1 ’Ia ha’amaita’ihia tō ’oe i’oa, e te Fatu ra te Atua nō ’Īserā’ela, ’o tei ha’apa’o tāmau i te fafaura’a ’e ’o tē aroha mai i tō ’oe mau tāvini ’o tē haere parauti’a i mua ia ’oe, ma tō rātou ’ā’au ato’a—

2 ’O ’oe ’o tei fa’aue mai i tō ’oe mau tāvini ’ia patu i te fare i tō ’oe i’oa i teie nei vāhi i (Kirtland).

3 ’E i teienei tē ’ite mai nei ’oe, e te Fatu ē, ’ua rave tō ’oe mau tāvini mai te au i tā ’oe i fa’aue mai.

4 ’E i teienei, tē ani atu nei mātou ia ’oe, e te Metua Mo’a, i roto i te i’oa o Iesu Mesia, te Tamaiti o tō ’oe na ’ōuma, i roto i tōna ra i’oa ana’e e tae mai ai te fa’aorara’a i te mau tamari’i a te ta’ata nei, tē ani atu nei mātou ia ’oe, e te Fatu, ’ia fāri’i mai i teie nei fare, te ’ohipa a tō mātou nei rima, tō ’oe mau tāvini, ’o tā ’oe i fa’aue mai ia mātou ’ia patu.

5 ’Ua ’ite ho’i ’oe ē ’ua rave mātou i teie nei ’ohipa nā roto i te ’ati rahi ; ’e nā roto mai i tō mātou veve rahi i hōro’a atu ai mātou i tā mātou faufa’a nō te patu i te fare i tō ’oe na i’oa, ’ia roa’a i te Tamaiti a te Ta’ata nei te hō’ē vāhi nō te fa’a’ite mai iāna iho i tōna mau ta’ata.

6 ’E mai tā ’oe i parau mai i roto i te hō’ē heheura’a, i hōro’ahia mai ia mātou nei, i te paraura’a mai ia mātou nei ’ei hoa nō ’oe na, i te nā-’ō-ra’a mai ē—’A fa’atupu i tā ’outou ’āmuira’a mo’a, mai te au i tā’u i fa’aue atu ia ’outou ;

7 ’E nō te mea ’aore tō te mau ta’ata ato’a e fa’aro’o, ’a ’imi māite ’outou ’e ’a ha’api’i atu te tahi i te tahi i te mau parau pa’ari ; ’oia ïa, ’a ’imi na ’outou i roto i te mau buka maita’i roa a’e i te mau parau pa’ari, ’a ’imi ho’i i te ’ite, ’oia ïa nā roto i te ha’api’i ’e nā roto ato’a i te fa’aro’o ;

8 ’A fa’anahonaho na ia ’outou iho ; ’a fa’aineine i te mau mea ato’a e maita’i ai ’outou, ’e ’a fa’ati’a i te hō’ē fare, ’oia ’ei fare nō te pure, ’ei fare nō te ha’apaera’a mā’a, ’ei fare nō te fa’aro’o, ’ei fare nō te ha’api’ira’a, ’ei fare nō te hanahana, ’ei fare nō te nahonaho, ’ei fare ho’i nō te Atua ;

9 ’Ia nā roto i te i’oa o te Fatu tā ’outou mau tomora’a i roto ; ’ia nā roto i te i’oa o te Fatu tā ’outou mau haerera’a i rāpae ; ’ia nā roto i te i’oa o te Fatu tā ’outou mau arohara’a, ma te ’āfa’i i te rima i ni’a i Tei Teitei Roa ra—

10 ’E i teienei, e te Metua Mo’a, tē ani atu nei mātou, tō ’oe mau ta’ata, ’ia ’oe ’ia tauturu mai ia mātou, nā roto i tō ’oe aroha, i te fa’atupura’a i tā mātou ’āmuira’a mo’a, ’ia ravehia te reira ma te fa’atura ia ’oe ’e ’ia fāri’ihia te reira e ’oe ;

11 ’E nā roto i te rāve’a e ’itehia ai e mea ti’amā mātou, i mua i tō ’oe aro, nō te fāri’i i te tupura’a o te mau fafaura’a tā ’oe i fafau mai ia mātou nei, tō ’oe mau ta’ata, nā roto i te mau heheura’a i hōro’ahia mai ia mātou nei ;

