1 ’Oia mau tē parau atu nei au ia ’outou na, e tō’u mau hoa, inaha, e hōro’a atu vau ia ’outou i te hō’ē heheura’a ’e te fa’auera’a ho’i, ’ia ’ite ’outou i te rāve’a nō te ha’apa’o i tā ’outou mau ’ohipa nō te ora ’e te fa’aorara’a ho’i i tō ’outou mau taea’e, ’o tei ha’apurarahia atu i ni’a i te fenua nō Ziona ;

2 I tīahihia e i tā’irihia ho’i e te rima o tō’u mau ’enemi, ’ei ni’a iho ia rātou vau e nīni’i atu ai i tō’u riri ’ū’ana ma te fāito ’ore i tō’u iho taime.

3 ’Ua vaiiho noa ho’i au ia rātou ē tae roa mai i teie nei ā, ’ia ti’a ia rātou ’ia fa’a’ī roa i te fāito nō tā rātou mau ’ohipa ’ī’ino, ’ia ’ī roa ho’i tā rātou ra ’āu’a ;

4 ’E ’ia ti’a ho’i ia rātou ’o tei pi’i ia rātou i tō’u nei i’oa ’ia tā’irihia, nō te hō’ē tau poto noa, i te hō’ē tā’irira’a māuiui ’e te fa’a’oroma’i ’atā, nō te mea ’aita rātou i ha’apa’o māite i te mau ha’api’ira’a ’e te mau fa’auera’a tā’u i hōro’a atu ia rātou ra.

5 Terā rā ’oia mau tē parau atu nei au ia ’outou na, ’ua parau mana vau i te hō’ē fa’auera’a mana, ’o tā tō’u mau ta’ata e ’ite, mai te mea e ha’apa’o mai rātou, mai teie iho hora atu ā, i te a’ora’a tā’u, tā te Fatu tō rātou ra Atua, e hōro’a atu ia rātou ra.

6 Inaha e ha’amata rātou i te ha’avī atu i tō’u mau ’enemi mai teie iho hora atu ā, nō te mea ’ua parau mana vau i te reira.

7 ’E nā roto i te ha’apa’o-maita’i-ra’a i te mau parau tā’u, tā te Fatu tō rātou ra Atua, e parau atu ia rātou, e ’ore roa rātou e fa’aea i te upō’ōti’ara’a ē tae noa atu i te taime e ha’avīhia atu ai te mau bāsileia o te ao nei i raro a’e i tō’u nei ’āvae, ’e ’ua hōro’ahia atu te fenua nei i te feiā mo’a, ’ia fāri’i ho’i i te reira ē a muri ē a muri noa atu.

8 Terā rā mai te mea ē ’aita rātou e ha’apa’o i tā’u mau fa’auera’a, ’e ’aita ho’i e ha’apa’o i tā’u mau parau ato’a, e upo’oti’a ïa te mau bāsileia o te ao nei i ni’a ia rātou ra.

9 ’Ua tu’uhia ho’i rātou ’ia riro ’ei māramarama i tō te ao nei, ’e ’ia riro ho’i ’ei mau fa’aora nō te ta’ata nei ;

10 ’E mai te mea ho’i e ’ere rātou i te mau fa’aora nō te ta’ata nei, ’ua riro ïa rātou mai te miti mā’aro ra, ’e ’ua faufa’a ’ore atu ra ho’i, maori rā ’ia hurihia atu i rāpae ’e ’ia ta’ata’ahihia i raro a’e i te ’āvae o te ta’ata nei.

11 Terā rā ’oia mau tē parau atu nei au ia ’outou na, ’ua parau mana vau ē e ho’i mai tō ’outou mau taea’e i te fenua nō tō rātou ’āi’a, ’oia ’o rātou ’o tei ha’apurara-’ē-hia atu, ’e e fa’ati’a mai ho’i rātou i te mau vāhi ano nō Ziona ra.

12 Nō te mea i muri a’e i te mau ’ati rahi e rave rahi, mai te au i tā’u i parau ia ’outou i roto i te hō’ē fa’auera’a nā mua a’era, e tae mai ai te ha’amaita’ira’a.

13 Inaha, ’o teie ho’i te ha’amaita’ira’a tā’u i fafau atu, ’ia oti ana’e tō ’outou mau ’ati, ’e te mau ’ati ho’i o tō ’outou mau taea’e, ’oia ho’i, ’o tō ’outou ïa fa’aorara’a, ’e te fa’aorara’a ho’i o tō ’outou mau taea’e, ’oia tō rātou fa’aho’ira’ahia i te fenua nō Ziona, ’ia ha’amauhia atu i reira, ’eiaha ho’i ’ia huri-fa’ahou-hia atu i raro.

