1 ’A ha’apa’o mai na, ’e ’a fa’aro’o mai i te reo o te Fatu, ’o ’outou ’o tei ha’aputuputu tāhō’ē mai ia ’outou iho, ’o ’outou ho’i te mau tahu’a rahi nō tā’u nei ’ēkālesia, ’o tei hōro’ahia atu te bāsileia ’e te mana.

2 Nō te mea ’oia mau, tē nā ’ō mai nei te Fatu, e mea ti’a ïa iā’u nei ’ia fa’ata’ahia te hō’ē ’episekōpo nō ’outou, ’e ’aore rā nō roto mai ia ’outou, nō te ’ēkālesia i teie nei tufa’a o te ’ō vine a te Fatu ra.

3 ’E ’oia mau, i roto i teie nei mea ’ua rave ’outou ma te pa’ari, nō te mea ho’i ’ua ti’a i te Fatu ’ia tu’u mai te mau ti’a’au ato’a i te tuatāpapara’a nō tō rātou ti’a’aura’a, i roto i teie nei orara’a ’e i te tau mure ’ore ato’a ho’i.

4 ’O ’oia ho’i ’o tei ha’apa’o maita’i ’e ’ua pa’ari ho’i i roto i teie nei orara’a, ’ua ti’a ïa ’ia fāri’i i te mau aora’i i fa’aineinehia nōna e tō’u ra Metua.

5 ’Oia mau tē parau atu nei au ia ’outou na, e mea ti’a i te mau peresibutero nō te ’ēkālesia i roto i teie nei tufa’a o tā’u nei ’ō vine ’ia tu’u mai i te tuatāpapara’a nō tō rātou ra ti’a’aura’a i te ’episekōpo, ’o tē fa’ata’ahia e au i roto i teie tufa’a o tā’u ’ō vine nei.

6 E pāpa’ihia ho’i teie mau mea i roto i te hō’ē pāpa’a parau, ’ia hōro’ahia atu i te ’episekōpo i Ziona ra.

7 ’E e fa’a’itehia mai te ’ohipa a te ’episekōpo nā roto i te mau fa’auera’a ’o tei hōro’ahia mai na, ’e nā roto ho’i i te reo o te ’āmuira’a.

8 ’E i teienei, ’oia mau tē parau atu nei au ia ’outou na, ’o tō’u tāvini ra ’o Newel K. Whitney te ta’ata ’o tē fa’ata’ahia ’e ’o tē fa’atōro’ahia ho’i i teie nei mana. ’O teie ho’i te hina’aro o te Fatu tō ’outou Atua, tō ’outou Tāra’ehara. ’Oia mau ïa. ’Āmene.

9 Te parau a te Fatu, nō te ’āmui atu i te ture ’o tei hōro’ahia mai ra, i te fa’a’itera’a mai i te ’ohipa a te ’episekōpo ’o tei fa’atōro’ahia nō te ’ēkālesia i teie tufa’a o te ’ō vine nei, ’o teie mau ā ho’i ïa—

10 ’Ia ha’apa’o i tā te Fatu fare vaira’a tao’a ; ’ia fāri’i ho’i i te moni a te ’ēkālesia i teie tufa’a o te ’ō vine ;

11 ’Ia ha’apa’o i te tuatāpapara’a nō te mau peresibutero mai te au i tei fa’auehia na ; ’e ’ia tauturu i te mau mea tā rātou i hina’aro, ’e e ’aufau ho’i rātou nō te mau mea tā rātou e fāri’i ra, mai te mea e moni tā rātou nō te ’aufau ;

12 ’Ia ha’amo’a-ato’a-hia te reira ’ei maita’i nō te ’ēkālesia, nō te feiā veve ’e te nava’i ’ore.

13 ’E ’o ’oia ’o tei ’ere i te rāve’a ’ia ’aufau ra, e pāpa’ihia te hō’ē tuatāpapara’a nō te reira, ’e e hōro’ahia atu i te ’episekōpo nō Ziona, ’o tē ’aufau atu i te tārahu nā roto i tā te Fatu e tu’u i roto i tōna ra rima.

