1 ’A ha’apa’o mai na ’o ’outou e te mau ta’ata, ’e ’ia mahora mai na tō ’outou ’ā’au, ’e ’a hōro’a mai na i tō ’outou tari’a mai te ātea mai ; ’e ’a fa’aro’o mai, ’o ’outou ’o tē parau ia ’outou iho e feiā nō te Fatu, ’e ’a fa’aro’o mai i te parau a te Fatu ’e i tōna ho’i hina’aro ia ’outou na.

2 ’Oia ïa, ’oia mau, tē parau atu nei au, ’a fa’aro’o i te parau nāna ’o tei tupu tōna ra riri i te feiā parauti’a ’ore ’e te feiā ’ōrurehau ho’i ;

3 ’O tē hina’aro i te rave atu i te feiā tāna e rave, ’e ’o te fa’aora i roto i te orara’a nei ia rātou ’o tāna i hina’aro ’ia fa’aora ;

4 ’O tē fa’atupu mai te au i tōna iho hina’aro ’e tōna ho’i ’oa’oa ; ’e ’o tē ha’amou atu i te taime e au iāna ra, ’e ’o tē ti’a iāna ’ia huri atu i te vārua i raro i hade ra.

5 Inaha, e parau atu vau, ’o te Fatu, i tō’u nei reo, ’e e ha’apa’o-mau-hia ïa.

6 Nō reira, ’oia mau tē parau atu nei au, ’ia ara te feiā parauti’a ’ore, ’e ’ia mata’u ’e ’ia rurutaina ho’i te feiā ’ōrurehau ; ’e ’ia tāpiri te feiā ti’aturi ’ore i tō rātou ’utu, nō te mea e tae atu te mahana nō te riri ’ū’ana mai te pūāhiohio te huru i ni’a ia rātou, ’e e ’ite te mau ta’ata ato’a ē ’o te Atua vau.

7 ’E ’o ’oia ’o tē tītau i te mau tāpa’o, e ’ite ïa ’oia i te mau tāpa’o, ’eiaha rā nō te fa’aorara’a.

8 ’Oia mau, tē parau atu nei au ia ’outou na, ’e tē vai ra te feiā i rotopū ia ’outou na ’o tei tītau i te mau tāpa’o, ’e i vai na ho’i te reira huru feiā mai te mātāmua mai ā ;

9 Terā rā, inaha, e ’ore te fa’aro’o e tupu mai nā roto i te mau tāpa’o, e pe’e mai rā te mau tāpa’o ia rātou ’o tei ti’aturi.

10 ’Oia ïa, e tupu mai te mau tāpa’o nā roto i te fa’aro’o, ’eiaha nā roto i te hina’aro o te ta’ata nei, ’eiaha ato’a mai te au i tō rātou ra hina’aro, nā roto rā i te hina’aro o te Atua.

11 ’Oia ïa, e tupu mai te mau tāpa’o nā roto i te fa’aro’o, ē tae noa atu i te mau ’ohipa rarahi, nō te mea ’ia ’ore te fa’aro’o e’ita tā te ta’ata e ti’a ’ia ha’amāuruuru atu i te Atua ; ’e ’o ’oia ’o tā te Atua i riri ra ’aore ho’i ïa ’oia i māuruuru roa iāna ; nō reira e ’ore roa ’oia e fa’a’ite i te mau tāpa’o i te reira huru ta’ata, maori rā nā roto i te riri ’ū’ana ’ei fa’ahapara’a ia rātou.

12 Nō reira, ’aore au, ’o te Fatu, i māuruuru i te mau ta’ata i rotopū ia ’outou na ’o tei tītau mai i te mau tāpa’o, ’e te mau mea māere ho’i e roa’a mai ai te fa’aro’o, e ’ere ho’i nō te maita’i o te ta’ata nei e hanahana ai au.

13 Noa atu rā, tē hōro’a atu nei au i te mau fa’auera’a, ’e e rave rahi tei fāriu ’ē atu i tā’u mau fa’auera’a ’e ’aore ho’i i ha’apa’o i te reira.

