1 Te Parau ’e te Hina’aro o te Fatu nō ni’a i te pūhapara’a nō ’Īserā’ela i tō rātou haerera’a i te Tō’o’a o te rā :

2 ’A tu’u atu i te mau ta’ata ato’a nō Te ’Ēkālesia a Iesu Mesia i te Feiā Mo’a i te mau Mahana Hope’a nei, ’e ’o rātou ato’a ’o tē tere atu nā muri iho ia rātou, ’ia fa’anahonahohia i roto i te mau pupu, ma te fafaura’a ’e te parau fafau ē e ha’apa’o rātou i te mau fa’auera’a ’e te mau ture ato’a a te Fatu ra tō tātou Atua.

3 ’Ia fa’anahonahohia te mau pupu ma te fa’ata’a i te mau ra’atira nō te mau pupu hō’ē hānere, te mau ra’atira nō te mau pupu e pae ’ahuru, te mau ra’atira nō te mau pupu hō’ē ’ahuru, ’e ’ia fa’ata’a-ato’a-hia te hō’ē peresideni ’e tōna nā tauturu to’opiti ’ei upo’o nō rātou, i raro a’e i te fa’aterera’a a te Tino ’Ahuru Ma Piti ’āpōsetolo.

4 E riro teie ’ei fafaura’a nā tātou—’oia ho’i e ha’apa’o tātou i te mau ’ōro’a ato’a a te Fatu.

5 ’A tu’u atu i te mau pupu tāta’itahi ’ia ’imi i tā rātou iho mau pua’atoro pūtō, te mau pere’o’o pūtō, te tao’a ’e te mā’a, te ’ahu ’e te mau mea ato’a i tītauhia nō te haerera’a, mai te au i te vāhi e mara’a ia rātou.

6 ’Ia oti te mau pupu ato’a i te fa’anahonahohia, ’a tu’u atu ia rātou ’ia haere atu ma tō rātou pūai, nō te fa’aineine i te ’ē’a nō rātou ’o tē fa’aea mai.

7 ’A tu’u atu i te mau pupu tāta’itahi, ’e tō rātou mau ra’atira ’e tō rātou mau peresideni, ’ia fa’aoti e hia ra ta’ata tē ti’a ’ia haere atu i te ha’amatara’a nō te tau māhanahana i mua nei ; ’ei reira e mā’iti ai i te tahi mau ta’ata tino itoito ’e te ’aravihi ho’i nō te ’āfa’i i te mau pua’atoro pūtō, te mau huero rā’au, ’e te mau mauha’a fa’a’apu, ’e ’ia haere atu ’ei mau pionie nō te fa’aineine nō te tanu i te mau mā’a tupu i te ha’amatara’a nō te tau māhanahana.

8 ’Ia ’aifāito te mau pupu tāta’itahi, mai te au i te tufa’a o tā rātou faufa’a, i te ’āfa’ira’a i te feiā veve, te mau vahine ’ivi, te ’ōtare, ’e te mau ’utuāfare ho’i nō te mau ta’ata ’o tei haere atu i roto i te nu’u fa’ehau, ’ia ’ore te mau ti’aorora’a a te vahine ’ivi ’e te ’ōtare ’ia tae i ni’a, i te tari’a o te Fatu, ’ei fa’ahapara’a i teie nei feiā.

9 ’A tu’u atu i te mau pupu tāta’itahi ’ia fa’aineine i te mau fare, ’e te mau ’āua fa’a’apu nō te fa’atupu i te sītona nā rātou ’o tē fa’aea mai i muri mai i teie nei tau ; ’e ’o teie ho’i te hina’aro o te Fatu nō ni’a i tōna mau ta’ata.

10 ’A tu’u atu i te mau ta’ata tāta’itahi ’ia fa’a’ohipa i tōna pūai ’e i tāna faufa’a nō te fa’anu’u atu i teie nei feiā i te vāhi tā te Fatu e fa’ata’a mai ’ei titi nō Ziona.

11 ’E mai te mea e rave ’outou i teie nei mea ma te ’ā’au mā, nā roto i te ha’apa’o maita’i, e ha’amaita’ihia ïa ’outou ; e ha’amaita’ihia ’outou i tā ’outou mau nana māmoe, i tā ’outou mau nana pua’atoro, i roto i tā ’outou mau ’āua fa’a’apu, i roto i tō ’outou mau fare, ’e i roto i tō ’outou mau ’utuāfare ho’i.

12 ’A tu’u atu i tō’u nā tāvini ra ia Ezra T. Benson ’e ia Erastus Snow ’ia fa’anahonaho i te hō’ē pupu.

13 ’E ’a tu’u atu i tō’u nā tāvini ra ia Orson Pratt ’e ia Wilford Woodruff ’ia fa’anahonaho i te hō’ē pupu.

