Te mana nō te upo’oti’a i ni’a i te ’enemi

Nā Elder Peter M. Johnson

Nō te Hitu ’Ahuru

Nāhea tātou e ’ite mai ai i te hau, e ha’amana’o ai ’o vai tātou, ’e ’ia manuia i ni’a i nā mauiha’a e toru a te ’enemi ?

Te mau taea’e ’e te mau tuahine, māuruuru nō te mau mea ato’a tā ’outou e rave nei nō ’outou ’e nō vetahi ’ē ’ia riro ’ei mau pipi nā Iesu Mesia, ’e ’ia ’oa’oa i te mau ha’amaita’ira’a o te hiero mo’a. Māuruuru nō tō ’outou maita’i. E mea fa’ahiahia ’outou ; e mea nehenehe ’outou.

Tē pure nei au e ’ite tātou i te ha’apāpūra’a a te Vārua Maita’i ’ia ’ite pāpū ana’e tātou ē, e mau tamari’i tātou nā te Atua. Tē fa’a’ite ra « Te ’utuāfare : E poro’i i tō te ao nei » ē : « ’Ua hāmanihia te mau ta’ata ato’a—te tāne ’e te vahine—i te hōho’a o te Atua. ’Ua riro tātou tāta‘itahi ’ei tamāiti ’e ’ei tamāhine vārua herehia e nā metua i te ra‘i ra, ’e nō reira, e huru ’e e hope’a hanahana tō tātou tāta’itahi ». ¹ O tātou « te mau vārua mā’itihia tei fa’ata’ahia nō te haere mai i te ’anotau o te ’īra’a o te mau tau nō te ha’amau i te mau niu o te ’ohipa rahi o te ’anotau hope’a nei ».² ’Ua parau te peresideni Russell M. Nelson ē : « ’Ua ha’api’ihia ’outou i roto i te ao vārua nō te fa’aineine ia ’outou nō te mau mea ato’a ’e nō te mau mea ato’a e fa’aruru atu ’outou i roto i teie tuha’a hope’a o te mau mahana hope’a nei (hi’o PH&PF 138:56). Tē vai noa ra te reira ha’api’ira’a i roto ia ’outou ! »³

E mau tamāroa ’e e mau tamāhine mā’itihia ’outou nā te Atua. E mana tō ’outou nō te upo’oti’a i ni’a i te ’enemi. Terā rā, ’ua ’ite te ’enemi ē ’o vai ’outou. ’Ua ’ite ’oia i tā ’outou tuha’a ’āi’a hanahana ’e tē ’imi nei ’oia ’ia fa’aiti i tō ’outou pūai i te tino nei ’e i te ra’i ra nā roto i te fa’a’ohipara’a e toru mauiha’a :

Ha’avarera’a
Fa’anevanevara’a
Ha’aparuparura’a

Ha’avarera’a

’Ua fa’a’ohipa te ’enemi i te mauiha’a o te ha’avarera’a i te ’anotau o Mose. ’Ua parau mai te Fatu ia Mose :

« E, inaha, e tamaiti ’oe nā’u…

« E ’ohipa tā’u nā ’oe… ’e tō ’oe hōho’a, mai tō tā’u Fānau Tahi ïa ».⁴

I muri noa iho i teie ’ōrama hanahana, ’ua tāmata o Sātane i te ha’avare ia Mose. E mea au roa te mau parau tāna i fa’a’ohipa : « E Mose, te tamaiti a te ta’ata, ’a ha’amori mai iā’u ». ⁵ E ’ere te ha’avarera’a tei roto noa i te anira’a ’ia ha’amori ia Sātane, tei roto ato’a rā i te huru nō tāna fa’ata’ara’a ia Mose ’ei tamaiti a te ta’ata. ’A ha’amana’o na, nō parau noa atu ra te Fatu ia Mose ē, e tamaiti ’oia nā te Atua, tei hāmanihia i te hōho’a o te Fānau Tahi.