14 I vai na ho’i i rotopū ia ’outou na te mau tāne fa’aturi ’e te mau vahine fa’aturi ; ’e ’ua fāriu ’ē atu te tahi pae mai roto atu ia ’outou na, ’e tē fa’aea noa nei ā vetahi i’ō ’outou na ’o tē fa’a’itehia atu a muri a’e.

15 ’Ia ara rātou ’e ’ia tātarahapa ’oi’oi ho’i, ’oi iri mai te utu’a i ni’a ia rātou mai te mārei ra te huru, ’e e fa’a’itehia mai tā rātou ’ohipa ma’ama’a, ’e e pe’e atu tā rātou mau ’ohipa ia rātou i mua i te mata o te ta’ata.

16 ’E ’oia mau tē parau atu nei au ia ’outou na, mai tā’u i parau ’ē na, ’o ’oia ’o tē hi’o atu i te hō’ē vahine ma te fa’ahina’aro iāna ra, ’e ’aore rā mai te mea e fa’aturi vetahi i roto i tō rātou ’ā’au, e ’ore roa e noa’a ia rātou te Vārua, e huna rātou i te fa’aro’o, ’e e mata’u ho’i.

17 Nō reira vau, ’o te Fatu, i parau atu ai ē, ’o te feiā mata’u, ’e tei ti’aturi ’ore, ’e te feiā ha’avare ato’a, ’e ’o rātou ’o tē hina’aro ’e ’o te fa’atupu i te ha’avare, ’e te tai’ata, ’e te tahutahu ho’i, e noa’a ia rātou tā rātou tufa’a i roto i te reira roto ’o tē ’ama noa i te auahi ’e te gopheri, ’o te piti te reira nō te pohe.

18 ’Oia mau, tē parau atu nei au ē, e ’ore roa e noa’a ia rātou te tufa’a i roto i te ti’afa’ahoura’a mātāmua.

19 ’E i teienei inaha, tē parau atu nei au, ’o te Fatu, ’ia ’outou ē ’aore roa ’outou i fa’ati’ahia, nō te mea tē vai nei teie mau mea i rotopū ia ’outou na.

20 Noa atu rā i te reira, ’o ’oia ’o tē ha’apa’o maita’i noa ma te fa’aro’o ’e ’o tē ha’apa’o ho’i i tō’u hina’aro, ’o ’oia ïa ’o tē upo’oti’a, ’e e fāri’i ho’i ’oia i te ’āi’a i ni’a i te fenua nei ’ia tae i te mahana nō te fa’ahuru-’ē-ra’a ;

21 ’Ia fa’ahuru-’ē-hia te fenua nei, ’ia au ho’i i te hōho’a ’o tei fa’a’itehia atu i tā’u mau ’āpōsetolo i ni’a i te mou’a ; ’e ’aore ho’i te ’īra’a nō te reira tuatāpapara’a i noa’a ia ’outou na.

22 ’E i teienei, ’oia mau tē parau atu nei au ia ’outou na ē, mai tā’u i parau atu ra ē e fa’a’ite atu vau i tō’u hina’aro ia ’outou na, inaha e fa’a’ite atu vau i te reira ia ’outou, ’eiaha nā roto i te fa’auera’a, nō te mea e rave rahi ho’i ’o tē ’ore roa e ha’apa’o maita’i i tā’u mau fa’auera’a.

23 ’Ei iāna rā ’o tē ha’apa’o i tā’u mau fa’auera’a e hōro’a atu ïa vau i te mau parau ’aro nō tō’u bāsileia, ’e e riro te reira i roto iāna ’ei ’āpo’o pape ora, i te piha’ara’a ē tae noa atu i te ora mure.

24 ’E i teienei, inaha, ’o teie ïa te hina’aro o te Fatu ra tō ’outou Atua nō ni’a i tōna feiā mo’a, ’ia ha’aputuputu atu rātou i te fenua nō Ziona, ’eiaha nā roto i te rū noa, ’o te tupu mai te ’āhuehue ’o tē fa’atupu mai i te ma’i ’ino roa.

