Te fa’ati’a’ia a te Fa’aora
’A haere ai tātou iāna ra, e haere mai te Atua e fa’aora ia tātou, e fa’aora ’oia i tō tātou māuiui ’aore rā e hōro’a mai ’oia i te pūai nō te fa’aruru i te huru fifi ato’a.
Fātata e 2 000 matahiti i teienei, ’ua pou mai te Fa’aora mai ni’a mai i te mou’a i muri i tōna ha’api’ira’a i te mau Ha’amaita’ira’a ’e i te tahi ato’a mau parau tumu nō te ’evanelia. ’A haere ai ’oia, tē haere mai nei te hō’ē ta’ata e ma’i lēpera tōna. ’Ua fa’a’ite mai ra taua ta’ata ra i te mana’o tura ’e te fa’atura nā roto i te tāhopura’a i te Mesia, i te ’imira’a i te tāmarū i tōna māuiui. E anira’a ’ōhie tāna : « E te Fatu, mai te mea e ti’a ia ’oe, e mā vau ia ’oe ».
’Ua fa’atoro atu ra te Fa’aora i tōna rima ’e fa’ati’a’ia atu ra iāna, ’a nā ’ō ai : « ’Ua ti’ā ’iā’u; ’ia mā ’oe ».1
Tē ha’api’i nei tātou i’ō nei ē, tē hina’āro noa nei to tatou Fa’aora e ha’amaita’i ia tātou. E nehenehe te tahi mau ha’amaita’ira’a e tae vave mai, e nehenehe te tahi e tāere ri’i, e nehenehe ato’a te tahi e tae mai i muri mai i teie orara’a, terā rā e tae mai te mau ha’amaita’ira’a i te taime i fa’ata’ahia.
Mai te lēpera ra, e nehenehe tātou e ’ite i te pūai e te tūroto i roto i teie orara’a nā roto i te fāri’ira’a i tōna hina’aro ’e nā roto i te ’itera’a ē tē hina’aro nei ’oia e ha’amaita’i ia tātou. E nehenehe tātou e ’ite i te pūai nō te ’aro i te huru tāmatara’a, nō te upo’oti’a i te mau ’umera’a ’ia hara ’e nō te māramarama ’e nō te fa’a’oroma’i i tō tātou mau taime fifi. E mea pāpū, i roto i te taime teimaha roa a’e o tōna orara’a, ’ua ha’apāpūhia te pūai o te Fa’aora nō te fa’a’oroma’i, i te paraura’a ’oia i tōna Metua : « ’Ia ha’apa’ohia tō ’oe hina’aro ».2
’Aita te lēpera i fa’atae i tāna anira’a nā roto i te mana’o te’ote’o ’aore rā te fa’ahepo. Tē fa’a’ite mai nei tāna mau parau i te hō’ē huru ha’eha’a, ma te tītaura’a teitei ’e te hina’aro mau ato’a rā ’ia tupu te hina’aro o te Fa’aora. ’O te hō’ē hi’ora’a te reira nō te huru e tītauhia ia tātou nō te haere i te Mesia ra. E nehenehe tātou e haere mai i te Mesia ma te ’ite pāpū ē, tōna hina’aro i teienei ē a muri noa atu, ’o te maita’i roa ïa nō tō tātou orara’a i te tāhuti nei ’e i te tau mure ’ore. E hi’ora’a mure ’ore tāna ’aita tā tātou. Tītauhia ia tātou ’ia haere mai i te Mesia mā te hina’aro mau ’ia horomi’ihia tō tātou hina’aro i roto i te hina’aro o te Metua, mai tō te Mesia ra.3 E fa’aineine ïa te reira ia tātou nō te ora mure ’ore.
