’utuāfare e tuatāpapa ra i te mau pāpa’ira’a mo’a

14 nō Māti

Nāhea te mau ti’ara’a hanahana o te mau tāne ’e o te mau vahine i te tū’ati i te tahi ’e te tahi ?

Te Parau Ha’api’ira’a ʼe te mau Parau Fafau 23–26

ītona tāu’aparau ʼāmui

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te ’ohipa i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau tumu parau e ’āparau) :

• Tā tātou pupu ’aore rā piha. ’O vai te hina’aro i tā tātou tauturu ’e mau pure ? E aha tā tātou e nehenehe e rave nō te tauturu ia rātou ? ’O vai tā tātou e ani manihini ’ia haere mai i te hō’ē ’ohipara’a i muri nei ?

• Tā tātou mau ’ohipa ’aore rā mau hōpoi’a. E aha te mau tītaura’a tā tātou i fa’aoti ? E aha te mau tītaura’a e ti’a ia tātou ’ia rave ? Nāhea tātou i te ani manihini ia vētahi ’ē ’ia haere mai i te Mesia ra, ’e nāhea tātou i te ani manihini ia vētahi ’ē i teienei ?

• Tō tātou orara’a. E aha te mau ’itera’a ’aita i maoro a’enei tei ha’apūai i tō tātou ’itera’a pāpū ? E aha te mea e tupu nei i roto i tō tātou orara’a ’e e nāhea tātou e nehenehe ai e pāturu te tahi ’e te tahi ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū nō te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau ’ōpuara’a ’e te mau ani-manihini-ra’a i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

’Ua hōro’a ’aifāito te Metua i te Ao ra i te mau tāne ’e te mau vahine i te mau ti’ara’a faufa’a rahi nō te fa’atupu i tāna ’ōpuara’a. Tē tū’ati nei teie mau ti’ra’a i te tahi ’e te tahi. Nō te tauturu i te mau tāne ’e te mau vahine ’ia fa’aoti i teie mau ti’ara’a, ’ua hōro’a ’oia ia rātou i te mau hōro’a ’e te mau ’aravihi hō’ē roa. ’Ua tuatāpapa paha te mau melo o te pupu ’aore rā, o te piha i Te Parau Ha’api’ira’a ’e te mau Parau Fafau 25 i teie hepetoma. I roto i teie heheura’a, ’ua hōro’a te Fatu i te a’o ia Emma Smith nō ni’a i tāna ’ohipa faufa’a roa i roto i te fa’aho’i-fa’ahou-ra’a mai o te ’evanelia ’e ’ua fa’ata’a e nāhea Iosepha ’e ’o Emma ’ia pāturu te tahi i te tahi. E aha te mau hi’ora’a tā ’outou i ’ite nō te mau tāne ’e te mau vahine i te rave-’āmui-ra’a i te ’ohipa ma te mau rāve’a e tū’ati nō te rave i te ’ohipa a te Fatu ? Nāhea ’outou i te fa’auru i te feiā ’āpī tamāroa ’aore rā, te feiā ’āpī tamāhine tā ’outou e ha’api’i ra, ’ia hāro’aro’a i tā rātou ti’ara’a hanahana ’e ’ia rave ’āmui i te ’ohipa nō te patu i te bāsileia o te Atua ?

’A fa’aineine ai ’outou nō te ha’api’i, ’a feruri e hi’o fa’ahou i « Te ’Utuāfare : E Poro’i i tō te Ao nei » (ChurchofJesusChrist.org) ’e i te parau poro’i a te tuahine Linda K. Burton « E ta’uma ’āmui tātou » (Liahona, Mē 2015, 29–32).

feiā ’āpī tamāhine ’e hō’ē feiā ’āpī tamāroa e fa’anehenehe ra i te hō’ē faraoa monamona

E nehenehe te feiā ’āpī tamāroa ’e te feiā ’āpī tamāhine e ha’api’i mai ’ia rave ’āmui i te ’ohipa i roto i te patura’a i te bāsileia o te Atua.

Ha’api’i-’āmui-ra’a mai

Nō te ha’amata i te hō’ē ’āparaura’a nō ni’a e nāhea te mau tāne ’e te mau vahine i te rave ’āmui i te ’ohipa i roto i te bāsileia o te Atua, ’a feruru e ani i te mau melo o te pupu ’aore rā, o te piha ’ia hi’o fa’ahou i Te Parau Ha’api’ira’a ’e te mau Parau Fafau 25. E aha tā te Fatu i parau nō ni’a i te mau hōpoi’a a Emma ’e a Iosepha i ni’a i te tahi ’e te tahi ? E aha tā tātou e ha’api’i mai i roto i te tuha’a 25 nō ni’a e nāhea te mau tāne ’e te mau vahine ia rave ’āmui i te ’ohipa ? E hōro’a atu i te feiā tā ’outou e ha’api’i ra i te tahi mau ’api parau nō te pāpa’i i te mau mea tā ratou i ’ite mai ’e e ani ia rātou ’ia fa’a’ite mai i tō rātou mau mana’o. I muri iho e mā’iti i roto i te mau ’ohipara’a i muri nei nō te tauturu ia rātou ’ia hāro’aro’a maita’i a’e e aha tā te Atua e tīa’i nei i tāna mau tamaiti ’e tāna mau tamāhine ’ia rave ’āmui i te ’ohipa.

