Tufa’a 62
E heheura’a tei hōro’ahia mai nā roto ia Iosepha Semita te peropheta, i te pae pape nō te ’ānāvai Missouri, i Chariton, i Missouri, i te 13 nō ’Ātete 1831. I te reira mahana, ’ua fārerei te peropheta ’e tāna pupu, ’o tē haere ra i Kirtland mai Independence mai, i te tahi mau peresibutero ’o tē haere ra i te fenua Ziona, ’e i muri iho i te fārereira’a ’oa’oa, ’ua fāri’i ihora ’oia i teie nei heheura’a.
1–3, ’Ua tāpa’ohia te mau ’itera’a pāpū i te ao ra ; 4–9, ’Ua tītauhia i te mau peresibutero ia tere haere ’e ’ia poro i te ’evanelia mai te ferurira’a tano ’e mai te au i te arata’ira’a a te Vārua.
1 Inaha, ’a ha’apa’o mai na ’o ’outou e te mau peresibutero nō tā’u nei ’ēkālesia, tē nā reira mai nei te Fatu ra tō ’outou Atua, ’oia ho’i ’o Iesu Mesia, tō ’outou ti’a, ’o tei ’ite i te paruparu o te ta’ata nei, ’e nāhea ’ia tauturu ia rātou ’o tē fa’ahemahia.
2 ’E ’oia mau roa ïa tei ni’a tō’u nei mata ia rātou ’o tei ’ore ā i haere atu i ni’a i te fenua ra nō Ziona ; nō reira, ’aore ā i oti tā ’outou ’ohipa.
3 Noa atu rā te reira, e ao tō ’outou, nō te mea ’ua pāpa’ihia i te ao ra te ’itera’a pāpū tā ’outou i fa’a’ite atu, ’ei hi’ora’a nā te mau melahi ; ’e tē ’oa’oa nei rātou nō ’outou, ’e ’ua fa’a’orehia tā ’outou na mau hara.
4 ’E i teienei, ’a haere noa i tō ’outou tere. ’A ha’aputuputu atu ’outou ia ’outou iho i ni’a i te fenua ra nō Ziona ; ’e ’a fa’atere i te hō’ē purera’a, ’e ’a ’oa’oa ’āmui, ’e ’a pūpū mai i te hō’ē ’ōro’a i tei Teitei Roa ra.
5 ’E i reira e ti’a ai ia ’outou ’ia ho’i mai nō te fa’a’ite i te parau mau, ’oia ïa, ’o ’outou ato’a, ’e ’aore rā ’ia tāta’ipiti, ’ia au i tō ’outou mana’o e maita’i ai ra, ’aita ho’i e huru ’ē iā’u nei ; maori rā ’ia ha’apa’o maita’i noa, ’e ’ia fa’a’ite atu i te parau ’āpī ’oa’oa i tō te ao nei, ’oia ho’i i rotopū i te mau ’āmuira’a o te feiā parauti’a ’ore ra.
6 Inaha, ’ua ha’aputuputu mai au, ’o te Fatu, ’ia ’outou ’ia fa’ati’ahia te fafaura’a ē e pāruruhia te feiā ha’apa’o maita’i i rotopū ia ’outou na, ’e e ’oa’oa ’āmui ho’i i te fenua nō Missouri. E hōro’a atu vau, ’o te Fatu, i te fafaura’a i te feiā ha’apa’o maita’i, ’e ’aita ho’i e ti’a iā’u ’ia ha’avare.
7 ’Ua ti’a iā’u, i te Fatu, mai te mea tē hina’aro ra te tahi i rotopū ia ’outou ’ia haere nā ni’a i te mau pua’ahorofenua, ’e ’aore rā nā ni’a i te mau niuru, ’e ’aore rā nā ni’a i te mau pere’o’o pua’ahorofenua, e fāri’i ïa ’oia i teie ha’amaita’ira’a, mai te mea ho’i e fāri’i ’oia i te reira i te rima o te Fatu ra, ma te ’ā’au māuruuru i te mau mea ato’a ra.
8 Tei ia ’outou noa teie nei mau mea ’ia rave mai te au i te ferurira’a maita’i ’e te mau arata’ira’a a te Vārua.
9 Inaha, nō ’outou te bāsileia. ’E inaha, ’e ’a hi’o mai na, tei pīha’i iho vau i te feiā ha’apa’o maita’i i te mau taime ato’a. ’Oia ïa. ’Āmene.