Te ti’aturi tāmau ’e te tupu fa’ahou ā
Te ti’aturi i te Fatu, ’o te ti’aturira’a ato’a ïa i tōna taime ’e e tītauhia te fa’a’oroma’i ’e te fa’aitoito ’o tē ora mai i te mau vero o te orara’a.
’Ua ma’i-roa-hia tā māua tamaiti ’o Dan i roto i tāna misiōni i te fenua Afirika, ’e ’ua hōpoihia ’oia i te fare ma’i ’aore re’a mātēria nō te rapa’au. ’A tai’o ai māua i tāna rata mātāmua ia mātou i muri mai i tōna ma’i, ’ua mana’o māua ē, e paruparu tōna mana’o, ’aita rā, ’ua pāpa’i mai ’oia ē : « Noa atu ā tei roto vau i te piha ma’i rū, ’ua pārahi hau noa vau. ’Aita a’enei tō’u ’oa’oa tāmau ’e te tupu fa’ahou ā mai te reira te huru i roto i tō’u orara’a ».
I te tai’ora’a māua ta’u vahine i teie mau parau, ’ua putapū roa māua. Te ’oa’oa tāmau ’e te tupu fa’ahou ā. ’Aita māua i fa’aro’o a’enei i teie huru parau, e aura’a pāpū rā ’ia māua i fa’aro’o atu. ’Ua ’ite māua ē, e ’ere te ’oa’oa tāna e parau ra i te ’oa’oa ’ārearea noa ’e te ’ana’anatae rahi, e hau rā ’e te ’oa’oa e tae mai ’ia auraro tātou i te Atua ’e ’ia tu’u ho’i i tō tātou ti’aturi i ni’a iāna i roto i te mau mea ato’a.1 Tātou ato’a nei, e mau taime i roto i tō tātou orara’a ’ua parau mai te Atua i te hau i tō tātou vārua ’e ’ua fa’atupu i tō tātou tīa’ira’a i te Mesia noa atu ā e mea pa’ari te orara’a ’e te pāpū ’ore.2
Tē ha’api’i nei Lehi ē, ’āhiri ’aita te hi’ara’a o Adamu rāua Eva, e vai noa ïa rāua « ma te hara ’ore, ’aore o rāua e ’oa’oa, nō te mea ’aita rāua i ’ite i te ’ati…
« Inaha rā, ’ua ravehia te mau mea ato’a i te pa’ari nōna, nō te ’ite i te mau mea ato’a.
« ’Ua hi’a Adamu ’ia vai te mau ta’ata ; ’e tē vai nei te mau ta’ata ’ia noa’a tō rātou ’oa’oa ».3
Te mea huru ’ē rā, e fa’aineine te mau ’ati ’e te ’oto ia tātou ’ia ’ite i te ’oa’oa mai te mea e ti’aturi tātou i te Fatu ’e i tāna ’ōpuara’a nō tātou. E parau teie tei fa’ahiti-nehenehe-hia e te hō’ē rohi pehe nō te 13 tenetere : « E fa’aineine te ’oto ia tātou nō te ’oa’oa. E huri tōna mata pārapu i te mau mea ato’a i rāpae i te fare, ’ia āteatea māite ’e ’ia tomo mai te ’oa’oa ’āpī. E ueue ’oia i te mau rao’ere marō o te ’āma’a ra o tō ’ā’au, ’ia mono mai te mau rao’ere ’āpī ’e te ruperupe i reira. E huti ’oia i te mau a’a, ’ia āteatea te vāhi nō te mau a’a ’āpī tei mo’e nā raro a’e ’ia tupu mai. Noa atu ā te mea e ’āueue te ’oto mai roto atu i tō ’ā’au ra, e maita’i rahi hau roa a’e e mono mai ».4
’Ua ha’api’i te peresideni Russell M. Nelson : « Te ’oa’oa tā te Fa’aora e pūpū nei [ia tātou]… E mea tāmau [ïa], ma te ha’apāpūra’a ē, ‘e vai poto noa mai tō ’oe… mau ’ati’ » [Te Parau Ha’api’ira’a ’e te mau Parau Fafau 121:7] ’e e ha’amo’ahia te reira nō tō tātou maita’i ».5 E ti’a i tā tātou mau tāmataraa ’e te mau ’ati ’ia fa’aātea mai i te vāhi nō te ’oa’oa rahi a’e.6
Te parau ’āpī maita’i o te ’evanelia, e ’ere ïa i te parau fafau nō te orara’a ’aita e ’oto ’e ’aita e pe’ape’a, e orara’a rā tei ’ī i te fā ’e tōna aura’a—e orara’a i reira tō tātou mau ’oto ’e tō tātou mau ’ati e « horomi’ihia i roto i te ’oa’oa i te Mesia ra ».7 ’Ua parau te Fa’aora : « E pohe tō ’outou i teie nei ao. E fa’aitoito rā, ’ua riro te rē o teie nei ao iā’u ».8 Tāna ’evanelia, e poro’i ïa nō te tīa’ira’a . Te ’oto ’āpitihia i te tīa’ira’a i roto ia Iesu Mesia, ’o te parau fafau ïa nō te ’oa’oara’a tāmau.