12 ’Ia vai tō ’oe hanahana i ni’a i tō ’oe mau ta’ata, ’e i ni’a iho ho’i i tō ’oe fare, ’o tā mātou e ha’amaita’i atu nei ia ’oe na, ’ia ha’amaita’ihia ’e ’ia ha’amo’ahia ’ia riro ’ei mea mo’a roa, ’e ’ia pārahi noa mai tō ’oe vārua i roto i teie nei fare ;

13 ’E ’ia ti’a i te mau ta’ata ato’a ’o tē tomo mai nā te ’ūputa o te fare o te Fatu ’ia ’ite i tō ’oe mana, ’e ’ia hina’aro ho’i i te fa’a’ite atu ē, ’ua ha’amo’a iho ā ’oe i te reira, ’e ’o tō ’oe iho ïa fare, ’oia te vāhi nō tō ’oe mo’ara’a.

14 ’E ’a fa’ati’a mai na, e te Metua Mo’a, ’ia rātou ato’a ’o tē ha’amori i roto i teie nei fare, ’ia ha’api’ihia i te mau parau pa’ari roa nō roto mai i te mau buka maita’i roa a’e, ’e ’ia ’imi māite rātou i te ’ite nā roto i te ha’api’ira’a, ’e nā roto ato’a i te fa’aro’o, mai te au i tā ’oe i parau ;

15 ’E ’ia tupu rahi ho’i rātou i roto ia ’oe, ’e ’ia fāri’i i te ’īra’a nō te Vārua Maita’i, ’e ’ia fa’anahonahohia mai te au i tā ’oe mau ture, ’e ’ia fa’aineinehia ho’i nō te fāri’i i te mau mea ato’a e maita’i ai rātou ;

16 ’E ’ia riro teie nei fare ’ei fare nō te pure, ’ei fare nō te ha’apaera’a mā’a, ’ei fare nō te fa’aro’o, ’ei fare nō te hanahana ’e nō te Atua, ’oia ïa ’ei fare nō ’oe ;

17 ’Ia ravehia te mau tomora’a o tō ’oe mau ta’ata, i roto i teie nei fare, nā roto i te i’oa o te Fatu ;

18 ’Ia ravehia tō rātou mau haerera’a atu i rāpae i teie nei fare, nā roto i te i’oa o te Fatu ;

19 ’E ’ia ravehia tā rātou mau arohara’a nā roto i te i’oa o te Fatu, ma te rima mo’a i fa’ateiteihia atu i ni’a i Tei Teitei Roa ra ;

20 ’E ’ia ’ore roa te hō’ē mea vi’ivi’i ’ia fa’ati’ahia ’ia ō mai i roto i tō ’oe fare nō te ha’avi’ivi’i i te reira ;

21 ’E ’ia ’ōfati te hō’ē noa atu o tō ’oe mau ta’ata i te ture, ’ia tātarahapa ’oi’oi rātou ’e ’ia ho’i fa’ahou mai ia ’oe na, ’e ’ia fāri’i-au-hia rātou i mua i tō ’oe aro, ’e ’ia fa’aho’ihia mai te mau ha’amaita’ira’a tā ’oe i fa’ata’a ’ia nīni’ihia i ni’a iho ia rātou ’o tē fa’atura ia ’oe i roto i tō ’oe fare.

22 ’E tē ani atu nei mātou ia ’oe, e te Metua Mo’a, ’ia ti’a i tō ’oe mau tāvini ’ia haere atu i rāpae i teie nei fare ma te ’ahuhia i tō ’oe nā mana, ’e ’ia vai noa tō ’oe i’oa i ni’a iho ia rātou, e tō ’oe hanahana ’ia vai fa’aati noa ia rātou, e nā tā ’oe mau melahi e tīa’i ia rātou ;

23 E mai teie atu vāhi e hōpoi atu rātou i te mau parau maita’i rahi ’e te hanahana, nā roto i te parau mau, ē tae noa atu i te mau hope’a o te ao nei, ’ia ’ite rātou e o teie iho ā tā ’oe ’ohipa, ’e ’ua fa’atoro mai ’oe i tō ’oe rima, nō te fa’atupu i tā ’oe i parau mai nā roto i te vaha o te mau peropheta, nō ni’a i te mau mahana hope’a.