14 Noa atu rā ïa, mai te mea e ha’avi’ivi’i rātou i tō rātou ra mau ’āi’a, e hurihia atu ïa rātou i raro ; nō te mea e ’ore roa vau e fa’aherehere ia rātou mai te mea e ha’avi’ivi’i rātou i tō rātou mau ’āi’a.

15 Inaha, tē parau atu nei au ia ’outou na, ’ia tae mai te fa’aorara’a ia Ziona nā roto i te mana e ti’a ai ;

16 Nō reira, e fa’ati’a mai au i te hō’ē ta’ata nō tō’u feiā, nō te arata’i ia rātou mai te au i tā Mose i arata’i i te mau tamari’i nō ’Īserā’ela.

17 E tamari’i ho’i ’outou nō ’Īserā’ela, ’e nō roto mai ho’i i te hua’ai o Aberahama, ’e ’ia arata’ihia mai ’outou mai roto mai i te fa’atītīra’a nā roto i te mana e ti’a ai, ’e nā roto ho’i i te rima i fa’atorohia ra.

18 ’E mai tō ’outou mau metua i arata’ihia i te mātāmua ra, e riro ïa te fa’aorara’a ia Ziona mai te reira.

19 Nō reira, ’eiaha roa tō ’outou ’ā’au e taiā, nō te mea ’aita ho’i au e parau atu nei ia ’outou mai tā’u i parau i tō ’outou mau metua : E haere atu tā’u melahi i ni’a nā mua ia ’outou, ’eiaha rā tō’u nei aro.

20 Terā rā tē parau atu nei au ia ’outou na : E haere atu tā’u mau melahi i ni’a nā mua ia ’outou, ’e tō’u ato’a nei aro, ’e tē vai ra te tau e riro ai ia ’outou te fenua maita’i.

21 ’Oia mau, ’oia mau tē parau atu nei au ia ’outou na, ’o tō’u tāvini ra ’o Iosepha Semita, tamaiti, te ta’ata ’o tā’u i fa’aau i te tāvini ’o tā te Fatu nō te ’ō vine i parau i roto i te parabole tā’u i hōro’a atu ia ’outou.

22 Nō reira, nā tō’u tāvini ’o Iosepha Semita, tamaiti, e parau atu i tei pūai nō tō’u ’utuāfare, tō’u mau ta’ata ’āpī ’e tei huru pa’ari ho’i—’A ha’aputuputu atu ’outou ia ’outou iho i te fenua nō Ziona, i ni’a iho i te fenua tā’u i ho’o mai i te moni tei ha’amo’ahia mai iā’u nei.

23 ’E ’a tu’u atu i te mau ’ēkālesia ato’a ’ia tono atu i te mau ta’ata ’aravihi ’e tā rātou mau moni ato’a, ’e ’ia ho’o mai i te mau fenua mai te au i tā’u i fa’aue atu ia rātou ra.

24 ’E mai te mea e haere mai tō’u mau ’enemi i ni’a ia ’outou nō te tīahi atu ia ’outou i rāpae i tō’u fenua maita’i, tā’u i ha’amo’a atu ’ia riro ’ei fenua nō Ziona, ’oia i rāpae i tō ’outou iho mau fenua i muri a’e i teie nei mau parau fa’a’ite pāpū tā ’outou i ’āfa’i mai i mua iā’u nei ’ei fa’ahapara’a ia rātou ra, e ’anatema roa atu ’outou ia rātou ;

25 ’E ’o rātou tā ’outou e ’anatema atu, ’o tā’u ato’a ïa e ’anatema atu, ’e ’a tāho’o ’outou i tō’u ra mau ’enemi.

26 ’E ’ei pīha’i iho vau ia ’outou i roto i tā ’outou tāho’ora’a i tō’u mau ’enemi, ē tae noa atu i te toru ’e te maha o te u’i nō te feiā ’o tei au ’ore mai iā’u nei.

27 ’Eiaha roa te hō’ē ta’ata e mata’u ’ia hōro’a i tōna ora nō’u nei ; nō te mea ’o ’oia ’o tē hōro’a i tōna ora nō’u nei e noa’a fa’ahou mai ā te reira iāna.