14 ’E te mau ’ohipa a te feiā ha’apa’o maita’i ’o tē rave i te ’ohipa nō te pae vārua ra, i te hōro’ara’a atu i te ’evanelia ’e te mau mea ho’i nō te bāsileia i te ’ēkālesia ’e i tō te ao nei ho’i, e riro ïa ’ei ’aufaura’a i te tārahu i te ’episekōpo i Ziona ra ;

15 ’E nō reira, nā roto mai ïa i te ’ēkālesia, nō te mea ho’i, ’ia au i te ture, e tu’u atu te mau ta’ata ato’a ’o tē haere mai i Ziona ra, i te mau mea ato’a i mua i te ’episekōpo i Ziona ra.

16 ’E i teienei, ’oia mau tē parau atu nei au ia ’outou na, ’e nō te mea e mea ti’a i te peresibutero tata’ihō’ē i roto i teie nei tufa’a o te ’ō vine ’ia hōro’a atu i te tuatāpapara’a nō tōna ra ti’a’aura’a i te ’episekōpo i roto i teie nei tufa’a o te ’ō vine ra—

17 Nā te hō’ē parau ha’apāpū ïa a te ha’avā, ’oia ho’i te ’episekōpo i roto i teie nei tufa’a o te ’ō vine, ’o tē hōro’ahia i te ’episekōpo i Ziona ra, e fa’a’ite i te ha’apa’o maita’i o te hō’ē ta’ata, ’e e ti’a ’ia hōro’ahia iāna te hō’ē ’āi’a, ’o tāna e fāri’i mai te ti’a’au pa’ari ’e te rave ’ohipa ha’apa’o maita’i ;

18 ’Ia ’ore rā, e ’ore ’oia e fāri’ihia e te ’episekōpo nō Ziona ra.

19 ’E i teienei, ’oia mau tē parau atu nei au ia ’outou na, te peresibutero tāta’itahi ato’a ’o tē tu’u atu i te tuatāpapara’a i te ’episekōpo nō te ’ēkālesia i roto i teie nei tufa’a o te ’ō vine, ’ia hōro’ahia iāna te parau fa’ati’a e te ’ēkālesia ’e ’aore rā e te mau ’ēkālesia tei reira ’oia i te ravera’a i te ’ohipa, ’ia ti’a iāna ’ia fa’ariro iāna iho ’e tāna mau parau tuatāpapa ho’i ’ei mea fāri’ihia i roto i te mau mea ato’a.

20 ’E teie fa’ahou ā, ’a tu’u atu i tō’u mau tāvini ’o tei fa’ata’ahia ’ei mau ti’a’au i ni’a i te mau ’ohipa nō te mau pāpa’ira’a o tā’u nei ’ēkālesia ’ia tītau i te tauturura’a i te ’episekōpo ’e ’aore rā i te mau ’episekōpo i roto i te mau mea ato’a ra—

21 ’Ia ti’a i te mau heheura’a ’ia nene’ihia ’e ’ia fa’ahaerehia atu i te mau hope’a o te fenua nei ; ’ia roa’a ato’a ia rātou te moni nō te ha’amaita’i i te ’ēkālesia i roto i te mau mea ato’a ra ;

22 ’Ia ti’a ato’a ia rātou ’ia fa’ariro ia rātou iho ’ei feiā ha’apa’o i roto i te mau mea ato’a ra, ’e ’ia tai’ohia ho’i ’ei ti’a’au pa’ari.

23 ’E i teienei, inaha, e riro ho’i teie ’ei hi’ora’a nā te mau ’āma’a i te mau vāhi ato’a nō tā’u nei ’ēkālesia, i te mau fenua ato’a rātou e fa’ati’ahia ai ra. ’E i teienei, tē fa’aoti nei au i tā’u mau parau. ’Āmene.

24 Te tahi mau parau ri’i ’ei ’āpitira’a i te mau ture nō te bāsileia, nō ni’a i te mau melo nō te ’ēkālesia—’o rātou ’o tei fa’ata’ahia e te Vārua Mo’a ’ia haere atu i ni’a i Ziona ra, ’e ’o rātou ho’i ’o tē fa’ati’ahia ’ia haere atu i ni’a i Ziona ra—

25 ’Ia ’āfa’i atu rātou i te hō’ē parau ha’apāpū i te ’episekōpo nō ’ō mai i nā peresibutero to’otoru nō te ’ēkālesia, ’e ’aore rā i te hō’ē parau ha’apāpū nō ’ō mai i te ’episekōpo ;

26 ’Ia ’ore rā, e ’ore ïa ’oia ’o tē haere atu i ni’a i te fenua nō Ziona e tai’ohia ’ei ti’a’au pa’ari. E hi’ora’a ato’a ho’i teie. ’Āmene.