1 ’E i muri a’era, ’ia ma’iri ihora te toru ’ahuru ’e ma maha o te matahiti, ’e ’oia ato’a te toru ’ahuru ’e ma pae, ’e inaha, ’ua fa’ati’a te mau pipi a Iesu i te ’ēkālesia a te Mesia i roto i te mau fenua pā’āto’a ē ’ati noa a’e. ’E ’o rātou e rave rahi ’o tei haere mai ia rātou ma te tātarahapa mau i tā rātou mau hara, ’ua bāpetizohia ïa nā roto i te i’oa o Iesu ; ’e ’ua fāri’i ato’a ho’i rātou i te Vārua Maita’i.

2 ’E i muri a’era, ’ia tae i te toru ’ahuru ’e ma ono o te matahiti, ’ua fa’afāriuhia te mau ta’ata pā’āto’a i ni’a i te fenua i te Fatu, te mau ’āti Nephi ’e te mau ’āti Lamana, ’e ’aita roa te mau mārōra’a ’e te mau tama’ira’a i tupu i rotopū ia rātou, ’e ’ua rave te ta’ata tāta’itahi i te mea ti’a te tahi i te tahi.

3 ’E ’ua ’āmui-tāhō’ē-hia tā rātou mau mea ato’a i rotopū ia rātou ; nō reira ’aita e feiā tao’a ’e te veve, ’aita e feiā tītī ’e te ti’amā, ’āre’a rā ’ua riro rātou pā’āto’a ’ei feiā ti’amā, ’e ’ei feiā ’o tē fāri’i i te hōro’ara’a nō ’ō mai i te ra’i ra.

4 ’E i muri a’era, ’ua ma’iri ato’a ihora te toru ’ahuru ’e ma hitu o te matahiti, ’e tē vai noa ra te hau i ni’a i te fenua.

5 ’E ’ua ravehia te mau ’ohipa rahi ’e te māere e te mau pipi a Iesu, ’e nō reira ho’i ’ua fa’aora rātou i te feiā ma’i, ’ua fa’ati’a mai i te feiā pohe, ’ua fa’aora i te feiā piri’o’i ’ia haere, ’e te feiā matapō ’ia ’ite, ’e te feiā tari’a turi ’ia fa’aro’o ; ’e ’ua rave rātou i te mau huru semeio ato’a i rotopū i te mau tamari’i a te ta’ata nei ; ’e ’aita roa rātou i rave i te hō’ē a’e semeio maori rā ’ua ravehia te reira nā roto i te i’oa o Iesu.

6 ’E ’ua ma’iri ihora te toru ’ahuru ’e ma va’u o te matahiti, ’e mai te reira ato’a te toru ’ahuru ’e ma iva, ’e te maha ’ahuru ’e ma hō’ē, ’e te maha ’ahuru ’e ma piti, ’oia ïa, ’e ’ua ma’iri ato’a ihora te maha ’ahuru ’e ma iva, ’e ’oia ato’a te pae ’ahuru ’e ma hō’ē, ’e te pae ’ahuru ’e ma piti ; ’oia ïa, ē tae noa atu ’ua ma’iri ato’a te pae ’ahuru ’e ma iva o te mau matahiti.

7 ’E ’ua ha’amanuia rahi te Fatu ia rātou i ni’a i te fenua ; ’oia ïa, ’e nō reira ho’i ’ua patu fa’ahou rātou i te mau ’oire i te vāhi nō te mau ’oire i pa’apa’a i te auahi.

8 ’Oia ïa, ’ua patu fa’ahou rātou i taua ’oire rahi ra nō Zarahemela.

9 ’Āre’a rā e rave rahi te mau ’oire i tomo, ’e ’ua haere mai ra te mau pape i ni’a ’e ’ua tāpo’ihia i te reira ; nō reira, ’aita roa i ti’a i teie mau ’oire ’ia fa’a’āpīhia.

10 ’E i teienei, inaha, i muri a’era, ’ua tupu rahi te pūai o te mau ta’ata o Nephi, ’e ’ua tupu ’oi’oi rahi rātou ’e ’ua riro mai ho’i ’ei feiā nehenehe ’e te auhia.

