28 nō Fepuare.

E aha te aura’a e tātarahapa ?

Te Parau Ha’api’ira’a ’e te mau Parau Fafau 18–19

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, i Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te ’ohipa i ni’a i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau mea e ’āparau) :

• Tā tātou pupu ’aore rā piha. ’O vai te ta’ata ’āpī i roto i tā tātou pāroita, ’e e nāhea tātou i te tauturu ia rātou ’ia ’ite rātou ē, tē fāri’i-pōpou-hia nei rātou ? E aha tā tātou e rave nō te ha’afaufa’a i tō tātou taime i roto i te mau rurura’a pupu autahu’ara’a ’aore rā te mau rurura’a piha tamāhine ?

• Tā tātou mau ’ohipa ’aore rā mau hōpoi’a. E aha te tahi o tā tātou mau ’ohipa ’e mau hōpoi’a ’ei feiā ’āpī tamāroa ’e ’ei feiā ’āpī tamāhine ? Nāhea tātou e nehenehe ai e rave maita’i a’e i te reira ?

• Tō tātou orara’a. E aha tā tātou e rave nō te riro rahi atu ā mai ia Iesu Mesia te huru, ’e ’ia fāri’i i tōna mana i roto i tō tātou orara’a ? E aha tā tātou e rave nō te tauturu i tō tātou ’utuāfare ’ia haere mai iāna ra ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū nō ni’a i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou i te pae vārua

E mea fifi roa ’ia tai’o i Te Parau Ha’api’ira’a ’e te mau Parau Fafau 19:16–19 ’e ’eiaha e ’ite i te here o te Fa’aora nō tātou. I roto i teie mau ’īrava, ’ua fa’ata’a ’oia i te māuiui ’o tāna i fa’aruru ’a tāra’e ai ’oia nō tā tātou mau hara, ’e ’ua heheu mai ’oia nō te aha ’oia i hina’aro ai e mamae rahi—« ia ore [tātou] ’ia ro’ohia i te mamae mai te mea ē, e tātarahapa [tātou] ». ’Ua riro te tātarahapa ’ei ha’amaita’ira’a tei fa’atupuhia e te Fa’aora. ’O te hō’ē ïa tauto’ora’a tāmau i te mau mahana ato’a, nā te fāriu ’ē i te hara ’e ’ia fāriu atu i ni’a i te Atua. E tuha’a te reira nō te fa’anahora’a a te Metua i te Ao ra nō te tauturu ia tātou ’ia ho’i iāna ra. E nehenehe te hāro’aro’ara’a nāhea ’ia tātarahapa, i te tauturu ia tātou ’ia tāmāhia i tā tātou mau hara, ’ia taui i tō tātou ’ā’au ’e te mau mana’o, ’e ’ia ha’afātata atu i te Atua.

Nāhea te tātarahapara’a i te tauturu ia ’outou ’ia ha’afātata atu i te Metua i te Ao ra ? Nāhea ’outou i te tauturu i te feiā tā ’outou e ha’api’i ra ’ia hina’aro e tātarahapa ? Nāhea ’outou i te tauturu ia rātou ’ia hi’o ē, te tātarahapa ’o te hō’ē ïa tauto’ora’a i te mau mahana ato’a ’e ’aita te reira i fa’ata’a-noa-hia nō te mau hara rahi ? ’A fa’aineine ai ’outou nō te ha’api’i, ’a feruri i te tuatāpapa i te parau poro’i a te peresideni Russell M. Nelson « E nehenehe tātou e rave maita’i a’e ’e e riro ’ei ta’ata maita’i a’e » (Liahona, Mē 2019, 67–69).

Te Mesia i Getesemane, nā Harry Anderson

Ha’api’i-’āmui-ra’a mai

Mai te mātāmua mai ā ’ua pi’i te mau peropheta ato’a i te ta’ata ’ia tātarahapa. Terā rā, ’aita paha e ani-manihini-ra’a pūai a’e ’ia tātarahapa mai tā te Fa’aora, o tē ’itehia i roto i Te Parau Ha’api’ira’a ’e te mau Parau Fafau 19:15–19, ’o tā te feiā ’āpī i tai’o paha i teie hepetoma. E nehenehe ’outou e ani ia rātou, e aha tā rātou i ’apo mai nō ni’a i te Fa’aora nā roto mai i teie mau ’īrava. E aha tā teie mau ’īrava e parau nei nō ni’a i te faufa’a rahi o te tātarahapa i te hi’ora’a a te Fatu ? E tauturu te mau mana’o i muri nei i te feiā tā ’outou e ha’api’i nei ’ia hi’o i te tātarahapa mai te hō’ē ha’amaita’ira’a i te mau mahana ato’a i roto i tō rātou orara’a.

