1 ’Oia mau tē parau atu nei au ia ’outou na, e tō’u mau hoa, tē hōro’a atu nei au i te a’ora’a ia ’outou, ’e te fa’auera’a ho’i, nō ni’a i te mau faufa’a ato’a nō te ha’apa’ora’a tā’u i fa’aue atu ’ia fa’anahonahohia ’e ’ia ha’amauhia ho’i, ’ia riro ’ei ha’apa’ora’a tāhō’ē, ’e ’ei ha’apa’ora’a mure ’ore ’ei maita’i nō tā’u ’ēkālesia, ’e nō te fa’aorara’a ho’i i te ta’ata nei ē tae noa atu i te taime au e tae mai ai—

2 Ma te fafaura’a ’o tē ’ore e ti’a ’ia fa’ahuru-’ē-hia, ’oia ho’i mai te mea e ha’apa’o maita’i rātou ’o tā’u i fa’aue ra, e ha’amaita’ihia ïa rātou i te mau ha’amaita’ira’a e rave rahi ;

3 Terā rā mai te mea ē ’aita rātou e ha’apa’o maita’i, ’ua fātata roa ïa rātou i te ’anatemahia.

4 Nō reira, nō te mea ’aita te tahi pae o tō’u mau tāvini i ha’apa’o i te fa’auera’a, ’ua ’ōfati rā i te fafaura’a nā roto i te nounou tao’a, ’e te parau ha’avare, ’ua ’anatema vau ia rātou i te ’anatema ’ino rahi roa.

5 Nō te mea ’ua parau mana vau, ’o te Fatu, i roto i tō’u ’ā’au, ’e mai te mea e ’itea te hō’ē ta’ata nō te ha’apa’ora’a tāhō’ē i te ’ōfatira’a i te ture, ’oia ho’i, ’ia ’ōfati ’oia i te fafaura’a i ru’uru’uhia ai ’outou ra, e ’anatemahia ’oia i roto i tōna orara’a, ’e e ta’ata’ahihia atu ’oia i raro e te ta’ata mai te au i tō’u hina’aro ;

6 E ’ore ho’i au, ’o te Fatu, e vahavahahia i roto i teie nei mau mea—

7 ’E e ravehia teie ’ia ’ore te feiā hape ’ore i rotopū ia ’outou ’ia fa’ahapahia mai te feiā parauti’a ’ore ; ’e ’ia ’ore ho’i te feiā parauti’a ’ore i rotopū ia ’outou ’ia ora atu ; nō te mea ’ua fafau vau, ’o te Fatu, ’e e noa’a ia ’outou te hō’ē korona nō te hanahana i tō’u pae ’atau.

8 Nō reira, mai te mea ’ua ’itehia ’outou ’ei feiā ’ōfati ture, e ’ore roa atu ’outou e ora atu i tō’u riri ’ū’ana i roto i tō ’outou orara’a.

9 Mai te mea e tāpū-’ē-hia atu ’outou nō te ’ōfatira’a i te ture, e ’ore ’outou e ora atu i te mau ha’amamaera’a rahi a Sātane ē tae noa atu i te mahana nō te fa’aorara’a.

10 ’E i teienei tē hōro’a atu nei au ia ’outou i te mana mai teie iho hora atu, mai te mea e ’itehia te hō’ē ta’ata i rotopū ia ’outou, e melo ’oia nō te ha’apa’ora’a tāhō’ē, ’o tei ’ōfati i te ture ’e ’aore ’oia e tātarahapa i taua ’ino ra, e tu’u atu ïa ’outou iāna i te mau ha’amamaera’a rahi a Sātane ; ’e ’aore tōna e mana ’ia fa’atae i te ’ino i ni’a ia ’outou.

11 Tei roto iā’u nei te pa’ari ; nō reira, e fa’auera’a tā’u e hōro’a atu ia ’outou na, ’ia fa’anahonaho ’outou ia ’outou iho ’e ’ia fa’ata’a i tā te ta’ata tāta’itahi ato’a ti’a’aura’a ;

12 ’Ia ti’a i te ta’ata tāta’itahi ato’a ’ia fa’a’ite mai iā’u i te huru nō tāna ha’apa’ora’a i te ti’a’aura’a i fa’ata’ahia nāna ra.