24 Tē ani atu nei mātou ia ’oe, e te Metua Mo’a, ’ia fa’anahonaho i te mau ta’ata ’o tē ha’amori, ’e ’o tē tāpe’a ma te tura i te i’oa ’e te ti’ara’a i roto i tō ’oe nei fare, ē tae noa atu i te mau u’i ato’a ē a muri noa atu ;

25 ’Ia ’ore roa te hō’ē a’e mauha’a tama’i fa’aineinehia nō te ’aro mai ia rātou ’ia manuia ; ’e ’o ’oia ’o tē heru i te ’āpo’o nō rātou ra, ’ia topa ’oia iho i roto i te reira ;

26 ’Ia ’ore ’ia noa’a i te hō’ē noa a’e ’āmuira’a ’ino te mana ’ia ti’a mai ’e ’ia upo’oti’a i ni’a a’e i tō ’oe feiā ’o tē tu’uhia tō ’oe i’oa i ni’a iho ia rātou i roto i teie nei fare ;

27 ’E mai te mea e ’aro mai te hō’ē noa a’e mau ta’ata, ’ia fa’ataehia tō ’oe riri i ni’a ia rātou ;

28 ’E mai te mea e tā’iri mai rātou i teie nei feiā, e tā’iri atu ïa ’oe ia rātou ; e ’aro atu ho’i ’oe nō tō ’oe mau ta’ata mai te au i tā ’oe i rave i te mahana ’arora’a ra, ’ia fa’aorahia mai rātou i te rima o tō rātou mau ’enemi ato’a ra.

29 Tē ani atu nei mātou ia ’oe, e te Metua Mo’a, ’ia ha’afifi, ’ia ha’amāere, ’ia fa’aha’amā ’e ’ia fa’a’āhuehue ho’i ia rātou ato’a ’o tei ha’aparare haere i te mau parau ha’avare nā te ara, nā roto i te ao nei, nō te pāto’i i tō ’oe tāvini ’e ’aore rā i tō ’oe mau tāvini, mai te mea ’aita rātou e tātarahapa, i te taime te ’evanelia mure ’ore e porohia ai i roto i tō rātou mau tari’a ;

30 ’E ’ia fa’arirohia tā rātou mau ’ohipa ato’a ’ei mea faufa’a ’ore, ’e ’ia fa’aanohia atu e te ua pa’ari, ’e nā roto ho’i i te mau fa’autu’ara’a ’o tā ’oe e fa’atae atu i ni’a iho ia rātou i roto i tō ’oe riri ē, ’ia fa’a’orehia te mau ha’avare ’e te fa’a’inora’a i ni’a i tō ’oe feiā.

31 ’Ua ’ite ho’i ’oe, e te Fatu, ’ua ti’amā tō ’oe mau tāvini i mua ia ’oe i te fa’a’itera’a atu i te parau nō tō ’oe na i’oa, nō reira ho’i rātou i fa’a’oroma’i ai i teie nei mau mea.

32 Nō reira tē ani ha’eha’a atu nei mātou ia ’oe ’ia fa’aora-roa-hia mātou mai raro mai i teie nei zugo ;

33 ’A ’ōfati atu i te reira, e te Fatu, ’a ’ōfati atu i te reira mai ni’a atu i te ’a’ī o tō ’oe na mau tāvini, nā roto i tō ’oe na mana, ’ia ti’a ia mātou ’ia ti’a mai i ni’a i rotopū i teie nei u’i ’e ’ia rave i tā ’oe ’ohipa.

34 E Iehova, ’a aroha mai i teie nei feiā, ’e nō te mea e hara te ta’ata ato’a, e fa’a’ore mai i te mau hara a tō ’oe mau ta’ata, ’e ’ia fa’a’ore-roa-hia taua mau mea ra ē a muri noa atu.

35 ’Ia ha’amauhia te fa’atāhinura’a a tō ’oe mau ’orometua ha’api’i i ni’a ia rātou i te mana nō ni’a mai.

36 ’Ia fa’atupuhia te reira i ni’a iho ia rātou, mai tei nā-reira-hia i ni’a iho i te mau ta’ata i te mahana Penetekose ra ; ’ia nīni’ihia mai te hōro’a nō te mau reo ’e’ē i ni’a i tō ’oe mau ta’ata, ’oia te mau arero mā’a mai te auahi ra, ’e te tātarara’a ho’i i te reira.