’Ua tāmata tu’utu’u ’ore noa te ’enemi i te ha’avare ia Mose, terā rā, ’ua pāto’i ’o Mose ma te parau ē : « ’A haere ’ē atu iā’u nei, e Sātane, ’o teie Atua hō’ē roa tā’u e ha’amori, ’oia ’o te Atua hanahana ».⁶ ’Ua ha’amana’o Mose ’o vai ’oia—hō’ē tamaiti nā te Atua.

E au ato’a te mau parau a te Fatu ia Mose nō ’outou ’e nō’u. ’Ua hāmanihia tātou i te hōho’a o te Atua iho, ’e e ’ohipa tāna nā tātou. Tē tāmata nei te ’enemi i te ha’avare nā roto i te tura’ira’a ia tātou ’ia ha’amo’e o vai mau tātou. Mai te mea ’aita tātou i māramarama o vai tātou, e mea fifi ïa ’ia ’ite ē, e riro mai tātou mai ia vai.

Fa’anevanevara’a

Tē tāmata ato’a nei te ’enemi e fa’anevaneva ’ē ia tātou i te Mesia ’e i tōna ’ē’a nō te fafaura’a. ’Ua fa’a’ite mai o Elder Ronald A. Rasband i teie mau parau : « Tē fā a te ’enemi, ’o te fa’anevanevara’a ïa ia tātou i te mau fa’a’itera’a pae vārua, ’āre’a te hina’aro o te Fatu ra, ’o te ha’amāramaramara’a ïa ia tātou ’e te fa’a’ōra’a ia tātou i roto i tāna ’ohipa ».⁷

I tō tātou nei ’anotau, ’ua rau te mau fa’anevanevara’a, mai te Twitter, te Facebook, te instagram, te mau ha’uti moemoeā, e rau atu ā. E mea fa’ahiahia teie mau rāve’a ’aravihi ’āpī, terā rā, mai te mea ē, ’aita tātou e ha’apa’o maita’i, e nehenehe te reira e fa’anevaneva ’ē atu ia tātou i te fa’atupura’a i tō tātou pūai hanahana. ’Ia fa’a’ohipahia te reira ma te au māite, e nehenehe te reira e hōro’a mai i te pūai o te ra’i ’e e fa’ati’a ia tātou ’ia fa’a’ite pāpū i te mau temeio ’a ha’aputuputu ai tātou ia Iseraela i nā pae e piti o te pāruru.

E mata nā tātou i te fa’a’ohipa i te mau rāve’a ’āpī ma te ha’apa’o maita’i ’eiaha rā ma te tāu’a ’ore.⁸ ’A ’imi tāmau noa i te mau rāve’a e ti’a ai i te mau rāve’a ’āpī ’ia ha’afātata ia tātou i te Fa’aora ’e ’ia fa’ati’a ia tātou ’ia rave i tāna ’ohipa ma te fa’aineine ia tātou nō tōna Tae-piti-ra’a mai.

Ha’aparuparura’a

I te hope’a, tē hina’aro nei te ’enemi e ha’aparuparu tātou. E nehenehe tātou e paruparu mai te mea ē, ’e fa’aau tātou ia tātou iho i ni’a ia vetahi ’ē, ’aore rā e feruri tātou ē, ’aita tātou e ora ra i te mau fāito i tītauhia, tae noa atu i tō tātou iho.

I te ha’amatara’a vau i tā’u ha’api’ira’a parau tahu’a tuatoru, ’ua paruparu tō’u mana’o. E maha ana’e pīahi e fa’ati’ahia i roto i te fa’anahora’a i taua matahiti ra, ’e e mea ’aravihi te tahi atu mau pīahi. E mau nūmera teitei a’e tā rātou i roto i te hi’opo’ara’a ’e e ’ite rahi atu tō rātou i roto i te mau ti’ara’a fa’atere, ’e ’ua fa’a’ite rātou i tō rātou ti’aturi i roto i tō rātou mau ’aravihi. E piti hepetoma i muri iho i roto i te fa’anahora’a, ’ua ha’amata te mana’o ha’aparuparu ’e te tapitapi i te tupu mai e fātata i te tāhiti roa.