25 Inaha, te fenua nō Ziona—tē tāpe’a nei au, ’o te Fatu, i te reira i roto i tō’u iho nā rima ;

26 Noa atu rā, tē hōro’a atu nei au ’o te Fatu, i tā Kaisara mau mea ia Kaisara.

27 Nō reira, tē hina’aro nei au, ’o te Fatu, ’ia ho’o mai ’outou i te mau fenua, ’ia upo’oti’a ’outou i tō te fenua nei, ’ia riro ’outou ’ei fatu i ni’a i te ao nei, ’ia ’ore tō rātou riri ’ia tupu mai.

28 Tē fa’atupu nei ho’i Sātane i te riri i roto i tō rātou ’ā’au ’ia riri rātou ia ’outou, ē tae noa atu i te ha’amani’ira’a toto.

29 Nō reira, e ’ore roa te fenua nō Ziona e roa’a, maori rā nā roto i te ho’o ’e ’aore rā nā roto i te toto, ’ia ’ore rā, ’aore ïa tō ’outou e ’āi’a i reira.

30 ’E mai te mea nā roto i te ho’o ra, inaha e ao ïa tō ’outou ;

31 ’E mai te mea nā roto i te toto ra, nō te mea ’ua ’ōpanihia ’outou ’eiaha ’ia ha’amani’i i te toto, inaha, tei ni’a ïa tō ’outou mau ’enemi ia ’outou na, ’e e hāmani-’ino-hia ’outou mai terā ’oire i terā ’oire, ’e mai terā sunago i terā sunago ra, ’e e mea iti roa tē toe mai nō te fāri’i i te ’āi’a.

32 ’Ua riri au, ’o te Fatu, i te feiā parauti’a ’ore ; tē tāpe’a mai nei au i tō’u Vārua i te mau ta’ata o te fenua nei.

33 ’Ua tapu ihora vau i roto i tō’u riri ’ū’ana, ’e ’ua fa’atupu ihora vau i te mau tama’i i ni’a i te fenua nei, ’e nā te feiā parauti’a ’ore e taparahi atu i te feiā parauti’a ’ore, ’e e tae mai te mata’u i ni’a i te mau ta’ata ato’a.

34 E fātata ato’a ho’i te feiā mo’a i te pohe ; noa atu rā ïa, tei pīha’i iho vau, ’o te Fatu, ia rātou ra, ’e e haere mai au i raro nei mai te ra’i mai mai mua mai i te aro o tō’u Metua ’e e ha’amou i te feiā parauti’a ’ore i te auahi pohe ’ore ra.

35 ’E inaha, ’aita teie mea e tupu i teienei, tē vai ra rā te tau.

36 Nō reira, nō te mea ’ua fa’atupu vau, ’o te Fatu, i teie mau mea ato’a i ni’a i te fenua nei, tē hina’aro nei au ’ia ha’aputuputuhia tō’u feiā mo’a i ni’a i te fenua nō Ziona ;

37 ’E ’ia rave te ta’ata tāta’itahi i te parauti’a i roto i tōna rima ’e ’ia ru’uru’u i tōna tau’upu i te ha’apa’o maita’i, ’e ’ia fa’ateitei i te reo fa’aara i tō te ao nei ; ’e ’ia fa’a’ite atu nā roto i te parau ’e nā roto i te horo ē e tae mai te ha’amoura’a i ni’a i te feiā parauti’a ’ore.

38 Nō reira, ’ia fa’anahonaho tā’u mau pipi ’o tē pārahi nei i Kirtland i tā rātou ra mau ’ohipa nō te pae tino nei, ’o rātou ho’i ’o tē pārahi nei i ni’a i teie nei fa’a’apu.

39 ’A tu’u atu i tō’u tāvini ra ia Titus Billings, ’o tē ha’apa’o nei i te reira, ’ia ho’o atu i te fenua, ’ia ineine ’oia ’ia tae i te ha’amatara’a nō te tau māhanahana ’ia haere atu i ni’a i te fenua nō Ziona, i pīha’i iho ia rātou ’o tē pārahi nei i ni’a iho i te reira, maori rā ia rātou tā’u e tāpe’a mai iā’u iho nei, ’o tē ’ore e haere atu ē tae noa atu i te taime au e fa’aue ai ia rātou.