14 Teie ato’a ho’i, ’a tu’u atu i tō’u nā tāvini ra ia Amasa Lyman ’e ia George A. Smith ’ia fa’anahonaho i te hō’ē pupu.

15 ’E ’ia fa’ata’a i te mau peresideni, ’e te mau ra’atira nō te mau pupu hānere, ’e nō te mau pupu pae ’ahuru, ’e nō te mau pupu hō’ē ’ahuru ra.

16 ’E ’a tu’u atu i tō’u mau tāvini ’o tei fa’ata’ahia ’ia haere atu ’e ’ia ha’api’i atu i teie, tō’u hina’aro i te feiā mo’a, ’ia vai ineine rātou nō te haere atu i te hō’ē fenua hau.

17 ’A haere atu na ’outou i tō ’outou haerera’a ’e ’a rave ho’i i te ’ohipa mai te au i tā’u i fa’a’ite atu ia ’outou na, ’e ’eiaha e mata’u atu i tō ’outou mau ’enemi ; nō te mea ’aore tō rātou e mana nō te tāpe’a i tā’u ’ohipa.

18 E fa’aorahia Ziona i te taime i ha’apa’ohia e au ra.

19 ’E mai te mea e tītau te hō’ē noa atu ta’ata ’ia fa’ateitei iāna iho, ’e ’aore ho’i e ha’apa’o i tā’u a’ora’a, e’ita ïa ’oia e fāri’i i te mana, ’e e ’itehia tāna ’ohipa faufa’a ’ore.

20 ’A ’imi na ’outou ; ’e ’a ha’apa’o na i tā ’outou mau fa’aaura’a te tahi i te tahi ; ’e ’eiaha e nounou i tā tō taea’e ra faufa’a.

21 ’A ha’apae na ’outou i te ’ino, ’oia ho’i, te fa’ahiti-faufa’a-ore-ra’a i te i’oa o te Fatu, nō te mea ’o vau nei te Fatu ra tō ’outou Atua, ’oia te Atua nō tō ’outou mau metua, te Atua ho’i nō Aberahama ’e nō Isaaka ’e nō Iakoba.

22 ’O vau nei ’oia ’o tei arata’i atu i te mau tamari’i nō ’Īserā’ela i rāpae i te fenua nō ’Aiphiti ; ’e ’ua fa’atorohia atu tō’u rima i te mau mahana hope’a nei, nō te fa’aora i tō’u nei mau ta’ata o ’Īserā’ela.

23 ’A fa’aea na i te tama’i te tahi i te tahi ; ’a fa’aea na i te parau fa’a’ino te tahi nō te tahi ra.

24 ’A fa’aea na i te ta’ero ’ava ; ’e ’a tu’u i tā ’outou mau parau ’ia ha’amaita’i te tahi i te tahi.

25 ’E mai te mea e rave mai ’oe i te hō’ē mea a tō ta’ata tupu, ’a fa’aho’i atu i te reira mea tā ’oe i rave mai ; ’e mai te mea e’ita e nehenehe ia ’oe ’ia fa’aho’i atu i te reira ’a haere ti’a atu ïa ’e ’a fa’a’ite i tō ta’ata tupu, ’o te fa’ahapa mai ’oia ia ’oe.

26 Mai te mea e ’itea ia ’oe te hō’ē taiha’a mo’e a tō ta’ata tupu ra, ’a ’imi itoito ’oe i te rāve’a ē tae noa atu ’ua nehenehe ia ’oe ’ia fa’aho’i atu i te reira iāna ra.

27 ’A fa’aitoito noa i te fa’ahereherera’a i tā ’oe faufa’a, ’ia riro ’oe ’ei ti’a’au pa’ari ; nō te mea e tao’a hōro’a noa te reira nā te Fatu ra tō ’oe Atua, ’e ’o ’oe ho’i tōna ti’a’au.

28 ’E mai te mea tē ’oa’oa nei ’oe, ’a ’ārue ïa i te Fatu nā roto i te hīmenera’a, te fa’a’otora’a ’upa’upa, te ’orira’a, ’e te pure ’ārue ’e te ha’amāuruurura’a ho’i.

29 Mai te mea tē ’oto nei ’oe, ’a ti’aoro atu ïa i te Fatu ra tō ’oe Atua nā roto i te ani-māite-ra’a atu, ’ia tupu te ’oa’oa i roto i tō ’oe ’ā’au.

30 ’Eiaha e mata’u i tō ’oe mau ’enemi, nō te mea tei roto rātou i tō’u nei rima ’e e rave ho’i au mai te au i tā’u i hina’aro i ni’a ia rātou.