E mea fifi roa ’ia feruri i te mamae tino ’e te ’āehuehu i ni’a i te lēpera ’o tei haere mai i te Fa’aora ra. E fa’a’ino te ma’i lēpera i te mau uaua ’e te ’iri, mā te fa’atupu i te fa’ahuru-’ē-ra’a o te hōho’a ’e ma te fa’atupu i te paruparu. ’Oia ato’a, ’ua fa’atupu te reira i te fa’ao’ō’ora’a rahi a vetahi ē. Te hō’ē ta’ata ’o tei ro’ohia i te lēpera ’ua tītauhia iāna ’ia fa’aru’e i tōna mau fēti’i nō te ora fa’ata’a-’ē-hia i te sōtaiete. ’Ua fa’arirohia te mau lēpera ’ei mea vi’ivi’i, i te pae tino ’e i te pae vārua. Nō reira, ’ua fa’ahepo te ture a Mose i te mau lēpera ’ia ’ō’omo i te ’ahu mutumutu ’e ’ia tuō « Vi’ivi’i ! » ’a haere ai rātou.4 Nō tō rātou ma’i ’e te fa’a’inora’a a te ta’ata, ’ua ora te mau lēpera i roto i te mau fare ’aore rā te mau mēnema vai noa.5 E’ita i te mea fifi ’ia feruri ē te lēpera i haere mai i te Fa’aora, ’ua pereha’a roa ïa.
I te tahi taime—nā roto i te tahi ’ohipa—e nehenehe ato’a e tupu tō tātou mana’o pereha’a, i tā tātou iho ānei mau ’ohipa ’aore rā i tā vetahi ’ē, nō te tahi ānei vaira’a e mana tō tātou i ni’a iho ’aore rā ’aita. I roto i terā mau taime, e nehenehe tātou e tu’u i tō tātou hina’aro i roto i tōna nā rima.
E rave rahi matahiti i teienei, ’ua fāri’i ’o Zulma tā’u vahine, tō’u ’āfa maita’i a’e, tō’u pae maita’i a’e—i te parau ’āpī pe’ape’a, e piti noa hepetoma nā mua a’e i te fa’aipoipora’a o te hō’ē o tā māua mau tamari’i. E pu’unono (tumeur) tōna i roto i tōna pūtē hā’ae, ē tē tupu ’oi’oi ra i te rahi. ’Ua ha’amata tōna hōho’a mata i te ’oru, ē ’ua tītauhia te hō’ē tāpūra’a fifi. E rave rahi mana’o i horohoro i roto i tōna ferurira’a ’e ’o tei fa’ataiaha i tōna ’ā’au. E pu’unono ataata ānei ? Nāhea tōna tino e ora mai ai ? E ha’aparuparu ānei tōna hōho’a mata ? E aha te fāito pūai o te māuiui ? E ’ino roa ānei tōna hōho’a ? E ho’i mai ānei te pu’unono i muri i te ’īritira’ahia te reira ? E nehenehe ānei iāna ’ia ’amui mai i te fa’aipoipora’a o tā māua tamaiti ? I tōna vai-noa-ra’a i roto i te piha tāpūra’a, ’ua pereha’a roa tōna mana’o.
I tāua taime faufa’a roa ra, ’ua muhumuhu te Vārua iāna e ti’a iāna ’ia fāri’i i te hina’aro o te Fatu. ’Ua fa’aoti ihora e tu’u i tōna ti’aturira’a i ni’a i te Atua. ’Ua mana’o pūai ’oia ē, noa atu te hope’ara’a, ’o tōna hina’aro te mea maita’i a’e nōna. I muri iho, ’ua fa’ata’otohia ’oia i te rā’au pātia fa’ata’oto.
Tau taime i muri mai, ’ua pāpa’i ’oia mai te tahi pehepehe i roto i tāna buka ’ā’amu : « I ni’a i te ’iri tāpūra’a a te taote tāpū, ’ua tīpapa vau i mua ia ’oe ’e ’ua auraro vau i tō ’oe hina’aro, ta’oto’oto a’era vau. ’Ua ’ite au ē ’ua nehenehe iā’u ’ia ti’aturi ia ’oe, ma te ’ite ē, ’aita e ’ino e nehenehe e haere mai mai ia ’oe na.
’Ua ’itehia iāna te pūai ’e te tāmahanahana nō te aurarora’a i tōna hina’aro i tō te Metua. I taua mahana ra, ’ua ha’amaita’i rahi te Atua iāna.
Ta’a ’ē noa atu tō tātou mau huru, e nehenehe tātou e fa’a’ohipa i tō tātou fa’aro’o nō te haere mai i te Mesia ra ’e ’ia ’ite i te hō’ē Atua tā tātou e nehenehe e ti’aturi. Mai tā te hō’ē o tā māua mau tamari’i, ’o Gabriel, i pāpa’i :
’Ia au i te peropheta, e mea ’ana’ana atu ā te hōho’a o te Atua i te mahana.