11 ’E tē fa’aipoipohia ra rātou, ’e te hōro’ahia ra ’ia fa’aipoipohia, ’e tē ha’amaita’ihia ra mai te au i te rahi o te mau fafaura’a ’o tā te Fatu i fafau atu ia rātou.

12 ’E ’aita rātou i pe’e atu i te mau ’ohipa ’e te ’ōro’a nō te ture a Mose ; ’āre’a rā ’ua pe’e atu rātou i te mau fa’auera’a tei fāri’ihia e rātou nō ’ō mai i tō rātou Fatu ’e tō rātou Atua, ma te tāmau noa i te ha’apae i te mā’a ’e i te pure, ’e i te ha’aputuputu pinepine nō te pure ’e nō te fa’aro’o i te parau a te Fatu.

13 ’E i muri a’era, ’aita roa te mārōra’a i tupu i rotopū i te mau ta’ata ato’a i ni’a i te fenua ato’a ; ’āre’a rā ’ua ravehia te mau semeio rahi i rotopū i te mau pipi a Iesu.

14 ’E i muri a’era, ’ua ma’iri ihora te hitu ’ahuru ’e ma hō’ē o te matahiti, ’e ’oia ato’a te hitu ’ahuru ’e ma piti o te matahiti ; ’oia ïa, i te pae hope’a, ē tae noa atu ’ua ma’iri te hitu ’ahuru ’e ma iva o te matahiti ; ’oia ïa, ē tae noa atu ’ua ma’iri hō’ē hānere matahiti, ’e ’ua hope roa te mau pipi a Iesu, ’o tāna i mā’iti ra, i te haere atu i te pāradaiso o te Atua, maori rā nā pipi e to’otoru ’o tē pārahi ra ; ’e tē vai ra te tahi atu ā mau pipi i fa’atōro’ahia ’ei mono nō rātou ; ’e e rave rahi ato’a tō taua u’i ra tei pohe.

15 ’E i muri a’era, ’aita te mārōra’a i tupu i ni’a i te fenua, nō te mea ’ua vai te aroha o te Atua i roto i te ’ā’au o te mau ta’ata.

16 ’E ’aita ho’i te nounou i tupu, ’aita te mārōra’a, ’aita te ti’arepu, ’aita te tai’ata, ’aita te ha’avare, ’aita te taparahi ta’ata, ’e ’aita te mau huru ’ohipa hā’iri’iri ato’a ; ’e ’oia mau roa ’aita ho’i e mau ta’ata i ’oa’oa roa atu i rotopū i te mau ta’ata i hāmanihia e te rima o te Atua.

17 ’Aita e feiā ’eiā haru, ’aita e ta’ata taparahi ta’ata, ’aita ato’a e mau ’āti Lamana, ’e ’aita ato’a e mau pupu ta’ata ta’a ’ē ; ’ua riro rā rātou ’ei hō’ē, e mau tamari’i nā te Mesia ; ’e e feiā ’āi’a i te bāsileia o te Atua.

18 ’E e ao ho’i tō rātou ! Nō te mea ’ua ha’amaita’i te Fatu ia rātou i roto i tā rātou mau ’ohipa ato’a ; ’oia ïa, ’ua ha’amaita’ihia ’e ’ua ha’amanuiahia rātou ē tae noa atu ’ua ma’iri hō’ē hānere ’e hō’ē ’ahuru matahiti ; ’e ’ua mou te u’i mātāmua i muri a’e i te Mesia, ’e ’aita e mārōra’a i ni’a te fenua tā’āto’a.

19 ’E i muri a’era, ’ua pohe ihora ’o Nephi, ’o tei pāpa’i i teie nei pāpa’a parau, (e ’ua pāpa’i ’oia i te reira i ni’a i te mau ’api a Nephi ra) ’e ’ua riro ihora tāna tamaiti ra ’o Amosa ’ei mono nōna i te pāpa’ira’a i te reira ; ’e ’ua pāpa’i ato’a ’oia i ni’a i te mau ’api a Nephi ra.

