Te
Ha’api’ira’a Tumu ’e te mau Fafaura’a

1 ’A fa’aro’o mai na ’o ’outou e te mau ta’ata nō tā’u nei ’ēkālesia, tē nā reira mai nei te reo nōna ’o tei pārahi i te vāhi teitei, ’e tei ni’a tōna mata i te mau ta’ata ato’a ; ’oia ïa, ’oia mau tā’u e parau atu nei : ’A fa’aro’o mai na, e te mau ta’ata i te ātea ’ē ra ; ’e ’o ’outou tei pārahi i ni’a i te mau motu o te moana ra, ’a fa’aro’o ’āmui mai na.

2 Nō te mea ’oia mau, tei te ta’ata ato’a te reo o te Fatu, ’e ’aita ho’i te hō’ē ta’ata ’o tē ’ore e fa’aro’o i te reira ; ’e ’aita te hō’ē mata ’o tē ’ore e ’ite, ’e ’aita ato’a te hō’ē tari’a ’o tē ’ore e fa’aro’o, ’e ’aita ato’a ho’i te hō’ē ’ā’au ’o tē ’ore e putapū.

3 ’E e ha’aputahia te ’ā’au o tei pāto’i i te ’oto rahi ; nō te mea e parauhia tā rātou mau ’ohipa ’ī’ino i ni’a i te mau tāpo’i fare, ’e e fa’a’itehia mai tā rātou mau ’ohipa huna.

4 ’E e tae atu te reo fa’aara i te mau ta’ata ato’a, nā roto mai i te vaha o tā’u mau pipi, ’o tā’u i mā’iti i teie mau mahana hope’a nei.

5 ’E e hāhaere atu rātou ’e ’aita roa e ti’a i te hō’ē ta’ata ’ia tāpe’a ia rātou, nō te mea nā’u nā te Fatu i fa’aue ia rātou.

6 Inaha, ’o teie tō’u ha’amanara’a, ’e te ha’amanara’a o tō’u mau tāvini, ’e tā’u ’ōmuara’a parau ho’i nō te buka o tā’u mau fa’auera’a, ’o tā’u i hōro’a atu ia rātou ’ia ha’aparare haere ia ’outou, e te mau ta’ata o te ao nei.

7 Nō reira, ’a mata’u ’e ’ia rurutaina, ’o ’outou e te mau ta’ata, nō te mea e fa’atupuhia te mau mea ato’a tā’u tā te Fatu i parau i roto i te reira.

8 ’E ’oia mau tē parau atu nei au ia ’outou na, ’o rātou ho’i ’o tē hāhaere atu, ma te hōpoi atu i teie nei mau parau i te mau ta’ata ato’a o te fenua nei, ’ua hōro’ahia ïa te mana ia rātou ’ia tā’ati i ni’a i te fenua nei ’e i te ra’i ato’a ho’i, i te feiā ti’aturi ’ore ’e te ’ōrurehau ;

9 ’Oia ïa, ’oia mau, ’ia tā’ati atu ia rātou ē tae noa atu i te mahana e nīni’ihia mai ai te riri ’ū’ana o te Atua i ni’a i te feiā parauti’a ’ore ma te fāito ’ore—

10 Ē tae noa atu ho’i i te mahana e tae mai ai te Fatu nō te hōro’a mai i te utu’a i te ta’ata tāta’itahi mai te au i tāna ’ohipa, ’e ’ia fāito atu i te ta’ata tāta’itahi mai te fāito tāna i fāito atu i tōna ra ta’ata tupu.

11 Nō reira, e tae te reo o te Fatu i te mau hope’a o te ao nei, ’ia fa’aro’o mai te mau ta’ata ato’a ’o tei hina’aro ’ia fa’aro’o :

12 ’A fa’aineine ’outou, ’a fa’aineine ’outou nō te mea ’o tē tae mai, inaha tē fātata mai nei te Fatu.

13 ’E ’ua tupu rahi te riri o te Fatu, ’e ’ua unuhihia tāna ’o’e i te ra’i ra, ’e e topa te reira i ni’a iho i te mau ta’ata ato’a o te ao nei.

