27 Febwari

?From Wanem Mared we I No Save Finis I Impoten?

Jenesis 24–27

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem topik nao bisoprik i bin toktok raon long hem long wod yut kaonsel miting blong yumi? ?Wanem nao bae yumi mekem, olsem wan klas o wan kworom, folem ol toktok storian ia?

• Kea long olgeta we oli stap long nid. ?Olsem wanem nao yumi save openem han long ol pipol long ol wei we i olsem hemia blong Kraes taem se yumi luk se i gat wan nid, mo yumi no save wanem blong talem?

• Invaetem evriwan blong akseptem gospel. ?Wanem nao yumi faenem insaed long gospel blong Jisas Kraes we i tekem glad i kam? ?Olsem wanem nao yumi save serem glad ia wetem ol narawan?

• Joenem ol famli blong taem we i no save finis. ?Wanem nao yumi stap mekem blong faenem nem blong ol bubu blong yumi we oli nidim blong kasem ol odinens blong tempol? ?Wanem nao yumi save mekem blong helpem ol narawan blong oli faenem nem blong ol bubu blong olgeta?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Taem we taem i bin kam blong Aesak i mas mared, Ebraham i bin askem wokman blong hem blong faenem wan waef blong Aesak. Ebraham mo Aesak, tufala i bin wantem blong faenem wan waef blong Aesak; waef ia bae i save mekem mo kipim ol kavenan wetem Lod, mo bae i save tijim ol pikinini blong tufala. Rebeka i bin fetful woman ia we i bin mekem kavenan blong mared ia wetem Aesak. Nomata ol skripja oli talem klia se mared i impoten tumas long God, ol tijing blong God abaot mared, tedei oli fesem jalenj. Be ol profet blong Hem oli bin talemaot finis se, mared, “God nao i odenem” (“Famli: Wan Ofisol Toktok I Go long Wol,” ChurchofJesusChrist.org/study?lang=bis. Hem i impoten blong olgeta ia we yu stap tijim blong oli andastanem ol trutok we oli no save finis abaot mared. Taem oli mekem olsem, bae i mekem olgeta oli rere from, mo bae oli testifae abaot impoten pat ia insaed long plan blong Papa blong yumi long Heven.

?Olsem wanem nao ol yut we yu stap tijim oli filim abaot mared we i no save finis? ?Olsem wanem nao yu save helpem olgeta blong gat tingting ia se from wanem mared we i no save finis i stap long medel blong plan ia blong Papa long Heven? Taem yu stap rere blong tij, yu save luklukbak long mesej blong Elda D. Todd Christofferson: “Why Marriage, Why Family” (Liahona, May 2015, 50–53). Yufala i save luklukbak tu long “Famli: Wan Ofisol Toktok I Go long Wol” (ChurchofJesusChrist.org/study?lang=bis).

Ol mared mo famli we oli no save finis oli stamba blong plan blong Papa long Heven.

Stap Lan Tugeta

Maet ol yut we yu stap tijim olgeta oli bin tingting hevi long hamas mared i impoten taem oli bin stap ridim Jenesis 24–27 long wik ia. Invaetem olgeta blong luklukbak long Jenesis 24. Askem olgeta blong oli serem sam ves we oli soem se mared i bin impoten long ol pipol we oli tokbaot olgeta long japta ia. Invaetem olgeta blong oli tingting se, from wanem mared we i no save finis i stamba long plan blong God. Ol aktiviti daon ia oli save helpem olgeta blong andastanem gud moa hamas mared i impoten.

• Ol memba blong klas o blong kworom blong yu oli save gat janis blong eksplenem from wanem mared i impoten long olgeta. Invaetem olgeta blong traem tingting se oli gat wan fren we i biliv se mared i nomo blong taem tedei, mo i no wan nid. Oli save raetem wan not i go long fren ia blong eksplenem hamas mared i impoten tumas insaed long plan ia blong Papa long Heven. Leftemap tingting blong olgeta blong tekem tu ol trutok we oli faenem insaed long “Famli: Wan Ofisol Toktok I Go long Wol. Mo tu, oli save yusum ol skripja we oli faenem insaed long “Ol Sapot Risos” o insaed long “Mared, Maredem” insaed long Gaed long Ol Skripja. (olskripja.ChurchofJesusChrist.org). Afta, invaetem olgeta blong serem long klas wanem we oli bin raetem.

• Blong stat blong toktok raon abaot hamas mared i impoten, raetem ol toktok ia long bod: ?From wanem mared we i no save finis i impoten? Givim sam minit long ol yut blong oli raetemdaon ansa blong olgeta long kwestin ia. Invaetem olgeta blong serem ol ansa blong olgeta. Oli save faenem sam moa ansa insaed long mesej blong Elda D. Todd Christofferson: “Why Marriage, Why Family” (Liahona, May 2015, 50–53). Mo tu, oli save wajem “Why Is Marriage Sacred to Heavenly Father?” we i kamaot long “Face to Face with Elder and Sister Renlund” (ChurchofJesusChrist.org Invaetem olgeta blong serem testemoni blong olgeta abaot from wanem mared i impoten.

• Taem yumi stap akseptem ol tijing blong God abaot mared mo yumi traehad blong laef folem olgeta tijing ia, yumi kasem plante blesing. Be, samfala pipol—wetem olgeta we oli traem evri samting blong laef folem gospel—oli fesem ol jalenj blong stanemap wan mared we i hapi mo i no save finis. Maet yu save askem ol yut blong tokbaot sam long ol jalenj ia. ?Wanem nao yumi save mekem naoia blong rere from ol kaen jalenj ia? Maet bae yu save invaetem olgeta blong ridim tu seksen blong mesej blong Elda Neil L. Andersen: “Ae blong Fet” (Liahona, Mei 2019, 34–38). Ol memba blong klas o blong kworom blong yu oli save toktok raon long ol eksampol we oli bin luk i hapen insaed long laef blong olgeta, o insaed long histri blong famli blong olgeta abaot ol pipol we oli bin stap fetful blong lukluk long ol jalenj blong olgeta olsem olgeta ia we Elda Andersen i stap tokbaot. ?Olsem wanem nao Sevya i stap helpem evriwan we i stap fesem ol jalenj taem oli stap lukaotem blong kasem ol blesing blong wan mared we i no save finis.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting blong olgeta, bae i mekem se rilesensip blong olgeta wetem Papa long Heven mo Jisas Kraes bae i kam strong moa.

Ol Sapot Risos

• Doktrin mo Ol Kavenan 49:16–17 (Mared i stap help blong mekem stamba tingting blong Kriesen i hapen)

• Doktrin mo Ol Kavenan 131:1–4; 132:15–21 (Wan i nidim blong i kasem mared we i no save finis blong save kam olsem wan god)

• “Renaissance of Marriage,” “How Did Elder and Sister Bednar Meet?” we i kamaot long“Face to Face with Elder and Sister Bednar” (ol vidio), ChurchofJesusChrist.org

Tij Folem Wei blong Sevya

Sevya i bin invaetem olgeta we oli stap folem Hem blong oli tekem aksen wetem fet mo blong laef folem ol trutok we Hem i bin tijim. ?Olsem wanem yu save invaetem olgeta we yu stap tijim blong oli laef folem ol trutok ia we oli stap lanem?