13 Nō te mea e mea ti’a ïa iā’u, i te Fatu, ’ia tītau i te ta’ata tāta’itahi ato’a ’ia fa’a’ite mai i te huru nō tāna ti’a’aura’a, ’ei ta’ata ti’a’au ho’i ’oia i ni’a i te mau ha’amaita’ira’a tāhuti nei tā’u i fa’atupu ’e i fa’aineine nō te mau ta’ata tā’u i hāmani.

14 Na’u, nā te Fatu, i hohora atu i te mau ra’i, ’e i hāmani i te fenua nei, ’e ’o te ’ohipa ïa a tō’u iho rima ; ’e nā’u iho te mau mea ato’a i roto i te reira.

15 ’E ’o tā’u ’ōpuara’a ïa ’ia hōro’a i te faufa’a nā tō’u feiā mo’a, nō te mea nā’u te mau mea ato’a.

16 Terā rā, ’ia ravehia te reira mai te au i tā’u i hina’aro e ti’a ai ; ’e inaha, ’o teie ho’i te rāve’a tā’u, tā te Fatu, i parau mana atu nō te tauturu i tō’u feiā mo’a, ’ia ti’a i te feiā veve ’ia fa’ateiteihia nā roto i te fa’aha’eha’ara’a i te feiā tao’a rahi.

17 Nō te mea ’ua ’ī roa te fenua nei, ’e ’ua nava’i ’e ’ua toe mai ho’i ; ’oia ïa, nā’u i fa’aineine i te mau mea ato’a, ’e ’ua fa’ati’a vau ’ia riro te tamari’i a te ta’ata nei ’ei ta’ata ha’apa’o ia rātou iho.

18 Nō reira, mai te mea e rave te hō’ē ta’ata i te faufa’a rahi ’o tā’u i hāmani ra, ’e ’aore ho’i e hōro’a i tāna tufa’a, mai te au i te ture nō tā’u ’evanelia, i te feiā veve e tei ’ere ho’i, e ’āmuihia atu ’oia i te feiā parauti’a ’ore i te nānāra’a atu i tōna mata i ni’a i roto i hade ra, nō te mamae rahi.

19 ’E i teienei, ’oia mau tē parau atu nei au ia ’outou na nō ni’a i te mau faufa’a nō te ha’apa’ora’a tāhō’ē—

20 ’A tu’u atu i tō’u tāvini ra ia Sidney Rigdon ’ia fāri’i i te vāhi tei reira ’oia i te pārahira’a i teienei, ’e te ’āua nō te fare rapa’aura’a ’iri ’ānimara ’ei ti’a’aura’a nōna, ’e ’ei tauturu iāna ’a rave ai ’oia i te ’ohipa i roto i tā’u ’ō vine, mai tā’u i hina’aro ra, ’ia tae i te taime au e fa’aue ai iāna ra.

21 ’E ’ia ravehia te mau mea ato’a mai te au i tei fa’aotihia e te ha’apa’ora’a tāhō’ē, ’e te fa’aotira’a tāhō’ē ’e ’aore rā te reo tāhō’ē nō te feiā i roto i te ha’apa’ora’a tāhō’ē, ’o tē pārahi nei i te fenua nō Kirtland.

22 ’E tē tu’u atu nei au, ’o te Fatu, i teie nei ti’a’aura’a ’e te ha’amaita’ira’a i ni’a i tō’u tāvini ra ia Sidney Rigdon ’ei ha’amaita’ira’a i ni’a iho iāna, ’e i tōna ra hua’ai i muri iho iāna ra ;

23 ’E e fa’arahi au i te mau ha’amaita’ira’a i ni’a iāna, mai te mea e vai ha’eha’a noa ’oia i mua iā’u nei.

24 ’E teie fa’ahou ā, ’a tu’u atu i tō’u tāvini ra ia Martin Harris ’ia fāri’i, ’ei ti’a’aura’a nōna ’e nō tōna hua’ai ho’i i muri iho iāna ra te ’āua fenua i roa’a i tō’u tāvini ra ia John Johnson nā roto i te tauira’a i tōna ’āi’a tahito ;

25 ’E mai te mea e ha’apa’o maita’i ’oia, e fa’arahi au i te mau ha’amaita’ira’a i ni’a iāna ’e i tōna hua’ai i muri iho iāna ra.

