Te Mau Parau a Moromona

1 ’E i teienei, ’ua fātata vau, ’o Moromona, i te tu’u atu i te pāpa’a parau ’o tā’u i pāpa’i i roto i te rima o tā’u ra tamaiti ’o Moroni ; inaha, ’ua ’ite au i te pae rahi o te ha’amoura’ahia o tō’u ra mau ta’ata, te mau ’āti Nephi.

2 E rave rahi hānere matahiti i ma’iri i muri mai i te taera’a mai o te Mesia i teienei, ’e tē hōro’a nei au i teie nei mau pāpa’a parau i roto i te rima o tā’u tamaiti ; ’e ’ua mana’o vau ē, e ’ite ’oia i te ha’amou-roa-ra’a-hia o tō’u mau ta’ata. ’Ia fa’ati’a mai rā te Atua ’ia ora noa ’oia i muri a’e i tō rātou pau, ’ia ti’a iāna ’ia pāpa’i i te tahi mau parau iti nō ni’a ia rātou, ’e te tahi mau parau iti nō ni’a i te Mesia, e penei a’e ’ia tae i te hō’ē mahana e riro te reira ’ei faufa’a nā rātou.

3 ’E i teienei, e parau ri’i atu vau nō ni’a i te mau mea tā’u i pāpa’i ; e fa’aoti a’era vau i te ha’apoto i te mau parau nō roto mai i te mau ’api a Nephi ra, ē tae roa mai i te fa’aterera’a a teie ari’i ’o Beniamina, ’o tā Amaleki i parau, ’ua ’imi ihora vau i roto i te mau pāpa’a parau i tu’uhia mai i roto i tō’u ra rima, ’e ’ua ’itehia mai teie nei mau ’api iā’u, ’e tei roto i te reira teie ’ā’amu iti nō te mau peropheta, mai ia Iakoba ē tae mai i te fa’aterera’a a teie nei ari’i ’o Beniamina, ’e te mau parau e rave rahi a Nephi.

4 ’E ’ua māuruuru vau i te mau mea i ni’a i teie nei mau ’api, nō te mau tohura’a nō te taera’a mai o te Mesia ; ’e ’ua ’ite ho’i tō’u ra mau metua ē, ’ua tupu e rave rahi o tē reira ; ’oia ïa, ’e ’ua ’ite ho’i au ē, ’ua tupu te mau mea ato’a i tohuhia nō mātou ra, ē tae roa mai i teie nei mahana, ’e e tupu ho’i te mau tohu nō te mau mahana i mua nei—

5 Nō reira, e mā’iti au i teie nei mau mea nō te fa’aoti i tā’u pāpa’a parau i ni’a i te reira, e rave au i te toe’a o tā’u pāpa’a parau nō ni’a mai i te mau ’api a Nephi ; ’e ’aita e ti’a iā’u ’ia pāpa’i i te hānerera’a o te tufa’a nō te mau mea nō ni’a i tō’u ra mau ta’ata.

6 Inaha rā, e rave au i teie nei mau ’api tei roto teie nei mau tohura’a ’e teie nei mau heheura’a, ’e e tu’u vau i te reira i roto i te toe’a o tā’u pāpa’a parau, e mea maita’i ho’i te reira iā’u ; ’e ’ua ’ite ho’i au ē, e riro te reira ’ei mea maita’i i tō’u mau taea’e.

7 ’E tē nā reira nei au nō te hō’ē ’ōpuara’a pa’ari ; tē nā reira mai nei ho’i te reo iti ha’iha’i iā’u, mai te au i te mau ’ohipa a te Vārua o te Fatu i roto iā’u. ’E i teienei, ’aita roa vau i ’ite i te mau mea ato’a ; ’ua ’ite rā te Fatu i te mau mea ato’a e tupu a muri atu ; nō reira, tē fa’auru nei ’oia iā’u ’ia rave mai te au i tōna hina’aro.

8 ’E ’o tā’u pure i te Atua, nō tō’u mau taea’e ïa, ’ia ho’i fa’ahou tō rātou ’ite i te Atua ; ’oia ïa, i te fa’aorara’a a te Mesia ; ’ia riro fa’ahou rātou ’ei feiā au-maita’i-hia.

