1 ’Oia mau, ’oia mau, tē parau atu nei au ia ’outou na, e tō’u mau tāvini nei, mai te mea ē ’ua fa’a’ore ’outou i te hapa te tahi i te tahi ra, e nā reira ato’a vau, ’o te Fatu, i te fa’a’ore atu i tā ’outou ra.

2 Noa atu rā, tē vai ra te tahi pae i rotopū ia ’outou na ’o tei hara rahi roa ; ’oia ïa, ’ua hara ho’i ’outou ato’a ; terā rā, ’oia mau tē parau atu nei au ia ’outou na, ’ia ara noa mai teie taime atu ā, ’e ’a ha’apae roa i te hara, ’o te topa atu te mau utu’a rahi i ni’a i tō ’outou na mau upo’o.

3 Nō te mea ’o ’oia ’o tei hōro’ahia atu te mea rahi ra, e mea rahi ato’a ïa te tītauhia atu iāna ra ; ’e ’o ’oia ’o tē hara i te māramarama rahi a’e ra, e fāri’i ato’a ïa i te fa’ahapara’a rahi a’e.

4 Tē ti’aoro mai nei ’outou i tō’u nei i’oa nō te mau heheura’a, ’e tē hōro’a atu nei au i te reira ia ’outou na ; ’e mai te mea ’aore ’outou e ha’apa’o i tā’u mau parau, ’o tā’u e hōro’a atu nei ia ’outou na, e riro ’outou ’ei feiā ’ōfati ture ; ’e ’o te parauti’a ho’i ’e te ha’avāra’a ra te utu’a i tā’atihia atu i tā’u nei ture.

5 Nō reira, ’o tā’u e parau atu nei i te hō’ē ra, ’o tā’u ato’a ïa e parau atu nei i te tā’āto’ara’a : ’A ara, nō te mea tē ha’aparare nei te ’enemi i tōna mau mana, ’e tē fa’atere ari’i nei ho’i te pōiri ;

6 ’E ’ua tupu ho’i te riri o te Atua i te mau ta’ata o te ao nei ; ’e ’aore roa te hō’ē i rave i te maita’i, ’e ’ua haere atu rātou pā’āto’a i rāpae i te ’ē’a.

7 ’E i teienei, ’oia mau tē parau atu nei au ia ’outou na, e ’ore au, ’o te Fatu, e fa’atae atu i tā ’outou mau hara i ni’a ia ’outou ; ’a haere atu i tō ’outou mau tere ’e ’eiaha e hara fa’ahou ; terā rā, ’o te ta’ata ’o tē hara fa’ahou ra, e fa’aho’ihia mai tāna mau hara tahito i ni’a iāna, tē nā reira mai ra te Fatu tō ’outou ra Atua.

8 ’E teie fa’ahou ā, tē parau atu nei au ia ’outou na, tē hōro’a atu nei au i te hō’ē fa’auera’a ’āpī ia ’outou, ’ia ti’a ia ’outou ’ia ’ite i tō’u hina’aro nō ni’a ia ’outou na ;

9 ’Oia ho’i, tē hōro’a atu nei au i te mau arata’ira’a ia ’outou, ’ia ’ite ’outou i te mau mea e ti’a ia ’outou ’ia rave i mua iā’u nei, ’ia riro te reira ’ei ora nō ’outou.

10 ’Ua ru’uru’uhia vau, ’o te Fatu, ’ia rave ’outou i te mea tā’u i parau ra ; ’ia ’ore rā ’outou ’ia rave i tā’u i parau ra, ’aore ïa tā ’outou e fafaura’a i reira.

11 Nō reira, ’oia mau tē parau atu nei au ia ’outou na, e mea ti’a ïa i tō’u mau tāvini ia Edward Partridge ’e Newel K. Whitney, A. Sidney Gilbert ’e Sidney Rigdon, ’e tō’u tāvini ia Iosepha Semita, ’e John Whitmer, ’e Oliver Cowdery, ’e W. W. Phelps, ’e Martin Harris, ’ia ru’uru’u-tāhō’ē-hia rātou nā roto i te ru’uru’ura’a ’e te fafaura’a ’o tē ’ore roa e ti’a ’ia fa’a’orehia e te ’ōfatira’a ture, maori rā ’ia tae ’oi’oi mai te fa’autu’ara’a, i roto i tō ’outou mau ti’a’aura’a ta’a ’ē ra—

12 Nō te ha’apa’o i te mau ’ohipa a te feiā veve, ’e te mau mea ato’a nō te ’episekōpora’a i te fenua nō Ziona ’e i te fenua nō Kirtland ato’a ho’i ;

13 Nō te mea ’ua ha’amo’a vau i te fenua nō Kirtland i te taime i ha’apa’ohia e au ra, ’ei maita’i nō te feiā mo’a nō Tei Teitei Roa ra, ’e nō te hō’ē titi nō Ziona ra.

