Tufa’a 94
E heheura’a tei hōro’ahia mai nā roto ia Iosepha Semita te peropheta, i Kirtland, i Ohio, i te 2 nō ’Ātete 1833. ’Ua fa’ata’ahia Hyrum Smith, Reynolds Cahoon, ’e Jared Carter ’ei tōmite patura’a fare nā te ’Ēkālesia.
1–9, ’Ua hōro’a mai te Fatu i te hō’ē fa’auera’a nō ni’a i te patura’a i te hō’ē fare nō te ’ohipa a te Peresidenira’a ; 10–12, ’Ia patuhia te hō’ē fare nene’ira’a parau ; 13–17, ’Ua fa’ata’ahia te tahi mau ’āi’a.
1 ’E teie fa’ahou ā, ’oia mau tē parau atu nei au ia ’outou na, e tō’u mau hoa, tē hōro’a atu nei au i te hō’ē fa’auera’a ia ’outou, ’ia ha’amata ’outou i te ’ohipa nō te tāpa’ora’a ’e te fa’aineinera’a i te ha’amatara’a ’e te niu nō te ’oire nō te titi nō Ziona, i’ō nei i te fenua nō Kirtland, ma te ha’amata atu i tō’u nei fare.
2 ’E inaha, ’ia ravehia ïa mai te au i te hōho’a tā’u i hōro’a atu ia ’outou na.
3 ’E ’a tu’u atu i te tufa’a fenua mātāmua i te pae apato’a ’ia ha’amo’ahia mai iā’u nei nō te fa’ati’ara’a i te hō’ē fare nō te peresidenira’a, nō te ’ohipa a te peresidenira’a, nō te fāri’ira’a mai i te mau heheura’a ; ’e nō te ’ohipa mo’a a te peresidenira’a, i roto i te mau mea ato’a nō ni’a i te ’ēkālesia ’e te bāsileia ho’i.
4 ’Oia mau tē parau atu nei au ia ’outou na, e hāmanihia te reira e pae ’ahuru ma pae ’āvae ’e e ono ’ahuru ma pae ’āvae te ’ā’anora’a ’e te roara’a nō te piha i roto ra.
5 ’E e tahua tō raro, ’e e tahua tō ni’a, mai te au ho’i i te hōho’a ’o tē hōro’ahia mai ia ’outou na a muri atu.
6 ’E e ha’amo’ahia te reira i te Fatu mai te niu atu, mai te au i te ha’apa’ora’a a te autahu’ara’a, mai te au ho’i i te hōho’a e hōro’ahia mai ia ’outou na a muri atu.
7 ’E e ha’amo’ahia te tā’āto’ara’a nō te reira i te Fatu nō te ’ohipa a te peresidenira’a.
8 ’E ’eiaha roa ’outou e fa’ati’a i te hō’ē noa atu mea vi’ivi’i ’ia tomo mai i roto i te reira ; ’e e vai tō’u hanahana i reira, ’e e vai ho’i tō’u nei aro i reira.
9 Terā rā mai te mea e tomo mai te hō’ē noa atu mea vi’ivi’i i roto i te reira, e ’ore roa ïa tō’u nei hanahana e vai i reira ; ’e e ’ore roa ho’i tō’u nei aro e tomo atu i roto i te reira.
10 ’E teie fa’ahou ā, ’oia mau tē parau atu nei au ia ’outou na, e ha’amo’ahia te piti o te tufa’a fenua i te pae apato’a iā’u nei nō te fa’ati’ara’a i te hō’ē fare iā’u nei, nō te ’ohipa nene’ira’a i te ’īritira’a nō tā’u mau pāpa’ira’a mo’a, ’e te mau mea ato’a ho’i tā’u e fa’aue atu ia ’outou na.
11 E hāmanihia te reira e pae ’ahuru ma pae ’āvae ’e e ono ’ahuru ma pae ’āvae te ’ā’anora’a ’e te roara’a ho’i nō te piha i roto ra ; ’e e tahua tō raro, ’e e tahua ho’i tō ni’a.
12 ’E e ha’amo’ahia te tā’āto’ara’a o teie nei fare i te Fatu mai te niu atu, nō te ’ohipa nene’ira’a parau, i te mau mea ato’a ho’i tā’u e fa’aue atu ia ’outou na, ’ia riro te reira ’ei mea mo’a ’e te vi’ivi’i ’ore, mai te au ho’i i te hōho’a i roto i te mau mea ato’a ’o tē hōro’ahia atu ia ’outou na.
13 ’E i ni’a iho i te toru o te tufa’a fenua tō’u tāvini ra ’o Hyrum Smith e fāri’i ai i tōna fenua ’āi’a.
14 ’E i ni’a iho i te tufa’a fenua mātāmua ’e te piti i te pae apato’erau, tō’u nā tāvini ra ’o Reynolds Cahoon ’e Jared Carter e fāri’i ai i tō rāua fenua ’āi’a—
15 ’Ia ti’a ia rātou ’ia rave i te ’ohipa tā’u i fa’ata’a nā rātou ra, ’ia riro ho’i rātou ’ei tōmite nō te hāmani i tō’u nā fare, mai te au i te fa’auera’a tā’u, tā te Fatu ra te Atua, i hōro’a atu ia ’outou na.
16 ’Eiaha teie nā fare e piti ’ia hāmanihia ē tae noa atu i te taime au e hōro’a atu ai i te fa’auera’a ia ’outou nō ni’a i te reira.
17 ’E i teienei, e ’ore roa vau e hōro’a fa’ahou atu i te hō’ē mea ia ’outou i teie taime. ’Āmene.