’Ōmuara’a

Te Buka a Moromona ’o te hō’ē ïa buka pāpa’ira’a mo’a mai te Bibilia te huru. Teie te hō’ē pāpa’a parau nō te mau ’ohipa a te Atua i te mau ta’ata nō te ’anotau tahito i te fenua Amerika, ’e tei roto ho’i i te reira te ’īra’a nō te ’evanelia mure ’ore.

’Ua pāpa’ihia teie buka e te mau peropheta e rave rahi nō te ’anotau tahito nā roto i te vārua nō te tohu ’e te heheura’a. ’Ua fa’ahitihia ’e ’ua ha’apotohia tā rātou mau parau ’o tei pāpa’ihia i ni’a i te mau ’api ’auro e te peropheta pāpa’i ’ā’amu ra i pi’ihia tōna ra i’oa ’o Moromona. Tē fa’a’ite ra teie pāpa’a parau i te ’ā’amu nō nā pupu ta’ata rahi e piti. ’Ua haere mai te hō’ē nā Ierusalema mai i te matahiti 600 H.M. ’E i muri iho ’ua fa’ata’ahia taua pupu ra i roto e piti nūna’a, ’o tei parauhia te mau ’āti Nephi ’e te mau ’āti Lamana. ’Ua haere mai te tahi atu nā mua roa i te taime te Fatu i fa’ahuru ’ē ai i te mau reo i te Patu nō Babela. ’Ua parauhia teie pupu te mau ’āti Iareda. E rave rahi tauatini matahiti i muri iho, ’ua ha’amouhia teie mau pupu ato’a maori rā te mau ’āti Lamana, ’e ’o rātou ïa te tahi o te mau tupuna nō te mau Inidia Amerika.

Te ’ohipa rahi roa a’e i pāpa’ihia i roto i te Buka a Moromona nō ni’a ïa i tā te Fatu ra ’o Iesu Mesia tāvinira’a i rotopū i te mau ’āti Nephi i muri noa iho i tōna ti’afa’ahoura’a. Tē ha’amāramarama ra te reira i te mau ha’api’ira’a tumu nō te ’evanelia, tē hōhora ra i te ’ōpuara’a nō te fa’aorara’a, ’E tē fa’a’ite ra ho’i i te mau ta’ata i te mau mea e tano ia rātou ’ia rave nō te fāri’i i te hau i roto i teie orara’a ’e i te fa’aorara’a mure ’ore i roto i te ao a muri atu.

I muri iho i tō Moromona fa’aotira’a i tāna mau pāpa’ira’a, ’ua hōro’a atu ’oia i te pāpa’a parau i tāna tamaiti ia Moroni, ’o tei ’āmui atu i te tahi o tāna iho mau parau i te reira, ’e ’ua huna atu ’oia i te mau ’api i roto i te ’Āivi Kumora. I te 21 nō Tetepa 1823, ’ua fā mai taua iho Moroni ra, ’o tei fa’ahanahanahia ’e tei ti’afa’ahou mai, i te peropheta ia Iosepha Semita ’e ’ua ha’api’i mai iāna nō ni’a i te pāpa’a parau tahito ’e te ’īritira’a i te reira i roto i te reo Peretāne.

I te taime au, ’ua hōro’ahia te mau ’api ia Iosepha Semita, ’e ’ua ’īriti ’oia i te reira nā roto i te hōro’a ’e te mana o te Atua. ’Ua nene’ihia teie pāpa’a parau i teienei i roto i te mau reo e rave rahi, ’ei ’ite ’āpī ’e te tahi atu fa’a’itera’a ē e Tamaiti ’o Iesu Mesia nā te Atua ora, ’e ’o rātou pā’āto’a ’o tē haere mai iāna ra ’e ’o tē ha’apa’o i te mau fa’auera’a ’e te mau ’ōro’a nō tāna ’evanelia, e fa’aorahia rātou.

Teie tā te peropheta Iosepha Semita i parau nō ni’a iho i teie pāpa’a parau : « ’Ua parau vau i te mau taea’e ē, ’o te Buka a Moromona te buka tano roa a’e i roto i te mau buka ato’a i ni’a i te fenua nei, ’e ’o te reira te ’ōfa’i tumu nō tā tātou ha’apa’ora’a, ’e e ha’afātata-rahi-hia a’e te hō’ē ta’ata i te Atua nā roto i te ha’apa’ora’a i te mau ha’api’ira’a nō taua buka ra i tō te tahi ’ē atu buka ».

Ta’a ’ē atu ia Iosepha Semita, ’ua mā’iti te Fatu hō’ē ’ahuru ma hō’ē atu ā mau ta’ata nō te hi’o mata atu i te mau ’api ’auro ’e ’ia riro ’ei mau ’ite ta’a ’ē nō te parau mau ’e te huru mo’a o te Buka a Moromona. ’Ua ’āmuihia mai tō rātou mau ’itera’a pāpū i pāpa’ihia, ’e ’ua parauhia te reira, « Te ’itera’a pāpū o nā ’ite to’otoru » ’e « Te ’itera’a pāpū o nā ’ite to’ova’u ».

Tē ani nei mātou i te mau ta’ata ato’a i te mau vāhi ato’a ’ia tai’o i te Buka a Moromona, ’ia feruri hōhonu i roto i tō rātou ’ā’au i te parau poro’i i fa’a’itehia i roto i te reira, ’e i muri iho ’ia ani i te Atua, te Metua mure ’ore, nā roto i te i’oa o te Mesia ē e parau mau ānei teie buka. ’O rātou ’o tē pe’e i teie ’ē’a ’e ’o tē ani nā roto i te fa’aro’o, e fāri’i rātou i te ’itera’a pāpū nō te parau mau ’e te huru mo’a o te reira nā roto i te mana o te Vārua Maita’i. (Hi’o i te Moroni 10:3–5.)

’O rātou ’o tei fāri’i i teie ’itera’a pāpū mo’a nō ’ō mai i te Vārua Mo’a, e ’ite ato’a rātou nā roto i taua mana ra ē, ’o Iesu Mesia te Fa’aora o te ao nei, ’e e heheu parau ’e e peropheta ’o Iosepha Semita nāna i teie mau mahana hope’a nei, ’e ’o Te ’Ēkālesia a Iesu Mesia i te Feiā Mo’a i te mau Mahana Hope’a nei te bāsileia o te Fatu ’o tei fa’ati’a-fa’ahou-hia i ni’a i te fenua nei, nō te fa’aineine i te Tae-Piti-Ra’a mai o te Mesia.