• E nehenehe ānei ’outou e feruri i te hō’ē hi’ora’a nō te tauturu i te mau melo o te pupu ’aore rā, o te piha ’ia hāro’aro’a i te aura’a o te parau ra « tū’atira’a » ? ’Ei hi’ora’a, e nehenehe rātou e parau nō ni’a i te mau ’ū e tū’atu ’aore rā, e ’āparau e nāhea te mau reo rau i roto i te hō’ē pupu hīmene i te hōro’a mai i te hīmene hau atu i te navenave. Nāhea te mau ti’ara’a hanahana o te mau tāne ’e o te mau vahine i te tū’ati te tahi i te tahi ? ’Ei pupu ’aore rā, ’ei piha, e tai’o ’āmui i nā paratarāfa mātāmua e piti o te tuha’a tei pi’ihia « Fa’ateiteira’a ’e tauturura’a i roto i tā tātou mau ’ohipa ’āpipiti » nō roto mai i te parau poro’i a te tuahine Linda K. Burton « E ta’uma ’āmui tātou » (Liahona, Mē 2015, 30). ’Aore rā, e nehenehe ’outou e ani i te hō’ē nā ta’ata fa’aipoipohia ’ia haere mai i roto i tā ’outou pupu ’aore rā, piha, ’e e paraparau mai nō ni’a e nāhea rāua i te tauturura’a te tahi ’e te tahi ’ia fa’aoti i tō rāua ti’ara’a ’e e nāhea te Fatu i te tauturura’a ia rāua. E aha tā tātou i ha’api’i mai, nā roto mai i te parau poro’i a te tuahine Burton ’aore rā, a nā ta’ata fa’aipoipohia, e nāhea te mau tāne ’e te mau vahine i te pāturura’a te tahi ’e te tahi i roto i te mau ’utuāfare ?

• E nehenehe te mau pāpa’ira’a mo’a i tāpurahia i roto i te « Mau rāve’a tauturu pāturu » e tauturu i te mau melo o te pupu ’aore rā, o te piha ’ia ’apo hau mai nō ni’a i te mau hōpoi’a a te mau tāne ’e a te mau vahine i roto i te mau ’utuāfare. ’A fa’ata’a i te melo tāta’itahi o te pupu ’aore rā, o te piha, ’ia tai’o hō’ē o teie mau tuha’a pāpa’ira’a mo’a. E ani ia rātou ’ia fa’a’ite mai i tā rātou mau ’īrava ’e ’ia parau mai nō ni’a i te mau hōpoi’a i fa’a’itehia. E aha tā teie mau pāpa’ira’a mo’a e ha’api’i nei nō ni’a i te mau hōpoi’a a te mau metua ? Nāhea te mau tāne ’e te mau vahine fa’aipoipo i te tauturu i te tahi ’e te tahi i roto i te fa’aotira’a i teie mau hōpoi’a hanahana ? Nāhea te Fa’aora i te tauturu ia rāua ’ia manuia ? Nāhea te mau tamari’i i te tauturu ia rāua ?

• Nō te tauturu i tā ’outou pupu ’aore rā, te piha ’ia hāro’aro’a e nāhea te mau tāne ’e te mau vahine e nehenehe ai e tauturu i te tahi ’e te tahi ’ei nā ’āpiti ’aifāito, ’a pāpa’i i teie mau upo’o parau i muri nei i ni’a i te tāpura ’ere’ere: Te mau hōpoi’a a te Metua tāne ’e Te mau hōpoi’a a te metua vahine. E ani i te mau melo o te pupu ’aore rā, o te piha, ’ia ’imi mai i te paratarāfa hitu o « Te ’Utuāfare : ’E Poro’i i tō te Ao nei » ’e e pāpa’i e aha tā tātou i ’ite mai i raro a’e i te upo’o parau tano. E aha tā tātou i ha’api’i mai nō ni’a i te mau ti’ara’a hanahana o te mau metua tāne ’e o te mau metua vahine ? E aha te aura’a te parau ē, e tauturu te mau metua tāne ’e te mau metua vahine i te tahi ’e te tahi « ei mau ’āpiti ’aifāito » i roto i te fa’aotira’a i teie mau hōpoi’a ? E aha te mau hi’ora’a tā tātou e nehenehe e fa’a’ite nō roto mai i tō tātou orara’a, ’o tē fa’a’ite nei i te mau metua tāne ’e te mau metua vahine i te fa’aotira’a i tō rātou mau ti’ara’a ’e te tauturura’a i te tahi ’e te tahi ’ei mau ’āpiti ’aifāito ? E nehenehe ato’a ’outou e ’āparau i te mau rāve’a e nehenehe ai te feiā ’āpī e fa’aineine i teienei nō teie mau ti’ara’a nō a muri a’e.

’A rave ma te fa’aro’o

’A fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tū’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e fa’a’ite mai i tō rātou mau mana’o.

Mau rāve’a tauturu pāturu

• Maseli 22:6 ; Te Parau Ha’api’ira’a ’e te mau Parau Fafau 68:25–28 ; 121:41–43 (Te mau hōpoi’a a te mau metua)

• Ephesia 5:25 ; Mose 3:21–24 ; 5:1–12 (E rave ’āmui te mau tāne ’e te mau vahine fa’aipoipo i te ’ohipa ’ei nā ’āpiti ’aifāito)

• Jean B. Bingham, « ’āmui i roto i te ravera’a i te ’ohipa a te Atua », Liahona, Mē 2020, 60 – 63

• « Te mau vahine i roto i tō tātou orara’a, », « ’Ei tāne tātou » (video), ChurchofJesusChrist.org

Ha’api’ira’a mai tā te Fa’aora

’Ua fa’aineine te Fa’aora i te feiā tāna i ha’api’i ’e ’ua hōro’a ia rātou i te mau hōpoi’a faufa’a roa. Nāhea ’outou ’ia fa’aineine i te feiā tā ’outou e ha’api’i nei ’ia rave ’āmui i te ’ohipa ’ei mau tamaiti ’e ’ei mau tamāhine nā te Atua ? (Hi’o Ha’api’ira’a mai tā te Fa’aora [2016], 27–28.)