26 ’E ’a tu’u atu i tō’u tāvini ra ia Martin Harris ’ia hōro’a atu i tāna mau moni nō te porora’a i tā’u mau parau, mai te au i tā tō’u tāvini Iosepha Semita, tamaiti, e fa’ata’a.

27 ’E teie fa’ahou ā, ’a tu’u atu i tō’u tāvini ra ia Frederick G. Williams ’ia fāri’i i te vāhi tāna e pārahi nei.

28 ’E ’a tu’u atu i tō’u tāvini ra ia Oliver Cowdery ’ia fāri’i i te ’āua fenua i fa’ata’a-’ē-hia i pīha’i iho i te fare, ’o tē riro ’ei fare nene’ira’a, ’o te ’āua fenua nūmera hō’ē ïa, ’e te ’āua fenua ato’a i pārahihia e tōna metua tāne.

29 ’E ’a tu’u atu i tō’u nā tāvini ia Frederick G. Williams ’e ia Oliver Cowdery ’ia fāri’i i te fare nene’ira’a ’e te mau mea ato’a nō taua fare ra.

30 ’E e riro teie ’ei ti’a’aura’a ’o tē fa’ata’ahia nō rāua.

31 ’E mai te mea e ha’apa’o maita’i rāua, inaha e ha’amaita’i au, ’e e fa’arahi ho’i i te mau ha’amaita’ira’a i ni’a ia rāua.

32 ’E ’o teie te ha’amatara’a o te ti’a’aura’a tā’u i fa’ata’a nō rāua, nō rāua ’e tō rāua hua’ai i muri iho ia rāua.

33 ’E, mai te mea e ha’apa’o maita’i rāua, e fa’arahi au i te mau ha’amaita’ira’a i ni’a ia rāua ’e tō rāua hua’ai i muri iho ia rāua, ’oia te mau ha’amaita’ira’a e rave rahi.

34 ’E teie fa’ahou ā, ’a tu’u atu i tō’u tāvini ra ia John Johnson ’ia fāri’i i te fare tāna e pārahi nei, ’e te ’āi’a ato’a, te tā’āto’ara’a maori rā te fenua ’o tei tāpe’ahia nō te fa’ati’ara’a i tō’u mau fare, ’o tei roto i taua ’āi’a ra, e taua nā ’āua fenua i fa’ata’ahia nō tō’u tāvini ra ’o Oliver Cowdery.

35 ’E mai te mea e ha’apa’o maita’i ’oia, e fa’arahi au i te mau ha’amaita’ira’a i ni’a iāna.

36 ’E ’o tō’u hina’aro ïa ’ia ho’o atu ’oia i te mau ’āua fenua ’o tei fāitohia nō te fa’ati’ara’a mai i te ’oire nō tō’u feiā mo’a, mai te au i te fa’a’itehia mai iāna e te reo o te Vārua, ’e mai te au ho’i i te fa’aotira’a a te ha’apa’ora’a tāhō’ē, ’e nā te reo o te ha’apa’ora’a tāhō’ē.

37 ’E ’o teie te ha’amatara’a o te ti’a’aura’a tā’u i fa’ata’a nōna, ’ei ha’amaita’ira’a nōna ’e tōna hua’ai i muri iho iāna.

38 ’E mai te mea e ha’apa’o maita’i ’oia, e fa’arahi roa vau i te mau ha’amaita’ira’a i ni’a iho iāna.

39 ’E teie fa’ahou ā, ’a tu’u atu i tō’u tāvini ra ia Newel K. Whitney ’ia fāri’i i te mau fare ’e te ’āua fenua i te vāhi tāna e pārahi nei, ’e te ’āua fenua ’e te fare ho’i i ni’a iho i te reira te fare ho’ora’a tao’a i te ti’ara’a, ’e te ’āua fenua ato’a i te poro i te pae apato’a nō te fare ho’ora’a tao’a, ’e te ’āua fenua ato’a tei reira te fare vaira’a rehu auahi ra.