’Ua fa’aoti a’era vau ē, mai te mea e hope iā’u teie fa’anahora’a maha matahiti, e fa’aoti au i te tai’o i te Buka a Moromona i te ono ’āva’e tāta’itahi. ’A tai’o ai au i te mau mahana ato’a, ’ua ’ite au i te parau a te Fa’aora ē, e ha’api’i mai te Vārua Maita’i iā’u i te mau mea ato’a ’e e fa’aha’amana’o ’oia iā’u i te mau mea ato’a.⁹ ’Ua ha’apāpū fa’ahou ’oia ē, o vai au ’ei tamaiti nā te Atua, ma te fa’aha’amana’o iā’u ē, ’eiaha vau e fa’aau iā’u ia vetahi ’ē, ’e ma te hōro’a mai iā’u i te ti’aturi i roto i tā’u ’ohipa hanahana ’ia manuia.¹⁰

E a’u mau hoa here, ’eiaha e vaiiho i te hō’ē noa atu ta’ata ’ia ’eiā i tō ’outou ’oa’oa. ’Eiaha e fa’aau ia ’outou i ni’a ia vetahi ’ē. ’A ha’amana’o i te mau parau here a te Fa’aora : « E hau tā’u e vaiiho ia ’outou nei, o tō’u nei hau tā’u e hō atu nō ’outou : E ’ere mai tā tō te ao nei hōro’a tā’u hōro’a ia ’outou. ’Eiaha e taiā, tō ’outou ’ā’au, ’eiaha ho’i e māta’u »¹¹

Nāhea tātou ’ia rave i te reira ? Nāhea tātou e ’ite ai i teie hau, e ha’amana’o ’o vai tātou, ’e ’ia manuia i ni’a i nā mauiha’a e toru a te ’enemi ?

A tahi, e ha’amana’o ē, te fa’auera’a mātāmua ’e te rahi ’o te hina’aro ïa i te Atua ma tō tātou ’ā’au, tō tātou mana’o ’e tō tātou pūai.¹² Te mau mea ato’a tā tātou e rave, ’ia ravehia ïa nō tō tātou here iāna ’e i tāna Tamaiti. Mai te mea ē, e fa’arahi tātou i tō tātou here ia rāua nā roto i te ha’apa’ora’a i tā rāua mau fa’auera’a, e rahi ato’a ïa tō tātou ti’ara’a ’ia here ia tātou iho ’e ’ia here ia vetahi ’ē. E ha’amata tātou i te tāvini i te ’utuāfare, te mau hoa, ’e te mau ta’ata tupu nō te mea e hi’o tātou ia rātou mai tā te Fa’aora e hi’o ia rātou—’ei mau tamāiti ’e ’ei mau tamāhine nā te Atua.¹³

Te piti, e pure i te Metua nā roto i te i’oa o Iesu Mesia i te mau mahana ato’a, te mau mahana ato’a, te mau mahana ato’a.¹⁴ Nā roto i te pure e ti’a ai ia tātou ’ia ’ite i te here o te Atua ’e ’ia fa’a’ite i tō tātou here iāna. Nā roto i te pure tātou e fa’a’ite ai i te ’ā’au mēhara ’e e ani ai i te pūai ’e i te itoito nō te tu’u i tō tātou hina’aro i mua i tō te Atua ’e ’ia arata’ihia tātou i roto i te mau mea ato’a.

Tē fa’aitoito atu nei au ia ’outou ’ia « pure i te Metua ma te pūai ato’a o tō ’outou ’ā’au, ’ia fa’a’īhia ’outou i tōna here… ’ia riro ho’i ’outou ’ei mau tamāiti [’e ’ei mau tamāhine] nā te Atua; ’e ’ia fā mai ho’i ’oia ra, ’ia riro tātou mai iāna ra ».¹⁵

Te toru, e tai’o ’e e tuatāpapa i te Buka a Moromona i te mau mahana ato’a, i te mau mahana ato’a, i te mau mahana atoa.¹⁶ E maita’i a’e tā’u tuatāpapara’a i te Buka a Moromona mai te mea ē, e tai’o vau ma te hō’ē uira’a i roto i te ferurira’a. Mai te mea e tai’o tātou ma te hō’ē uira’a, e nehenehe tātou e fāri’i i te heheura’a ’e e ’ite ē, e parau mau tā te peropheta Iosepha Semita ’a parau ai ’oia ē, « Te Buka a Moromona : ’o te buka ’āfaro roa a’e ïa i te mau buka ato’a i te fenua nei… ’e e fātata atu ā te hō’ē tāne [’aore rā hō’ē vahine] i te Atua nā roto i te ha’apa’ora’a i tāna mau ha’api’ira’a, i te tahi ’ē atu mau buka »¹⁷ E mau parau nā te Mesia tō roto i te Buka a Moromona, ’e e tauturu ho’i te reira ia tātou ’ia ha’amana’o ē, o vai tātou.

