1 Inaha, tē parau atu nei au ia ’oe na, ’e nō te mea ’ua hina’aro tō’u tāvini ra ’o Martin Harris i te hō’ē fa’a’itera’a nō ’ō nei i tō’u nei rima, ’e tei ia ’oe na, e tō’u tāvini e Iosepha Semita, tamaiti, te mau ’api ’o tā ’oe i fa’a’ite atu ’e tā ’oe ho’i i pāpa’i ’e ’ua fāri’i ’oe nō ’ō nei atu iā’u nei ;

2 ’E i teienei, inaha, ’o teie ho’i te mea tā ’oe e parau atu iāna—’ua nā ’ō mai ’oia ’o tei parau mai ia ’oe na : ’O vau nei te Fatu, ’o te Atua ho’i, ’e ’ua hōro’a atu vau i teie nei mau mea ia ’oe, e tō’u tāvini e Iosepha Semita, tamaiti, ’e ’ua fa’aue ho’i ia ’oe ’ia ti’a mai ’oe ’ei ’ite nō teie nei mau mea ;

3 ’E ’ua fa’aue au ia ’oe ’ia fa’aau mai ’oe i te hō’ē fafaura’a iā’u nei, ’oia ho’i ’eiaha roa ’oe e fa’a’ite atu i taua mau mea ra maori rā i te mau ta’ata tā’u i fa’aue atu ia ’oe ’ia fa’a’ite atu ; ’e ’aita tō ’oe e mana i ni’a i taua mau ’api ra maori rā nā’u e hōro’a atu ia ’oe na.

4 ’E e hōro’a tā ’oe ’ia ’īriti mai i te mau parau i ni’a i te mau ’api ; ’e ’o teie ïa te hōro’a mātāmua tā’u i hōro’a atu ia ’oe na ; ’e ’ua fa’aue atu vau ia ’oe ’eiaha roa ’oe e tītau mai i te tahi atu ā hōro’a ē tae noa atu i te hopera’a ’o tei ’ōpuahia e au nō te reira ; nō te mea e ’ore ho’i au e hōro’a atu i te tahi atu ā hōro’a nā ’oe ē tae noa atu i te taime e oti ai te reira.

5 ’Oia mau, tē parau atu nei au ia ’oe na, e ’ati tē tae mai i ni’a i te mau ta’ata o te ao nei mai te mea ’aita rātou e ha’apa’o i tā’u mau parau ;

6 Nō te mea e fa’atōro’ahia ’oe a muri a’e, ’e e haere atu ’oe ma te fa’a’ite atu i tā’u mau parau i te mau tamari’i a te ta’ata nei.

7 Inaha, mai te mea ē ’aita rātou e ti’aturi i tā’u mau parau, e ’ore iho ā ïa rātou e ti’aturi ia ’oe, e tō’u tāvini e Iosepha, ’āhiri e nehenehe ia ’oe ’ia fa’a’ite atu ia rātou i teie nei mau mea tā’āto’a tā’u i hōro’a atu ia ’oe na.

8 ’Auē ho’i, teie nei u’i ti’aturi ’ore ’e te ’a’ī ’eta’eta ē—’ua tupu rahi tō’u riri ia rātou.

9 Inaha, ’oia mau tē parau atu nei au ia ’oe na, ’ua tāpe’a noa vau i taua mau mea tā’u i hōro’a atu ma te ti’aturi ia ’oe na, e tō’u tāvini e Iosepha, nō te hō’ē tumu pa’ari e vai nei i roto iā’u, ’e e fa’a’itehia atu te reira i te mau u’i a muri atu ;

10 E fāri’i rā teie nei u’i i tā’u nei parau nā roto ia ’oe na ;

11 E ’āmuihia i tō ’oe ’itera’a pāpū te ’itera’a pāpū nō nā tāvini to’otoru nō’u nei, ’o tā’u e mā’iti ’e e fa’atōro’a ho’i, ’o tā’u ho’i e fa’a’ite atu i teie nei mau mea, ’e e haere atu rātou ma te fa’a’ite atu i tā’u mau parau ’o tei hōro’ahia atu nā roto ia ’oe na.