E mea teatea atu ā tōna rouru i te hiona
’e e ’ū’uru tōna reo mai te tahera’a ’ānavai pape rahi ra.
’e i pīha’i iho ’iana e mea faufa’a ’ore te ta’ata…
’Ua teimahahia vau nā roto i tō’u ’itera’a ē ’aita to’u e faufa’a.
’E i taua taime noa ra tō’u fa’atorora’a i tō’u ’ē’a i te hō’ē atua ’o tā’u e nehenehe e ti’aturi.
’E i reira noa ïa tō’u ’itera’a i te Atua ’o tā’u e nehenehe e ti’aturi.6
E Atua ’o tē nehenehe e ti’aturihia, ’o tē fa’aitoito i tō tātou tīa’ira’a. E nehenehe tātou e ti’aturi ’iāna nō te mea ’ua here ’ōna ia tātou ’e tē hina’aro nei ’ōna i te mea maita’i a’e nō tātou i te mau taime ato’a.
’Ua fa’a’ite te lēpera iāna maoti te mana nō te tīa’ira’a. ’Aita te ao nei i hōro’a i te hō’ē noa a’e rāve’a nāna, ’aita ato’a hō’ē noa a’e tāmāhanahanara’a. Nō reira, ’ua riro te fa’ati’a’ia a te Fa’aora mai te hō’ē hanihanira’a nō tōna vārua tā’āto’a. E nehenehe noa tātou e feruri i te mau mana’o hōhonu māuruuru a te lēpera i te fa’ati’a’ia a te Fa’aora, i te fa’aro’ora’a iho ā rā ’oia i te mau parau « ’Ua ti’a ’iā’u ; ’ia mā ’oe ».
Tē parau ra te ’ā’amu ē « i taua taime ra, ’ua mā tōna lēpera ».7
Tātou ato’a, e nehenehe tātou e fāri’i i te fa’ati’a’ia a te rima here ’e te fa’aora a te Fa’aora. ’Auē te ’oa’oa, te tīa’ira’a ’e te ha’amāuruurura’a e tae mai i tō tātou vārua nā roto i te ’itera’a ē tē hina’aro nei ’ōna e tauturu ia tātou ’ia vai mā. ’A haere ai tātou iāna ra, e haere mai te Atua e fa’aora ia tātou, e fa’aora ’oia i tō tātou māuiui ’aore rā e hōro’a mai ’oia i te pūai nō te fa’aruru i te huru fifi ato’a.
’A ta’a noa atu ai i te reira, e tauturu mai te fāri’ira’a i tōna hina’aro—’eiaha rā i tō tātou iho—’ia māramarama i tō tātou vaira’a. ’Aita roa hō’e a’e ’ino e nehenehe e haere mai nō ’ō mai i te Atua ra. ’Ua ’ite ’oia e aha te mea maita’i a’e nō tātou. Penei a’e, e’ita ’ōna e fa’a’ore vave i tā tātou mau hōpoi’a. I te tahi taime, e nehenehe ’oia e ha’amāmā i te mau hōpoi’a, mai tāna i nā reira ia Alama ’e tōna mau ta’ata.8 I te pae hope’a, maoti te mau fafaura’a, e ’īritihia te mau hōpoi’a,9 i roto ānei i teie orara’a aore rā i te Ti’afa’ahoura’a mo’a.