40 ’E ’ua fa’ata’a vau i teie mau mea ato’a nā tō’u tāvini ra ’o Newel K. Whitney ’ei ti’a’aura’a nōna, ’ei ha’amaita’ira’a ho’i i ni’a iāna e i tōna hua’ai i muri iho iāna ra, nō te maita’i o te fare hoora’a tao’a nō tā’u ha’apa’ora’a tāhō’ē tā’u i ha’amau nō tā’u titi i te fenua nō Kirtland.

41 ’Oia ïa, ’oia mau, ’o teie ho’i te ti’a’aura’a tā’u i fa’ata’a nō tō’u tāvini ra o N. K. Whitney, ’oia ’o teie fare ho’ora’a tao’a tā’āto’a, ’o ’oia e tōna ta’ata ha’apa’o, ’e tōna hua’ai i muri iho iāna.

42 ’E mai te mea e ha’apa’o maita’i ’oia i te ha’apa’ora’a i tā’u mau fa’auera’a, tā’u i hōro’a iāna ra, e fa’arahi au i te mau ha’amaita’ira’a i ni’a iāna e tōna hua’ai i muri iho iāna ra, ’oia te mau ha’amaita’ira’a e rave rahi.

43 ’E teie fa’ahou ā, ’a tu’u atu i tō’u tāvini ra ia Iosepha Semita, tamaiti, ’ia fāri’i i te ’āua fenua ’o tei fāitohia nō te patura’a i tō’u fare, e maha ’ahuru ïa roda (200 mētera) te roa, ’e e hō’ē ’ahuru ma piti roda (60 mētera) te ’ā’ano, ’e te ’āi’a ato’a ’o tē pārahihia nei e tōna metua tāne i teienei ;

44 ’E ’o te ha’amatara’a teie o te ti’a’aura’a tā’u i fa’ata’a nāna, ’ei ha’amaita’ira’a i ni’a iāna, ’e i ni’a i tōna metua tāne.

45 Inaha ho’i, ’ua fa’ata’a vau i te ’āi’a nō tōna metua tāne, ’ei tauturura’a iāna ; nō reira e tai’ohia ’oia i roto i te ’utuāfare o tō’u tāvini ’o Iosepha Semita, tamaiti.

46 ’E e fa’arahi au i te mau ha’amaita’ira’a i ni’a i te ’utuāfare o tō’u tāvini ’o Iosepha Semita, tamaiti, ’oia i te mau ha’amaita’ira’a e rave rahi, mai te mea e ha’apa’o maita’i ’oia.

47 ’E i teienei, e fa’auera’a tā’u e hōro’a atu ia ’outou nō ni’a ia Ziona, ’eiaha ’outou ia ru’uru’u-fa’ahou-hia i te ha’apa’ora’a tāhō’ē i tō ’outou mau taea’e nō Ziona, maori rā mai teie te huru—

48 ’Ia oti ’outou i te fa’anahonahohia, e parauhia ïa ’outou te Ha’apaora’a Tāhō’ē nō te titi o Ziona, te ’Oire nō Kirtland. ’E tō ’outou mau taea’e, ’ia oti rātou i te fa’anahonahohia, e parauhia rātou te Ha’apaora’a Tāhō’ē nō te ’Oire nō Ziona.

49 ’E e fa’anahonahohia rātou nā ni’a i tō rātou iho mau i’oa, ’e i tō rātou iho i’oa ; ’e e rave rātou i tā rātou ’ohipa nā ni’a i tō rātou iho i’oa, ’e i tō rātou iho mau i’oa ;

50 ’E e rave ’outou i tā ’outou ’ohipa nā ni’a i tō ’outou iho i’oa, ’e i tō ’outou iho mau i’oa.

51 ’E ’ua fa’aue au ’ia ravehia teie mea nō tō ’outou iho fa’aorara’a, ’e nō tō rātou ato’a fa’aorara’a, ’ei hope’ara’a nō tō rātou tīahira’ahia atu i rāpae ’e nō te mea ’o tē tupu mai.