37 ’E ’ia fa’a’īhia tō ’oe fare i tō ’oe na hanahana, mai te mata’i rahi ’ū’ana ra.

38 ’A tu’u mai i ni’a iho i tō ’oe mau tāvini i te ’itera’a pāpū nō te fafaura’a, ’e ’ia haere atu rātou nō te poro i tā ’oe parau, e ti’a ia rātou ’ia tā’ati i te ture, ’e ’ia fa’aineine i te ’ā’au o tō ’oe feiā mo’a nō taua mau fa’autu’ara’a ra ’o tā ’oe e fātata nei i te fa’atae atu, i roto i tō ’oe riri ’ū’ana, i ni’a i tō te ao pā’āto’a nei, nō tā rātou mau ’ōfatira’a ture, ’ia ’ore ho’i tō ’oe mau ta’ata ’ia matapōiri i te mahana pe’ape’a ra.

39 ’E i te mau ’oire ato’a tā tō ’oe mau tāvini e tomo atu i roto ra, ’e ’ia fāri’i te mau ta’ata o taua ’oire ra i tō rātou ’itera’a pāpū, ’a fa’atae atu i tō ’oe ra hau ’e tā ’oe fa’aorara’a i ni’a iho i taua ’oire ra ; ’ia ti’a ia rātou ’ia ha’aputuputu mai i te feiā parauti’a mai roto mai i taua ’oire ra, ’ia ti’a ho’i ia rātou ’ia haere mai i Ziona, ’e ’aore rā i tōna ra mau titi, te mau vāhi tā ’oe i fa’ata’a, ma te hīmene nō te ’oa’oa mure ’ore ;

40 Ē tae noa atu ho’i i te taime teie nei mau mea e fa’aotihia ai ra, ’eiaha tā ’oe mau fa’autu’ara’a ’ia topa i ni’a iho i taua ’oire ra.

41 ’E i te mau ’oire ato’a tā tō ’oe mau tāvini e tomo atu i roto ra, ’e ’aore ho’i te mau ta’ata i taua ’oire ra e fāri’i i te ’itera’a pāpū o tō ’oe mau tāvini, ’e ’ia fa’aara atu tō ’oe mau tāvini ia rātou ’ia fa’aora ia rātou iho i teie u’i ’ā’au ’eta’eta nei, ’a fa’atae atu i ni’a iho i taua ’oire ra te mau mea tā ’oe i parau mai nā roto i te vaha o tō ’oe mau peropheta.

42 Terā rā, ’a fa’aora mai ’oe, e Iehova, i tō ’oe mau tāvini mai roto mai i tō rātou mau rima, ’e ’a tāmā mai ’oe ia rātou i te toto o taua feiā ra, ’o tā mātou ïa e tītau nei ia ’oe.

43 E te Fatu, ’aore mātou e ’oa’oa ’ia ha’amouhia tō mātou mau ta’ata tupu ; e mea faufa’a rahi ho’i tō rātou ’ā’au i mua ia ’oe na ;

44 Terā rā, ’ia fa’atupuhia tā ’oe parau e ti’a ai. ’A tauturu mai ’oe i tō ’oe mau tāvini, ma tō ’oe aroha i te turura’a ia rātou ’ia parau atu ē : ’Ia ravehia tō ’oe na hina’aro, e te Fatu, ’e ’eiaha tō mātou nei.

45 ’Ua ’ite mātou ē, ’ua parau mai ’oe nā roto i te vaha o tā ’oe mau peropheta, i te mau mea ri’ari’a roa nō ni’a i te feiā parauti’a ’ore, i te mau mahana hope’a—’e e nīni’i atu ho’i ’oe i tā ’oe mau fa’autu’ara’a, ma te fāito ’ore ;

46 Nō reira, e te Fatu, ’a fa’aora mai na i tō ’oe mau ta’ata i te ’ati rahi o te feiā parauti’a ’ore ; ’e ’a fa’ati’a mai na i tō ’oe mau tāvini ’ia tā’ati mai i te ture, ’e ’ia ru’uru’u mai ho’i i te ’itera’a pāpū, ’ia fa’aineinehia rātou nō te mahana ’amara’a ra.

