Tufa’a 46
E heheura’a tei hōro’ahia mai nā roto ia Iosepha Semita te peropheta, i te ’Ēkālesia, i Kirtland, i Ohio, i te 8 nō Māti 1831. I te taime mātāmua roa nō te ’Ēkālesia ’aita te hō’ē fa’anahora’a ta’a ’ē i fa’aotihia nō ni’a i te fa’aterera’a i te mau purera’a a te ’Ēkālesia. Terā rā, ’ua riro ’ei peu huru mātauhia ’ia fa’ati’a i te mau melo ana’e ’e te mau ta’ata ana’e e tītau ra i te ’ite nō ni’a i te ’Ēkālesia ’ia tomo mai i roto i te mau purera’a ’ōro’a ’e te tahi atu mau putuputura’a a te ’Ēkālesia. Tē fa’a’ite ra teie heheura’a i te hina’aro o te Fatu nō ni’a i te fa’aterera’a ’e te arata’ira’a i te mau purera’a ’e tāna arata’ira’a nō ni’a i te ’imira’a ’e te haro’aro’ara’a i te mau hōro’a o te Vārua.
1–2, E fa’atere te mau peresibutero i te mau purera’a mai te au i te arata’ira’a a te Vārua Mo’a ; 3–6, ’Eiaha roa ’ia ’ōpani i te mau ta’ata e ’imi ra i te parau mau ’ia haere mai i te mau purera’a ’ōro’a ; 7–12, ’A ani i te Atua ’e ’a tītau i te mau hōro’a a te Vārua ; 13–26, ’Ua fa’a’itehia mai te tāpura nō te tahi o teie mau hōro’ara’a ; 27–33, ’Ua hōro’ahia mai te mana i te feiā fa’atere nō te ’Ēkālesia ’ia ’ite maita’i i te mau hōro’a a te Vārua.
1 ’A ha’apa’o mai na ’o ’outou e te mau ta’ata nō tā’u nei ’ēkālesia ; nō te mea ’oia mau tē parau atu nei au ia ’outou na, ’ua parauhia teie nei mau mea ia ’outou ’ei faufa’a nō ’outou ’e ’ei ha’api’ira’a ho’i ia ’outou.
2 Terā rā, noa atu i taua mau mea ’o tei pāpa’ihia ra, ’ua fa’ata’ahia ïa te mau peresibutero nō tā’u nei ’ēkālesia, mai te mātāmua mai ā, ’e e nā reira-noa-hia, ’ia fa’atere i te mau putuputura’a ato’a mai te au i tei fa’a’itehia ’e tei fa’auruhia e te Vārua Mo’a ra.
3 Noa atu rā i te reira, ’ua fa’auehia ’outou ē ’eiaha roa e huri atu i te hō’ē ta’ata i rāpae i tā ’outou mau putuputura’a, ’o tei fa’atupuhia i mua i tō te ao ato’a nei.
4 ’Ua fa’aue-ato’a-hia ’outou ē ’eiaha roa ’outou e huri atu i te hō’ē melo nō te ’ēkālesia i rāpae i tā ’outou mau purera’a ’ōro’a ; ’āre’a rā, mai te mea ’ua hapa te hō’ē ra, ’eiaha ïa ’oia ’ia rave i te ’ōro’a ē tae noa atu i te taime ’oia e tātarahapa ai.
5 ’E tē parau fa’ahou atu nei au ia ’outou na, ’eiaha ’outou e huri atu i te hō’ē ta’ata ’o tei ’ana’anatae i te ’imira’a i te bāsileia, i rāpae i tā ’outou mau purera’a ’ōro’a—tē parau nei au i teie nō ni’a i te feiā e ’ere rātou i tō te ’ēkālesia.
