24 Epril

?From Wanem God I Givim Ol Komanmen long Yumi?

Eksodas 18–20

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem sam eksperiens we i jes pas we oli tekem yumi i go kolosap moa long Papa long Heven mo Jisas Kraes.

• Kea long olgeta we oli stap long nid. ?I gat wan we i jes muv i kam insaed long wod blong yumi, o i jes joenem Jos? ?Olsem wanem nao yumi helpem olgeta blong filim we oli welkam?

• Invaetem evriwan blong akseptem gospel. ?I gat sam aktiviti we oli stap kam we yumi save invaetem ol fren blong yumi blong kam long hem?

• Joenem ol famli blong taem we i no save finis. ?Wanem wok moa yumi save mekem blong raetem ol histri blong yumiwan?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Sapos yufala i ridim Eksodas 20 bae i save pusum yufala blong tingting long from wanem nao yumi gat ol komanmen. Sam pipol oli luk ol komanmen olsem wan samting we i stopem yumi, o i stap traem blong kontrolem yumi. Be, from se yumi save se God i wan Papa we i gat lav, yumi save trastem se ol loa blong Hem oli blong gud blong yumi, iven sapos yumi no save oltaem ol risen biaen long ol komanmen ia. Hem i bin promesem yumi se yumi save kam blong save se ol komanmen blong Hem oli tru taem yumi laef folem olgeta (luk long Jon 7:17).

Presiden Russell M. Nelson i tijim: “From Papa mo Pikinini, Tufala i lavem yumi wetem wan lav we i no gat en, i stret evriwan, nao Tufala i save se yumi no save luk evri samting we Tufala i stap luk; from hemia, Tufala i givim ol loa we bae oli lidim mo protektem yumi. I gat wan strong koneksen bitwin lav blong God mo ol loa blong Hem” (“The Love and Laws of God” [Brigham Young University devotional, Sept. 17, 2019], 2, speeches.byu.edu).

?From wanem nao yu glad from ol komanmen ia? ?Wanem nao yu wantem ol memba blong klas o blong kworom blong andastanem abaot risen we God i givim ol komanmen long yumi? Yu save rere blong tijim hemia taem yu luklukbak long Eksodas 20 mo mesej blong Presiden Dallin H. Oaks: “Loving Others and Living with Differences” (Liahona, Nov. 2014, 25–28).

Yumi save kam blong save se ol komanmen blong God oli tru taem yumi laef folem olgeta.

Stap Lan Tugeta

Blong helpem memba blong klas o blong kworom blong oli luklukbak long Ol Ten Komanmen, yu save askem olgeta blong mekem wan lis blong ol komanmen ia, olsem we i stap long memori blong olgeta. Sapos oli nidim help, oli save lukluk long Eksodas 20:3–17. ?From wanem nao God i givim ol komanmen long yumi? Blong help blong givim ansa long kwestin ia, ol yut oli save toktok raon long sam long Ol Ten Komanmen ia long ol smol grup. ?Olsem wanem, fasin blong laef folem ol komanmen ia i helpem yumi blong faenem hapines mo i mekem yumi go kolosap moa long God? Olgeta aedia ia we oli kam afta oli save helpem olgeta we yu stap tijim blong oli lanem moa abaot risen from wanem God i givim yumi ol komanmen.

• Ol skripja oli gat ansa blong kwestin ia: “From wanem God i givim ol komanmen long yumi? Yu save invaetem ol memba blong klas o blong kworom blong lukaotem ol ansa long wan, o moa long wan long ol skripja we oli stap insaed long “Ol Sapot Risos.” Afta, askem olgeta blong serem wan samting we oli faenem. Mo tu, oli save wajem olgeta vidio ia mo faenem sam niu tingting: “Instructions Included,” “Why Does God Give Us Commandments?” (ChurchofJesusChrist.org

• Blong helpem memba blong klas o blong kworom blong andastanem from wanem God i givim ol komanmen, yu save komperem fasin blong gat ol komanmen blong God wetem ol eksperiens we oli bin gat. Olsem: yu save askem olgeta blong traem pikjarem long maen se oli se oli ron long hos folem wan rod long wan bigfala hil, kolosap wan stip klif, mo i gat wan fanis long saed blong rod. Askem olgeta blong toktok raon wetem wan narawan abaot ol kwestin olsem: ?Long wanem wei nao ol komanmen blong God oli olsem fanis ia? ?Olsem wanem nao blong stap obei ol komanmen i blesem laef blong yumi? ?Wanem samting moa yumi save komperem se i save helpem yumi andastanem from wanem God i givim ol komanmen long yumi, mo from wanem nao yumi mas obei olgeta? Blong gat sam eksampol, yu save invaetem olgeta blong luklukbak long wan long ol mesej, o wan long ol vidio we oli stap long “Ol Sapot Risos.” Askem olgeta blong serem wanem oli faenem taem oli bin komperem ol samting, mo toktok raon long wanem oli bin lanem.

• Toktok storian blong yufala, maet bae i lidim ol memba blong klas o blong kworom blong toktok raon long wei we oli mas tritim olgeta we oli no gat bilif, o olgeta we oli laef folem samfala komanmen nomo. Maet bae yu save invaetem olgeta blong lukaotem sam kaonsel insaed long mesej blong Presiden Dallin H. Oaks: “Loving Others and Living with Differences.” Maet bae yu wantem askem ol kwestin olsem: ?Olsem wanem nao bae yumi tritim olgeta we oli jusum blong laef long wan laef we i defren long hemia blong yumi? ?Olsem wanem yumi save luk gud long ol narawan taem oli mekem ol joes we oli defren long joes blong yumi?

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao taem we, oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Dutronome 10:12–13; Alma 36:30; Doktrin mo Ol Kavenan 1:24–28; 82:8–10; 93:20, 28; 130:18–21 (From wanem God i givim ol komanmen long yumi)

• Jeffrey R. Holland, “We Are All Enlisted” (Liahona, Nov. 2011, 44–47; luk tu long vidio ia: “Stay within the Lines”); Richard G. Scott, “The Atonement Can Secure Your Peace and Happiness” (Liahona, Nov. 2006, 40–42; luk tu long vidio ia: “A Secure Anchor”); Von G. Keetch, “Blessed and Happy Are Those Who Keep the Commandments of God” (Liahona, Nov. 2015, 115–17; luk tu long vidio ia wetem sem taetol)

Tij Folem Wei blong Sevya

“Taem yumi stap traem bes blong laef mo tij moa olsem Sevya, bae yumi no save ronwe long hem, be samtaem, bae yumi foldaon. Yu no slakem tingting blong yu; be, yu letem blong ol mistek mo ol wiknes blong yu oli mekem se yu yu tanem yu i go long Papa long Heven mo long Sevya” (Teaching in the Savior’s Way,14).