47 Tē ani atu nei mātou ia ’oe, e te Metua Mo’a, ’ia ha’amana’o ia rātou ’o tei tīahi-’ē-hia atu e te mau ta’ata nō te mata’eina’a nō Jackson, i Missouri, mai ni’a atu i te mau fenua o tō rātou ra ’āi’a, ’e ’a ’ōfati, e te Fatu, i teie zugo nō te ’ati rahi ’o tei tu’uhia i ni’a iho ia rātou ra.

48 ’Ua ’ite ’oe, e te Fatu, ’ua hāmani-’ino-rahi-hia ’e ’ua ha’amāuiui-rahi-hia rātou e te feiā parauti’a ’ore ; ’e ’ua ’ī roa tō mātou ’ā’au i te ’oto nō tā rātou ra mau hōpoi’a rahi.

49 E te Fatu, e aha ïa te maoro tā ’oe e fa’ati’a noa i teie nei feiā ’ia fāri’i noa i teie nei ’ati rahi, ’e i te ti’aorora’a ho’i a tō rātou feiā hara ’ore ’ia tae atu i tō ’oe na tari’a, ’e i tō rātou ho’i toto ’ia tae atu ’ei fa’a’itera’a pāpū i mua ia ’oe, ’e ’aita ho’i ’oe e fa’a’ite mai nei i tā ’oe na fa’a’itera’a pāpū nō te tauturura’a ia rātou ?

50 ’A aroha mai, e te Fatu, i teie nei pupu ta’ata ’ino rahi, ’o tei tīahi atu i tō ’oe mau ta’ata, ’ia fa’aea rātou i te hāmani ’ino mai, ’e ’ia tātarahapa rātou i tā rātou mau hara mai te mea e ’itea te tātarahapa ;

51 Terā rā, ’ia ’ore ho’i rātou ’ia nā reira, e fa’a’ite mai ïa ’oe i tō ’oe rima, e te Fatu, ’e e fa’aora mai i te reira ’o tā ’oe i fa’ata’a ’ei Ziona i tō ’oe mau ta’ata nei.

52 ’E mai te mea ē ’aita atu e rāve’a ’ē atu, ’ia ’ore te ’ohipa a tō ’oe mau ta’ata nei ’ia manuia ’ore i mua ia ’oe na, ’ia fa’atupuhia ïa tō ’oe na riri, ’e ’ia topa atu ho’i tō ’oe na au ’ore rahi i ni’a iho ia rātou ra, ’ia ha’amouhia atu rātou, te a’a ’e te ’āma’a ato’a, i raro a’e i te ra’i ra ;

53 Terā rā, mai te mea e tātarahapa mai rātou, ’a aroha mai ’oe ’e ’a fa’aherehere ho’i ia rātou, ’e ’a fa’afāriu ’ē atu i tō ’oe riri ’ū’ana ’ia hi’o mai ’oe i te mata o tā ’oe i Fa’atāhinuhia ra.

54 ’A aroha mai, e te Fatu, i te mau nūna’a ato’a o te fenua nei ; ’a aroha mai i te feiā fa’atere hau nō tō mātou nei fenua ; ’ia ha’amau-noa-hia taua mau parau tumu ra, ’o tei pāturuhia e tō mātou mau hui metua ma te tura ’e te mana’o maita’i roa, ’oia ho’i te Papa Ture nō tō mātou fenua, ’ia vai noa te reira ē a muri noa atu.

55 ’A ha’amana’o mai i te mau ari’i, ’e te mau tamaiti ari’i, ’e te mau hui ari’i, ’e te mau ta’ata ti’ara’a teitei o te fenua nei, ’e te mau ta’ata pā’āto’a, ’e te mau ’ēkālesia, ’e te tā’āto’ara’a o te feiā veve, te feiā nava’i ’ore, ’e te feiā ’ati o te fenua nei ;

56 ’Ia ha’amarūhia tō rātou ’ā’au, e Iehova, ’a haere atu ai tō ’oe mau tāvini i rāpae i tō ’oe fare nō te fa’a’ite atu i te ’itera’a pāpū nō ni’a i tō ’oe i’oa ; ’ia auraro tō rātou mau mana’o ’eta’eta i te parau mau, ’e ’ia auhia tō ’oe mau ta’ata i mua i te mata o te mau ta’ata ato’a ;

57 ’Ia ’ite tō te mau hope’a ato’a o te ao nei ē, ’ua fa’aro’o mātou, tō ’oe nei mau tāvini, i tō ’oe reo, ’e nā ’oe mātou nei i tono atu ;

58 ’Ia ti’a i tō ’oe mau tāvini, te mau tamari’i tamāroa a Iakoba, ’ia ha’aputuputu mai i te feiā parauti’a nō roto mai i teie nei feiā nō te patu i te hō’ē ’oire mo’a i tō ’oe na i’oa, mai te au i tā ’oe i fa’aue ia rātou ra.