• Nō te tauturu i te mau melo o te pupu ’aore rā, o te piha, ’ia hāro’aro’a e nāhea te tātarahapa i te ha’amaita’i i tō rātou orara’a, e nehenehe ’outou e ha’amata nā roto i te uira’a i teie mau uira’a : Nāhea vau e ’ite ai ē, tē tupura ra tā’u mau tauto’ora’a nō te tātarahapa ? Nāhea te Fa’aora i te tauturu mai iā’u ’ia taui ? Ta’a ’ē atu te fa’a’orera’a i te hara, e aha te tahi atu mau ha’amaita’ira’a e tae mai nā roto i te tātarahapa ? ’A ani i te mau melo o te piha ’ia tai’o hō’ē ’aore rā hau atu o te mau pāpa’ira’a mo’a i roto i « Mau rāve’a tauturu pāturu », ma te ’imi i te mau pāhonora’a i te mau uira’a. E aha tā rātou i ’ite mai ? ’Ei tuha’a nō teie ’āparaura’a, e nehenehe ’outou e fa’a’ite i te video « Te tātarahapa : Hō’ē mā’itira’a ’oa’oa » (ChurchofJesusChrist.org).

• E rave rahi feiā ’āpī tei ta’a ’ore i te aura’a o te tātarahapa. E nehenehe rātou e fē’a’a i te tātarahapa ’aore rā, e feruri ē nō te mau hara rarahi ana’e te reira. Nō te tauturu i te fa’atītī’aifarora’a i teie mana’o hape, e nehenehe ’outou e ani i te mau melo o te pupu ’aore rā, o te piha, ’ia tuatāpapa i te tuha’a o te parau poro’i a te peresideni Russell M. Nelson « E nehenehe tātou e rave maita’i a’e, ’e e riro ’ei ta’ata maita’i a’e » (Liahona, Mē 2019, 67–69), ma te ’imi mai i te mau pereota ’o tē tauturu ia rātou ’ia hāro’aro’a i te aura’a o te tātarahapa. E aha tei ’itehia mai e rātou ’o tē tauturu ia rātou ’ia feruri nō ni’a i te tātarahapa ma te hō’ē huru ’āpī ? E aha te mau ha’amaita’ira’a tā te peresideni Nelson i fafau i te feiā o te tātarahapa ?

• Nāhea ’outou i te tauturu i te feiā tā ’outou e ha’api’i nei ’ia hāro’aro’a nō te aha ’e e nāhea tātou ’ia tātarahapa ? E nehenehe te parau poro’i a te peresideni Dallin H. Oaks e tauturu « Tāmāhia nā roto i te tātarahapa » (Liahona, Mē 2019, 91–94). E nehenehe ’outou e vāhi te pupu ’aore rā, te piha nā roto e maha pupu, ’e e ani i te pupu tāta’itahi ’ia tai’o hō’ē o nā tuha’a e maha o te a’ora’a a te peresideni Oaks. I muri iho, e vauvau poto mai te pupu tāta’itahi e aha tā rātou i tai’o i te tahi atu mau pupu, e tae noa atu i te tahi mau ’īrava nō roto mai i te parau poro’i ’o tē pāturu i te mau mea tā rātou i ’apo mai. E nehenehe ’outou e fa’aoti ma te anira’a i te mau melo o te pupu ’aore rā, o te piha, ’ia fa’a’ite mai i tō rātou ’itera’a pāpū nō ni’a i te faufa’a o te tātarahapa i roto i te ’ōpuara’a a te Atua.

’A rave ma te fa’aro’o

E fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i ni’a i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tu’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e hōro’a mai i tō rātou mau mana’o.

Mau rāve’a tauturu pāturu

• 2 Nephi 31:13 ; Enosa 1:5–9 ; Mosia 4:9–12 ; 27:23–26, 35 ; Alama 19:33 ; 36:18–21, 24 ; 37:9 ; Helamana 15:7–8 ; Moroni 6:8 ; Te Parau Ha’api’ira’a ’e te mau Parau Fafau 58:42–43 ; 64:9–10 (Te mau pāpa’ira’a mo’a nō ni’a i te tātarahapa)

• Te Parau Ha’api’ira’a ’e te mau Parau Fafau 18:10–16 (E hōro’a mai te tātarahapa i te ’oa’oa)

• « Tātarahapa », i roto Nō te Pūai o te Feiā ’Āpī (2011), 28–29

• « Te tātarahapa nā roto i te tāra’ehara a Iesu Mesia », i roto i te pene 3 o te ’Ia Poro Haere i Tā’u nei ’Evanelia (2019), 62–63

• « Te tātarahapa, o te hō’ē ïa ha’amaita’ira’a nō tātou pā’āto’a », « Tāra’ehara—e ’ere nō te hō’ē ana’e taime » (video), ChurchofJesusChrist.org

Ha’api’ira’a mai tā te Fa’aora

’Ua ani te Fa’aora ia vetahi ’ē ’ia ’ohipa ma te fa’aro’o ’e ’ia ora i te mau parau mau tāna i ha’api’i. E aha tā ’outou e rave nō te tauturu i te feiā tā ’outou e ha’api’i nei ’ia hi’o i te mana o te tātarahapa i te mau mahana ato’a ? (Hi’o Ha’api’ira’a mai tā te Fa’aora [2016], 31, 35.)