12 ’Oia ïa, e ’ite pāpū roa rātou ē, e parau mau teie nei mau mea, nō te mea mai te ra’i mai au i te fa’a’ite atu i te reira ia rātou.

13 E hōro’a atu vau i te mana ia rātou ’ia ’ite mata rātou i te huru mau nō teie nei mau mea ;

14 ’E e’ita ho’i au e hōro’a i teie nei mana i te tahi ’ē atu, ’ia fāri’i i teie nei ’itera’a pāpū i rotopū i teie nei u’i, i teie nei taime, ’oia i te ha’amatara’a o te fa’ati’ara’a ’e te haerera’a mai o tā’u nei ’ēkālesia mai roto mai i te mēdēbara—mai te marama te teatea, mai te mahana te ’ana’ana, ’e mai te ri’ari’a o te nu’u fa’ehau ’e tā rātou ra mau reva.

15 ’E nā roto i te ’itera’a pāpū o nā ite to’otoru vau e fa’atae atu ai i tā’u parau.

16 ’E inaha, ’o ’oia ’o tē ti’aturi i tā’u mau parau, e fārereihia atu rātou e au nā roto i te fa’a’itera’a a tō’u nei Vārua ; ’e e fānauhia rātou iā’u nei, ’oia ïa i te pape ’e te Vārua—

17 ’E ’ia tīa’i ri’i ā ’oe e ma’a taime iti e ti’a ai, nō te mea ’aita ā ’oe i fa’atōro’ahia—

18 ’E e ha’apararehia tō rātou ’itera’a pāpū nō te fa’ahapara’a i teie nei u’i, mai te mea e fa’a’eta’eta rātou i tō rātou ’ā’au i taua nā ’ite ra.

19 Nō te mea ē e ’ati ri’ari’a rahi tē tae atu i rotopū i te mau ta’ata o te ao nei, ’e e nīni’i-noa-hia atu te reira i terā taime ’e i terā taime, mai te mea ’aita rātou e tātarahapa, ē tae noa atu i te ano-roa-ra’a o te fenua nei, ’e e ha’amouhia ’e e fa’a’ore-roa-hia ho’i te mau ta’ata o te ao nei e te ’ana’ana rahi o tō’u taera’a mai.

20 Inaha, tē fa’a’ite atu nei au i teie nei mau mea ia ’oe, mai tā’u i fa’a’ite ato’a atu i te mau ta’ata nō ni’a i te ha’amoura’a o Ierusalema ; ’e e fa’atupuhia tā’u parau i teienei mai tei fa’atupuhia i muta’a ihora.

21 ’E i teienei tē fa’aue atu nei au ia ’oe, e tō’u tāvini e Iosepha, ’ia tātarahapa ’e ’ia haere ma te parauti’a i mua iā’u nei, ’e ’eiaha roa e fa’ati’a i te mau ’umera’a a te ta’ata nei ;

22 ’E ’ia pūai noa ’oe i te ha’apa’ora’a i te mau fa’auera’a tā’u i fa’aue atu ia ’oe na ; ’e mai te mea e nā reira ’oe, inaha e hōro’a atu vau i te ora mure ’ore nō ’oe, noa atu e taparahihia ’oe.

23 ’E i teienei, tē parau fa’ahou atu nei au ia ’oe, e tō’u tāvini e Iosepha, nō ni’a i te ta’ata ’o tē hina’aro nei i te ’ite—

24 Inaha, tē parau atu nei au iāna, tē fa’ateitei nei ’oia iāna iho, ’e ’aita ho’i e nava’i tōna fa’aha’eha’ara’a iāna iho i mua iā’u nei ; terā rā mai te mea ē e pi’o ’oia i raro i mua iā’u nei, ’e e fa’aha’eha’a ’oia iāna iho nā roto i te pure ’ū’ana ’e te fa’aro’o ho’i, ma te ’ā’au tae mau ra, ’ei reira vau e fa’ati’a ai iāna ’ia hi’o i te mau mea tāna e hina’aro ra ’ia ’ite.