59 Tē ani atu nei mātou ia ’oe ’ia fa’ata’a mai i te tahi mau titi ’ē atu ā nō Ziona i teie tā ’oe i fa’ata’a mai, ’ia ti’a i te ha’aputuputura’a o tō ’oe mau ta’ata ’ia haere noa ma te mana rahi ’e te hanahana ho’i, ’e ’ia ha’apotohia tā ’oe ’ohipa i roto i te parauti’a ra.

60 I teienei, ’o teie mau parau, e te Fatu, ’o tā mātou ïa i parau i mua ia ’oe na, nō ni’a i te mau heheura’a ’e te mau fa’auera’a tā ’oe i hōro’a mai ia mātou nei, ’o tei tai’ohia i rotopū i te mau ’Ētene.

61 ’Ua ’ite rā ’oe ē, e here rahi tō ’oe i te mau tamari’i a Iakoba, ’o tei ha’apurara-haere-hia i ni’a i te mau mou’a nō te hō’ē tau maoro roa, i te mahana ’ārumaruma ’e te pōiri.

62 Nō reira tē ani atu nei mātou ia ’oe ’ia aroha mai i te mau tamari’i a Iakoba, ’ia ha’amata Ierusalema i te fa’aorahia mai teie atu ā hora ;

63 ’E ’ia ha’amatahia te ’ōfatira’a i te zugo nō te tītīra’a nō te ’utuāfare o Davida ;

64 ’E ’ia ha’amata ho’i te mau tamari’i a Iuda i te ho’i atu i te mau fenua ’o tā ’oe i hōro’a atu ia Aberahama, tō rātou metua.

65 ’E ’ia fa’afāriuhia mai te toe’a nō Iakoba mai roto mai i tō rātou huru ’ōviri ’e te taehae i te ’īra’a nō te ’evanelia mure ’ore ; ’ua ’anatemahia ho’i ’e ’ua tā’irihia ho’i rātou nō tō rātou ’ōfatira’a i te ture ;

66 ’Ia ti’a ia rātou ’ia tu’u atu i tā rātou mau mauha’a tama’i ha’amani’ira’a toto i raro, ’e ’ia fa’a’ore atu i tā rātou ra mau ’ōrurehau.

67 ’E ’ia ’ite te mau toe’a nō ’Īserā’ela i ha’apurara-’ē-hia, ’e ’o tei tīahihia atu i te mau hope’a nō te ao nei, i te parau mau, ’ia ti’aturi i te Mesia, ’e ’ia fa’aorahia ho’i i te hāmani-’ino-ra’a, ’e ’ia ’oa’oa ho’i i mua ia ’oe na.

68 E te Fatu, ’a ha’amana’o mai i tō ’oe tāvini ia Iosepha Semita, tamaiti, ’e i tōna mau ’ati ’e te mau hāmani-’ino-ra’a ato’a—i te huru nō tāna fafaura’a ia Iehova ra, ’e i tāna tapura’a ia ’oe, e te Atua pūai nō Iakoba—’e te mau fa’auera’a tā ’oe i hōro’a mai iāna ra, ’e ’ua tāmata noa ’oia ma te ’ā’au tae ’ia rave i tō ’oe hina’aro.

69 ’A aroha mai, e te Fatu, i tāna vahine fa’aipoipo ’e te mau tamari’i ho’i, ’ia fa’ateiteihia rātou i mua i tō ’oe aro, ’e ’ia fa’aorahia ho’i e tō ’oe rima tauturu.

70 ’A aroha mai i tō rātou mau fēti’i, ’ia ha’apararīhia tō rātou mau mana’o hape ’e ’ia hōpoi-’ē-hia atu mai te diluvi ra ; ’ia fa’afāriuhia mai rātou ’e ’ia fa’aorahia ho’i i pīha’i iho i tō ’Īserā’ela, ’e ’ia ’ite mai ē, ’o te Atua iho ā ’oe.