52 I ’ōfatihia ho’i te mau fafaura’a nā roto i te ’ōfatira’a i te ture, nā roto i te nounou tao’a ’e te mau parau ha’avare—

53 Nō reira, ’ua matara ’outou i te ha’apa’ora’a tāhō’ē ’e tō ’outou mau taea’e, ’e ’aore ’outou i ru’uru’uhia ia rātou, maori rā e tae noa mai i teie nei hora, maori rā ho’i mai teie te huru, mai te au i tā’u i parau ra, nā roto i te tīpe’e mai te au i tei fa’aauhia e teie nei ha’apa’ora’a tāhō’ē i roto i te ’āpo’ora’a, mai te au i te fāito ’o tā ’outou mau faufa’a ’e i tei fa’aotihia e te reo o te ’āpo’ora’a.

54 ’E teie fa’ahou ā, e fa’auera’a tā’u e hōro’a atu nei ia ’outou nō ni’a i tā ’outou ti’a’aura’a tā’u i fa’ata’a nō ’outou na.

55 Inaha, nā’u teie mau faufa’a tā’āto’a, mai te mea ’aita ’ua faufa’a ’ore ïa tō ’outou fa’aro’o, ’e ’ua ’itea ’outou ’ei feiā ha’avare, ’e ’ua ’ōfatihia ïa te mau fafaura’a tā ’outou i fafau mai iā’u nei ;

56 ’E mai te mea nā’u te mau faufa’a, e ti’a’au ïa ’outou ; ’ia ’ore rā, e ’ere ho’i ïa ’outou i te mau ti’a’au.

57 ’Oia mau tē parau atu nei rā vau ia ’outou na, ’ua fa’ata’a vau ia ’outou ’ia riro ’ei mau ti’a’au nō tō’u nei ’utuāfare, ’oia ’ei mau ti’a’au mau roa.

58 ’E ’o teie ho’i te tumu vau i fa’aue atu ai ia ’outou ’ia fa’anahonaho ia ’outou iho, ’oia ’ia nene’i i tā’u mau parau, te ’īra’a nō tā’u mau pāpa’ira’a mo’a, te mau heheura’a tā’u i hōro’a atu ia ’outou na, ’e ’o tā’u e hōro’a atu ia ’outou na, a muri atu, i terā taime ’e i terā taime—

59 Nō te fa’ati’ara’a mai i tā’u ’ēkālesia e bāsileia i ni’a i te fenua nei, ’e nō te fa’aineine i tō’u mau ta’ata nō te taime au e pārahi ai i rotopū ia rātou, ’o tei fātata mai ho’i i teienei.

60 ’E e fa’aineine ’outou nō ’outou iho i te hō’ē vāhi ’ei vaira’a moni, ’e e ha’amo’a mai i te reira i tō’u nei i’oa.

61 ’E e fa’ata’a ’outou i te hō’ē i rotopū ia ’outou nō te ha’apa’o i te vaira’a moni, ’e e fa’atōro’ahia ’oia nō teie nei ha’amaita’ira’a.

62 ’E ’ia vai te hō’ē tāpa’o tā’atira’a i ni’a i te vaira’a moni, ’e e hōpoihia mai te mau mea mo’a ato’a i roto i taua vaira’a moni ra ; ’e ’eiaha te hō’ē noa atu ta’ata i rotopū ia ’outou ’ia parau ē, nāna ana’e iho te reira, ’eiaha ato’a te hō’ē tufa’a nō te reira, nō te mea nā ’outou pā’āto’a ïa te reira.

63 ’E tē hōro’a atu nei au i te reira nā ’outou mai teie iho nei hora atu ā ; ’e i teienei, ’a mata na ho’i ’ia haere atu ’outou ’e ’ia fa’a’ohipa i te ti’a’aura’a tā’u i fa’ata’a nā ’outou na, maori rā te mau mea mo’a, nō te nene’ira’a i teie mau mea nei mai te au i tā’u i parau ra.

64 ’E te moni ’āpī e noa’a mai nō te mau mea mo’a ra, e tāpe’ahia ïa i roto i te vaira’a moni, ’e e tu’uhia te hō’ē tāpa’o tāpiri i ni’a i te reira ; ’e ’eiaha roa taua moni ra e ha’amāu’ahia, ’e ’eiaha ato’a e ’īriti-’ē-hia atu i rāpae i te vaira’a moni e te hō’ē ta’ata, ’e ’eiaha roa te tāpa’o tāpiri i tu’uhia i ni’a i te reira ’ia tātarahia, maori rā nā roto i te reo o te ha’apa’ora’a tāhō’ē, ’e ’aore rā nā roto i te fa’auera’a.