E tauturu mai te hina’aro mau ’ia fa’atupu i tōna hina’aro, ’e te māramaramara’a i te nātura mo’a o tō tātou Fa’aora, i te fa’atupu i te huru fa’aro’o ’o tā te lēpera i fa’a’ite nō te tāmāra’a iāna. E Atua nō te here Iesu Mesia, e Atua nō te tia’i, e Atua nō te fa’aora, e Atua ’o tē hina’aro i te ha’amaita’i ia tātou ’e i te tauturu ia tātou ’ia vai mā. ’O tāna ïa i hina’aro hou ’a haere mai ai i ni’a i te fenua nei, i te taime ’oia ’a parau ai e fa’aora ’oia ia tātou ’ia ’ōfati noa atu tātou i te ture. ’O tāna ïa i hina’aro i Getesemane ’a fa’aruru ai ’oia i te māuiui ’itea-’ore-hia e te ta’ata nei i te taime ’a ’aufau ai i te utu’a umunaro nō te hara. ’O tāna ïa e hina’aro nei i teienei ’ia ti’a ’oia nō tātou i mua i te Metua.10 Nō reira tē tāvevo noa ra tōna reo : « E haere mai ’outou iā’u nei, e te feiā ato’a i ha’a rahi ’e tei teiaha i te hōpoi’a, e nā’u ’outou e fa’aora ».11
E nehenehe ’ōna e fa’aora ia tātou ’e e fa’ateitei ia tātou nō te mea e mana tōna nō te rave i te reira. ’Ua rave ’ōna i ni’a iāna iho i te mau māuiui ato’a o te tino ’e tō te vārua ’ia ’ī tōna ’ā’au i te aroha nō te tauturu ia tātou i roto i te mau mea ato’a, nō te fa’aora i tō tātou māuiui ’e nō te fa’ateitei ia tātou.12 E mea nehenehe roa ’e e putapū te ’ā’au i te mau parau a Isaia, tei parauhia e Abinadi :
« ’Ua rave mau rā ’oia i tō tātou paruparu, ’e ’ua hōpoi ’ē ’oia i tō tātou ’oto […]
« I paruparu rā ’oia i tā tātou nei hara, i tā’irihia ’oia i tō tātou nei ’ino; ’e te a’o i hauhia ai tō tātou, tei ni’a ïa iāna, ’e nō tōna paruparu e ora ai tātou ».13
’Ua ha’api’i-ato’a-hia teie huru mana’o i roto i teie pehepehe :
« E te Tāmuta nō Narazeta ē,
E ’ā’au teie tei pereha’a roa ’ino, ’ino roa,
E ora teie tei hu’ahu’a roa, mai pohe roa,
E ti’a ānei ia ’oe ’ia tātā’i, e te Tāmuta ē ? »
’E nā roto i tōna rima here ’e te ineine,
’Ua tāfaihia tōna iho ora marū nā roto
I tō tātou orara’a pereha’a, ē ti’a mai nei
’Ei hāmanira’a ’āpī—« ’āpī te mau mea ato’a ».
« Te mau hu’ahu’a māfatu,
Te hina’aro, te hia’ai manuia, te tīa’i ’e te fa’aro’o,
E hāmani na ’oe ’ei tuha’a maita’i,
E te Tāmuta nō Narazeta ē ! »14
’Ia mana’o ’outou ē, ’aita roa atu ’outou i mā ’e ’ua pereha’a roa, ’ia ’ite ’outou ē, e nehenehe ’outou ’ia tāmāhia ’e ’ia tātā’ihia, nō te mea ’ua here ’oia ia ’outou. ’A ti’aturi ē ’aita e ’ino e nehenehe e haere mai mai iāna ra.
Nō te mea ’ua « pou ’oia i raro i te mau mea ato’a »,15 e nehenehe te mau mea ato’a tei pereha’a i roto i tō tātou orara’a e tātā’ihia, nō reira, e nehenehe tātou e fa’afaitehia i te Atua. Nā roto iāna, e fa’afaitehia te mau mea ato’a, te mea i te fenua nei ’e te mea i te ra’i ra, ma te fa’atupu ho’i i te « hau nā roto i te toto o tōna satauro ».16
Haere ana’e i te Mesia ma te rave i te mau mea ato’a e tītauhia. ’A nā reira ai tātou, ’ia riro tō tātou huru i te parau ē : « E te Fatu, mai te mea e ti’a ’ia ’oe, e mā vau ia ’oe ». ’Ia nā reira tātou, e ti’a ïa ia tātou ’ia fāri’i’ i te fa’ati’a’ia fa’aora a te ’Orometua, ’āpitihia e te tavevo iti o tōna reo marū : « ’Ua ti’a iā’u ; ’ia mā ’oe ».
E Atua te Fa’aora ’o tā tātou e nehenehe e ti’aturi. ’O ’oia te Mesia, tei Fa’atāhinuhia, te Mesia te ’āti Iuda ’o tā’u e fa’a’ite pāpū nei nā roto i tōna i’oa mo’a, tō Iesu Mesia, ’āmene.