13 Maj

?Olsem Wanem Mi Save Fesem Wanem I Kam Agens Wetem Fet?

Jenesis 37–41

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Long wanem wei nao yumi bin luk han blong God insaed long laef blong yumi?

• Kea long olgeta we oli stap long nid. ?Olsem wanem yumi save sapsapotem wanwan long yumi long ol samting we yumi stap gotru long hem?

• Invaetem evriwan blong akseptem gospel. ?Olsem wanem yumi save yusum teknoloji long wan wei we i gud moa, mo olsem wan tul blong stap serem gospel?

• Joenem ol famli blong taem we i no save finis. ?Wanem nao yumi stap mekem blong helpem ol famli blong yumi blong kam long Kraes?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Olsem wan yangfala man, Josef blong Ijip i bin fesem plante kaen fasin blong agens. Hem i bin fesem raorao wetem famli blong hem, mo ol brata blong hem oli no bin mekem gud hem. Hem i bin fesem temtesen blong brekem loa blong jastiti. Be, oli no bin stap respektem hem from stret mo tru fasin blong hem; oli bin sakem hem long kalabus. Ol memba blong klas o blong kworom blong yu, maet oli fesem ol semmak tes mo plante moa bakegen. Taem yu stap stadi long ol eksperiens we oli stap long Jenesis 37–41, tingting long olgeta we yu stap tijim olgeta. Tingting hevi long wanem bigfala lesen nao laef blong Josef bae i givim long olgeta (luk tu long Ita 12:27; Henry B. Eyring, “Traem, Traem, Traem”,” Liahona, Nov 2018, 90–93). Stori blong Josef i save givim insperesen long ol memba blong klas o blong kworom blong yu blong askem: “?Olsem wanem mi save fesem ol samting we oli kam agensem mi wetem fet, mo olsem wanem bae God i helpem mi?”

Taem yumi stap lukluk nomo blong gat fet long Jisas Kraes, bambae yumi save faenem paoa taem yumi fesem ol samting we oli kam agensem yumi.

Stap Lan Tugeta

Tingting blong askem ol memba blong klas o blong kworom blong mekem lis long bod, blong samfala samting we oli bin hapen long laef blong Josef blong Ijip, olsem we oli tokbaot insaed long Jenesis 37 mo 39–41. Soem sam pikja, olsem olgeta we oli stap long Kam Folem Mi—Blong Wanwan Man, Woman mo Famli. Hemia i save helpem olgeta blong oli tingbaot ol taem ia. ?Olsem wanem nao ol tes blong Josef oli semmak long ol jalenj we ol yang pipol oli stap fesem tedei? Sapos Josef i laef i stap naoia, ?wanem kaonsel nao hem i save givim long yumi abaot fasin blong fesem wanem we i save kam agensem yumi? ?Wanem bae hem i save talem abaot wei we, rilesensip blong hem wetem Lod i bin helpem hem? Yusum ol aktiviti olsem olgeta we oli kam afta blong helpem ol yut blong oli tingting abaot wei we bae oli fesem ol jalenj blong olgeta wetem fet long Jisas Kraes.

• Blong stap stadi long wei we Sevya i fesem wanem i kam agens i save helpem yumi blong fesem ol samting we oli kam agens wetem fet. Maet ol yut oli save givim sam eksampol blong ol samting we oli kam agensem Sevya, mo luklukbak long hemia tugeta (luk long “Ol Sapot Risos” blong gat sam aedia). ?Wanem nao i tajem yumi abaot wei we Sevya i bin fesem ol taem blong Hem we samting i bin kam agensem Hem? ?Olsem wanem nao yumi save folem eksampol blong Hem taem yumi stap fesem samting we i kam agensem yumi bakegen?

• Samtaem, hem i isi moa blong fesem wanem i kam agens taem yumi traem blong luk hemia long lukluk blong Lod. Blong helpem olgeta we yu stap tijim oli andastanem hemia, askem olgeta blong faenem ol eksampol blong wanem samting defren bae lukluk ia i save givim; mekem hemia taem yufala i luklukbak long “The Eternal Perspective of the Gospel” (Liahona, May 2015, 117–19). Invaetem olgeta blong serem wanem we oli bin faenem. ?Wanem nao ol eksampol ia oli stap talem abaot wei we yumi save luk mo fesem ol samting we oli stap kam agensem yumi? Sapos Sevya i save toktok i kam long yumi long saed blong ol jalenj blong yumi, ?yu ting se bae Hem i talem wanem long yumi? Blong help blong givim ansa long kwestin ia, ol yut oli save luklukbak long ol skripja ia we oli stap long “Ol Sapot Risos.”

• Tingting blong askem ol yut blong oli serem wan eksampol blong wan (maet wan bubu) we i bin givim insperesen long olgeta from wei we hem i bin fesem wan tes we i bin had. O, maet bae yu save serem ol eksampol we oli gat insperesen, abaot ol pipol we yu save olgeta. Ol mesej blong Jeneral Konfrens, plante taem oli tekem ol stori blong ol pipol we oli bin fesem samting we i kam agensem olgeta, wetem fet (luk long samfala eksampol long “Ol Sapot Risos”). Tingting long wanem yu save serem aot long ol mesej olsem, we maet bae oli gat mining long olgeta ia we yu stap tijim olgeta. Taem yufala i stap toktok raon tugeta long ol eksampol ia, givim tingting se ol memba blong klas o blong kworom oli sapos blong lukluk nomo long hao fet long Jisas Kraes i bin helpem ol pipol long ol taem we ol samting oli bin kam agensem olgeta. Yu save serem tu lis blong ol risos blong Bisop W. Christopher Waddell, we Lod i bin givim blong helpem yumi wetem ol jalenj blong yumi; lis ia i stap kolosap long en blong mesej ia blong hem: “Turn to the Lord” (Liahona, Nov. 2017, 94–96).

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes bae i kam strong moa.

Ol Sapot Risos

• Matiu 4:1–11 (Sevya i bin gat fet long taem we ol samting oli kam agensem Hem)

• Matiu 14:10–21; Luk 23:33–34; Jon 19:25–27 (Sevya i bin givim seves long ol narawan long taem we Hem i bin fesem fasin blong stap agens)

• Matiu 27:45–46; Luk 23:44–46 (Sevya i bin filim se Hem i bin stap Hemwan long taem we ol samting oli bin kam agensem Hem, be Hem i bin trastem God)

• Matiu 5:38–45; Mosaea 24:8–15; Doktrin mo Ol Kavenan 121:1–8; 122:5–9 (Ol tijing blong Sevya abaot fasin blong fesem wanem we i kam agensem yu)

• Neil L. Andersen, “We I Karem Kil,” Liahona, Nov 2018, 83–86

• L. Todd Budge “Wan Tras we I Semmak Oltaem mo I Wantem Gohed,” Liahona, Nov 2019, 47–49.

• Jean B. Bingham, “That Your Joy Might Be Full,” Liahona, Nov. 2017, 85–87

Tij Folem Wei blong Sevya

“Taem yu rere, yu mas save andastanem ol pipol ia we yu stap tijim olgeta blong hemia i gaedem ol plan blong yu” (Teaching in the Savior’s Way, 7). Eksampol: wetem prea, mekem plan blong ol aktiviti we oli yusum ol skripja mo ol nara risos we oli save help wetem ol jalenj we ol memba blong klas o kworom oli fesem.