Te Mesia i Gētesemane nā Heinrich Hofmann.

28 nō Māti

Nō te aha vau e hina’aro ai i te Tāra’ehara a Iesu Mesia ?

Te Parau Ha’api’ira’a ’e te mau Parau Fafau 29

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i te Te parau tumu a te pupu Autahu’ara’a a Aarona ’aore rā, i Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te ’ohipa i te mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau tumu parau e ’āparau) :

• Tā tātou pupu ’aore rā piha. E aha tā tātou e nehenehe e rave nō te fa’atupu i te hō’ēra’a i roto i te mau melo o te pupu ’aore rā, o te piha ? E aha te mau fā tā tātou e hina’aro e rave ’āmui ?

• Tā tātou mau ’ohipa ’aore rā mau hōpoi’a. E aha tā tātou e rave ra nō te fa’a’ite i te ’evanelia ? E aha te mau ’itera’a tā tātou i fāri’i nō te ravera’a i te ’ohipa hiero ’e te ’ā’amu ’utuāfare ?

• Tō tātou orara’a. Nāhea tātou i te ’itera’a i te rima o te Fatu i roto i tō tātou orara’a ? E aha te mea tei fa’auru ia tātou i roto i tā tātou tuatāpapara’a pāpa’ira’a mo’a i teie hepetoma ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū nō ni’a i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau ’ōpuara’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou i te pae vārua

’Ua ha’api’i te peresideni Ezra Taft Benson : « Mai te hō’ē ta’ata ’aita e hina’aro mau i te mā’a tae roa atu ē, ’ua po’ia ’oia, ’aita ato’a ’oia e hina’aro i te fa’aorara’a a te Mesia tae roa atu ē, e ’ite ’oia ē, nō te aha ’oia e hina’aro ai i te Mesia. ’Aita hō’ē ta’ata e ’ite maita’i nō te aha ’oia e hina’aro ai i te Mesia tae roa atu ē, e hāro’aro’a ’e e fāri’i ’oia i te ha’api’ira’a tumu o te hi’ara’a ’e te mau hope’ara’a o te reira i ni’a i te mau ta’ata ato’a » (« The Book of Mormon and the Doctrine and Covenants  », Ensign, Mē 1987, 85). ’A tuatāpapa ai ’outou i Te Parau Ha’api’ira’a ’e te mau Parau Fafau 29 i teie hepetoma, e nehenehe ’outou e ’ite mai i te fa’ata’ara’a a te Fa’aora nō ni’a i te Hi’ara’a ’e e nāhea tātou i te fa’aorara’ahia. Nāhea ’outou i te fāri’ira’a i te hō’ē ’itera’a pāpū nō Iesu Mesia ’e nō tōna ti’ara’a ’ei Fa’aora ’e ’ei Tāra’ehara nō ’outou ? ’A feruri e nāhea te ha’apūaira’a i te ’itera’a pāpū o te mau melo o te pupu ’aore rā, o te piha, nōna, i te taui ia rātou. ’A fa’aineine ai ’outou, e feruri i te tuatāpapa i Te ti’amāra’a ’e te hi’ara’a ’o Adamu ’e ’o Eva », « Te Tāra’ehara a Iesu Mesia », ’e « Te misiōni hanahana a Iesu Mesia » i roto i te pene 3 o te ’Ia Poro Haere i tā’u nei ’Evanelia ([2019], 49–52, 60–61).

Nō te mea ’ua fa’aora te Fa’aora ia tātou i te hi’ara’a, e nehenehe tātou e ’ite mai i te ’oa’oa.

Ha’api’i-’āmui-ra’a mai

Nō te ha’amata i te ’āparaura’a o teie mahana, e nehenehe ’outou e ani i te feiā tā ’outou e ha’api’i ra ’ia tāpura i ni’a i te tāpura ’ere’ere te hō’ē mea tā rātou i ’ite nō ni’a i te hi’ara’a ’o Adamu ’e ’o Eva. ’Ei hi’ora’a, e aha tā rātou e ha’api’i mai nō ni’a i te hi’ara’a, i roto i Te Parau Ha’api’ira’a ’e te mau Parau Fafau 29:36–50 ? E aha te tāpa’o fa’a’ite o te hi’ara’a tā tātou e ’ite nei ’ati a’e ia tātou ? Nā te mau ’ohipara’a i raro nei e tauturu i tā ’outou pupu ’aore rā, piha, ’ia ’ite ē, nāhea te Tāra’ehara a Iesu Mesia i te tauturu ia tātou ’ia upo’oti’a i ni’a i te mau hope’a o te hi’ara’a.

• Nō te hāro’aro’a maita’i atu ā i te hi’ara’a ’o Adamu ’e ’o Eva, e ti’a i te mau melo o te pupu ’aore rā, o te piha, e tai’o i te « Hi’ara’a » i roto i te Mau māite i te Fa’aro’o (56–59) ’aore rā, « Te ti’amāra’a ’e te hi’ara’a ’o Adamu ’e ’o Eva » i roto i te pene 3 o te ’Ia Poro Haere i tā’u nei ’Evanelia (49–50). E ani ia rātou ’ia feruri ē, ’ua ani mai te hō’ē hoa ia rātou, « Nō te aha vau e hina’aro ai ia Iesu Mesia ? » E ani ia rātou ’ia ha’api’i ’āpipiti te tahi ’e te tahi nāhea rātou ’ia pāhono i te reira uira’a ma te turu’i i ni’a i te mea tā rātou i ’apo mai i roto i tā rātou tai’ora’a.

