27 Maj

?Huia Mi, mo Wanem Kaen Man o Woman Nao God I Wantem Mi blong Kam?

Eksodas 1–6

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Olsem wanem nao yumi stap gat glad taem yumi biaen long Jisas Kraes?

• Kea long olgeta we oli stap long nid. ?Huia long wod o long komuniti blong yumi i nidim help blong yumi? ?Olsem wanem nao yumi save helpem olgeta?

• Invaetem evriwan blong akseptem gospel. ?Olsem wanem yumi save helpem wanwan long yumi blong rere from misinari seves?

• Joenem ol famli blong taem we i no save finis. ?Olsem wanem nao yumi save tekpat long ol hadwok blong wod blong mekem wok blong famli histri mo tempol?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Wan smol bus tri we faea i laet long hem be i no bon, maet bae i wan sapraes samting blong luk, mo i bin pulum tingting blong Moses. Be wanem we i bin hapen afta, i moa bigwan. God i bin toktok long Moses, mo Moses i bin lan blong luk hemwan olsem we God i bin stap luk hem. Wetem kaen lukluk ia, Moses i bin mekem wan samting i hapen wetem help blong Lod; samting ia, hem i ting se bae i no posibol blong hem i mekem: hem i fesem King blong Ijip mo i bin sevem ol pipol blong God.

Yumi evriwan i nidim ol eksperiens we bae oli helpem yumi blong riplesem ol tu tingting we yumi gat abaot yumi wetem haremsave we God i gat abaot huia yumi mo wanem kaen man o woman yumi save kam. Ol yang pipol, speseli, oli stap fesem ol giaman mesej abaot hamas oli impoten. Mo semmak wetem Moses, God i “bin gat wan wok blong [oli] mekem” (Stamba Toktok blong Aronik Prishud Kworom). Oli gat ol king blong olgeta blong fesem, mo ol pipol blong olgeta blong sevem. ?Olsem wanem bae yu helpem olgeta blong tingbaot se oli ol gel mo boe blong papa mo mama long heven, we tufala i lavem olgeta, mo oli gat “wan tabu fasin mo wan fiuja we i no save finis”? Stamba Toktok blong Ol Yang Woman Tingting hevi long hemia taem yu stap ridim Eksodas 1–6. Tingting blong stadi long Doktrin mo Ol Kavenan 18:10–15 mo mesej blong Presiden Dieter F. Uchtdorf “Yu Minim Wan Samting long Hem” (Jeneral Konfrens, Nov 2011, ChurchofJesusChrist.org/study/general-conference?lang=bis).

Laef blong yumi i save jenis taem we yumi andastanem tru aedentiti blong yumi olsem ol pikinini blong God.

Stap Lan Tugeta

Mebi ol memba blong klas o kworom blong yu oli bin gat janis blong ridim Eksodas 1–6 long wik ia. Blong pusum olgeta blong oli serem wanem we oli bin lanem, yu save askem olgeta olsem wanem Moses i bin filim abaot koling blong hem blong sevem ol pikinini blong Isrel (luk long Eksodas 3:11). ?Wanem trutok nao Lod i bin tijim Moses blong help blong jenisim lukluk blong hem? (Luk long Eksodas 3:4–15; 4:10–17; luk tu long Moses 1:3–11). ?Olsem wanem ol trutok ia oli bin helpem Moses? ?Olsem wanem oli save helpem yumi? Yusum wan aktiviti olsem wan long olgeta ia blong helpem ol memba blong klas o kworom blong faenemaot wanem God i bin talemaot abaot tru aedentiti blong olgeta, hamas oli impoten, mo hamas moa oli save kasem.

• Presiden Dieter F. Uchtdorf i talem: “Be Lod i yusum wan skel we i defren long skel we wol i yusum blong skelem praes blong wan sol” (“Yu Minim Wan Samting long Hem,” Jeneral Konfrens, Novemba 2011, ChurchofJesusChrist.org/study/general-conference?lang=bis ). Blong toktok raon long aedia ia, yu save raetem long bod: ?Olsem wanem wol ia i soem wan man o woman we hem i impoten? Invaetem olgeta we yu stap tijim blong oli givim sam ansa. Sapos yumi stap jajem hamas yumi impoten long wei ia, ?bae olsem wanem nao ol filing ia i jenisim ol joes blong yumi? Afta, yu save raetem long bod: ?Olsem wanem God i soem wan man o woman se hem i impoten? Taem ol yut oli stap serem ol ansa, leftemap tingting blong olgeta blong ridim Jon 3:16; Doktrin mo Ol Kavenan 18:10–15; Luk 15:3–6, 11–32. Mo tu, oli save ridim tu sam las seksen blong mesej blong Presiden Uchtdorf. Sapos yumi stap jajem hamas yumi impoten long wei ia, ?bae olsem wanem nao ol filing ia i jenisim ol joes blong yumi?

• Ol kaenkaen nem oli jenisim hao yumi stap filim abaot, mo haos yumi stap tritim yumiwan bakegen mo ol narawan. Blong helpem ol memba blong klas o blong kworom blong oli tingting olsem wanem nao oli stap singsingaotem olgeta wetem ol defren kaenkaen nem, maet bae yu givim wan nem tag we i no gat nem long hem long wanwan long olgeta. Long wanwan tag ia, i save gat ol toktok ia: “Halo, Mi mi …” we oli raetem antap long hem. Invaetem olgeta blong tingting long ol defren toktok o sentens we oli save raetem long nem tag blong olgeta. Sapos Papa long Heven bae i fulumap spes ia long ol nem tag blong yumi, ?wanem nao bae Hem i raetem? ?Wanem nao bae Hem i raetem sapos oli raetem ol toktok ia long ol tag ia: “Halo, mi save kam …”? Ol memba blong klas o blong kworom oli save tingting hevi long ol kwestin ia taem oli stap ridim sam long olgeta skripja ia: 1 Jon 3:1–3; Moronae 10:32–33; Doktrin mo Ol Kavenan 76:69–70; 84:37–38.

• Ol mesej blong Jeneral Konfrens we oli stap long “Ol Sapot Risos,” insaed i gat ol eksampol blong ol pipol we laef blong olgeta i bin jenis from se oli bin lanem tru aedentiti blong olgeta olsem ol pikinini blong God. Tingting blong givim long wanwan memba blong klas o blong kworom, wan long ol eksampol ia blong tingting hevi long hem mo serem wetem grup. Maet bae yu wantem tokabaot olsem wanem, we, save ia, se yumi evriwan i ol pikinini blong God, i jenisim laef blong yu. Invaetem ol memba blong klas o blong kworom blong mekem sem samting.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Joy D. Jones, “Value beyond Measure,” Liahona, Nov. 2017, 13–15

• Brian K. Taylor, “?Mi mi Mi Pikinini blong God o no?” Liahona, Mei 2018, 12–14

• “Our True Identity,” “How Can I See Myself as God Does?” we i kam long “Face to Face with Elder Rasband, Sister Oscarson, and Brother Owen” (ol vidio), ChurchofJesusChrist.org

• “All About Me” i wan eksperiens we yu save faenem long FamilySearch.org/discovery

Tij Folem Wei blong Sevya

“Sapos ol yut oli filim se yu trastem olgeta, bae tras blong olgeta long tabu paoa ia we oli save kasem bae i gro, mo bambae oli mekem sapraes long yu wetem wanem oli save mekem” (Teaching in the Savior’s Way, 28).