14 ’E e fa’a’itehia mai te rima o te Fatu ; ’e e tae mai te mahana e tāpū-’ē-hia atu ai rātou mai rotopū atu i te mau ta’ata, ’oia ho’i ’o rātou ’o tē ’ore e fa’aro’o i te reo o te Fatu, ’e ’o tē ’ore ato’a ho’i e fa’aro’o i te reo o tōna mau tāvini, ’e ’o tē ’ore ato’a e ha’apa’o i te mau parau a te mau peropheta ’e te mau ’āpōsetolo.

15 Nō te mea, ’ua fāriu ’ē atu rātou i tā’u mau ’ōro’a, ’e ’ua ’ōfati ho’i i tā’u fafaura’a mure ’ore ;

16 ’Aita rātou e ’imi i te Fatu nō te fa’atupu i tāna parauti’a ; tē haere nei rā te ta’ata tāta’itahi i tōna ihora haere’a, ’ia au i te hōho’a o tōna iho atua, ’o tei au ho’i tōna hōho’a i te hōho’a o te ao nei, ’e tōna huru ra, ’o te huru ïa o te hō’ē ’īdolo, ’o tē riro ’ei mea tahito ’e ’o tē pohe ho’i i roto ia Babulonia, ’oia ’o Babulonia rahi, ’o tē ma’iri i raro.

17 Nō reira, ’o vau ’o te Fatu, nō tō’u ’itera’a i te ’ati rahi ’o tē tae mai i ni’a i te mau ta’ata o te fenua nei, ’ua ti’aoro atu vau i tō’u tāvini ia Iosepha Semita, tamaiti, ’e ’ua parau atu ra iāna nā roto mai i te ra’i, ’e ’ua hōro’a atu ra i te mau fa’auera’a iāna ra ;

18 ’E ’ua hōro’a ato’a ho’i i te mau fa’auera’a ia vetahi ’ē atu ā, ’ia fa’a’ite atu rātou i te reira mau mea i tō te ao nei ; ’e ’ua nā-reira-hia teie mau mea ato’a ’ia fa’ati’ahia tei pāpa’ihia e te mau peropheta—

19 E tae mai te mau mea paruparu o te ao nei ’e e ha’apararī i te mau ta’ata ’aravihi ’e te pūai, ’ia ’ore te ta’ata noa nei ’ia a’o i tōna ta’ata tupu, ’ia ’ore ho’i ’ia ti’aturi noa i te rima tāhuti nei—

20 ’Ia parau rā te mau ta’ata ato’a nā roto i te i’oa o te Atua te Fatu, ’oia ïa te Fa’aora o te ao nei ;

21 ’Ia fa’arahi-ato’a-hia te fa’aro’o i ni’a i te fenua nei ;

22 ’Ia fa’ati’ahia tā’u fafaura’a mure ’ore ;

23 ’Ia porohia atu te ’īra’a o tā’u ’evanelia e te feiā paruparu ’e te ha’eha’a ho’i i te mau hope’a o te ao nei, ’e i mua ho’i i te mau ari’i ’e te feiā fa’atere hau.

24 Inaha, ’o vau te Atua ’e ’ua parau vau i te reira ; nā’u teie nei mau fa’auera’a, ’e ’ua hōro’ahia atu i tō’u mau tāvini i roto i tō rātou ra paruparu, mai te au i tō rātou iho reo, ’ia noa’a ia rātou te ite.

25 ’E mai te mea ’ua hape rātou, ’ia fa’a’itehia mai te reira ;

26 ’E mai te mea ’ua ’imi rātou i te pa’ari, ’ia ha’api’ihia rātou ;

27 ’E mai te mea ’ua hara rātou, ’ia fa’autu’ahia rātou, ’ia ti’a ia rātou ’ia tātarahapa.

28 ’E mai te mea ’ua noa’a ia rātou te ’ā’au ha’eha’a ra, ’ia fa’arirohia rātou ’ei mea pūai, ’e ’ia ha’amaita’ihia ho’i nō ni’a mai ra, ’e ’ia fāri’i ho’i i te ’ite i terā taime ’e i terā taime.