25 ’E i reira ’oia e parau atu ai i te mau ta’ata o teie nei u’i : Inaha, ’ua ’ite au i te mau mea tā te Fatu i fa’a’ite mai ia Iosepha Semita, tamaiti, ’e ’ua ’ite pāpū roa vau ē, e parau mau ana’e taua mau mea nei, nō te mea ’ua ’ite mata vau i te reira, ’e ’ua fa’a’itehia mai te reira iā’u nei e te mana o te Atua, ’eiaha i tō te ta’ata nei.

26 ’E tē fa’aue atu nei au ’o te Fatu nei iāna, i tō’u tāvini ra ia Martin Harris, ’eiaha ’oia e parau fa’ahou atu ia rātou nō ni’a i teie nei mau mea, maori rā ’ia parau atu ’oia ē : ’Ua ’ite mata vau i taua mau mea nei, ’e ’ua fa’a’itehia mai te reira iā’u nā roto i te mana o te Atua ; ’e ’o te reira ho’i te mau parau tāna e parau atu.

27 Terā rā, mai te mea e huna ’oia i te reira, tē ’ōfati ra ïa ’oia i te fafaura’a tāna i fafau mai iā’u nā mua a’enei, ’e inaha, e fa’ahapahia ’oia.

28 ’E i teienei, ’ia ’ore ’oia ’ia fa’aha’eha’a iāna iho ’e ’ia fā’i mai iā’u nei i te mau mea hape tāna i rave, ’e ’ia ’ore ho’i ’oia ’ia fafau mai iā’u ē e ha’apa’o ’oia i tā’u mau fa’auera’a, ma te fa’atupu i te fa’aro’o iā’u nei, inaha, tē parau atu nei au iāna, e ’ore roa ’oia e ’ite mata atu i te reira mau mea, nō te mea e’ita roa vau e fa’a’ite atu iāna i te mau mea tā’u i parau atu.

29 ’E mai te mea ’o te reira te huru, tē fa’aue atu nei au ia ’oe, e tō’u tāvini e Iosepha, ’ia parau atu ’oe iāna, ’eiaha roa ’oia e rave fa’ahou ā, ’eiaha ho’i e ha’ape’ape’a fa’ahou mai iā’u nō ni’a i teie nei mau mea.

30 ’E mai te mea ’o te reira te huru, inaha, tē parau atu nei au ia ’oe, e Iosepha, ’ia oti ia ’oe te tahi atu ā mau ’api ri’i i te ’īritihia, e fa’aea ïa ’oe nō te hō’ē tau poto, ē tae noa atu i te taime au e fa’aue fa’ahou ai ia ’oe ; ’e i reira e ti’a ai ia ’oe ’ia ’īriti fa’ahou.

31 ’E ’ia ’ore ana’e ’oe e nā reira, inaha, e fa’a’orehia ïa tā ’oe hōro’ara’a, ’e e ’īriti ’ē atu ïa vau i te mau mea tā’u i hōro’a ti’aturi atu ia ’oe na.

32 ’E i teienei, nō te mea tē ’ite nei au ē, tē tāmoemoehia nei nō te taparahi ia ’oe, ’oia ïa, tē ’ite nei au ē ’ia ’ore tō’u tāvini ’o Martin Harris ’ia fa’aha’eha’a iāna iho, ’e ’ia ’ore ’oia ’ia fāri’i i te hō’ē fa’a’itera’a nā roto i tō’u nei rima, e topa ïa ’oia i roto i te hara ;

33 ’E e rave rahi ho’i te tāmoemoe nei ’ia ha’amou ia ’oe mai ni’a atu i te fenua nei ; nō reira vau i hōro’a atu ai i teie nei mau fa’auera’a ia ’oe, ’ia ha’amaorohia tō ’oe pu’e mahana.

34 ’Oia ïa, nō reira vau i parau atu ai ē : ’A fa’aea, ’e ’a tīa’i noa ē tae noa atu i te taime au e fa’aue atu ai ia ’oe na, ’e nā’u e fa’aineine i te mau rāve’a e ti’a ai ia ’oe ’ia rave fa’aoti i te mea tā’u i fa’aue atu ia ’oe na.

35 ’E mai te mea e tāmau māite ’oe i te ha’apa’o maita’i i tā’u mau fa’auera’a, e fa’ateiteihia ïa ’oe ’ia tae i te mahana hope’a ra. ’Āmene.