10 Epril

?Olsem Wanem Mi Save Mekem Bilif blong Mi long Jisas Kraes I Kam Strong Moa Evri Dei?

Eksodas 14–17

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, antap long we yufala i kaonsel tugeta abaot ol stret nid blong klas o blong bisnis blong kworom, ating yu wantem blong toktok raon long ol filing mo ol stamba toktok we oli kam long jeneral konfrens. Ol kwestin ia bae i save help:

• ?Wanem stamba tingting o mesej we i kamaot klia long yumi? ?Wanem i mekem bilif blong yumi long Jisas Kraes i kam strong moa?

• ?Wanem nao yumi save mekem blong mekem ol testemoni blong yumi abaot profet we oli stap laef oli kam strong moa? ?Wanem nao yu filim se Spirit i talem long yu blong go mekem from olgeta samting ia we yu bin lanem, o bin filim?

• ?Wanem nao yumi nidim blong mekem, olsem wan klas o kworom blong tingbaot mo tekem aksen folem kaonsel we yumi bin harem long jeneral konfrens?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Blong save laef long draeples, ol pikinini blong Isrel oli bin nidim blong lanem olsem wanem blong dipen long Lod. Oli bin dipen long Hem blong Hem i mekem ol merikel we i sevem laef, olsem blong openem Red Si, mo tu, ol merikel blong mekem man i no save ded, olsem blong sendem mana long heven i kam daon. I tru i semmak blong olgeta ia we yu stap tijim. Sapos oli mas laef tru long wokbaot blong olgeta long saed blong spirit insaed long waelples ia we i wol ia, oli mas praktisim bilif ia we oli gat long Jisas Kraes. Mo oli mas praktisim bilif ia tu evri dei, i no jes wanwan taem. Sam long olgeta we yu stap tijim bae i no filim se bilif blong olgeta i strong tumas. Yu save helpem olgeta blong luk se bilif i gro sloslo, dei afta dei. Oli fidim bilif ia tru long ol smol mo simpol samting we yumi mekem evri taem. Tingting hevi long olgeta samting ia taem yu stap stadi long Eksodas 14–17 long wik ia. Maet bae yu wantem stadi tu long mesej blong Dallin H. Oaks, “Ol Smol mo Simpol Samting,” (Liahona, Mei 2018, 89–92).

Yumi save mekem bilif blong yumi i kam strong moa evri dei tru long ol smol mo simpol wei.

Stap Lan Tugeta

Blong statem storian, yu save askem ol yut blong serem sam long ol evri dei fasin blong olgeta, we i stap helpem olgeta blong mekem ol gud samting. Ol samting ia, maet i gat fasin blong holemtaet wan gud helt, o mekem testemoni blong olgeta i kam strong moa. ?Wanem bae i save hapen sapos yumi no stap gohed blong holemtaet ol evri dei fasin ia? ?Olsem wanem nao, ol evri dei hadwok blong yu blong mekem ol gud samting, bae yu save komperem wetem ol instraksen we Lod i stap givim long Laen blong Isrel blong oli pikimap mana? (luk long Eksodas 16:16–21). Yu save helpem klas o kworom blong oli komperem eksperiens blong Laen blong Isrel wetem ol hadwok blong yumi blong mekem bilif blong yumi long Jisas Kraes i kam strong moa evri dei. Eksampol: ?Wanem nao Lod i givim long yumi we i olsem mana ia we Hem i bin givim evri dei long Ol Laen blong Isrel? ?Wanem nao bae yumi save mekem, we i olsem blong pikimap mana? Blong gohed blong toktok raon long hemia, yu save yusum wan o moa long wan long ol aktiviti andanit ia, o wan aktiviti blong yuwan.

• Tugeta, ridim Alma 37:6–7. Olsem wan klas o wan kworom, mekem wan lis long bod blong ol “smol mo simpol samting” we Lod i stap invaetem yumi blong mekem evri dei blong yumi go long Hem. Afta, olgeta we yu stap tijim olgeta oli save luklukbak long mesej blong Presiden Dallin H. Oaks: “Ol Smol mo Simpol Samting” blong faenem ol smol samting we oli save jenisim bigwan laef blong yumi. ?Wanem jenis nao ol samting ia oli save mekem? ?Wanem nao yumi gat insperesen blong mekem, blong mekem se ol samting ia oli kam pat moa blong evri dei laef blong yumi?

• ?From wanem bilif long Jisas Kraes i wan samting blong mas fidim evri dei? Blong helpem ol memba blong andastanem moa hemia, yu save soem wan, o moa long wan long ol vidio ia we oli stap long lis anda long “Ol Sapot Risos.” Long ol vidio ia, Elda D. Todd Christofferson i stap tij abaot nid ia blong hadwok evri dei blong sapotem bilif blong yumi. Invaetem olgeta ia we yu stap tijim blong oli serem ol samting we oli bin lanem, we i givim insperesen long olgeta blong oli kam antap long bilif blong olgeta long Jisas Kraes evri dei.

• Hadwok we i hapen evri dei, i bes wei blong mekem bilif blong yumi long Kraes i kam strong moa. Blong toktok raon long aedia ia, Elda David A. Bednar i givim wan nambatri tingting long mesej ia blong hem: “More Diligent and Concerned at Home” (Liahona, Nov. 2009, 17–20). ?Wanem lesen nao yumi lanem aot long wei we hem i tokbaot peinting we i stap long ofis blong hem? ?Olsem wanem nao ol lesen ia oli go wetem ol hadwok blong yumi blong bildimap bilif blong yumi long Jisas Kraes? Sapos yufala i ridim Alma 32:21, 26–43 tugeta, bae i save tekem sam niu tingting i kam long toktok storian blong yufala. ?Wanem niu tingting nao yumi faenem abaot wei blong mekem bilif blong yumi long Jisas Kraes i kam strong moa?

• Yumi save mekem bilif blong yumi i kam antap moa taem yumi jusum blong lanem samting aot long ol eksperiens we oli testem bilif ia. Maet bae yu wantem soem vidio ia: “Spiritual Whirlwinds” (ChurchofJesusChrist.org). Tugeta, toktok raon long wanem we yumi save mekem long taem blong wan tes blong mekem se bilif blong yumi i kam strong moa. (Luk tu long Neil L. Andersen, “Spiritual Whirlwinds,” Liahona, May 2014, 18–21.) Tingting blong askem ol memba blong klas o blong kworom blong oli serem ol taem we oli bin filim se bilif blong olgeta long Kraes i bin stap long tes, mo wanem nao oli bin mekem blong mekem bilif blong olgeta i kam strong moa long tetaem ia. Poenemaot se Eksodas 14–17 i tokbaot we Laen blong Isrel oli bin komplen plante taem long taem ia we oli bin fesem ol tes. ?Olsem wanem nao, komplen long taem blong ol tes i save mekem bilif blong yumi i nomo strong i stap? ?Wanem i defren bitwin fasin blong stap komplen mo fasin blong stap talemaot wari blong yumi long Papa long Heven long taem blong ol hadtaem?

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• “Daily Bread: Pattern,” “Daily Bread: Change,” “Daily Bread: Experience” (ol vidio), ChurchofJesusChrist.org

Tij Folem Wei blong Sevya

Helpem ol memba blong klas o blong kworom blong oli andastanem olsem wanem oli save invaetem Spirit blong i stap long ol toktok storian blong olgeta. Oli save mekem hemia tru long “ol fasin blong olgeta, … wei we oli tritim wanwan long olgeta, mo wei we oli filim abaot gospel” (Teaching in the Savior’s Way,15).