō te ’evanelia ; 3–6, E tae mai ’e e ’āmui mai te bāsileia mileniuma o te ao ra i te bāsileia o te Atua i ni’a i te fenua nei.
1 ’A fa’aro’o mai na, ’e inaha, ’o te reo mai te mea ra ē, nō te hō’ē i tonohia mai i raro nei nō ni’a mai ra, ’o tei pūai ’e tei mau ho’i i te mana, ’o tōna ra haerera’a tei te mau hope’a ïa o te ao nei, ’oia, ’o tē parau mai nei i te ta’ata—’A fa’aineine ’outou i te ’ē’a o te Fatu, ’a fa’atītī’aifaro i tōna ra mau ’ē’a.
2 ’Ua hōro’ahia atu te mau tāviri nō te bāsileia o te Atua i te ta’ata i ni’a i te fenua nei, ’e mai reira atu te ’evanelia e tere atu ai ē tae noa atu i te mau hope’a o te ao nei mai te ’ōfa’i i ’ō’otihia nō roto mai i te mou’a ma te rima ’ore, e tere atu ai ē tae noa atu i te taime e ’ī ai te ao nei i te reira.
3 ’Oia ïa, e reo i te pi’ira’a mai ē—’A fa’aineine ’outou i te ’ē’a o te Fatu, ’a fanahonaho ’outou i te ’amura’a ahiahi a te ’Ārenio, ’a fa’aineine ho’i nō te Tāne fa’aipoipo ’āpī.
4 ’A pure atu i te Fatu, ’a ti’aoro atu i tōna i’oa mo’a, ’a fa’a’ite atu i tāna mau ’ohipa māere i rotopū i te mau ta’ata.
5 ’A ti’aoro atu i te Fatu, ’ia tere atu tōna ra bāsileia i mua i ni’a i te fenua nei, ’ia ti’a i te mau ta’ata ’ia fāri’i i te reira, ’e ’ia vai ineine noa nō te mau mahana e tae mai ra, i roto i te reira e tae mai ai te Tamaiti a te Ta’ata i raro nei i roto i te ra’i, i fa’a’ahuhia i te ’ana’anara’a o tōna ra hanahana, ’ia fārerei mai i te bāsileia o te Atua ’o tei fa’ati’ahia i ni’a i te fenua nei.
6 Nō reira, ’ia haere te bāsileia o te Atua i mua, ’ia ti’a i te bāsileia o te ao ra ’ia tae mai, ’e ’ia ti’a ia ’oe, e te Atua, ’ia fa’ahanahanahia i te ao ra mai tō ni’a i te fenua nei, ’ia ha’avīhia atu ho’i tō ’oe na mau ’enemi ; nō te mea nō ’oe na te tura, te mana ’e te hanahana, ē a muri ē a muri noa atu. ’Āmene.