Tufa’a 8
E heheura’a tei hōro’ahia mai nā roto ia Iosepha Semita te peropheta, ia Oliver Cowdery, i Harmony, i Pennsylvania, i te ’āva’e nō ’Ēperēra 1829. ’A ’īriti-noa-hia ai te Buka a Moromona, tē rave noa ra Oliver i te ’ohipa pāpa’i parau, ma te pāpa’i i te mau parau i fa’a’itehia iāna e te peropheta, ’e ’ua hina’aro ’oia ’ia fāri’i i te hōro’a nō te ’īritira’a parau. ’Ua pāhono mai ra te Fatu i tāna tītaura’a nā roto i te hōro’ara’a mai i teie nei heheura’a.
1–5, E fāri’ihia te heheura’a nā roto i te mana o te Vārua Maita’i ; 6–12, E fāri’ihia te ’ite nō te mau mea hōhonu a te Atua ’e te mana nō te ’īriti i te mau pāpa’a parau tahito nā roto i te fa’aro’o.
1 E Oliver Cowdery, ’oia mau, ’oia mau, tē parau atu nei au ia ’oe na, mai te Fatu e ora nei, ’oia tō ’oe Atua ’e tō ’oe ho’i Tāra’ehara, mai te reira ato’a te pāpūra’a ē e noa’a ia ’oe te ’ite i te mau mea ato’a tā ’oe e ani mai nā roto i te fa’aro’o, ma te ’ā’au parauti’a, ’e ma te ti’aturi ē e fāri’i iho ā ’oe i te ’ite nō ni’a i te mau ’ō’otira’a i ni’a i te mau pāpa’a parau tahito ra, ’oia i te mea tahito roa, ’e tei roto i te reira taua mau tufa’a o tā’u mau pāpa’ira’a mo’a ’o tei parauhia na, nā roto i te fa’a’itera’a a tō’u Vārua.
2 ’Oia ïa, inaha, e fa’a’ite au ia ’oe, i roto i tō ’oe ferurira’a e’ i roto i tō ’oe ’ā’au na, nā roto i te Vārua Maita’i, ’o tē tae i ni’a ia ’oe ’e ’o tē pārahi i roto i tō ’oe ’ā’au.
3 I teienei, inaha, ’o teie te vārua o te heheura’a ; inaha, nā roto i taua vārua ra Mose i arata’i ai i te mau tamari’i o ’Īserā’ela nā roto i te miti ’Ute’ute i ni’a i te repo marō ra.
4 Nō reira, ’o teie ho’i tā ’oe hōro’a ; ’a fa’a’ohipa i te reira, ’e e ao tō ’oe, nō te mea nā te reira e fa’aora mai ia ’oe mai roto mai i te rima o tō ’oe ra mau ’enemi, ’āhiri ’aita te reira, e taparahi rātou ia ’oe ’e e ha’amou ho’i i tō vārua.
5 ’A ha’amana’o i teie nei mau parau, ’e ’a ha’apa’o i tā’u mau fa’auera’a. ’A ha’amana’o, ’o teie tā ’oe hōro’a.
6 I teienei, e ’ere teie te tā’āto’ara’a nō tā ’oe hōro’a ; nō te mea e hōro’a fa’ahou ā tā ’oe, ’oia te hōro’a a Aarona ; inaha, nā te reira ho’i i fa’a’ite mai i te mau mea e rave rahi ia ’oe na ;
7 Inaha, ’aita atu e mana, maori rā te mana o te Atua, ’o tē ti’a ’ia fa’atae atu i teie nei hōro’a a Aarona ia ’oe na.
8 Nō reira, ’eiaha e fē’a’a, nō te mea e hōro’a te reira nā te Atua ; ’e e mau noa ’oe i te reira i roto i tō ’oe nā rima, ’e e rave ’oe i te mau ’ohipa māere ; ’e ’aita hō’ē mana e ti’a ’ia ’īriti ’ē atu i te reira mai roto atu i tō ’oe nā rima, nō te mea, e ’ohipa te reira nā te Atua.
9 ’E, nō reira, ’o te mea tā ’oe e ani mai iā’u ’ia fa’a’ite atu ia ’oe na nā roto i taua rāve’a ra, ’o te reira tā’u e hōro’a atu ia ’oe na, ’e e noa’a mai ia ’oe te ’ite nō ni’a i te reira.
10 ’A ha’amana’o ē ’ia ’ore te fa’aro’o e ’ore te hō’ē mea e oti ia ’oe ; nō reira, ’a ani mai nā roto i te fa’aro’o. ’Eiaha e fa’ariro i teie mau mea ’ei mea faufa’a ’ore ; ’eiaha ho’i e ani mai i te hō’ē mea ti’a ’ore.
11 ’A ani mai ’ia ’ite ho’i ’oe i te mau parau ’aro a te Atua ra, ’e ’ia ti’a ho’i ia ’oe ’ia ’īriti i te parau ’e ’ia fāri’i ’oe i te ’ite nō roto mai i te tā’āto’ara’a o te reira mau pāpa’a parau tahito mo’a ’o tei huna-’ē-hia na ; ’e mai te au ho’i i tō ’oe fa’aro’o e nā-reira-hia ïa ia ’oe na.
12 Inaha, ’o vau nei ïa ’o tei parau atu i te reira ; ’e ’o vau ā teie ’o tei parau atu ia ’oe na mai te mātāmua mai ā. ’Āmene.