20 ’E ’ua pāpa’i ’oia i te reira e va’u ’ahuru ’e ma maha matahiti, ’e ’ua vai noa te hau i ni’a i te fenua, maori rā te tahi noa pae iti o te mau ta’ata ’o tei tāiva i te ’ēkālesia ’e ’o tei rave i te i’oa o te mau ’āti Lamana i ni’a iho ia rātou ; nō reira ’ua ha’amata fa’ahou te mau ’āti Lamana i te tupu i ni’a i te fenua.

21 ’E i muri a’era, ’ua pohe ato’a ihora ’o Amosa, (hō’ē ïa hānere e iva ’ahuru ’e ma maha matahiti i muri a’e i te taera’a mai o te Mesia) ’e ’ua riro ihora tāna tamaiti ra ’o Amosa ’ei mono nōna i te pāpa’ira’a i te pāpa’a parau ; ’e ’ua pāpa’i ato’a ho’i ’oia i ni’a i te mau ’api a Nephi ra ; ’e ’ua pāpa’ihia ïa i roto i te buka a Nephi, ’oia ho’i teie nei buka.

22 ’E i muri a’era, ’ua ma’iri ihora te piti hānere o te matahiti ; ’e ’ua mou pā’āto’a te piti o te u’i, maori rā te hō’ē pae iti noa.

23 ’E i teienei, tē hina’aro nei au, ’o Moromona, ’ia ’ite ’outou ē, ’ua fānau rahi te mau ta’ata, ’e nō reira ho’i ’ua purara rātou nā ni’a i te fenua tā’āto’a, ’e ’ua riro ho’i rātou ’ei feiā tao’a rahi, nō tō rātou manuia i roto i te Mesia ra.

24 ’E i teienei, ’ia tae a’era i te piti hānere ’e ma hō’ē matahiti, ’ua ha’amata ihora te tahi pae i rotopū ia rātou i te fa’ateiteihia i roto i te te’ote’o, mai te ’ō’omora’a i te mau ’ahu moni rahi, ’e te tāmaura’a i te mau poe nehenehe, ’e te mau mea nehenehe o teie nei ao.

25 ’E mai te reira mai taime ’aita tā rātou mau faufa’a ’e tā rātou mau tao’a i ’āmui-tāhō’ē-hia i rotopū ia rātou.

26 ’E ’ua ha’amata rātou i te fa’ata’a ’ē ia rātou i roto e rave rahi mau huru pupu ; ’e ’ua ha’amata rātou i te patu i te mau ’ēkālesia nā rātou iho ’ia roa’a tā rātou faufa’a, ’e ’ua ha’amata ho’i i te fa’aru’e i te ’ēkālesia mau a te Mesia.

27 ’E i muri a’era, ’ia ma’iri a’era te piti hānere ’e hō’ē ’ahuru matahiti, ’ua tupu mai e rave rahi mau ’ēkālesia i ni’a i te fenua ; ’oia ïa, e rave rahi te mau ’ēkālesia tei parau ē ’ua ’itea ia rātou te Mesia, ’āre’a rā ’ua fa’aru’e rātou i te mau tufa’a rahi nō tāna ’evanelia, ’e nō reira ho’i ’ua fāri’i rātou i te mau huru ’ohipa ’ī’ino ato’a, ’e ’ua hōro’a atu rātou i te mea mo’a i te ta’ata i ’ōpanihia nō tōna ti’amā ’ore.

28 ’E ’ua tupu rahi roa taua ’ēkālesia nei nō te mau ’ohipa ’ī’ino, ’e nō te mana o Sātane tei haru i tō rātou ’ā’au.

29 ’E ’oia ato’a, tē vai fa’ahou ra te tahi ’ēkālesia tei huna i te Mesia ; ’e ’ua hāmani ’ino rātou i tō te ’ēkālesia mau a te Mesia, nō tō rātou ha’eha’a ’e nō tō rātou ti’aturi i te Mesia ; ’e ’ua vahavaha mai ho’i ia rātou nō te mau semeio e rave rahi i ravehia i rotopū ia rātou ra.

