Tufa’a 125
E heheura’a tei hōro’ahia mai nā roto ia Iosepha Semita te peropheta, i Nauvoo, i Illinois, i te ’āva’e Māti 1841, nō ni’a i te feiā mo’a i te tufa’a fenua nō Iowa.
1–4, ’Ua tītauhia te feiā mo’a ’ia patu i te mau ’oire ’e ’ia ha’aputuputu i roto i te mau titi nō Ziona.
1 E aha tō te Fatu hina’aro nō ni’a i te feiā mo’a i te Tufa’a fenua nō Iowa ?
2 ’Oia mau, tē nā ’ō mai nei te Fatu, tē parau atu nei au ia ’outou nō ni’a i te feiā ’o tei parauhia i tō’u nei i’oa ’e ’o tē tāmata nei ho’i ’ia riro ’ei feiā mo’a nō’u, mai te mea e ha’apa’o rātou i tō’u hina’aro ’e e ha’apa’o ho’i i tā’u mau fa’auera’a nō ni’a ia rātou ra, ’ia ha’aputuputu ïa rātou i te mau vāhi tā’u e fa’ata’a nō rātou nā roto i tō’u tāvini ia Iosepha, ’e ’ia fa’atupu rātou i te mau ’oire i tō’u nei i’oa, ’ia ineine rātou nō te mau mea ’o tē tupu mai i roto i te tau i mua nei.
3 ’A tu’u ia rātou ’ia fa’atupu mai i te hō’ē ’oire i tō’u nei i’oa i ni’a i te fenua i te tahi pae i te ’oire nō Nauvoo, ’e ’ia topahia te i’oa ’o Zarahemela i ni’a iho i te reira.
4 ’E ’a tu’u atu ia rātou pā’āto’a ’o tē haere mai mai te hiti’a o te rā mai, ’e mai te tō’o’a o te rā, ’e mai te apato’erau, ’e te apato’a mai, ’o tei hina’aro i te pārahi i reira, ’ia rave i tō rātou tufa’a ’āi’a i reira ’e i roto ato’a i te ’oire nō Nashville, ’e ’aore rā i roto i te ’oire nō Nauvoo, ’e i roto i te mau titi ato’a ’o tā’u i fa’ata’a, tē nā reira mai nei te Fatu.