31 ’Ia tāmatahia tō’u mau ta’ata i te mau mea ato’a e ti’a ai, ’ia ti’a ia rātou ’ia vai ineine noa nō te fāri’i i te hanahana ’o tā’u i fa’ata’a nō rātou ra, ’oia te hanahana nō Ziona ; ’e ’o ’oia ’o tē ’ore e fa’a’oroma’i i te tā’irira’a, e’ita ’oia e riro ’ei mea au nō tō’u nei bāsileia.

32 ’A tu’u atu iāna ’o tei ma’ua ’ia ha’api’i i te pa’ari nā roto i te fa’aha’eha’ara’a iāna iho ’e i te ti’aorora’a i te Fatu ra tōna Atua, ’ia ’ara’ara tōna nā mata ’ia ti’a iāna ’ia ’ite, ’e ’ia matara tōna nā tari’a ’ia ti’a iāna ’ia fa’aro’o ;

33 Nō te mea ’ua tonohia atu tō’u nei Vārua i roto i te ao nei nō te ha’amāramarama i te feiā ha’eha’a ’e te feiā ’ā’au tātarahapa, ’e nō te fa’ahapara’a i te feiā paieti ’ore.

34 ’Ua pāto’i mai tō ’outou mau taea’e ia ’outou na ’e i tō ’outou ’itera’a pāpū ho’i, ’oia ho’i te nūna’a ’o tei tīahi iho nei ia ’outou i rāpae ;

35 ’E i teienei tē tae mai nei te mahana nō tō rātou ’ati rahi, ’oia te mau mahana nō te ’oto, mai te au i te vahine ’o tei ro’ohia i te māuiui fānau ; ’e e rahi roa tō rātou ra ’oto maori rā ’ia tātarahapa ’oi’oi rātou, ’oia ïa, ’ia ’oi’oi roa.

36 Nō te mea ’ua taparahi rātou i te mau peropheta, ’e ia rātou ho’i ’o tei tonohia atu ia rātou ra ; ’e ’ua ha’amani’i rātou i te toto hara ’ore, ’o tē pi’i noa mai nei mai te repo mai i te fa’ahapara’a atu ia rātou ra.

37 Nō reira, ’eiaha e māere i teie mau mea nei, nō te mea ho’i ’aore ā ’outou i mā roa ; e’ita ā e ti’a ia ’outou ’ia amo i tō’u nei hanahana ; terā rā e ’ite ’outou i te reira mai te mea e ha’apa’o maita’i ’outou i te ha’apa’ora’a i tā’u mau parau ato’a tā’u i hōro’a atu ia ’outou na, mai te mau mahana nō Adamu ē tae noa mai ia Aberahama, mai ia Aberahama ē tae noa mai ia Mose, mai ia Mose ē tae noa mai ia Iesu ’e tāna mau ’āpōsetolo, ’e mai ia Iesu ’e tāna mau ’āpōsetolo ē tae noa mai ia Iosepha Semita, ’o tā’u i parau atu nā roto i tā’u mau melahi, tō’u mau tāvini utuutu, ’e nā roto ho’i i tō’u iho reo mai roto mai i te mau ra’i, ’ia fa’atupu i tā’u ’ohipa ;

38 ’E nāna ho’i i patu i te niu nō te reira, ’e ’ua ha’apa’o maita’i ’oia ; ’e ’ua rave mai au iāna iā’u iho nei.

39 E rave rahi te feiā ’o tei māere i tōna pohera’a ; ’āre’a rā e mea faufa’a rahi ïa ’ia ha’amau ’oia i tōna ’itera’a pāpū i tōna toto, ’ia fa’ahanahanahia ’oia ’e ’ia fa’ahapahia ho’i te feiā parauti’a ’ore.

40 ’Aita ānei au i fa’aora mai ia ’outou i tō ’outou ra mau ’enemi, i te mea ana’e ē ’ua vaiiho atu vau i te hō’ē ’ite i tō’u nei i’oa ?

41 Nō reira, i teienei, ’a fa’aro’o mai na, e te mau ta’ata nō tā’u nei ’ēkālesia ; ’e ’o ’outou te mau peresibutero, ’a fa’aro’o tāhō’ē mai na ; ’ua fāri’i ho’i ’outou i tō’u nei bāsileia.

42 ’A fa’aitoito na i te ha’apa’ora’a i tā’u mau fa’auera’a ato’a, ’o te tae atu te mau fa’autu’ara’a i ni’a iho ia ’outou na, ’e ’o te mou ho’i tō ’outou fa’aro’o, ’e ’o te upo’oti’a tō ’outou mau ’enemi i ni’a a’e ia ’outou na. Nō reira ’aita atu ā e parau fa’ahou i teienei. ’Āmene ’e ’Āmene.