13 Febwari

?Olsem Wanem Yumi Save Gohed blong Stap Tru long Sevya Insaed long Wan Wol we I Gat Nogud Fasin?

Jenesis 12–17; Ebraham 1–2

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Hamas moa nao yumi muv i go kolosap moa long Sevya? ?Olsem wanem nao yumi stap traem blong kam moa olsem Hem?

• Kea long olgeta we oli stap long nid. ?Huia nao i bin stap long maen blong yumi long ol las dei we oli jes pas? ?Olsem wanem nao yumi save helpem wanwan long olgeta ia?

• Invaetem evriwan blong akseptem gospel. ?Olsem wanem nao bae yumi ansarem ol kwestin blong ol fren blong yumi abaot Jos long wan wei we i bildimap fet blong olgeta long Sevya?

• Joenem ol famli blong taem we i no save finis. ?Wanem nao samfala wei we yumi toktok o go kolosap moa wetem ol narafala memba blong famli, olsem ol bubu mo ol kasen brata mo sista?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Blong stap laef long wan stret mo gud fasin insaed long wan wol we i gat nogud fasin, i neva bin isi blong mekem. Long Ebraham, fos ia blong tanem baksaed long God i no jes kam long wol aotsaed ia—iven papa blong Ebraham i bin lego Lod (luk long Ebraham 1:5–12; 2:5). Ebraham mo Sara, tufala i bin fesem ol taem we oli bin had, be yet, tufala i bin trastem ol promes blong Lod “[mo hemia i bin winim tingting blong olgeta, mo oli bin akseptem olgeta, mo oli talem tu se oli filim olsem se oli ol strenja long wol ia, mo ples ia i no blong olgeta]” (Hibrus 11:13).

?Olsem wanem bae yu save helpem ol memba blong klas o blong kworom blong oli gohed blong stap fetful taem oli filim se oli “ol strenja” mo wol ia “i no ples blong olgeta” from se oli stap laef folem ol standet blong Lod? ?Olsem wanem yu save givim insperesen long olgeta blong oli gat strong paoa long tingting taem oli stap laef long wan fasin we oli stap tru long Lod? Taem yu stap rere blong tij, tingting blong luklukbak long Jon 15:18–20 mo mesej blong Elda Neil L. Andersen “Overcoming the World” (Liahona, May 2017, 58–62).

Ol disaepol blong Jisas Kraes oli save faenem pis taem oli stap laef wetem fasin blong stap fetful nomata fasin blong agens we i stap.

Stap Lan Tugeta

Maet ol memba blong klas o kworom blong yu oli kasem insperesen tru long eksampol blong Ebraham long wik ia taem oli bin stap stadi long Jenesis 12–17 mo Ebraham 1–2. Maet bae yu save invaetem olgeta blong luklukbak long Ebraham 1:1–19 mo serem wanem i givim insperesen long olgeta tru long eksampol blong Ebraham. ?Wanem semmak samting yumi luk bitwin ol jalenj we Ebraham i bin fesem mo ol jalenj we yumi stap fesem tedei? Jusum wan o moa long wan long ol aktiviti ia we oli stap andanit blong leftemap tingting blong olgeta blong toktok raon abaot wei we yumi save gohed blong stap fetful long Jisas Kraes long evri kaen situesen.

• Lod mo ol profet blong Hem, plante taem, oli bin askem strong long olgeta we oli bin stap tijim olgeta blong oli stap laef long wan fetful fasin nomata fasin nogud we i stap raon long olgeta. ?Wanem nao sam wei we Setan i stap temtem ol yang pipol blong oli brekem ol komanmen blong God long taem blong yumi tedei? Olgeta we yu stap tijim oli save ridim sam long ol skripja we oli stap long “Ol Sapot Risos.” Invaetem olgeta blong toktok raon long wanem we oli bin lanem abaot fasin blong stap gohed blong stap tru long Kraes taem we wol ia i stap temtem yumi blong mekem defren samting, o i stap jikim yumi. Oli save serem ol wei we oli bin faenem blong stap fetful long laef taem we ol narawan oli no stap fetful. ?Wetaem nao yumi, o ol narawan we yumi bin save olgeta, oli bin save mekem hemia? Yu save soem tu wan o moa long wan long ol vidio we i stap long “Sam Moa Risos.”

• Blong helpem klas o kworom blong yu blong andastanem wei blong winim wol ia mo kasem ol blesing we oli kam taem yumi mekem olsem, raetem long bod: Blong winim wol, hem i blong … mo Blong winim wol, risal blong hem i … Afta, yu save askem ol yut blong luklukbak long mesej blong Elda Neil L. Andersen, we taetol blong hem i “Overcoming the World.” Invaetem olgeta blong oli faenem sam wei blong finisim ol sentens ia, mo oli raetem wanem we oli bin lanem long bod. Toktok raon long wanem oli faenem. Invaetem wan, bifo klas, blong hem i kam we hem i rere blong serem wan stori we i soem olsem wanem Jisas Kraes i bin gohed blong stap tru long Papa blong Hem, nomata fasin blong agens we i bin stap (eksampol, luk long Matiu 4:1–11; Luk 22:39–44). ?Olsem wanem nao eksampol blong Sevya i helpem yumi blong andastanem abaot fasin blong stap winim wol ia? (luk long Jon 16:33).

• Ol disaepol blong Jisas Kraes oli stap “insaed long wol ia, be oli no blong wol ia.” Blong “stap insaed long wol ia” i save minim se yumi fesem samting we i kam agensem yumi taem yumi stap laef folem mak blong ol standet blong yumi. Be tu, hem i minim se yumi save lidim tingting blong ol narawan blong oli mekem gud samting. Blong stap tijim prinsipol ia, yu save askem wan blong i kam long klas we hem i rere blong serem wan, o moa long wan stori we i stap long mesej blong Presiden Bonnie H. Cordon, we taetol blong hem i “Blong Oli Save Luk” (Liahona Mei 2020, 78–80). ?Wanem nao yumi lanem aot long ol ol stori ia abaot fasin blong yusum laet blong yumi blong helpem ol narawan blong oli kam kolosap moa long Jisas Kraes? Invaetem klas o kworom blong luklukgud insaed long mesej blong Presiden Cordon blong kasem ol sentens we oli givim insperesen long olgeta blong oli stap wan laet long ol narawan long wan wol we i gat fasin nogud. Invaetem olgeta blong ridim ol sentens blong olgeta laod, mo blong oli serem wanem nao oli kasem insperesen blong go mekem.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting blong olgeta, bae i mekem se rilesensip blong olgeta wetem Papa long Heven mo Jisas Kraes bae i kam strong moa.

Ol Sapot Risos

• Matiu 5:14–16; 1 Nifae 15:23–25; Hileman 5:12; Doktrin mo Ol Kavenan 10:5; 27:15–18; 87:8 (Olsem wanem blong gohed blong stap tru long Jisas Kraes insaed long wan wol we i gat fasin nogud)

• “Stand Ye in Holy Places—Bloom Where You’re Planted,” “195 Dresses,” “Guided Safely Home” (ol vidio), ChurchofJesusChrist.org

Tij Folem Wei blong Sevya

Sevya i bin invaetem Pita blong i testifae taem Hem i askem Pita: “?Be yufala, yufala i stap tokbaot mi, se mi hu?” (Matiu 16:15). Taem we Pita i ansa, testemoni blong hem i bin kam strong moa. ?Wanem kwestin nao bambae i invaetem olgeta we yu stap tijim blong oli testifae, blong mekem se Spirit i save mekem testemoni blong olgeta i kam strong moa?