E nehenehe e fa’a’ohipa i te ’ā’amu nō te tere o te mau ’āti Iareda i te fenua i parauhia ra ’ei hōho’a nō tō tātou tere i roto i te tāhuti nei. ’Ua parau te Fatu i te taea’e o Iareda ’e i tōna mau ta’ata ē, « e nā mua [’oia ia rātou] i te haere i te hō’ē fenua tei hau ’ē i te mau fenua o te ao nei i te maita’i ».9 ’Ua fa’aue ’oia ia rātou ’ia hāmani i te mau pahī, ’e ’ua ha’apa’o rātou i te parau ’e ’ua haere e hāmani i te reira mai te au i te mau arata’ira’a a te Fatu. Teie rā, ’a nu’u noa ai te ’ohipa, ’ua ha’amata te taea’e o Iareda i te ha’ape’ape’a e’ita e nava’i teie huru pahī a te Fatu. ’Ua ti’aoro atu ’oia :
« E te Fatu, ’ua rave au i te ’ohipa tā ’oe i fa’aue mai, ’e ’ua tarai au i te mau pahī i tā ’oe i parau mai iā’u ra.
« ’E inaha, e te Fatu, ’aita ’o roto ia rātou e māramarama ».10
« Inaha, e te Fatu e fa’ati’a ānei ’oe ’ia haere atu mātou i terā pae mai o te moana ra i te pōuri ? »11
’Ua māni’i a’enei ānei tō ’outou vārua i te Atua mai te reira te huru ? ’Ia tūtava ’outou i te ora mai tā te Fatu i fa’aue ’e ’aita rā te mau fa’ahope’ara’a parau ti’a e tupu ra, ’ua uiui a’enei ānei tō ’outou mana’o ē, e haere ānei ’outou nā roto i teie orara’a i te pōuri ?12
’Ua fa’ahiti a’era te taea’e o Iareda i te tahi fifi rahi atu ā, nāhea i te oraora i roto i teie mau pahī. ’Ua ti’aoro ’oia : « ’E e pohe ho’i mātou nō te mea e’ita e ti’a ’ia huti i te aho, maori rā i te mata’i tō roto ia rātou ».13 ’Ua fa’atupu ānei te mau fifi o te orara’a i te pe’ape’a nō te hutira’a i te aho ’e ’ua uiui atu ra te mana’o ē, e nāhea pa’i tātou i te ora mai i teie mahana, ’aita ïa i fa’ahitihia te parau nō te ho’ira’a i te fare o te ra’i ?
