I ni’a iho ia ’ōrua e ta’u nā tāvini taea’e nei, nā Linda Curley Christensen ’e Michael Malm

14 nō Fepuare.

E aha te autahu’ara’a ?

Te Parau Ha’api’ira’a ʼe te mau Parau Fafau 12–13 ; Iosepha Semita—’Ā’amu 1:66–75

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te ’ohipa i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau tumu parau e ’āparau) :

• Tā tātou pupu ’aore rā piha. E aha te mau ’ohipara’a tā tātou i fa’atupu a’enei ? ’Ua manuia ānei te reira ? E aha te mau mea i tere maita’i, ’e e aha te nehenehe e ha’amaita’i atu ?

• Tā tātou mau ’ohipa ’aore rā mau hōpoi’a. ’O vai tē hina’aro nei i tā tātou tāvinira’a ? Nāhea tātou e nehenehe ai e tauturu ia rātou ?

• Tō tātou orara’a. E aha te mau fā tā tātou e ’ohipa tāta’itahi nei ? E aha te mau ’ohipa i tupu ’o tā tātou e nehenehe e fa’a’ite ? E aha te mau ha’amaita’ira’a tā tātou i fāri’i ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū nō te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau ’ōpuara’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

’A tai’o ai ’outou nō ni’a i te fa’aho’i-fa’ahou-ra’a-hia mai te autahu’ara’a a Aarona i roto i Te Parau Ha’api’ira’a ’e te mau Parau Fafau 13, e tāmata i te tai’o nā roto i te mata o te feiā tā ’outou e ha’api’i nei. Tē māramarama ra ānei rātou i te mana o te autahu’ara’a i roto i tō rātou orara’a ? Nāhea te mau ’ōro’a o te autahu’ara’a mai te bāpetizora’a ’e te ’ōro’a mo’a i te tauturu ia ’outou ’ia fāri’i i te mana o te Fa’aora ? ’A feruri i te mau ’itera’a tā ’outou e nehenehe e fa’a’ite. Nō te fa’aineine ia ’outou iho nō te ha’api’i i ni’a i te autahu’ara’a, ’ feruri i te tuatāpapa i te mau pāpa’ira’a mo’a i hōro’ahia i roto i te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare ’e te « Autahu’ara’a » i roto i te ’Arata’i nō te mau pāpa’ira’a mo’a (scriptures.ChurchofJesusChrist.org).

E tauturu te mau pāpa’ira’a mo’a ia tātou ’ia hāro’aro’a e nāhea te autahu’ara’a i te ha’amaita’i i tō tātou orara’a.

Ha’api’i-’āmui-ra’a mai

Nō te ha’amata i te hō’ē ’āparaura’a nō ni’a i te autahu’ara’a, e nehenehe ’outou e ani i te mau melo o te pupu ’aore rā, o te piha, ’ia fa’a’ite mai i te mea tā rātou i ’ite nō ni’a i te fa’aho’i-fa’ahou-ra’a-hia mai te autahu’ara’a a Aarona, tae noa atu i te mea tā rātou i tai’o i teie hepetoma i roto i Te Parau Ha’api’ira’a ’e te mau Parau Fafau 13 ’e Iosepha Semita—’Ā’amu 1:66–75. E nehenehe ato’a ’outou e fa’a’ite i te hō’ē hōho’a e fa’a’ite ra i te fa’aho’i-fa’ahou-ra’a-hia mai te autahu’ara’a a Aarona (mai te Buka hōho’a o te ’evanelia [2009], no°93) ’e e ani i te mau melo o te pupu ’aore rā, o te piha, ’ia fa’a’ite mai i te mea tā rātou i ’ite nō ni’a i teie ’ohipa i tupu. Nō te aha tātou i māuruuru ai ē ’ua fa’aho’i-fa’ahou-hia mai te autahu’ara’a ? E nehenehe te mau ’ohipara’a i muri nei e tauturu i te feiā tā ’outou e ha’api’i nei ’ia hāro’aro’a maita’i e aha te autahu’ara’a, ’e e mea nāhea te reira i te ha’amaita’i ia tātou.

• Nāhea te mau melo o te pupu ’aore rā, o te piha, ’ia fa’ata’a e aha te autahu’ara’a i te hō’ē ta’ata ’aore ā i fa’aro’o a’e nei i te reira ? Nō te tauturu ia rātou, e nehenehe ’outou e pāpa’i i ni’a i te tāpura ’ere’ere i te tahi mau uira’a a te ta’ata nō ni’a i te autahu’ara’a, mai teie E aha te autahu’ara’a ? Nāhea te hō’ē ta’ata e fāri’i ai i te autahu’ara’a ? Nāhea te hō’ē ta’ata tei mau i te autahu’ara’a ’ia ohipa ? E aha tā te mau taea’e tei mau i te autahu’ara’a e rave ? ’A ani i te feiā tā ’outou e ha’api’i nei ’ia ’imi i te mau pāhonora’a ma te fa’a’ohipa i te mau pāpa’ira’a mo’a ’e te tahi atu mau rāve’a e ’itehia i roto i « Te tahi atu mau rave’a tauturu » ’e ’ia pāpa’i i tā rātou mau pāhonora’a i ni’a i te tāpura ’ere’ere. E nehenehe ’outou e ani ia rātou ’ia fa’a’ite mai i te mau ha’amaita’ira’a e tae mai i roto i tō rātou orara’a maoti te autahu’ara’a. E nehenehe ato’a ’outou e fa’a’ite ’e e ’āparau i te video « Nāhea te autahu’ara’a ’ia ’ohipa » (ChurchofJesusChrist.org ; hi’o ato’a Dale G. Renlund, « Te autahu’ara’a ’e te mana tāra’ehara o te Fa’aora », Liahona, Novema 2017, 64–67).

