Te ’itera’a pāpū o nā ’ite to’otoru

’Ia ’ite tō te mau nūna’a ato’a, ’e te mau ’ōpū ato’a, ’e te mau reo ato’a, ’e te mau ta’ata ato’a e taehia e teie nei buka ē : ’Ua ’ite mata mātou, nā roto i te maita’i o te Atua te Metua, ’e o tō tātou Fatu ra ’o Iesu Mesia, i te mau ’api nō reira mai teie nei pāpa’a parau, ’oia te pāpa’a parau nō te mau ta’ata o Nephi, ’e ’oia ato’a nō te mau ’āti Lamana, tō rātou mau taea’e, ’e ’oia ato’a nō te mau ta’ata o Iareda, ’o tei haere mai mai te pare mai ra ’o tei parauhia ra. ’E ’ua ’ite ato’a ho’i mātou ē, ’ua ’īritihia te reira nā roto i te hōro’a ’e te mana o te Atua, nō te mea ’ua fa’a’ite mai tōna reo i te reira ia mātou ; nō reira ’ua ’ite pāpū mātou ē, e parau mau ïa tā teie nei buka. ’E tē fa’a’ite pāpū ato’a nei mātou ē, ’ua ’ite mātou i te mau parau i ’ō’otihia i ni’a iho i te mau ’api ; ’e ’ua fa’a’itehia mai te reira ia mātou e te mana o te Atua, ’e e ’ere i tō te ta’ata nei. ’E tē fa’a’ite atu nei mātou ma te parau mau ē, ’ua pou mai te hō’ē melahi a te Atua nō te ra’i mai, ’e ’ua hōpoi mai ra ’e ’ua tu’u mai ra ho’i ’oia i taua mau ’api ra i mua i tō mātou mata, ’e ’ua hi’o atu ra ’e ’ua ’ite atu ra mātou i te mau ’api, ’e te mau parau i ’ō’otihia i ni’a ihora ; ’e ’ua ’ite ho’i mātou ē, nā roto i te maita’i o te Atua te Metua, ’e o tō tātou Fatu ra ’o Iesu Mesia, i ’ite ai mātou ’e tē fa’a’ite pāpū atu nei ho’i mātou ē, e parau mau ïa teie mau mea. ’E e mea māere roa ho’i ïa ia mātou nei. ’Āre’a rā, ’ua fa’aue mai te reo o te Fatu ia mātou ’ia fa’a’ite pāpū atu mātou i teie nei parau ; nō reira, nō tō mātou hina’aro ’ia ha’apa’o i te mau fa’auera’a a te Atua, tē fa’a’ite pāpū atu nei mātou i tō mātou ’itera’a pāpū nō ni’a i teie mau mea. ’E ’ua ’ite mātou ē, mai te mea e ha’apa’o maita’i mātou i tā te Mesia ra, e mā ïa tō mātou mau ’ahu i te toto o te mau ta’ata ato’a ra, ’e e ti’a atu ho’i i mua i te ha’avāra’a a te Mesia ma te pōra’o ’ore, ’e e pārahi ho’i i pīha’i iho iāna ē a muri noa atu i roto i te mau ra’i. ’E ’ia fa’ahanahanahia te Metua, ’e te Tamaiti, ’e te Vārua Maita’i, ’oia te Atua hō’ē roa ra. ’Āmene.