71 ’A ha’amana’o, e te Fatu, i te mau peresideni, ’oia te mau peresideni ato’a nō tā ’oe ’ēkālesia, ’ia fa’ateitei mai tō ’oe rima ’atau ia rātou, ’e tō rātou mau ’utuāfare ato’a, ’e tō rātou mau fēti’i, ’ia vai tāmau noa mai tō rātou mau i’oa ’e ’ia ha’amana’o-noa-hia i terā u’i ’e i terā u’i.

72 ’A ha’amana’o i tā ’oe ’ēkālesia pā’āto’a, e te Fatu, ’e tō rātou mau ’utuāfare ato’a, ’e tō rātou mau fēti’i ato’a, ’e tō rātou feiā ma’i pā’āto’a ’e tei ’ati, ’e te feiā veve pā’āto’a ’e te feiā ha’eha’a o te ao nei ; ’ia riro te bāsileia tā ’oe i fa’atupu ma te rima ’ore, ’ei mou’a rahi ’e ’ia fa’a’ī roa i te ao ato’a nei ;

73 ’Ia haere mai tā ’oe ’ēkālesia mai roto mai i te mēdēbara nō te pōiri, ’e ’ia ’ana’ana mai, mai te marama te ateate, mai te mahana te teatea, ’e mai te nu’u fa’ehau ’e tō rātou mau reva te ri’ari’a ;

74 ’E ’ia fa’a’una’unahia mai te vahine fa’aipoipo ’āpī ra nō te mahana ’oe e ’īriti ai i te pāruru nō te mau ra’i, ’e ’ia fa’atahe atu i te mau mou’a i raro i mua i tō ’oe aro, ’e te mau peho ’ia fa’ateiteihia, te mau vāhi pu’u ra ’ia fa’a’āfarohia ; ’ia ti’a i tō ’oe hanahana ’ia fa’a’ī i te fenua nei ;

75 ’E ’ia fa’a’otohia te pū nō te feiā i pohe ra, ’ia fa’atāhitihia atu mātou i ni’a i roto i te ata nō te fārerei ia ’oe, ’e ’ia pārahi noa ho’i mātou i pīha’i iho i te Fatu ;

76 ’Ia mā roa tō mātou mau ’ahu, ’ia fa’a’ahuhia mātou i te mau ’ahu roa nō te parauti’a, ma te ’āma’a tāmara i roto i tō mātou rima, ’e te mau korona nō te hanahana i ni’a i tō mātou upo’o, ’e ’ia fāri’i i te ’oa’oa mure ’ore nō tō mātou mau ’ati rahi pā’āto’a.

77 E te Fatu te Atua Manahope, ’a fa’aro’o mai na i tā mātou nei mau tītaura’a, ’e ’a pāhono mai ia mātou mai te ra’i mai, tō ’oe fa’aeara’a mo’a, i te vāhi tā ’oe e pārahi ra i ni’a i te terōno, ma te hanahana, te tura, te mana, te hinuhinu, te pūai, te hau, te parau mau, te parauti’a, te ha’avāra’a, te aroha, ’e te hope’a ’ore nō te ’īra’a, mai tahito mai ā ē a muri noa atu.

78 ’A fa’aro’o mai, ’a fa’aro’o mai, ’a fa’aro’o mai ia mātou nei, e te Fatu ē ! ’E ’a pāhono mai i teie nei mau tītaura’a, ’e ’a fāri’i i te ha’amo’ara’a nō teie nei fare ia ’oe na, te ’ohipa a tō mātou nei rima, ’o tā mātou i patu i tō ’oe na i’oa ;

79 ’E i teie ato’a ’ēkālesia, ’ia tu’u mai ho’i i tō ’oe i’oa i ni’a iho. ’E ’a tauturu mai ia mātou nā roto i te mana o tō ’oe Vārua, ’ia ti’a ia mātou ’ia ’āmui i tō mātou reo i tō te mau seraphi māramarama ’e te ’ana’ana rahi e fa’a’ati ra i tō ’oe terōno, ma te mau parau nō te ’āruera’a, ’e te hīmenera’a Hosana i te Atua ’e te ’Ārenio !

80 ’E ’ia fa’a’ahuhia tō ’oe feiā i fa’atāhinuhia i te ora mure ’ore, ’e ’ia pi’i pūai mai tō ’oe feiā mo’a nō te ’oa’oa rahi. ’Āmene, ’e ’Āmene.