Tufa’a 131
Te mau arata’ira’a a Iosepha Semita, te peropheta, i hōro’ahia i Ramus, i Illinois, i te 16 ’e te 17 nō Mē 1843.
1–4, E mea tītauhia te fa’aipoipora’a tiretiera nō te fāri’i i te fa’ateiteira’a i roto i te ao teitei roa a’e ; 5–6, ’Ua ha’amāramaramahia mai e nāhea te ta’ata nei e tā’atihia ai nō te fāri’i i te ora mure ’ore ; 7–8, E mātēria te vārua ato’a.
1 I roto i te hanahana tiretiera tē vai nei e toru ao ’e ’aore rā e toru tuha’a ;
2 ’E nō te fāri’i i te fāito teitei roa a’e, e mea ti’a ïa i te ta’ata ’ia tomo i roto i teie fa’anahora’a nō te autahu’ara’a [’oia ho’i te Fafaura’a ’āpī ’e te mure ’ore nō te fa’aipoipora’a] ;
3 ’E ’ia ’ore ’oia ’ia nā reira, e ’ore roa ïa e noa’a te reira iāna.
4 E ti’a iāna ’ia tomo atu i roto i te tahi atu, terā rā ’o te hope’a te reira nō tōna bāsileia ; e ’ore roa ho’i e ti’a iāna ’ia fāri’i i te fa’arahira’a.
5 (I te 17 nō Mē 1843.) ’O teie te aura’a nō te parau pāpū a’e nō te tohura’a, ’oia ho’i, ’o te ’itera’a ïa te ta’ata ē ’ua tā’atihia ’oia nō te ora mure ’ore, nā roto i te heheura’a ’e te vārua nō te tohu, nā roto i te mana nō te Autahu’ara’a Mo’a.
6 E ’ore roa atu e ti’a i te ta’ata ’ia fa’aorahia i roto i te ’ite ’ore.
7 ’Aore roa e mea mātēria ’ore e vai nei. E mātēria te vārua ato’a ; terā rā e mea maita’i roa a’e ’e ’aore rā e mea ateate roa a’e, ’e e ’itehia te reira nā roto i te mata ateate a’e ;
8 ’Aita e ti’a ia tātou ’ia ’ite i te reira ; ’āre’a rā ’ia fa’aateate-roa-hia tō tātou tino, e ’ite ïa tātou ē e mātēria te mau mea ato’a.