30 Nō reira ’ua fa’a’ohipa rātou i te mana ’e te ha’amanara’a i ni’a i te mau pipi a Iesu, ’o tei pārahi i rotopū i tō te ’ēkālesia, ’e ’ua huri atu ia rātou i roto i te fare tāpe’ara’a ; ’āre’a rā nā roto i te mana nō te parau a te Atua tei vai na i roto ia rātou ra, ’ua pararī ihora te fare tāpe’ara’a nā te ’āfara’a, ’e ’ua haere atu ra rātou ma te rave i te mau semeio rahi i rotopū ia rātou.

31 Terā rā, noa atu ā teie mau semeio ato’a i ravehia, ’ua fa’a’eta’eta noa te mau ta’ata i tō rātou ’ā’au, ’e ’ua tītau ’ia taparahi mai ia rātou, mai tā te mau ’āti Iuda i Ierusalema i tītau ’ia taparahi ia Iesu, mai te au i tāna parau.

32 ’E ’ua huri ia rātou i roto i te mau umu auahi, ’e ’ua haere mai rātou i rāpae ’e ’aita roa i fāri’i i te hō’ē pēpē.

33 ’E ’ua huri ato’a ia rātou i roto i te mau ana o te mau ’ānimara ’ōviri, ’e ’ua ha’uti noa ihora rātou i te mau ’ānimara ’ōviri mai te hō’ē tamari’i e ha’uti ra i te fanau’a māmoe ; ’e ’ua haere mai rātou i rāpae mai rotopū mai ia rātou, ’e ’aita roa i fāri’i i te hō’ē pēpē.

34 ’Ua fa’a’eta’eta rā te mau ta’ata i tō rātou ’ā’au, ’e ’ua arata’ihia ho’i rātou e te mau tahu’a ha’avare e rave rahi ’e te mau peropheta ha’avare e rave rahi nō te patu i te mau ’ēkālesia e rave rahi, ’e nō te rave ho’i i te mau huru ’ohipa ’ī’ino ato’a. ’E ’ua tūpa’i mai rātou i te mau ta’ata o Iesu ; ’aita rā te mau ta’ata o Iesu i tūpa’i fa’ahou atu. ’E nō reira ’ua paruparu tō rātou fa’aro’o ’e ’ua rave i te parauti’a ’ore, i terā matahiti ’e i terā matahiti, ē tae roa atu ’ua ma’iri e piti hānere ’e toru ’ahuru matahiti.

35 ’E i teienei, i muri a’era, i teie matahiti, ’oia ïa, i te piti hānere ’e toru ’ahuru ’e ma hō’ē o te matahiti, ’ua tupu te ’āmahamahara’a rahi i rotopū i te mau ta’ata.

36 ’E i muri a’era, i teie matahiti ’ua ’itehia te tahi mau ta’ata ’o tei ma’irihia te i’oa te mau ’āti Nephi, ’e ’ua riro rātou ’ei feiā fa’aro’o mau i te Mesia ; ’e i rotopū ia rātou tē vai ato’a ra te tahi mau ta’ata ’o tei ma’irihia te i’oa te mau ’āti Lamana—te mau ’āti Iakoba, ’e te mau ’āti Iosepha, ’e te mau ’āti Zorama.

37 Nō reira ’ua ma’irihia te i’oa o te feiā ti’aturi mau i te Mesia, ’e tei ha’amori mau i te Mesia, (’e tei rotopū ia rātou nā pipi to’otoru a Iesu ’o tē pārahi ra) ’o te mau ’āti Nephi ïa, ’e te mau ’āti Iakoba, ’e te mau ’āti Iosepha, ’e te mau ’āti Zorama.

38 ’E i muri a’era, ’o rātou ’o tei pāto’i i te ’evanelia ’ua pi’ihia rātou e mau ’āti Lamana, e mau ’āti Lemuela, e mau ’āti Isema’ela ; ’e ’aita tō rātou fa’aro’o i paruparu, ’āre’a rā ’ua pāto’i mau rātou i te ’evanelia a te Mesia ; ’e ’ua ha’api’i rātou i tā rātou mau tamari’i ’eiaha roa e ti’aturi i te reira, mai tō rātou mau metua te huru ’o tei paruparu i te mātāmua roa.

