23 Jenuware

?Olsem Wanem Lod I Stap Helpem Mi blong Mi Moa Fetful blong Givim Seves?

Jenesis 5; Moses 6

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, o toktok raon long wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Plan blong tekem aksen long wanem yufala i tokbaot.

• Laef folem gospel. ?Wanem eksperiens i bin mekem ol testemoni blong yumi oli kam strong moa?

• Kea long olgeta we oli stap long nid. ?Huia i nidim help mo ol prea blong yumi? ?Wanem nao yumi save filim blong mekem blong helpem olgeta?

• Invaetem evriwan blong akseptem gospel. ?Olsem wanem yumi save stap olsem wan laet long ol nara memba blong famli o fren we oli no gat ol semfala bilif olsem yumi?

• Joenem ol famli blong taem we i no save finis. ?Olsem wanem yumi save soem moa lav mo sapot long ol famli blong yumi, mo mekem wan samting we i defren be i gud insaed long ol hom blong yumi?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Taem we Inok i bin kasem koling blong hem blong wok blong Lod, hem i bin filim se hem i no naf from wok ia (luk long Moses 6:31). Be Lod i no jes sendem Inok i go wok; Hem i bin promesem Inok se bae Hem i protektem mo helpem hem (luk long Moses 6:32–34).

Maet bae yu save luksave yu long ol filing ia we Inok i gat, insaed long seves blong yu. Sam seves blong yumi, yumi givim tru long ol koling blong Jos. Long sam nara taem, yumi stap luk nomo wan nid, mo yumi filim Spirit i talem long yumi blong soem lav mo sapot. Be, taem janis i kam, yumi save gat strong paoa long tingting, olsem Inok i bin gat, mo save se bae Lod i helpem yumi taem yumi stap akseptem invitesen blong Hem blong “wokbaot wetem mi” (Moses 6:34).

Taem yu stap rere blong tij abaot help we yumi save kasem long Lod taem yumi stap givim seves long ol narawan, luklukbak long Moses 6 mo tingting long ol eksperiens we yu bin gat taem yu bin stap givim seves long ol narawan. ?Olsem wanem nao Lod i bin helpem yu long ol hadwok blong yu? ?Wanem nao yu hop se ol memba blong klas mo kworom blong yu bae oli lanem aot long ol eksampol blong Inok mo ol narawan? Yu save ridim wan long ol mesej ia we oli kam long Presiden Henry B. Eyring: “Walk with Me” (Liahona, May 2017, 82–85) o “Ol Kavenan Woman we Oli Patna Wetem God” (Liahona, Nov 2019, 70–73).

Yumi save folem eksampol blong Sevya taem yumi stap givim seves olsem pat blong evri dei laef blong yumi.

Stap Lan Tugeta

Blong stap givim seves wetem ol narawan, hem i givim wan janis long yumi, blong stap “wokbaot wetem [God]” mo bambae yumi kasem help blong Hem taem yumi stap wok blong Hem (Moses 6:34). Blong helpem ol memba blong klas o kworom blong stat blong toktok raon long hemia, yu save askem olgeta blong luklukgud insaed long Moses 6:32–39 blong faenem ol wei we Lod i bin stap wetem Inok long seves blong hem. ?Olsem wanem nao Lod i stap helpem yumi taem yumi stap wok blong Hem? Olgeta aedia ia we oli kam afta, oli save helpem yu blong statem wan toktok storian abaot help we i kam long heven we yumi save kasem taem yumi stap givim seves long ol narawan.

• Ol skripja oli fulap wetem ol tijing abaot seves (eksampol, luk long Matiu 25:31–40; Luk 10:25–37; Mosaea 2:17). Tingting blong stap invaetem olgeta we yu stap tijim blong oli serem ol skripja we i bin givim insperesen long olgeta blong givim seves long ol narawan. Yu save askem olgeta, bifo klas, blong oli kam we oli rere blong serem samfala skripja abaot seves, o sam eksampol blong seves. Sapos oli nidim help, leftemap tingting blong olgeta blong lukluk anda long “Seves” insaed long Gaed long Ol Skripja (olskripja.ChurchofJesusChrist.org). ?Wanem insperesen nao yu filim blong go mekem from olgeta samting ia we yu stap ridim?

• Sevya i bin givim seves long ol narawan truaot long seves blong Hem. ?Wanem nao yumi lanem aot long eksampol blong Hem we i save helpem yumi taem yumi stap givim seves, o stap wok blong Hem? Blong ansarem kwestin ia, wanwan memba blong klas o kworom i save ridim wan long olgeta skripja ia we oli kam afta, mo lukaotem wan samting we skripja ia i stap tijim abaot eksampol blong Sevya long saed blong seves: Matiu 14:13–21; Jon 9:1–11, 35–38; 13:4–5, 12–17; 3 Nifae 17:5–9. Invaetem evriwan blong serem wanem we oli bin faenem. Givim taem blong evriwan i tingting long wan we oli save givim seves long hem, mo olsem wanem bambae oli folem eksampol blong Sevya long seves blong olgeta.

• Samtaem, yumi ting se, seves, hem i minim blong mekem wan samting we i bigwan mo i kakae taem. Ating hemia i wan risen from wanem sam long yumi i no givim seves tumas olsem we yumi sapos blong mekem. Maet bae yu poenemaot se, plante taem, Sevya i i stap givim seves long ol pipol we Hem i luk olgeta truaot long wokbaot blong Hem long evri dei laef blong Hem (eksampol, luk long Matiu 12:9–13; Mak 5:21–34; Luk 19:1–10; Jon 4:3–26). Blong helpem ol memba blong klas o kworom blong oli tingting long sam simpol wei we oli save givim seves long ol narawan long evri dei laef blong olgeta, yu save soem wan long olgeta vidio ia: “When Ye Are in the Service—YM” o “When Ye Are in the Service—YW” (ChurchofJesusChrist.org). Askem ol yut blong oli serem ol tingting blong olgeta. ?Wanem smol aksen blong seves yumi luk ol narawan oli stap mekem? ?Wanem insperesen yumi kasem blong go mekem? Invaetem wanwan blong i raetemdaon sam wei blong finisim olgeta toktok ia: “Mi save givim seves long ol narawan taem mi …” mo “Bambae mi askem help blong Lod long ol hadwok blong mi blong givim seves taem mi …” Afta, askem sam long olgeta blong oli serem wanem we oli bin raetem.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting blong olgeta, bae i mekem se rilesensip blong olgeta wetem Papa long Heven mo Jisas Kraes bae i kam strong moa.

Ol Sapot Risos

• “Opportunities to Do Good,” “Teachings of Thomas S. Monson: Rescuing Those in Need” (ol vidio), ChurchofJesusChrist.org

• Bonnie L. Oscarson, “The Needs before Us” (Liahona, Nov. 2017, 25–27)

Tij Folem Wei blong Sevya

Antap long fasin blong stap helpem olgeta we oli stap lan blong oli filim mo luksave Spirit, helpem olgeta blong tekem aksen folem ol kwaet toktok we oli kasem long Spirit” (Teaching in the Savior’s Way [2016], 10).