6 ’E tē parau fa’ahou atu nei au ia ’outou na, nō ni’a i tā ’outou mau purera’a ha’amaura’a ra, mai te mea ē tē vai ra te tahi mau ta’ata e ’ere i tō te ’ēkālesia, ’o tei ’imi mau i te bāsileia ra, ’eiaha roa ’outou e huri atu ia rātou i rāpae.
7 Terā rā, ’ua fa’auehia ’outou i roto i te mau mea ato’a ’ia ani i te Atua ’o tē hōro’a noa mai ; ’e ’o tā te Vārua e fa’a’ite ia ’outou ’o tā’u ïa i hina’aro ’ia rave-mau-hia e ’outou nā roto i te ’ā’au mo’a ra, ma te haere parauti’a i mua i tō’u nei aro, ma te ha’amana’o i te hope’a o tō ’outou ora, i te ravera’a i te mau mea ato’a ma te pure ’e te ha’amāuruuru, ’ia ’ore ’outou ’ia ha’avarehia e te mau vārua ’ino ra, ’e ’aore rā e te mau ha’api’ira’a a te mau diabolo, ’e ’aore rā e te mau fa’auera’a a te ta’ata nei ; nō te mea, nā te ta’ata nei te tahi tufa’a, ’e nā te mau diabolo te tahi tufa’a.
8 Nō reira, ’a ara na ’outou ’o te ha’avarehia ’outou ; ’e ’ia ’ore ’outou ’ia vare, ’a ’imi māite ’outou i te mau hōro’a maita’i roa, ma te ha’amana’o noa i te tumu i hōro’ahia mai ai te reira ;
9 Nō te mea ’oia mau tē parau atu nei au ia ’outou na, ’ua hōro’ahia mai te reira ’ei maita’i nō rātou ’o tei here iā’u nei ’e ’o tei ha’apa’o noa i tā’u mau fa’auera’a ato’a, ’e iāna ato’a ’o tē tāmata ’ia nā reira ; ’ia ha’amaita’ihia rātou ato’a ’o tei ’imi mai ’e ’o tei ani mai ho’i iā’u nei, ’o tei ani mai ’eiaha rā nō te tāpa’o, ’ia ha’amāu’a rātou i te reira i ni’a i tō rātou ra mau hina’aro ti’a ’ore.
10 ’E teie fa’ahou ā, ’oia mau tē parau atu nei au ia ’outou na, tē hina’aro nei au ’ia ha’amana’o noa ’outou, ’e ’ia vai noa i roto i tō ’outou ferurira’a ē e aha mau ra taua mau hōro’a ra ’o tei hōro’ahia i te ’ēkālesia.
11 Nō te mea, ’aore te mau hōro’a ato’a i hōro’ahia nā te mau ta’ata tāta’itahi ato’a ; e rave rahi ho’i te mau hōro’a, ’e ’ua hōro’ahia mai te hō’ē hōro’a i te ta’ata tāta’itahi ato’a e te Vārua o te Atua ra.
12 I te tahi pae ’ua hōro’ahia hō’ē, ’e i te tahi pae ’ua hōro’ahia te tahi ’ē atu, ’ia maita’i te tā’āto’ara’a nā roto i te reira.
13 I te tahi pae ’ua hōro’ahia e te Vārua Maita’i ’ia ’ite ē ’o Iesu Mesia te Tamaiti a te Atua, ’e ’ua fa’asātaurohia ho’i ’oia nō te mau hara a tō te ao nei.
14 Ia vetahi ’ē ra ’ua hōro’ahia ’ia ti’aturi i tā rātou ra mau parau, ’ia noa’a ato’a ia rātou te ora mure ’ore, mai te mea e tāmau noa rātou i roto i te fa’aro’o.
15 ’E teie fa’ahou ā, i te tahi pae ’ua hōro’ahia mai e te Vārua Maita’i ’ia ’ite i te mau vāhi huru ’ē nō te fa’aterera’a, mai te au i tei ha’amāuruuru i te Fatu hō’ē ra, mai te au ho’i i tō te Fatu ra hina’aro, ma te fa’aau i tōna ra mau aroha i te huru o te mau tamari’i a te ta’ata nei.