• Nāhea ’outou i te tauturu i te mau melo o te pupu ’aore rā, o te piha, ’ia ha’api’i mai nā roto mai i te mau pāpa’ira’a mo’a nō te aha rātou e hina’aro ai i te Tāra’ehara a Iesu Mesia ? Hō’ē rāve’a, ’o te pāpa’ira’a ïa i te tahi mau fa’ahorora’a o te pāpa’ira’a mo’a nō roto mai i te « Mau rāve’a tauturu pāturu » i ni’a i te tāpura ’ere’ere, ’e i muri iho, e pāpa’i i te mau fa’ahitira’a parau poto nō tāua mau fa’ahorora’a ra i ni’a i te mau tuha’a ’api parau. E hōro’a i te mau melo o te pupu ’aore rā, o te piha, hō’ē o te mau tuha’a ’api parau. E ani ia rātou ’ia tai’o i te mau fa’ahorora’a o te mau pāpa’ira’a mo’a i pāpa’ihia i ni’a i te tāpura ’ere’ere ’e ’ia ’ite mai i te hō’ē e tū’ati atu i tā rātou fa’ahitira’a parau poto. (Tē vai ra te tahi mau fa’ahitira’a parau e tū’ati hau atu i te hō’ē moa pāpa’ira’a mo’a). E ani i te melo tāta’itahi o te pupu ’aore rā, o te piha, ’ia tai’o pūai i tuha’a pāpa’ira’a mo’a e tū’ati i ni’a i tā rātou fa’ahitira’a parau, ’e ’ia fa’a’ite mai e aha tā rātou i ’apo mai nō ni’a i te tumu e hina’aro ai tātou i te Tāra’ehara a te Fa’aora.

• E ani i te mau melo o te pupu ’aore rā, o te piha, ’ia pāhono ’ōmo’e i te mau uira’a mai teie i muri nei : Nāhea vau i te ha’amaita’ihia nā roto i te Tāra’ehara a Iesu Mesia ? E aha tā te Fa’aora e hina’aro ’ia taui au ’ia ti’a iā’u ’ia ora hope roa i te mau ha’amaita’ira’a o tōna Tāra’ehara ? ’I muri iho e ani ia rātou ’ia ’āparau ’āmui i te uira’a mātāmua. E nehenehe rātou e hi’o fa’ahou « Te Tāra’ehara a Iesu Mesia » ’e « Te misiōni hanahana a Iesu Mesia » i roto i te pene 3 o te ’Ia Poro Haere i tā’u nei ’Evanelia (51–52, 60–61.) ’e hō’ē ’aore rā hau atu o te mau video i roto i te « Mau rave’a tauturu pāturu ». E ani ia rātou ’ia fa’a’ite mai e aha tā rātou i ’apo mai.

’A rave ma te fa’aro’o

E fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i e aha tā rātou e rave nō te ’ohipa i ni’a i te mau fa’a’itera’a tā rātou i fāri’i i teie mahana. Nāhea te ha’api’ira’a nō teie mahana e tu’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e hōro’a mai i tō rātou mau mana’o.

Mau rāve’a tauturu pāturu

• Te Parau Ha’api’ira’a ’e te mau Parau Fafau 19:16–19 (’Ua ’aufau Iesu Mesia i te ho’o nō tā tātou mau hara ’ia ’ore ho’i tātou ’ia mamae mai te mea e tātarahapa tātou)

• 2 Nephi 9:6–16 ; Alama 42:6–9 (’Ua fa’aora o Iesu Mesia ia tātou i te pohe ’e i hade)

• 2 Nephi 2:5–10 ; Helamana 14:15–17 (Nā roto ana’e ia Iesu Mesia e nehenehe ai tātou e ho’i i te Atua ra)

• Mosia 3:7 ; Alama 7:11–13 (Maoti tō te Mesia ravera’a i ni’a iho iāna i tō tātou mau pe’ape’a ’e tā tātou mau hara, ’ua ’ite ’oia nāhea ’ia tauturu ia tātou)

• Mose 5:10–12 (Nō te mea ’ua fa’aora te Fa’aora ia tātou i te hi’ara’a, e ’ite mai tātou te ’oa’oa)

• Walter F. Gonzalez, « Te rima o te Fa’aora », Liahona, Novema 2019, 90–92

• « ’I hea te parauti’a, te here ’e te aroha e fārerei ai », « Nō te aha tātou e hina’aro ai i te hō’ē Fa’aora », « Nā te Tāra’ehara e fa’ati’a ia tātou » (video), ChurchofJesusChrist.org

Ha’api’ira’a mai tā te Fa’aora

’Ua pure te Fa’aora nō tāna mau pipi ’e e tāmau noa i te tāvini ia rātou. ’Ua ’ite mai ’oia i te mau rāve’a ’ia vai i pīha’i iho ia rātou ’e ’ia fa’a’ite i tōna aroha. E aha te mau rāve’a tā ’outou e vai ra nō te rave ato’a mai te reira ’e te feiā tā ’outou e ha’api’i nei ? (Hi’o Ha’api’ira’a mai tā te Fa’aora [2016], 6.)