40 ’E ’ia hāponohia te mau moni ato’a, ’o tei ti’a ’ia ravehia, ’aita e pe’ape’a iā’u nei ’ia iti ’e ’aore rā ’ia rahi, i te fenua nō Ziona, ia rātou ra ’o tā’u i fa’ata’a ’ia fāri’i.

41 Inaha, na’u, nā te Fatu, e hōro’a atu i tō’u tāvini ra ia Iosepha Semita, tamaiti, te mana ’ia ti’a iāna ’ia ’ite, nā roto i te Vārua, ’o vai tē haere atu i ni’a i te fenua nō Ziona, ’e ’o vai, i rotopū i tā’u mau pipi, ’o tē fa’aea mai.

42 ’Ia tāpe’a tō’u tāvini ra ’o Newel K. Whitney, i tāna fare toa, ’oia ho’i te fare ho’ora’a tao’a, nō te hō’ē tau poto fa’ahou ā.

43 Noa atu rā ïa, ’ia hōro’a atu ’oia i te moni pā’āto’a tei ti’a iāna ’ia hōro’a atu, ’ia hāponohia atu i ni’a i te fenua nō Ziona ra.

44 Inaha, tei roto teie nei mau ’ohipa i tōna iho rima ; ’ia ha’apa’o ’oia ma te pa’ari.

45 ’Oia mau, tē parau atu nei au, ’ia fa’atōro’ahia ’oia ’ei ta’ata ha’apa’o nō te mau pipi ’o tē fa’aea mai, ’e ’ia fa’atōro’ahia ’oia i teie nei mana ;

46 ’E i teienei ’a fārerei ’oi’oi atu ’oe ’e tō’u tāvini ’o Oliver Cowdery i te mau ’ēkālesia, ma te parau ha’amāramarama atu i teie nei mau mea ia rātou. Inaha, ’o teie ïa tō’u hina’aro, ’ia noa’a te mau moni mai te au i tā’u i fa’ata’a.

47 ’O ’oia ’o tē ha’apa’o maita’i noa ’e ’ua tāmau noa, e upo’oti’a ïa ’oia i te ao nei.

48 ’O ’oia ’o tē hāpono atu i te tao’a i te fenua ra nō Ziona e fāri’i ïa ’oia i te ’āi’a i roto i teie nei ao, ’e e pe’e mai tāna mau ’ohipa iāna ra, ’e te utu’a maita’i ato’a i roto i te ao e tae mai ra.

49 ’Oia ïa, e ao tō tei pohe i roto i te Fatu ra, mai teie nei atu ā. ’Ia tae mai te Fatu ra, ’e ’ia pau te mau mea tahito ra, ’e ’ia riro mai te mau mea ato’a ’ei mea ’āpī, e ti’a mai ai rātou mai roto mai i te pohe ra, ’e e ’ore roa ho’i e pohe a muri atu, ’e e fāri’i ho’i i te ’āi’a i mua i te Fatu, i roto i te ’oire mo’a ra.

50 ’E ’o ’oia ’o tē ora ra ’ia tae mai te Fatu, ’e ’ua tāpe’a ho’i i te fa’aro’o, e ao ïa tōna ; noa atu rā i te reira, ’ua fa’ata’ahia iāna ’ia pohe atu i te tau i ha’apa’ohia nō te ta’ata nei.

51 Nō reira, e tupu noa te mau tamari’i ē pa’ari noa atu ; e pohe atu te mau ta’ata pa’ari ; e ’ore rā rātou e ta’oto i raro i te repo, e fa’ahuru-’ē-hia rā rātou mai te ’amora’a mata te vitiviti.

52 Nō reira, ’o teie te tumu i poro haere atu ai te mau ’āpōsetolo i tō te ao nei i te parau nō te ti’afa’ahoura’a ’o tei pohe.

53 ’O teie ho’i te mau mea tei ti’a ia ’outou ia tīa’i ; e mai te au i tā te Fatu e parau ra, ’ua fātata mai taua mau mea nei i teienei, ’e tei te hō’ē tau ’o tē tae mai, ’oia ïa i te mahana nō te taera’a mai o te Tamaiti a te Ta’ata nei.

