9 Jenuware

?Olsem Wanem Nao God I Wantem Mi blong Mi Kea long Ol Kriesen blong Hem, mo Hemia I Tekem Bodi blong Mi Tu?

Jenesis 1–2; Moses 2–3; Ebraham 4–5

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, o toktok raon long wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem nao yumi bin toktok raon long hem long las taem? Mo ?Wanem invitesen nao o wanem wok nao oli bin givimaot? ?Wanem nao yumi bin mekem blong tekem aksen, blong muv folem ol invitesen, o ol wok ia we oli bin givimaot olgeta?

• Kea long olgeta we oli stap long nid. ?Wanem nao yumi save talem o mekem blong go luk ol narawan we maet oli stap filim se oli stap olgetawan, o oli filim se oli stap longwe long Papa long Heven?

• Invaetem evriwan blong akseptem gospel. ?Wanem nao sam wei we yumi save helpem ol narawan blong oli filim lav blong Jisas Kraes?

• Joenem ol famli blong taem we i no save finis. ?Wanem aedia nao yumi save serem wetem wanwan long yumi blong helpem ol famli blong yumi blong oli kam strong moa?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; kolosap 25–35 minit

Stap Lan Tugeta

Blong helpem ol yut blong oli tingting long wanem oli save mekem i gud moa blong kea gud long ol kriesen blong God, raetem olgeta heding ia long bod: Krieta, Kriesen, mo Ol Responsabiliti blong Yumi. Askem olgeta blong luklukbak long Jenesis 1–2 mo raetem wanem oli lanem abaot Krieta mo Kriesen. ?Wanem nao yumi stap lanem abaot ol responsabiliti blong yumi? (Luk speseli long Jenesis 1:26–28; 2:15). Ol aedia ia we oli kam afta, oli save helpem ol yut blong oli toktok raon long responsabiliti blong yumi blong kea long ol kriesen blong God.

• ?Olsem wanem yu save helpem olgeta we yu stap tijim blong oli andastanem se bodi blong olgeta i tabu kriesen blong God? Eksampol: yu save askem olgeta wanem nao yumi stap lanem abaot bodi blong yumi aot long 1 Korin 6:19–20; Moses 2:26–27; Ebraham 4:26–27. ?Wanem nao ol toktok olsem, “pikja,” mo “olsem,” oli stap minim? Wok tugeta blong mekem wan lis blong sam samting we yumi save mekem blong kea long bodi blong yumi. (luk long “Helt blong Bodi mo blong Filing,” we i stap long Blong Ol Yut Oli Kam Strong [buklet, 2011], 24–27.)

• Plante taem, ol yang pipol oli fesem ol mesej we i mekem olgeta oli filim se oli no filim sef abaot bodi blong olgeta. Invaetem ol yut blong wajem vidio ia: “God’s Greatest Creation” (ChurchofJesusChrist.org). Askem olgeta blong lukaotem ol mesej we oli stap helpem olgeta blong oli filim glad, o filim blong talem tangkyu from bodi blong olgeta (luk tu long Russell M. Nelson, “Your Body: A Magnificent Gift to Cherish,” New Era, Aug. 2019, 2–7). ?Wanem nao yumi save serem blong helpem wan fren o memba blong famli we i no filim sef abaot bodi blong hem?

• Invaetem ol yut blong oli ridim, saelen nomo, wan o moa long wan long olgeta ves ia, mo oli lukaotem ol niu tingting abaot from wanem God i bin krietem planet wol ia, mo hao nao Hem i wantem yumi blong kea long planet wol ia: Jenesis 1:26–28; 2:15; 1 Nifae 17:36; Doktrin mo Ol Kavenan 49:19–21; 59:15–20; 104:13–18; Moses 2:26–31; 3:15. Askem olgeta blong serem ol tingting blong olgeta abaot wanwan long ol skripja ves ia. Afta, invaetem olgeta blong wok tugeta blong oli mekem wan lis blong ol samting we oli save mekem wanwan, o olsem wan grup, blong oli mekem responsabiliti blong olgeta blong stap kea from planet wol ia (luk long ol aedia long “Ol Sapot Risos”). ?Wanem jenis ia yumi nidim blong mekem insaed long ol tingting mo ol aksen blong yumi blong kea gud moa long planet wol ia?

• Tingting blong invaetem ol memba blong klas o kworom blong kam long miting wetem wan samting we i soem se wol ia i naes, wol ia we God i bin krietem; samting ia i save wan droing, wan foto, o wan poem. Invaetem olgeta blong oli serem wanem we oli karem i kam, mo blong oli serem ol filing we oli gat from ol kriesen ia blong God. Soem vidio ia: “Our Home” (ChurchofJesusChrist.org), mo askem olgeta blong oli lisin blong harem ol samting ia we oli soem wei we God i stap filim abaot wol ia, mo ol samting we i givim insperesen long olgeta blong kea long wol ia.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong mekem folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting blong olgeta, bae i mekem se rilesensip blong olgeta wetem Papa long Heven mo Jisas Kraes bae i kam strong moa.

Ol Sapot Risos

Ol wei we yumi save kea from planet wol ia:

• Planem samfala sid, tri, o wan garen.

• Pikimap doti long komuniti blong yu.

• Oganaesem wan klinap long ples raonabaot long haos blong yu o mekem wan projek blong yusumbak samting.

• Go wokbaot long bus mo tingting hevi long ol samting we yu talem tangkyu from.

• Krietem sam art samting wetem ol samting we, long nomol taem, bae yu sakem olgeta i go, mo serem art ia long wan so blong grup art.

• Faenemaot ol wei we yu save sevem paoa mo wota.

Tij Folem Wei blong Sevya

Givim long ol memba blong klas o kworom sam janis blong oli tijtijim olgeta long ol klas, from se plante taem, bae oli lanem samting moa aot long wanwan long olgeta, mo aot long eksperiens ia blong stap tij.