11 nō ’Ēperēra

Nāhea e nehenehe ai iā’u ’ia tītau manihini i te tā’āto’ara’a ’ia haere mai i te Mesia ?

Te Parau Ha’api’ira’a ʼe te mau Parau Fafau 30–36

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, i Te parau tumu a te Feiā ’Āpī Tamāhine. I muri iho, ta’a ’ē atu i te ’āparaura’a nō ni’a i te mau ’ohipa ta’a ’ē a te pupu ’aore rā, a te piha, e nehenehe ’outou e ’āparau nō te mau mana’o ’e te mau tumu parau nō roto mai i te ’āmuira’a rahi. E tauturu te mau uira’a i muri nei.

• E aha te mau tumu parau ’aore rā, te mau parau poro’i tei ha’aputapū ia tātou ?

• E aha tei fa’a’ana’anatae ia tātou ’ia rave nō te mea tā tātou i ha’api’i mai ’aore rā tei fa’auru ia tātou ?

• E aha te ti’a ia tātou ’ia rave ’ei pupu ’aore rā, ’ei piha, nō te fa’a’ohipa i te a’ora’a tā tātou i fa’aro’o i roto i te ’āmuira’a rahi ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū nō ni’a i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau ’ōpuara’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

Tau ’āva’e noa i muri a’e i te fa’anahora’ahia te ’Ēkālesia tei fa’aho’i-fa’ahou-hia mai i te 6 nō ’Ēperēra 1830, i Fayette, New York, ’ua ha’amata te Fatu i te pi’i i te mau misiōnare nō te ha’aputuputu « i [tei] mā’iti mai roto mai i nā tufa’a e maha nō te fenua nei » (Te Parau Ha’api’ira’a ’e te mau Parau Fafau 33:6). ’O te ’ohipa ïa tei ha’amata nā roto i te hō’ē pu’e ta’ata iti tei fa’afāriu-’āpī-hia, i roto i te hō’ē tuha’a fenua tā’ōti’ahia tei riro mai ’ei nu’u misiōnare porora’a ’evanelia nā te ao ato’a nei. ’Aita rā te ’ohipa misiōnare i tā’ōti’ahia nō te feiā e tāvini nei i te mau misiōni rave tāmau. Tē hina’aro nei te Fatu ’ia tātou tāta’itahi ’ia ani manihini i te mau ta’ata ’ati a’e ia tātou ’ia haere mai iāna ra.

E aha te mau ’itera’a tei roa’a ia ’outou i te ani-manihini-ra’a ’ia vetahi ’ē ’ia ha’api’i mai i te ’evanelia a te Fa’aora ? E aha te ti’a ia ’outou ia rave nō te fa’auru i te mau melo o te pupu ’aore rā, o te piha, ’ia fa’aoti i tā rātou ’ohipa i te ’āfa’ira’a mai i te mau vārua ia Iesu Mesia ra ? ’A fa’aineine ai ’outou nō te ha’api’i, ’a feruri i te hi’o fa’ahou « E aha tā’u fā ’ei misiōnare ? » i roto i te ’Ia Poro Haere i tā’u nei ’Evanelia ([2019] 1–16) ’e te parau poro’i a Elder Dieter F. Uchtdorf « Te ’ohipa misiōnare : Fa’a’ite i te mea i roto i tō ’outou ’ā’au », Liahona, Mē 2019, 15–18).

Nā roto i te anira’a i tō tātou mau hoa ’ia haere mai i te mau purera’a ’aore rā, i te mau ’ohipara’a a te ’Ēkālesia, tē tauturu ra ïa tātou ia rātou ’ia ha’api’i mai nō ni’a i te Mesia.

Ha’api’i-’āmui-ra’a mai

Tē fa’ahiti nei Te Parau Ha’api’ira’a ’e te mau Parau Fafau 30–36 i te mau i’oa o te mau ta’ata e rave rahi tei pi’ihia i roto i te misiōni i te mau mahana mātāmua o te ’Ēkālesia. Tau mahana hou tā ’outou putuputura’a, e nehenehe ’outou e hōro’a i te melo tāta’itahi o te pupu ’aore rā, o te piha, i te hō’ē o teie mau i’oa (hi’o i te mau upo’o parau o te mau tuha’a 30–36) ’e e ani iāna ’ia ha’api’i mai e aha te parau a’o tā te Fatu i hōro’a nō te tauturu i te reira ta’ata ’ia fa’a’ite i te ’evanelia. Nāhea tātou i te fa’a’ohipa i te reira parau a’o ia tātou iho ? E nehenehe te mau mana’o i raro nei e fa’auru i te feiā tā ’outou e ha’api’i nei ’ia ani i te mau ta’ata ’ati a’e ia rātou ’ia haere mai i te Mesia ra.