39 ’E ’ua tupu te reira nō te mau ’ohipa ’ī’ino ’e te mau ’ohipa vi’ivi’i a tō rātou mau metua, mai tō te mātāmua roa mai ā. ’E ’ua ha’api’ihia rātou ’ia ’ino’ino atu i te mau tamari’i a te Atua, mai te mau ’āti Lamana i ha’api’ihia ’ia ’ino’ino atu i te mau tamari’i a Nephi mai te mātāmua mai ā.

40 ’E i muri a’era, ’ua ma’iri te piti hānere ’e maha ’ahuru ’e ma maha matahiti, ’e ’o te reira ïa te huru o te mau ’ohipa a taua feiā ra. ’E ’ua tupu te feiā parauti’a ’ore i te rahi, ’e ’ua hau roa atu rātou i te rahi i te mau ta’ata o te Atua.

41 ’E ’ua tāmau noa rātou i te patu i te mau fare purera’a nō rātou iho, ’e ’ua fa’a’una’una i te reira i te mau huru tao’a rahi ato’a. ’E i reira ’ua ma’iri ihora te piti hānere e pae ’ahuru matahiti ’e te piti hānere ’e ono ’ahuru matahiti.

42 ’E i muri a’era, ’ua ha’amata fa’ahou ihora te mau ta’ata parauti’a ’ore o taua feiā ra i te fa’ati’a i te mau tapura’a huna ’e te mau pupu ’ohipa huna a Gadianetona ra.

43 ’E ’ua ha’amata ato’a te mau ta’ata i parauhia te mau ta’ata o Nephi, i te fa’atupu i te te’ote’o i roto i tō rātou ’ā’au, nō tā rātou mau tao’a rahi, ’e ’ua riro rātou ’ei feiā te’ote’o mai tō rātou mau taea’e, mai te mau ’āti Lamana.

44 ’E mai taua tau atu ra ’ua ha’amata te mau pipi i te ’oto nō te mau hara a tō te ao nei.

45 ’E i muri a’era, ’ia ma’iri te toru hānere matahiti, ’ua riro te mau ta’ata o Nephi ’e te mau ’āti Lamana ’ei feiā parauti’a ’ore roa, ’e ’ua riro tō te tahi huru mai tō te tahi.

46 ’E i muri a’era, ’ua purara te feiā ’eiā haru o Gadianetona nā ni’a i te fenua tā’āto’a ; ’e ’aita roa te hō’ē a’e ta’ata parauti’a e vai ra, maori rā te mau pipi a Iesu. ’E ’ua ha’apu’e rahi rātou i te ’auro ’e te ’ārio, ’e ’ua ho’o atu ’e ’ua ho’o mai rātou i roto i te mau huru tapihoora’a ato’a.

47 ’E i muri a’era, ’ia ma’iri te toru hānere ’e pae matahiti, (tē vai noa ra te mau ta’ata i roto i te parauti’a ’ore) ’ua pohe ihora Amosa ; ’e nā tōna taea’e, ’o Amarona, i ha’apa’o i te pāpa’a parau ’ei mono nōna.

48 ’E i muri a’era, ’ia ma’iri te toru hānere ’e piti ’ahuru matahiti, ’ua fa’ahepohia ihora Amarona e te Vārua Maita’i ’ia huna i te mau pāpa’a parau mo’a—’oia ïa, i te mau pāpa’a parau mo’a ato’a i tu’uhia mai mai terā u’i i terā u’i, ’o tei riro ’ei mea mo’a—ē tae noa atu i te toru hānere ’e piti ’ahuru matahiti i muri a’e i te taera’a mai o te Mesia.

49 ’E ’ua huna ’oia i te reira i te Fatu ra, ’ia tae fa’ahou mai te reira i te toe’a o te ’utuāfare o Iakoba, mai te au i te mau parau tohu ’e te mau fafaura’a a te Fatu. ’E ’o te hope’a teie nō te pāpa’a parau tuatāpapa a Amarona.