’Ua ’ohipa te Fatu ’e te taea’e o Iareda nō te pāhono i tōna mau māna’ona’ora’a tāta’itahi, ma te fa’ata’a iāna ē : « ’Aita e au ia haere ’outou i terā pae mai o taua moana rahi nei, maori rā [e fa’aineine au i te rāve’a nō te pāruru] ia ’outou i te mau ’are o te miti ra, ’e te mau mata’i i reva atu na, ’e te mau pape pu’e tē haere mai ra ».14
’Ua ha’apāpū atu te Fatu ē, nā ni’a roa atu, e ’ore roa te mau ’āti Iareda e tāpae i te fenua i parauhia mai te mea ’aita ’oia. ’Aita tā rātou e rāve’a, ’e te rāve’a ana’e e tāpae ai rātou i terā pae mai o te moana rahi, ’o te tu’ura’a ïa i tō rātou ti’aturi i ni’a iāna. E au ē, ’ua fa’ahōhonu atu ā teie mau ’ohipa ’e te ha’api’ira’a a te Fatu i te fa’aro’o o te taea’e o Iareda ’e ’ua ha’apūai i tōna ti’aturi i te Fatu.
’A hi’o maita’i na tātou i te tauira’a o tāna pure mai te uiuira’a ’e te māna’ona’ora’a i te fa’a’itera’a fa’aro’o ’e te ti’aturi :
« ’Ua ’ite au, e te Fatu, e mana hope tō ’oe, ’e tā ’oe i hina’aro i te rave nō te faufa’a o te ta’ata nei, e ti’a ïa ia ’oe…
« Inaha, e te Fatu, e ti’a teie ia ’oe. ’Ua ’ite mātou ē e ti’a ia ’oe ’ia fa’a’ite mai i te pūai rahi ra, e mea iti rā ïa i te mana’o o te ta’ata nei ».15
’Ua pāpa’ihia ē, « haere atu ra rātou i roto i tā rātou mau pahī ra, reva atu ra i ni’a i te moana, ’e ’ua tu’u a’era rātou ia rātou iho i te Fatu i tō rātou Atua ».16 Tu’u ia rātou te aura’a ra, ’ua ti’aturi ’aore rā ’ua auraro. ’Aita te mau ’āti Iareda i haere i roto i te mau pahī nō tō rātou ’ite-pāpū-ra’a mea nāhea tō rātou tere. ’Ua haere rātou nō te mea ’ua ha’api’i rātou i te ti’aturi i te mana o te Fatu, tōna maita’i ’e te aroha, ’e nō reira, ’ua ineine rātou nō te auraro ia rātou ’e tō rātou ato’a mau fē’a’a ’e mau mata’u i te Fatu ra.
’Aita i maoro a’enei, i mata’u nei tā māua mootua ’o Abe nō te pai’uma atu i ni’a iho i te pāpio tei tere i ni’a ’e i raro. ’Ua au a’e ’oia i te pāpio tei tere ’āfaro noa. ’Ua paraparau maita’i tōna māmā rū’au iāna ē e ’ore ’oia e fifi, ’ua ti’aturi ’oia iāna ’e ’ua pai’uma i ni’a iho i te pāpio. ’Ua parau atu ’oia ma te mata ’ata’ata : « E mea taiā, ’aita rā e fifi ». Penei a’e mai teie paha te huru o te mau ’āti Iareda. Te ti’aturi i te Atua, e mea taiā i te ’ōmuara’a, teie rā, e tupu te ’oa’oara’a i muri mai.
E ’ere teie tere i te mea ’ōhie nō te mau ’āti Iareda. E rave rahi taime tō rātou pāremora’a i roto i te hōhonu o te moana « nō te ’are mou’a tei fati mai i ni’a iho ia rātou ».17 Terā rā, ’ua pāpa’ihia ē « ’aita te mata’i i fa’aea i te haere i te pae i te fenua i parauhia ra ».18 Noa atu te fifi ’ia māramarama i te reira, i te mau taime iho ā rā o tō tātou orara’a ’ia pūai te mata’i tā tātou e fa’aū ’ia pūai te vāve’a, e ti’a ia tātou ’ia tāmarū ma te ’ite ē, i roto i tōna maita’i fāito ’ore, tē puhi noa ra te mata’i hau o te Atua ia tātou i te fare.