• ’Ua ta’a ānei i te feiā tā ’outou e ha’api’i ra, e aha te aura’a, ’ia haere mai i te Mesia ra ? E ani ia rātou ’ia fa’a’ite mai i tō rātou mau mana’o. Mai te mea e mea maita’i, e nehenehe ’outou e fa’a’ite atu i teie tātarara’a : « Nō te haere mai i te Fa’aora, ’ei fa’aro’o tō te ta’ata iāna e tae roa i te tātarahapa—te ravera’a i te mau tauira’a e tītauhia nō te fa’atū’ati i tō rātou orara’a i ni’a i tāna ha’api’ira’a » (’Ia Poro Haere i tā’u nei ’Evanelia, 2). E nehenehe ato’a te mau melo o te pupu ’aore rā, o te piha, e tai’o i te mau pāpa’ira’a mo’a tei roto te mau pereota mai teie « haere mai ’outou iā’u nei » ’aore rā, « haere mai i te Mesia ra » nō te tauturu i te pāhono i teie uira’a—’ei hi’ora’a, Mataio 11:28–30 ; Omoni 1:26 ; Moroni 10:32 ; Te Parau Ha’api’ira’a ’e te mau Parau Fafau 20:59. Nō te aha tātou e hina’aro ai ’ia haere mai te ta’ata i te Mesia ra ? E aha te tahi mau ’ohipa ’ōhie e nehenehe tā tātou e rave nō te tauturu ia rātou ? E nehenehe te mau melo o te pupu ’aore rā, o te piha, e hāmani i te mau fa’anahora’a nō te ani i te hō’ē ta’ata tā rātou i mātau ’ia ha’afātata mai i te Mesia.

• E riro te ha’api’ira’a mai e nāhea vetahi i te fa’a’itera’a i te ’evanelia, ’ei rāve’a maita’i roa nō te fa’auru i te feiā tā ’outou e ha’api’i nei. E nehenehe ’outou e fa’a’ite i te hō’ē ’aore rā, hau atu mau video e ’itehia i raro a’e i te « Mau rāve’a tauturu pāturu » ’aore rā, e ani i te mau melo o te pupu ’aore rā, o te piha, ’ia tai’o mai i te parau a’o ’e te mau hi’ora’a e ’itehia i roto i te parau poro’i a te tuahine Cristina B. Franco « Te ’itera’a i te ’oa’oa i roto i te fa’a’itera’a i te ’evanelia » (Liahona, Novema 2019, 83–86). E aha tā tātou i ʼapo mai nā roto mai i teie mau hiora’a ? E ’āparau ’āmui e aha tā tā ’outou pupu ’aore rā, piha, e rave nō te ani ia vetahi ’ē ’ia haere mai i te Mesia ra.

• ’Ia tae ana’e mai te taime nō te fa’a’ite i te ’evanelia, ’ua parau o Elder Dieter F. Uchtdorf ē, e riro te tahi pae o tātou i te « tapitapi ri’i nō te rave i te reira. ’Aore rā, e ha’amā ri’i ’ia haere i rāpae i tō tātou vāhi hau » (« ’Ohipa misiōnare : Te fa’a’itera’a e aha tō roto i tō ’outou ’ā’au », Liahona, Mē 2019, 16). Mai te mea e fāri’i te mau melo o te pupu ’aore rā, o te piha i te reira huru, e tauturu nā mana’o ’ōhie e pae tā Elder Uchtdorf i hōro’a i roto i tāna parau poro’i, ia rātou. E ani i te melo tāta’itahi o te piha ha’api’ira’a ’ia tai’o mai hō’ē a’e o tōna mau mana’o, ’e ’ia fa’a’ite mai i te mea tā rātou i ’apo mai.

’A rave ma te fa’aro’o

E fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tu’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e hōro’a mai i tō rātou mau mana’o.

Mau rāve’a tauturu pāturu

• 1 Timoteo 4:12 (’Ia riro ’outou ’ei hi’ora’a nō te feiā fa’aro’o)

• Alama 17:2–4 (’Ua fa’aineine te mau tamaiti a Mosia ia rātou iho nō te fa’a’ite i te ’evanelia)

• Te Parau Ha’api’ira’a ’e te mau Parau Fafau 42:6–7 (’Ia poro i te ’evanelia nā roto i te mana o te Vārua)

• Russell M. Nelson ’e Wendy Nelson, « Ti’aturira’a o ’Īsera’ela » (purera’a nā te feiā ’āpī ’ati ti’a te ao nei i te 3 nō Tiunu 2018), hau atu te New Era ’e te Ensign, HopeofIsrael.ChurchofJesusChrist.org

• « Anira’a i te tā’āto’ara’a ’ia haere mai i te Mesia ra : Fa’a’itera’a i te ’Evanelia », « Anira’a ia vetahi ’ia haere mai ’e e hi’o », « Anira’a ia vetahi ’ia haere mai ’e e tauturu », « Anira’a ia vetahi ’ia haere mai ’e ’ia fa’aea mai », ChurchofJesusChrist.org

Ha’api’ira’a mai tā te Fa’aora

’Ua ani manihini te Fa’aora ia vetahi ’ia fa’a’ite pāpū i te mau parau mau ’ia ti’a i te Vārua ’ia ha’aputapū i tō rātou ’ā’au « ’O vai rā vau i tā ’outou nā paraura’a ? » Tāna ïa uira’a. ’A pāhono ai Petero, ’ua ha’apūaihia tōna ’itera’a pāpū : « O te Mesia ’oe, te Tamaiti a te Atua ora » (Mataio 16:15–16). Nāhea te fa’a’itera’a i te ’evanelia i te ha’apūai i te mau ’itera’a pāpū o te mau melo o te pupu ’aore rā, o te piha ?