14 ’Ia tupu noa ho’i Ziona i te ’una’unara’a ’e i te mo’ara’a e ti’a ai ; ’ia fa’arahihia tōna ra mau ’ōti’a e ti’a ai ; ’ia ha’apūaihia tōna ra mau titi ’e ti’a ai ; ’oia ïa, ’oia mau tē parau atu nei au ia ’outou na, ’ia ti’a mai Ziona i ni’a ’e ’ia ’ō’omo ho’i i tōna ra mau ’ahu nehenehe e ti’a ai.

15 Nō reira, tē hōro’a atu nei au i teie nei fa’auera’a ia ’outou na, ’ia ru’uru’u atu ia ’outou iho i teie nei fafaura’a, ’e ’ia ravehia ho’i te reira mai te au i te mau ture a te Fatu.

16 Inaha, e pa’ari ato’a teie i roto iā’u nei ’ei maita’i nō ’outou na.

17 ’E ’ia ’aifāito ’outou, ’oia ho’i, ’ia ’aifāito tō ’outou ti’ara’a nō te mau faufa’a, nō te ha’apa’ora’a ho’i i te mau ’ohipa nō tō ’outou mau ti’a’aura’a, te ta’ata tāta’ihō’ē mai te au i tōna mau hina’aro ’e tei tītauhia ho’i e ana, mai te mea e mea ti’a tōna ra mau hina’aro—

18 ’E teie mau mea ato’a nō te maita’i o te ’ēkālesia a te Atua ora, ’ia ti’a i te ta’ata ato’a ’ia fa’arahi i tāna tārēni, ’ia noa’a i te ta’ata ato’a te tahi atu ā mau tārēni, ’oia ïa, ’ia hānere a’e te rahira’a, ’ia tu’uhia atu ho’i i roto i te fare vaira’a tao’a a te Fatu ra, ’ia riro ho’i ’ei faufa’a ’āmui nā te ’ēkālesia pā’āto’a—

19 Te ta’ata ato’a i te ’imira’a i te maita’i nō tōna ra ta’ata tupu, ’e i te ravera’a ho’i i te mau mea ato’a ra ma te mata rōtahi i te hanahana o te Atua ra.

20 ’Ua fa’ata’a vau i teie nei fa’anahora’a ’ia riro ’ei fa’anahora’a mure ’ore nā ’outou, ’e nā tō ’outou mau mono ho’i, mai te mea ’aore ’outou e rave i te hara.

21 ’E ’o te ta’ata ’o tē hara atu i teie nei fafaura’a, ’e ’o tē fa’a’eta’eta atu i tōna ra ’ā’au i te reira, e ha’avāhia ’oia mai te au i te mau ture o tā’u nei ’ēkālesia, ’e e tu’uhia atu ho’i ’oia i te mau tūpa’ipa’ira’a a Sātane ē tae noa atu i te mahana nō te fa’aorara’a.

22 ’E i teienei, ’oia mau tē parau atu nei au ia ’outou na, ’e e pa’ari ho’i teie, ’a fa’ariro i te mamona nō te parauti’a ’ore ’ei hoa nō ’outou, ’e e ’ore rātou e ha’amou atu ia ’outou na.

23 ’A vaiiho noa mai na i te ha’avāra’a iā’u nei, nō te mea nā’u te reira, ’e nā’u e tāho’o atu. ’Ia vai te hau i rotopū ia ’outou ; e vai tāmau noa tā’u mau ha’amaita’ira’a i ni’a iho ia ’outou na.

24 Nō ’outou a’ena ho’i te bāsileia i teienei, ’e e vai noa te reira ia ’outou na ē a muri noa atu, mai te mea ’aita ’outou e hi’a atu i tō ’outou na ti’ara’a maita’i. ’Oia mau ïa. ’Āmene.