• Mai te mea e ha’api’i ’outou i te feiā tei mau i te autahu’ara’a a Aarona, e fāna’o rātou i te hi’o fa’ahou i te parau poro’i a te taea’e Douglas D. Holmes « ’E aha te mea e tītauhia i te mau taea’e ato’a o te autahu’ara’a a Aarona ’ia hāro’aro’a » (Liahona, Mē 2018, 50–53). E nehenehe ’outou e fa’aue i te melo tāta’itahi o te pupu ’ia hi’o fa’ahou i te mau paratarāfa mātāmua e rave rahi o te parau poro’i ’aore rā, hō’ē o nā tuha’a e maha ’ē atu. E ani i te ta’ata tāta’itahi ’ia ’imi i te hō’ē mea tāna e mana’o ra ē, e mea tītauhia i te mau taea’e ato’a o te autahu’ara’a a Aarona ’ia hāro’aro’a. ’A hōro’a iāna i te hō’ē taime nō te fa’a’ite mai i te mea tāna i ’apo mai, ’e ’ia fa’ata’a mai ē, nō te aha ’oia i mā’iti ai i terā ha’api’ira’a.

• Mai te mea e ha’api’i ’outou i te feiā ’āpī tamāhine, e nehenehe ’outou e fa’a’ite i te parau poro’i a te peresideni Russell M. Nelson « Te mau tao’a pae vārua », tei vauvauhia nō rātou (Liahona, Novema 2019, 76–79). E nehenehe ’outou e ani i te mau melo o te piha ’ia ’imi i tāna parau poro’i nō te ’ite mai i te hō’ē mea ’o tā rātou e nehenehe e rave nō te « huti [hope] mai i te mana o te Fa’aora » i roto i tō rātou orara’a (’api 77). E aha tā te peresideni Nelson i ha’api’i nō ni’a e nāhea tātou e nehenehe ai e fāri’i mai i te mana o te autahu’ara’a ? Nāhea te mana o te autahu’ara’a i te ha’amaita’i ia tātou ? ’A fa’aitoito i te feiā ’āpī tamāhine ’ia feruri e nāhea rātou ’ia ha’a i ni’a i teie anira’a a te peresideni Nelson : « Tē tāparu nei au ’ia ’outou ’ia tuatāpapa nā roto i te pure i te mau parau mau ato’a e nehenehe e ’itehia ia ’outou nō ni’a i te mana o te autahu’ara’a » (’api 79).

Rave ma te fa’aro’o

’A fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tū’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e fa’a’ite mai i tō rātou mau mana’o.

Mau rāve’a tauturu pāturu

• Te Parau Ha’api’ira’a ’e te mau Parau Fafau 84:17–22 ; 107:1–5 (Te autahu’ara’a ’o te mana ’e te ha’amanara’a ïa o te Atua)

• Hebera 5:4 ; Te mau Hīro’a Fa’aro’o 1:5 (Nā te Atua i pi’i i te feiā tei mau i te autahu’ara’a ’e ’ua fa’atōro’ahia e te hō’ē tei mau i te ha’amanara’a)

• Te Parau Ha’api’ira’a ’e te mau Parau Fafau 121:34–46 (E ’ohipa te mana ’e te ha’amanara’a o te autahu’ara’a i ni’a noa i te mau parau tumu o te parauti’a)

• Mataio 3:1–6 ; 28:16–19 ; Ioane 15:16 ; Te Parau Ha’api’ira’a ’e te mau Parau Fafau 12:3–4 ( E poro te mau tāne ’e te mau vahine ti’amā i te ’evanelia)

• Te ’Ohipa 3:1–8 ; Iakobo 5:14–15 (E hōro’a te feiā tei mau i te autahu’ara’a i te ha’amaita’ira’a nō te fa’aora i tei ma’ihia ’e tei ’atihia)

• 3 Nephi 11:21–22 ; 18:1–5 ; Te Parau Ha’api’ira’a ’e te mau Parau Fafau 107:20 (E fa’atere te mau taea’e tei mau i te autahu’ara’a i te mau ’ōro’a)

• Te Parau Ha’api’ira’a ’e te mau Parau Fafau 65:2 ; 107:18–21 (E tauturu te mau taea’e tei mau i te autahu’ara’a ’ia fa’atere i te ’Ēkālesia)

• « ’Autahu’ara’a a ’A’arona », « ’Autahu’ara’a a Melehizedeka », ’Autahu’ara’a », i roto i te Mau māite i te fa’aro’o (2004), 3–4, 101–2, 124–28

Ha’api’ira’a mai tā te Fa’aora

’Ua ha’api’i te Fa’aora i tāna mau pipi ’ia fāriu atu i ni’a i te mau pāpa’ira’a mo’a nō te mau pāhonora’a i te mau uira’a ’e nō te fāri’i i te pūai pae vārua. Nāhea e nehenehe ai ia ’outou ’ia fa’aitoito i te feiā tā ’outou e ha’api’i nei ’ia fāriu atu i ni’a i te mau pāpa’ira’a mo’a nō te ’ite mai i te mau pāhonora’a i tā rātou mau uira’a ’e te mau tītaura’a ? (Hi’o Ha’api’ira’a mai tā te Fa’aora [2016], 30.)