I te hope’a, nā roto i te pure, ’a rave i te ’ōro’a mo’a i te mau hepetoma ato’a, i te mau hepetoma ato’a, i te mau hepetoma ato’a. Nā roto i te mau fafaura’a ’e te mau ’ōro’a o te autahu’ara’a, tae noa atu i te ’ōro’a mo’a, e ’itehia ai te mana o te Atua i roto i tō tātou orara’a.¹⁸ ’Ua ha’api’i Elder David A. Bednar : « ’Ua riro te ’ōro’a nō te pāne ’e te pape ’ei anira’a tāmau ’ia tātarahapa mau ’e ’ia fa’a’āpīhia i te pae vārua. ’Aita te ravera’a i te ’ōro’a mo’a, e fa’a’ore i te mau hara. Mai te mea rā e fa’aineine māite tātou ia tātou, ’e e ’āmui atu tātou i roto i teie ’ōro’a mo’a ma te ’ā’au tātarahapa ’e te vārua marū, teie te fafaura’a, ’oia ho’i, e vai tāmau noa te Vārua o te Fatu i roto ia tātou ».¹⁹

’Ia ’amu tātou i te ’ōro’a mo’a ma te ha’eha’a, e ha’amana’o tātou i te māuiui o Iesu i roto i taua ’āua mo’a ra pi’ihia o Getesemāne ’e tāna tusia i ni’a i te sātauro. E fa’a’ite tātou i te ’ā’au mēhara i te Metua nō te tonora’a mai i tāna Tamaiti Fānau Tahi, tō tātou Fa’aora, ’e e fa’a’ite i tō tātou hina’aro mau e ha’apa’o i tāna mau fa’auera’a ’e e ha’amana’o tāmau noa iāna.²⁰ Tē vai ra te māramarama pae vārua i ’āpitihia i te ’ōro’a mo’a—nō te ta’ata iho, e mea pūai, ’e e mea hina’arohia.

E a’u mau hoa, tē fafau nei au ē, mai te mea e tūtava tātou ’ia here i te Atua ma tō tātou ’ā’au ato’a, e pure nā roto i te i’oa o Iesu Mesia, e tuatāpapa i te Buka a Moromona, ’e nā roto i te pure, e ’amu i te ’ōro’a mo’a, e roa’a ïa ia tātou te ’aravihi, nā roto i te pūai o te Fatu, ’ia upo’oti’a i te mau peu fa’ahemara’a a te ’enemi, nō te fa’aiti i te mau fa’anevanera’a ’o te tā’ōti’a i tō tātou pūai hanahana, ’e nō te pāto’i i te mana’o ha’aparuparura’a ’o te fa’aiti i tō tātou ’aravihi ’ia ’ite i te here o tō tātou Metua i te Ao ra ’e o tāna Tamāiti. E ’ite hope roa tātou ē, ’o vai tātou ’ei mau tamāiti ’e ’ei mau tamāhine nā te Atua.

E te mau taea’e ’e te mau tuahine, tē fa’a’ite nei au i tō’u here ia ’outou ’e tō’u ’itera’a pāpū ē, tē ora nei tō tātou Metua i te Ao ra ’e tāna Tamaiti ’o Iesu te Mesia. Tē here nei au ia Rāua. Te ’Ēkālesia a Iesu Mesia i te Feiā Mo’a i te mau Mahana Hope’a Nei ’o te bāsileia ïa o te Atua i ni’a i te fenua nei E fa’auera’a hanahana tā tātou ’ia fa’aineine i te ao nei nō te Tae-piti-ra’a mai o te Mesia. I te i’oa o Iesu Mesia, ’āmene.