65 ’E e nā reira ’outou i te fa’aherehere i te moni ’āpī ’o tē noa’a mai nō te mau mea mo’a i roto i te vaira’a moni, nō te ’ohipa maita’i ’e te mea mo’a ato’a.

66 ’E e parauhia teie te vaira’a moni mo’a a te Fatu ; ’e e tu’uhia te tāpa’o tāpiri i ni’a iho, ’ia mo’a ’e ’ia ha’amo’ahia te reira i te Fatu.

67 ’E teie fa’ahou ā, e fa’aineinehia te tahi atu ā vaira’a moni ; ’e e fa’ata’ahia ho’i te hō’ē ta’ata ha’apa’o i te vaira’a moni, ’e e tu’uhia te tāpa’o tāpiri i ni’a iho i te reira ;

68 ’E te mau moni ato’a tā ’outou e fāri’i nā roto i tō ’outou mau ti’a’aura’a, nā roto i te fa’a’ohipa-maita’i-ra’a i te faufa’a tā’u i fa’ata’a nā ’outou na, ’oia ho’i te mau fare, ’e ’aore rā te mau fenua, ’e ’aore rā te mau pua’atoro, ’e ’aore rā te mau mea ato’a maori rā te mau pāpa’ira’a mo’a ’e te hanahana ’o tā’u i tāpe’a nā’u iho nō te mau ’ohipa mo’a ’e te hanahana, e hōpoi-’oi’oi-hia ïa i roto i te vaira’a moni, ’a fāri’i ai ’outou i te mau moni, nā roto i te mau hānere, ’e ’aore rā i te mau pae ’ahuru, ’e ’aore rā i te mau piti ’ahuru, ’e ’aore rā i te mau ’ahuru, ’e ’aore rā i te mau pae.

69 ’Oia ho’i, mai te mea e fāri’i te hō’ē ta’ata i rotopū ia ’outou e pae tārā, e hōpoi ’oia i te reira i roto i te vaira’a moni ; mai te mea e roa’a iāna hō’ē ’ahuru, ’e ’aore rā e piti ’ahuru, ’e ’aore rā e pae ’ahuru, ’e ’aore rā hō’ē hānere a’e, ’ia nā reira ato’a ’oia ;

70 ’E ’eiaha te hō’ē ta’ata i rotopū ia ’outou ’ia parau ē, nāna ana’e iho te reira ; nō te mea e ’ore roa te reira e parauhia nāna, ’eiaha ho’i te hō’ē tufa’a nō te reira.

71 ’E ’eiaha roa te hō’ē tufa’a nō te reira ’ia ha’amāu’ahia ’e ’aore rā ’ia ’īriti-’ē-hia atu i te vaira’a moni, maori rā nā roto i te reo ’e te fa’ati’ara’a tāhō’ē a te ha’apa’ora’a tāhō’ē.

72 ’E ’o te reo ’e te fa’ati’ara’a tāhō’ē teie a te ha’apa’ora’a tāhō’ē—’ia parau mai te hō’ē noa atu ta’ata i rotopū ia ’outou na i te tīa’i moni ē : Tē hina’aro nei au i teie nō te tauturu mai iā’u i roto i tā’u ti’a’aura’a—

73 ’E mai te mea e pae tārā, ’e ’aore rā mai te mea hō’ē ’ahuru tārā, ’e ’aore rā e piti ’ahuru, ’e ’aore rā e pae ’ahuru, ’e ’aore rā hō’ē hānere a’e, e hōro’a atu te tīa’i moni i te fāito tāna i tītau nō te tauturu iāna i roto i tāna ti’a’aura’a—

74 Ē tae noa atu i te taime e ’itehia ai ē e ta’ata ’ōfati ture ’oia, ’e ’ua fa’a’ite-pāpū-roa-hia i mua i te ’āpo’ora’a nō te ha’apa’ora’a tāhō’ē ē e ti’a’au ha’apa’o ’ore ’oia ’e te pa’ari ’ore.