Tē parau fa’ahou nei te ’ā’amu : « ’E ’ua nā reira rātou i te puhia-noa-hia atu ; ’e ’aita roa e ti’a ’ia parari rātou i te mea rahi o te tai, ’e ’aore roa i ti’a ’ia ha’ape’ape’ahia e te i’a rahi ra ; tei raro rā rātou i te miti ’e ’aore rā tei ni’a ra i te miti, e māramara tō rātou ».19 Tei roto tātou i te hō’ē ao tē fati noa ra te miti rahi o te pohe, te mau ma’i i te pae tino ’e i te pae manava ’e nō te mau huru fifi ato’a ’e te mau huru ’ati tei fati i ni’a ia tātou. ’Ātīrā noa atu, nā roto i te fa’aro’o ia Iesu Mesia ’e te mā’itira’a e ti’aturi iāna, e ti’a ato’a ia tātou ’ia māramarama noa noa atu tei ni’a ’aore rā tei raro tātou i te miti. E pāpū tō tātou ti’aturira’a ē, e’ita roa atu te Atua e fa’aea i te puhi ia rātou i te fenua i parauhia ra.
’A tā’ue’ue noa ai te mau ’āti Iareda i roto i te mau pahī, « ’ua hīmene noa rātou i te mau hīmene ’ārue i te Fatu… ’e ’ua ha’amaita’i atu ra [rātou] i te Fatu ē ’ia pō roa te mahana ; ’e ’ia tae i te pō ra, ’aita rātou i fa’aea i te ha’amaita’i i te Fatu ra ».20 ’Ua ’ite rātou i te ’oa’oa ’e te māuruuru noa atu ā tō rātou mau ’ati. ’Aita ā rātou i tāpae i te fenua i parauhia ra, tē ’oa’oa nei rātou i te ha’amaita’ira’a i parauhia maoti tō rātou ti’aturi tāmau ’e te tupu fa’ahou ā, iāna ra.21
’Ua tūra’ihia te mau ’āti Iareda i ni’a i te miti e 344 mahana.22 Tē ’ite ra ’outou ? Te ti’aturi i te Fatu, ’o te ti’aturira’a ato’a ïa i tōna taime ’e e tītauhia te fa’a’oroma’i ’e te fa’aitoito ’o tē ora mai i te mau vero o te orara’a.23
I te hope’a, ’ua « tīpae atu ra [te mau ’āti Iareda] i tahatai i te fenua i parauhia ra. ’E tae a’era tō rātou ’āvae i ni’a iho i tahatai i te fenua i parauhia ra, ’ua pi’o ihora rātou i raro i ni’a i te fenua, fa’aha’eha’a atura ia rātou iho i mua i te Fatu, ’e ’ua ’oto ihora rātou ma te roimata ’oa’oa i mua i te Fatu, nō te rahi o tōna ra aroha ia rātou ».24
Mai te mea e ha’apa’o maita’i noa tātou i tā tātou mau fafaura’a, ’ia tae i te hō’ē mahana, e tāpae ato’a tātou i te fare ’e e pi’o tātou i mua i te Fatu ma te roimata nō te rahi o tōna aroha i roto i tō tātou orara’a, nā reira ato’a te mau ’oto tei fa’aāteatea i te vāhi nō te ’oa’oa rahi atu ā.25
Tē fa’a’ite pāpū nei au ē, ’ia tu’u tātou ia tātou iho i roto i te rima o te Fatu ’e ’ia tāpe’a ho’i tātou i te ti’aturi tāmau ’e te tupu fa’ahou ā ia Iesu Mesia ’e i tāna mau fā hanahana i roto i tō tātou orara’a, e haere mai ’oia ia tātou ’āpe’ehia e te taiā ’ore, e parau mai ’oia i te hau i tō tātou vārua ’e e fa’atupu ’oia i te « ti’aturi iāna nō tō [tātou] ora ».26
Tē fa’a’ite pāpū nei au ē ’o Iesu te Mesia. ’O ’Oia te tumu nō te mau ’oa’oa ato’a ».27 ’Ua nava’i tōna aroha, e mea pūai ’oia nō te fa’aora.28 ’O ’oia te māramarama, te ora ’e te tīa’ira’a o te ao nei.29 E’ita ’oia e vaiiho ’ia pohe tātou.30 I te i’oa o Iesu Mesia, ’āmene.