16 ’E teie fa’ahou ā, ’ua hōro’ahia mai e te Vārua Maita’i i te tahi pae ’ia ’ite i te huru o te mau ’ohipa, nō ’ō mai ānei i te Atua, ’ia hōro’ahia mai te mau fa’a’itera’a a te Vārua i te ta’ata tāta’itahi ’ia maita’i rātou i te reira.
17 ’E teie fa’ahou ā, ’oia mau tē parau atu nei au ia ’outou na, i te tahi pae, ’ua hōro’ahia e te Vārua o te Atua te parau pa’ari.
18 I te tahi ’ē ra ’ua hōro’ahia ïa te parau e noa’a ai te ’ite, ’ia ha’api’ihia atu te mau ta’ata ato’a ’ia ’imi i te pa’ari ’e te māramarama.
19 ’E teie fa’ahou ā, ’ua hōro’ahia i te tahi mau ta’ata te fa’aro’o ’ia fa’aorahia te ma’i ;
20 ’E ia vetahi ’ē ra ’ua hōro’ahia ïa te fa’aro’o nō te fa’aora atu i te ma’i.
21 ’E teie fa’ahou ā, ’ua hōro’ahia i te tahi mau ta’ata te ravera’a i te mau semeio ;
22 ’E ’ua hōro’ahia ia vetahi ’ē ra ’ia parau i te parau tohu ;
23 ’E ia vetahi ’ē ra te ’itera’a i te mau huru vārua ra.
24 ’E teie fa’ahou ā, ’ua hōro’ahia i te tahi mau ta’ata ’ia parau i te parau ’e’ē.
25 ’E i te tahi ’ē ra te tātarara’a ïa i te parau ’e’ē.
26 ’E nō ’ō mai na teie nei mau hōro’a ato’a i te Atua, ’ei maita’i nō te mau tamari’i a te Atua ra.
27 ’E ’ei te ’episekōpo nō te ’ēkālesia, ’e i te feiā ato’a tā te Atua e fa’ata’a ’e e fa’atōro’a ho’i nō te tīa’i māite i te ’ēkālesia ’e ’ei mau peresibutero nō te ’ēkālesia, e hōro’ahia ïa ia rātou ’ia ’ite i te huru nō taua mau hōro’a ato’a ra, ’oi ’itehia te tahi i rotopū ia ’outou ’o tē parau fa’ahua noa mai ē e ’ere ho’i i tā te Atua ra.
28 ’E a muri a’era ’o ’oia ’o tē ani mai nā roto i te Vārua e fāri’i ’oia nā roto i te Vārua ;
29 E hōro’ahia atu i te tahi pae ’ia fāri’i i taua mau hōro’a ato’a ra, ’ia riro te hō’ē ’ei upo’o fa’atere, ’ia maita’i te mau melo ato’a nā roto i te reira.
30 ’O tē ani mai nā roto i te Vārua ra, tē ani ra ïa mai te au i te hina’aro o te Atua ; nō reira, e ravehia ïa mai te au i tāna e ani mai.
31 ’E teie fa’ahou ā, tē parau atu nei au ia ’outou na ē, ’ia ravehia te mau mea ato’a nā roto i te i’oa o te Mesia e ti’a ai, te mau mea ato’a tā ’outou e rave nā roto i te Vārua ra ;
32 ’E ’ia ha’amāuruuru atu ’outou i te Atua nā roto i te Vārua e ti’a ai nō te mau ha’amaita’ira’a ato’a i ha’amaita’ihia ai ’outou na.
33 ’E ’ia ha’apa’o noa ’outou i te vi’ivi’i ’ore ’e te mea mo’a i mua iā’u nei e ti’a ai. ’Oia ïa. ’Āmene.