75 Terā rā, ’a vai noa ai ’oia i roto i te autaea’era’a mau, ’e ’ua ha’apa’o maita’i noa ’e ’ua pa’ari ho’i i roto i tāna ti’a’aura’a, ’o teie ho’i tāna tokene i te tīa’i moni ra, ’ia ’ore te tīa’i moni ’ia tāpe’a atu.

76 Terā rā, mai te mea ’ua ’ōfati ’oia i te ture, e auraro ïa te tīa’i moni i te ’āpo’ora’a ’e te reo ho’i nō te ha’apa’ora’a tāhō’ē.

77 ’E mai te mea ’ua ’itea te tīa’i moni ’ei ti’a’au ha’apa’o ’ore ’e te pa’ari ’ore, e auraro ïa ’oia i te ’āpo’ora’a ’e te reo nō te ha’apa’ora’a tāhō’ē, ’e e ’īriti-’ē-hia atu ’oia i tōna vāhi, ’e e mā’itihia te tahi ’ē atu ’ei mono nōna.

78 ’E teie fa’ahou ā, ’oia mau tē parau atu nei au ia ’outou nō ni’a i tā ’outou mau tārahu—inaha ’o tō’u ïa hina’aro ’ia ’aufau atu ’outou i tā ’outou mau tārahu pā’āto’a.

79 ’E ’o tō’u ïa hina’aro ’ia fa’aha’eha’a ’outou ia ’outou iho i mua iā’u nei, ’e ’ia fāri’i ho’i i teie ha’amaita’ira’a nā roto i tō ’outou itoito ’e te ha’eha’a ’e te pure fa’aro’o.

80 ’E mai te mea ’ua itoito noa ’outou ’e ’ua ha’eha’a, ’e ’ua tāmau noa i te pure fa’aro’o, inaha, e ha’amarū vau i te ’ā’au o te feiā tā ’outou i tārahu atu ē tae noa atu i te taime au e fa’atae atu ai i te rāve’a nō te fa’ati’amā ia ’outou.

81 Nō reira, ’a pāpa’i ’oi’oi atu i New York, ’e ’a pāpa’i mai te au i te fa’a’itehia atu e tō’u Vārua ; ’e nā’u e ha’amarū i te ’ā’au o te feiā tā ’outou i tārahu atu, ’ia fa’a’orehia tō rātou mana’o nō te ha’ape’ape’a ia ’outou.

82 ’E mai te mea e ha’eha’a noa ’outou ’e e ha’apa’o maita’i noa ho’i ma te ti’aoro noa mai i tō’u nei i’oa, inaha, e hōro’a atu vau ia ’outou i te rē.

83 Tē hōro’a atu nei au ia ’outou i te hō’ē fafaura’a, e fa’aorahia ’outou mai roto mai i tō ’outou tītīra’a i teie taime hō’ē nei.

84 ’E mai te mea e noa’a ia ’outou te rāve’a ’ia hōro’a tārahu atu i te moni nā ni’a i te hānere, ’e ’aore rā i te tauatini, ē tae noa atu i te taime e tārahu atu ai ’outou i tei nava’i nō te ha’amatara ia ’outou iho i te tītīra’a, tei ia ’outou te ti’ara’a ’ia nā reira.

85 ’E ’a tāpa’o na i te mau faufa’a tā’u i tu’u atu i roto i tō ’outou rima, i teie taime hō’ē noa nei, nā roto i te hōro’ara’a i tō ’outou mau i’oa nā roto i te tāhō’ēra’a ’e ’aore rā mai te au i tō ’outou mana’o e maita’i ai ’outou.

86 Tē hōro’a atu nei au i teie ti’ara’a ia ’outou, i teie taime hō’ē noa nei ; ’e inaha, mai te mea e rave ’outou i te mau mea tā’u i tu’u atu i mua ia ’outou na, mai te au i tā’u mau fa’auera’a, nā’u ho’i teie mau mea ato’a nei, ’e ’o ’outou tō’u mau ti’a’au, ’e e ’ore ho’i te fatu e fa’ati’a i tōna ’utuāfare ’ia vāvāhihia. ’Oia ïa. ’Āmene.