28 ’E ’o ’oia tei ’ore i hina’aro ’ia hōro’a i tōna ora nō’u nei, e ’ere ïa ’oia i te pipi nā’u.

29 ’O tō’u hina’aro ïa ’ia fa’ateitei atu tō’u tāvini ra ’o Sidney Rigdon i tōna reo i rotopū i te mau putuputura’a i te mau tufa’a fenua i te hiti’a o te rā, nō te fa’aineine i te mau ’ēkālesia ’ia ha’apa’o i te mau fa’auera’a tā’u i hōro’a atu ia rātou nō ni’a i te fa’aho’ira’a ’e te fa’aorara’a ia Ziona.

30 ’O tō’u hina’aro ïa ’ia ’ore tō’u tāvini ra ’o Parley P. Pratt ’e tō’u tāvini ra ’o Lyman Wight ’ia ho’i atu i te fenua nō tō rāua mau taea’e, ē tae noa atu i te taime e noa’a mai ai ia rāua te mau pupu ta’ata nō te haere atu i ni’a i te fenua nō Ziona, ’ia ta’ihō’ē ’ahuru, ’e ’aore rā ’ia ta’ipiti ’ahuru, ’e ’aore rā ’ia ta’ipae ’ahuru, ’e ’aore rā ’ia ta’ihō’ē hānere atu, ē tae noa atu ’ua noa’a mai ia rāua e pae hānere rahira’a nō roto i te pūai o tō’u ’utuāfare.

31 Inaha, ’o teie tō’u hina’aro ; ’a ani mai ē e fāri’i ïa ’outou ; terā rā ’aita ho’i te ta’ata e ha’apa’o noa mai nei i tō’u nei hina’aro.

32 Nō reira, mai te mea ē ’aita e roa’a ia ’outou e pae hānere, ’a ’imi māite penei a’e e roa’a mai ia ’outou e toru hānere.

33 ’E mai te mea ē ’aita e roa’a ia ’outou e toru hānere, ’a ’imi māite penei a’e e roa’a mai ia ’outou hō’ē a’e hānere.

34 Terā rā ’oia mau tē parau atu nei au ia ’outou na, e fa’auera’a tā’u e hōro’a atu ia ’outou, ’eiaha ’outou e haere atu i ni’a i te fenua nō Ziona ē tae noa atu i te taime e noa’a mai ai ia ’outou hō’ē hānere nō roto i te pūai o tō’u ’utuāfare, ’o tē haere atu nā muri iho ia ’outou i te fenua nō Ziona.

35 Nō reira, mai tā’u i parau atu ia ’outou, ’a ani mai ’e e fāri’i ïa ’outou ; ’a pure ’ū’ana mai penei a’e e haere ato’a tō’u tāvini ra ’o Iosepha Semita, tamaiti, nā muri ia ’outou na, ’e ’ia peresideni i rotopū i tō’u mau ta’ata, ’e ’ia fa’anahonaho i tō’u bāsileia i ni’a i te fenua i ha’amo’ahia ra, ’e ’ia ha’amau ho’i i te mau tamari’i nō Ziona mai te au i te mau ture ’e te mau fa’auera’a tei hōro’ahia atu ’e ’o tē hōro’ahia atu ho’i ia ’outou na.

36 E upo’oti’a ’outou ’e e roa’a ato’a te hanahana ia ’outou nā roto i tō ’outou itoito, te ha’apa’o-maita’i-ra’a, ’e te pure fa’aro’o.

37 ’A tu’u atu i tō’u tāvini ra ia Parley P. Pratt ’ia tere atu nā muri iho i tō’u tāvini ra ia Iosepha Semita, tamaiti.

38 ’A tu’u atu i tō’u tāvini ra ia Lyman Wight ’ia tere atu nā muri iho i tō’u tāvini ra ia Sidney Rigdon.

39 ’A tu’u atu i tō’u tāvini ra ia Hyrum Smith ’ia tere atu nā muri iho i tō’u tāvini ra ia Frederick G. Williams.

40 ’A tu’u atu i tō’u tāvini ra ia Orson Hyde ’ia tere atu nā muri iho i tō’u tāvini ra ia Orson Pratt, i te mau vāhi ato’a tā tō’u tāvini ’o Iosepha Semita, tamaiti, e a’o ia rātou ra, ’ia tupu te mau mea tā’u i fa’aue ia ’outou na, ’e ’a vaiiho mai i te toe’a i roto i tō’u nei rima. ’Oia ïa. ’Āmene.