54 ’E ē tae noa atu i te reira hora e pārahi noa mai ho’i te mau pāretenia ma’ama’a i rotopū i te feiā pa’ari ; ’e i te reira hora e tae mai ai te fa’ata’a-’ē-ra’a o te feiā parauti’a ’e te feiā parauti’a ’ore ; ’e i te reira mahana vau e tono atu ai i tā’u mau melahi ’ia ’īriti ’ē atu i te feiā parauti’a ’ore ’e ’ia huri atu ia rātou i roto i te auahi pohe ’ore.

55 ’E i teienei inaha, ’oia mau tē parau atu nei au ia ’outou na, ’aore au, ’o te Fatu, i māuruuru i tō’u tāvini ra ia Sidney Rigdon ; tē fa’ateitei ra ’oia iāna iho i roto i tōna ra ’ā’au, ’e ’aita ho’i i fāri’i i te a’ora’a, ’ua fa’a’oto rā ho’i i te Vārua ;

56 Nō reira ’aore tāna pāpa’ira’a e fāri’ihia e te Fatu, ’e e pāpa’i fa’ahou ’oia i te tahi ; ’e mai te mea ’aore te Fatu e fāri’i i te reira, inaha, e ’ore roa ’oia e ti’afa’ahou i roto i te tōro’a tā’u i fa’ata’a nōna ra.

57 ’E teie fa’ahou ā, ’oia mau tē parau atu nei au ia ’outou na, ’o rātou ’o tei hina’aro i roto i tō rātou ’ā’au, ma te marū, ’ia fa’aara i te feiā hara ’ia tātarahapa, ’ia fa’atōro’ahia rātou i te reira mana e ti’a ai.

58 E mahana ho’i teie nō te fa’aarara’a, e ’ere ho’i i te mahana nō te fa’arahi i te parau. ’E ’eiaha vau, ’o te Fatu, ’ia tahitohitohia i te mau mahana hope’a ra.

59 Inaha, nō ni’a nei au, ’e tē vai nei ā tō’u mana i raro. Tei nia a’e au i te mau mea ato’a, ’e tei roto ho’i i te mau mea ato’a, ’e nā roto ho’i i te mau mea ato’a, ’e te hi’opo’a nei i te mau mea ato’a, ’e tē tae mai ra te mahana e auraro ai te mau mea ato’a iā’u nei.

60 Inaha, ’o Alepha vau ’e ’o Omega, ’oia ’o Iesu Mesia.

61 Nō reira, ’ia ara te mau ta’ata ato’a i te huru nō tā rātou fa’ahitira’a i tō’u nei i’oa.

62 Inaha ho’i, ’oia mau tē parau atu nei au, e rave rahi te ta’ata i raro a’e i teie nei fa’ahapara’a, ’o tē fa’ahiti i te i’oa o te Fatu, ’e ’o te fa’ahiti faufa’a ’ore noa i te reira, ma te mana ’ore ho’i.

63 Nō reira, ’ia tātarahapa tō te ’ēkālesia i tā rātou mau hara, ’ei reira vau, ’o te Fatu, e fāri’i ai ia rātou ; ’ia ’ore rā, e tāpū-’ē-hia atu rātou.

64 ’A ha’amana’o ē ’o tei tae mai nō ni’a mai ra, e mea mo’a ïa, ’e ’ia parauhia te reira ma te ara maita’i e ti’a ai, ’e nā roto ho’i i te fa’aurura’a a te Vārua ; ’e nā roto i te reira e ’ore roa e noa’a te fa’ahapara’a, ’e e fāri’i ’outou i te Vārua nā roto i te pure ; nō reira, ’ia ’ore te reira, tē vai noa ra ïa te fa’ahapara’a.

65 ’Ia ’imi tō’u nā tāvini ’o Iosepha Semita, tamaiti, ’e Sidney Rigdon, i te fare nō rāua, mai te au i tei ha’api’ihia ia rāua e te Vārua nā roto i te pure.

66 Tē vai nei ā teie nei mau mea ’ia upo’oti’ahia nā roto i te fa’a’oroma’i, ’ia ti’a i te reira huru ’ia fāri’i i te teiahara’a hau a’e ’e te mure ’ore ho’i nō te hanahana, ’ia ’ore rā, ’ei fa’ahapara’a rahi a’e ïa. ’Āmene.