29 ’E i muri a’e i te fāri’ira’a i te pāpa’a parau o te ’āti Nephi, ’oia mau, ’ia noa’a i tō’u tāvini ia Iosepha Semita, tamaiti, te mana nō te ’īriti i Te Buka a Moromona nā roto i te aroha o te Atua, nā roto ho’i i te mana o te Atua.

30 ’E ’o rātou ato’a ho’i ’o tei hōro’ahia teie mau fa’auera’a, ’ia noa’a mai ia rātou te mana nō te ha’amaura’a i te niu nō teie nei ’ēkālesia, ’e ’ia fa’atupu mai i te reira nō roto mai i te vāhi mo’emo’e ’e te vāhi pōiri, i te ’ēkālesia mau ’e te mea ora i ni’a i te ao pā’āto’a nei, ’e ’ua māuruuru roa vau, ’o te Fatu, i te paraura’a atu i tō te ’ēkālesia pā’āto’a, ’eiaha rā i te ta’ata tāta’ihō’ē—

31 Nō te mea, ’aita roa e ti’a iā’u, i te Fatu, ’ia hi’o noa atu i ni’a i te hara ma te fa’ati’a i te hō’ē vāhi iti noa a’e nō te reira ;

32 Noa atu rā i te reira, e fa’a’orehia te hara a te ta’ata ’o tē tātarahapa ’e ’o tē ha’apa’o i te mau fa’auera’a a te Fatu ;

33 ’E ’o ’oia ’o tē ’ore e tātarahapa ra, e rave-’ē-hia mai ïa mai iāna ra te māramarama tāna i fāri’i ; nō te mea e ’ore roa tō’u Vārua e mārō noa atu i te ta’ata, tē nā reira mai ra te Fatu Sabaota ra.

34 ’E teie fa’ahou ā, ’oia mau tē parau atu nei au ia ’outou na, e te mau ta’ata tei pārahi i ni’a i te ao nei : tē hina’aro nei au, ’o te Fatu, ’ia fa’a’ite atu i teie mau mea i te mau ta’ata ato’a ;

35 Nō te mea ’aita vau e ha’apa’o i te huru o te ta’ata, ’e tē hina’aro nei au ’ia ’ite te mau ta’ata ato’a nei ē, tē ’oi’oi mai nei te taera’a mai o te reira mahana ; ’aita ā i tae i te hora, ’ua fātata mai rā te reira, e rave-’ē-hia atu ai te hau mai ni’a atu i te ao nei, ’ei reira te diabolo e mana ai i ni’a iho i tōna iho bāsileia.

36 ’E e mana ato’a te Fatu i ni’a i tōna iho feiā mo’a, ’e e fa’atere ari’i ’oia i rotopū ia rātou, ’e e tae mai ’oia i raro nei ma te ha’avāra’a ia Idumea, ’oia ho’i te ao nei.

37 ’A ’imi māite i teie nei mau fa’auera’a, nō te mea e parau mau te reira ’e te tano, ’e e fa’atupu-pā’āto’a-hia te mau tohura’a ’e te mau fafaura’a i roto i te reira.

38 Te mau mea tā’u, tā te Fatu, i parau atu ra, ’ua parauhia ïa e au, ’e e’ita vau e ’imi i te ’ōtohera’a nō’u iho nō te reira. ’E noa atu ē, e mou te mau ra’i ’e te fenua nei, e’ita tā’u parau e mou, e fa’atupu-pā’āto’a-hia rā te reira, nā roto i tō’u iho reo ’e ’aore rā nā roto i te reo o tō’u mau tāvini, hō’ē ā ïa.

39 Inaha ho’i, ’e ’a hi’o na, ’o te Atua te Fatu, ’e te fa’a’ite pāpū mai ra te Vārua i te reira, ’e e parau mau taua fa’a’itera’a nei, ’e e vai noa te parau mau ē a muri ē a muri noa atu. ’Āmene.