9 ’E i teienei, tē fa’aoti nei au, ’o Moromona, i tā’u pāpa’a parau, ’o tā’u i rave nō ni’a mai i te mau ’api a Nephi ; ’e tē pāpa’i nei au i te reira mai te au i te ’ite ’e te pa’ari tā te Atua i hōro’a mai iā’u nei.

10 Nō reira, i muri a’era i tō Amaleki tu’ura’a atu i teie nei mau ’api i roto i te rima o te ari’i Beniamina, ’ua rave ’oia i te reira ’e ’ua ’āmui ihora i te tahi atu mau ’api, ’e tei roto i te reira te mau pāpa’a parau i hōro’ahia mai e te mau ari’i, mai terā u’i i terā u’i ē tae roa mai i te mau mahana o te ari’i Beniamina.

11 ’E ’ua hōro’ahia mai te reira mai terā u’i i terā u’i, mai te ari’i Beniamina mai ē tae roa mai i roto i tō’u nei rima. ’E tē pure nei au, ’o Moromona, i te Atua ’ia fa’ahereherehia te reira mai teie atu taime. ’E ’ua ’ite au ē, e fa’ahereherehia te reira ; nō te mea ’ua pāpa’ihia te mau mea fa’ahiahia rahi i ni’a iho i te reira, ’e nā roto mai i te reira e ha’avāhia ai tō’u ra mau ta’ata ’e tō rātou mau taea’e i taua mahana rahi ’e te hope’a ra, mai te au i tā te Atua parau i pāpa’ihia ra.

12 ’E i teienei, ’o te parau teie nō taua ari’i ra ’o Beniamina—’ua tupu te tahi mau mārōra’a ri’i i rotopū i tōna iho mau ta’ata.

13 ’E i muri a’era, ’ua haere mai te mau nu’u fa’ehau o te mau ’āti Lamana i raro mai te fenua mai ra nō Nephi, nō te ’aro i tōna mau ta’ata. Inaha rā, ’ua ha’aputuputu mai ra te ari’i Beniamina i tōna mau nu’u fa’ehau, ’e ’ua ’aro atu ’oia ia rātou ; ’e ’ua tama’i atu ’oia ma te pūai o tōna iho rima, ’e ma te ’o’e ho’i a Labana ra.

14 ’E ’ua tama’i atu rātou i tō rātou mau ’enemi nā roto i te pūai o te Fatu, ’e ’ua taparahi rātou e rave rahi tauatini o te mau ’āti Lamana. ’E i muri a’era, ’ua ’aro atu rātou i te mau ’āti Lamana, ē tae noa atu ’ua ti’avaru rātou ia rātou i rāpae i tō rātou mau fenua ’āi’a.

15 ’E i muri a’era, ’ua ti’a mai ra te mau Mesia ha’avare e rave rahi, ’e ’ua tāpirihia a’era tō rātou vaha, ’e ’ua fa’autu’ahia rātou mai te au i tā rātou ra mau hara.

16 ’E i muri iho ’ua ti’a ato’a mai ra te mau peropheta ha’avare, ’e te feiā ha’api’i ha’avare, ’e te mau ’orometua ha’avare, i rotopū i te mau ta’ata, ’e ’ua fa’autu’ahia rātou ato’a mai te au i tā rātou mau hara ; ’e i muri iho ’ua tupu mai ra te mau mārōra’a e rave rahi ’e te mau tāivara’a e rave rahi i te mau ’āti Lamana, inaha, i muri a’era, ’ua fa’ahau te ari’i Beniamina i tō te fenua nā roto i te tauturura’a a te mau peropheta mo’a ’o tē pārahi ra i rotopū i tōna mau ta’ata—

17 Inaha ho’i, e ta’ata mo’a te ari’i Beniamina, ’e ’ua fa’atere ’oia i ni’a i tōna mau ta’ata ma te parauti’a ; ’e tē vai ra ho’i e rave rahi mau ta’ata mo’a i ni’a i te fenua, ’e ’ua parau rātou i te parau a te Atua ma te mana ’e te pūai ho’i ; ’e ’ua a’o ’ū’ana rātou nō te ’ā’au ’eta’eta o te mau ta’ata—

18 Nō reira, nā roto i te tauturura’a a te mau peropheta, ’ua rave te ari’i Beniamina i te ’ohipa ma te pūai ato’a o tōna tino ’e te ’ite ato’a ho’i o tōna vārua, ’e ’ua fa’atupu fa’ahou ’oia i te hau i ni’a i te fenua.